وفي الجزء الرابع سنعرف سوياً كل ما يخطر علي بالك من اسئلة من قراءتك للجزء السابق، وهل برأيك سوف يحدث ما يخطر علي بالنا كلنا ام سيكون هناك مفاجآت من نوع آخر ؟ كل ذلك واكثر سوف نعرفه في السطور التالية .
الجزء الرابع من رواية بقايا امرأة
وهنا مشت رنا للمطبخ .. ونسرين قعمزت … وكان على طاوله … مكسرت وملتيز وام نم وتشيبس ومكسرات .. وبان كيك وجنبه صونية على شكل تلاته قلوب فيهم عسل وزبده ومربى .. وباكو كونفلكس وحليب بالشكلاته … وسينابون …
وهنا جابت رنا الموكا وقالتلها ..
رنا .. خيرك مابديتيش .. ااااااى نسيت انك ماتفطريش هكى انتى 
.. نقليلك ددددددددحى ونجيب هرييييييييه ؟؟؟
نسرين << بوجه مصدووووووووم >>> ….
رنا … تلفونى يرن لحظه بس …
وفى لحظه هيا … نسرين كانت مصموطه … ومش عارفه لاتروح ولاقعد وتدير روحها عاديه ومش هامها الموضوع او تأترت بيه …بس فى الاخير … قررت انا ترد عليها وماتخليهاش فى قلبها …
رنا … سامحينى موزه كان يكلم فيا وقالى وتى روحك بعدين بنطلعو نتغدو برا … مهم خيرك ماتاكليش ؟؟ ماعجبكش الفطور ؟؟
نسرين… لا لا ماعنديش نيه شبعانه والله ..
رنا … شنى فطرتى فى حوشك يامعفنه ؟؟
نسرين … لا لا خديت طاسه فروبى فرواله وموز وخلاص …
رنا … مهم نبى نسألك … سمعتى ؟؟
نسرين .. شن فى ؟؟
رنا … نرجس عطوها .. واليوم بيتمو فيها .. وحتى اللاى نادت عليا .. والله قاعده نخمم شن نلبس ..
نسرين … ااه … ان شالله ربى يتمملهم على خير ..
رنا .. اى والله بس نقولك … تعالى اليوم هدى عليهم .. حتى ولو كانو مايكلموش فيك … ابدى انتى بالك يرتخو قبل العرس …
نسرين … ان شالله خير … نشوف وائل قبل …
رنا … اسمعى بنقولك شى بس والله والله لو تصيرلى مشكله بسببه نهارك … انى والله ماقدرت نشدها فى قلبى اكتر …
نسرين … شن فى ؟؟
رنا … انى نحس انا هما مايبوكش اليوم بتمشى … لانى امس كنت عندهم وسمعت تحكى لامها فى مطبخ وتقوللها ماعندك علاش بتناديها نسرين غير تحشمنا قدام ناس وهما عيله متعرفه ويدورو على الاتيكيت ومظهر ..
وامها بعدين قالتلها …اصلا مالا فكا افتكينا من وجهه اصلا هيا كل ماتجى غير باش تمسح الاخضر واليابس ..
نسرين … هما قالو هكى ؟؟ حسبى الله ونعم الوكيل … قسما بالله مافى مره جيتهم اكتر من الحاج الا يمدهوالى ماناخد حاجه …
رنا … انى نصيحتى ليك ديرى زينى .. والله مرات نجى حتى طاة ميه ماناخدها عندهم … وبعدين هما تكلمو هكى بس على خاطر انى سمينه … يعنى انى متلا مستحيل يتجرؤ يقولو عليا كلمه …
رنا …. خيرك زعلتى ؟؟
نسرين … لا لا والله بس خليت مكينه تخدم ونبى نصوبن ..
رنا … اوك حبيبتى غير عاوديها مره مره ..
