وفي الجزء الرابع من رواية بايرة حلتنا دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة مريم أحمد .
الجزء الرابع من رواية بايرة حلتنا
قلت ليها الحقيييني بدورو يسرقو راجلي مني قالت لي أجييي كيفن الكلام دة
قلت ليها عدديل كدي هسي سمعت محاسن قالت لي أمي بتدور تعرسو لي بت أختها قالت لي كر علي شلبوك قبل ما تخلطيهو زاتو قلت ليها هيييي الا الشلب ما معانا وأصبري لي كان ما عرستو أنا وبس يبقى ما أسمي ميامن قالت لي أيي لازم توريها الطفى النور منو قلت ليها أكيد ح أوريها بس كدي خليها تجي بعدين العصر نشوف خلقتا عاملة كيف يمكن ما سمحة قالت لي خلاص أنا جايكي عشان بعدين أمشي معاك قلت ليها سمح تعالي، وبالفعل ربع ساعة بس وجاتني وقعدنا نفكر ح نعمل شنو في بت أختها دي عشان تخلي سليم الخلا قلبي يتيم 
….
العصر كدي لفحنا تيابنا ومشينا بيت محاسن لقينا ضيوفها جوا، والصدمة كانت لمن شفت البت مواليد 2003 لكن تحلف تقول عمرها ما 18 تلدني وتلدكن وحات اللهوالعجب كلاما كلو حنكشة ويااي وبابي ومامي، وسماحة ولون أنضف من ضميري وجسم وعيون أنا زاتي أنبرشت في البت وطبعا صاحبنا راقد ليها رز ومن جات ما سابها بس النهار كلو ينضمو، قلت ليها كر علي شلبو خلاص قالت لي راجل الشلب بتشلب وبجي راجع زي الكلب ما تخافي ح نرجعو
قلت ليها ويين يختيي مع السمحة أم عجن ديشعرها تقعد فيهو وأنا شعري الاضان ما واصلا، عاني وشها تحلفي تقولي مركبين ليهو أستكير شدة ما سمح وانا وشي كلو حبوبلا خليك من دا عاني جسما وعانني أنا ما شايفة كرشتي دي عليك الله دي أنا بنافسا خلاص الجنا ضاع من يدي يا حليلي
قالت لي ما تفقدي الامل قلت ليها بري فقدتو وأنتهى خلاص شلبتو الشافعة وقدرت عليهو، قعدنا نعاين ليهم ونتحسر لمن رجعنا بيتنا، وحاتكم أنا الموية والاكل بقو ينضاقو لي حنضل بعد شفت البت….
اليوم التاني صحيت بدري بصوت محاسن وهي بتصحي فيني، في قلبي قلت الجابها شنو الفقر دي كمان بتدرو تتطير راجلي من يدي، قمتا على حيلي وقلت ليها بي أخر نفس خير في شنو! قالت لي دايراك تمشي مع سليم ولدي عشان تجيبو لي صواني من حريم الحلة سليم براهو ما بيعرف الناس، في الاول كنت ما ماشة لكن من عرفت إني ح أمشي مع سليم طوالي قمتا ناطة من سريري وقلت ليها سمحقالت لي ح يستناك برة جنب الباب غسلي وشك وأمشي معاهو قلت ليها طيب، قمت جري مشيت غسلت وشي وأتسوكتا سريع ولميت شعري وجلبطتا لي مرطب في شلوفتي ومشيت لي حبيييب القلب الهارد فشفاشيلقيتو مستنيني أححيي أنا منو، قال لي السلام عليكم قلت ليهو وعليكم السلام قال لي كيفك الليلة! قلت ليهو ما كنت كويسة لكن هسي بقيت فل الفل وحات أسم الله قال لي شنوو! قلت ليهو ولا شي أرح قدامنا مشوار، مشينا جبنا الصواني وجينا واثناء ما نحنا راجعين كدي وقفت وشهقت شهقه كبيرة وجسمي كلو بقى يرجف، قال