نسرين … يالله نستأدن منك
رجعت نسرين لشقتها … وقعمزة وهنا حست انها بدت تغرق فى وحل مشاكل برغم انا غلطتها وحيده … خلتها تدفع تمن سلسلة اخطاء هيا ماكانتش ليها دنب فيهم .. بس احيانا الغلطه الغير محسوبه ممكن تكون تمناها حياتك وسعادتك
وهدا الا صار مع نسرين …
وبما انا نسرين كانحوشه مضموم قررت تاخد فترة راحه وتخش ترقد العشيه .. على امل انها تنوض العشيه على خبر يغير الكابوس الا هيا عايشه فيه …ووهيا ماشيه لدارها .. رن تلفونها … فاجت وخدت سماعه طول ..
نسرين .. اهلين مريم ..
مريم .. اهلين يادعوه .. وينك امس استنين تبعتلى حتى رساله …
نسرين .. انى وين ورساله وين بالله عليك خلينى فى همى ترا .. حاسه روحى مخنوقه …
مريم .. خيرك شن فى ؟؟
نسرين … << بدون تعليق >>
مريم … شن فى تكلمى … اكيد هوا صح ؟؟
نسرين … العيله كلها مقلوبه عليا … انى والله مخنوقه يا مريم ..
مريم … ابديلى بيه واحكى شن صار معاك …
نسرين … متجاهلنى .. قسما بالله حاسه نفسى مش موجوده قدام عيونه ..
مريم … بالك غير مروح تعبان من سفر وخلاص …
نسرين …لا لا .. وائل الا انى حبيته وعرفته مش هدا … مريم ماكلفش نفسه يقيم عيونى فى عيونه … تصورى يتهرب من حتى الكلام معاى … لو شفتى امس كيف صدنى خلاص حسيت روحى متت …
مريم … انتى شن متوقعه علاش يتصرف هكى ؟؟
نسرين .. << بدو العيون يدمعو >> مش عارفه … انى حاسه انه يتعمد يكرهنى فيه …
مريم … نسرين .. راجعى نفسك … نقولك شى ماتزعليش منى … لكل فعل له رد فعل اقوى … يعنى اكيد وائل ماتصرفش هكى من بلاش …
نسرين .. ماتدفعيش عليه … انتى لو تلمحى على موضوع سمن فاالله غالب .. تلاته اربع نساوين الليبيات سمان … شنى يعنى رجاله كلهم يطفشو ؟؟
مريم .. انتى تبررى لنفسك ؟؟؟ انتى عارفه انا راجل انانى .. يبى المرأه قدامه هيفا وهبى وفى المطبخ منال العالم وفى الحوش خدامه فلبنيه وفى الشارع شيخه فتنه …
نسرين … وانى ماوعدتاش انى نرسم روحى زى ماهو يبى …نسرين افهمينى … انى نبيه يحبنى فى اسوء حالاتى .. يعنى يحبنى لانى نسرين الا لطالما كان يشوف فيها اميره .. مش نسرين ملكة الجمال … نسرين انى لقدر الله معناها لو تشوهت شنى ؟؟ يسيبنى ؟؟ صدقينى سمنى هدا اكبر اختبار ليه … ومستحيل نسامحه لو خسر فيه …
مريم … انتى تبى تقنعى نفسك انا مشكلتك معاه مش سمن صح ؟؟
نسرين … اى انى حاسه انا يخون فيا … صدقينى قلبى قلبى ينبه فيا وانى نعرف لما يكون فى شى غلط … صدقينى كل ناس يمرو بى مشاكل بس تنحل وبالحب يلقو حل … يعنى مفروض هوا يدعمنى ويوقف جنبى … صدقينى ورا كل رجل عظيم امراه والعكس …
مريم … فوتيك من شعارت الفارغه هيا … انتى عارفه راجل يبيها حمره جرايه ماتاكلش الشعير وعلى الطبطابى …
نسرين … انى ماتقبلتش الوضع هوا يوم بس … انى تعبت … انى هجرنى سنه وكنت بعد مرواحه بيعوضنى خير على الا مر من حياتنا … بس هوا زاد اتوحش اكتر من قبل … مش طايقنى ..