لي مالك يا بت! قلت ليهو عل…علي جنووووو قال لي ودا منو كمان! أشرت ليهو بي يدي عاين كدة لاقى ليك خلقة عجيبة غريبة زول وسخان ولابس جلابية وسخانة زيو وشعرو أغزر من شعري وبعاين بنظرة غريبة وما مفهومة قلت ليهو دة مجنون الحلة وشايلا معااي من يشوفني طوالي بسكنيضحك قلت ليهو ما تضحك أنا جا.. وما تميت كلامي كدة علي جنو جا علينا قال لي ميامن البايرة وأداني ليك نظرة بيعرفها براهو أنا هنا خلاص عرفت موضوعي أستحمى وبقيت أرجف زيادة فجاة طلع مطوة من وين الله أعلم بعدين هو مجنون بكون جابها من أي حتة، قال لي الليلة ح أقتلك قلت ليهو لا ما تهبشني وأختانيييقال لي أصبري لي جايك أنا، طوالي فكيت الجرية وهو بقى جاري وراي وأنا شغال أصرخ وأكورك واااااي أميي تعالي ألحقيني وااايقال لي تعالي أنا بس داير العب معاك وأضبحك بالسكين زي الخروفقلت ليهو واااي القتل ما فيهو لعب يا عليي جنوو، سجمي يا ناس الحقونييي داير يقتلنيي وسليم بس بعاين لينا وميت من الضحك وأنا جارية كدة توبي أتشرط وأترمى مني في الارض بقيت جارية بي جلبابي بسقلت ليهو علي جنووو عليك الله خلينيييقال لي لا أنا بس عايز العب معاك وأضبحك بعدين بخليك تمشيقلت ليهو كان ضبحتني تاني ما بقوم لاني بكون ميت وااي دي شنو المصيبة الوقعت فيها دي الحقوونييي يخوااانيوبقينا جارين حكاية نص ساعة وهو ما راضي يخليني أخر حاجة لمن سليم لمن وقف ضحك حتى جا عليهو وشال منو السكين وقال ليهو يلا من هنا وأداهو ليك تحمير كدي بالله خمسة دقائق بس وأختفى من وشنا، أنا هبطت وقعدت في الارض وبقيت أقول، كر عليي، ووووب، سجمييي، وبعليييييي، واااااي كنت ح أموت وانا لسة ما عرستقال لي والله صحي إنتي بايرة همك كلو العرس قلت ليهو أنت أسكت مني ما شفتو كان ساكيني كيف مالك ما جيت من قبيل قال لي ما كنت قادر أوقف ضحك صراحة منظرك وإنتي جارية بضحك شدديد
قلت ليهو أنننننننن ما ظريف نهائي قال لي عارف، شوية وأنتبهت لي منظري وجلبابي القصير اللابساهو، في قلبي قلت الله يجازيك يا علي جنوو خليتني أتعرى قدام الراجلجريت جري جبت توبي أمي لبستو وقعت أبكي، قال لي بسم الله مالك تاني في شنو! قلت ليهو التوب أتشرطقال لي ويعني! قلت ليهو يعني الليلة أمي ح تدقني بالمفراكة وح أسمع وسخ أضنينيقال لي ما عجبني ليك قلت ليهو شيل صوانيك دي براك أنا ماشة بيتنا قال لي أستني، ما أشتغلت بيهو وجريت جرى على بيتنا والشارع كلو بفكر في أمي والدقة الح أكلها……
☆☆☆☆☆☆☆☆☆☆
اشوفكم….
☆يتبــــــــــــــــــــــــــــــــــــــــــــع☆☆
لقراءة الجزء التالي : الجزء الخامس من رواية بايرة حلتنا
لقراءة الجزء السابق : الجزء الثالث من رواية بايرة حلتنا
للإطلاع علي فهرس اجزاء الرواية : جميع روابط اجزاء رواية بايرة حلتنا للكاتبة مريم أحمد
جميع الحقوق محفوظة للكاتبة مريم أحمد .