مريم … عندى ليك حل … توا .. خشى ديرى دوش … واجبدى شعيراتك .. والبسى وحده من لبسياتك القنينات متع الحوش … واول مايروح .. استقبليه باابتسامه .. وتكونى موتيتله شاهى … وهوا اكيد انتم العشيه تقعمزو تتفرجو … فاا خشى معاه فى الحكى لين يرتخى وبعدين افتحيله هالموضوع .. لعل وعسى تقدرو توصلو لحل … لانا لو تسكر بينكم باب الحوار صدقينى رح تتأزم بينكم اكتر …
نسرين … اصلا مافيش حل تانى .. بجد انى خلاص تعبت هلبببببه ومعاش نقدر نتحمل الوضع مقرف هوا
مريم … ايواااا خلاص وصدقينى رح توصلو لحل … بس مفروض مفروض انك تبدى فى دايت …
نسرين … اول ماصغار يسكرو سنه اقلها بس رضاعه صدقينى رح نفطمهم وتوا تشوفى كيف نولى …
مريم .. باهى حاول تقللى بس توا يعنى اقلها تحافضى علىوزنك هدا وماتزيدى عليه …
نسرين … ان شالله .. بس توا تعالى خلينى نحكيلك مصايبى تانيه مع حوش اهل راجلى …
مريم … المايك ليك احكى ….
وهنا نسرين بدت تحكى لى مريم على كل همومها مع اهل راجلها وعلى القلب والمصايب الا نزلت عليهم فى يوم واحد …
واول ماتمت … كانت ردة فعل مريم …
مريم … ااااااه ياهمى انى … انى عندى احساس انا سلفتك $#$#$ هيا هى الا ترفع ودوه وتجيب وتغلظ فى القلوب .. وباين انا حماتك تفاهه وسطحيه … وبما انك رنا اسطح واتفه فاطنجره ولقت مغطاها … وبدو يوز لبعضهم وينشر وفى سمهم لعزوزتك … لانا على حسب ماقولتى .. عزوزتك لاتهش لاتنش .. معناها واضحه بنتها وسلفتك معبينلها راسها ..
نسرين … مش عارفه … بس صدمتنى على الكلام الا يقولو فيه .. كان خاطرى نقلب طاوله على راسها ونقلبها فوقها .. وخاصة لما قالتلى نقليلك دحى …
مريم .. والله والله الا فانى سلفتك هيا ضحكتنى هههههههههه بس انتى سلبيه .. كانا انى قسما بالله مانسكتلها … والا مانمسح بيها
نسرين … كنت على وشك نديرها .. بس انى توا موقفى ضعيف .. انى راجلى يعامل فيا مش كويس … واهله قالبين عليا … ونزيد نتعارك معاها باش تمشى تعاود لراجلها ويجى هوا لوائل … وانى مش ناقصنى مشاكل معاه …
مريم .. معناها نقولك شى … اجبدى عليها وعامليها بنفس اسلوبها .. تبى تقتل عدوك عامله بنفس اسلوبه …
نسرين … غير نفضالها بس .. تى والله الا مانطلع منها الخمير والقديم …. مهم توا ساعه 3 ظهر .. شوفى بالله الوقت فيسع مايجرى … فاخلينى نبخر الحوش ونخش ندوش ونجبد شعرى ونكتم روحى .. وندير طوجين كيكه وشاهى .. ونحاول نفتح معاه موضوع قبل مانمشى لحوش اهلى … لانا اختى متزوجه جايتهم اليوم بتهدرز ..
مريم … معقوله هوا اليوم تانى يوم مروح وانتى بتمشى …
نسرين .. صدقينى قسما بالله رح يطلع من قبل ماحتى نفكر نمشى .. اول شى اخته اليوم زى ماقتلك بيتمو فيها .. وتانى شى هوا مش طايق يقعد لحظه فى الحوش … ولو شفتى ملامحه امس كنتى فهمتى ..
مريم… والله ربى يهديكم وخلاص .. خلاص غير كلميه وقوليلى شن يصير معاكم
نسرين … ماشى تمام .. خلاص خلينى نسكر ونجرى على روحى قبل مايروح ..
مريم .. خلاص سلام …
سكرت نسرين … وتنه\دة على بلوة قلبها .. وبعدين خشت للمطبخ وبخرت الحوش … وبعدين اتدكرت انها امس فى الليل مدوشه .. فابطلت وخشت على طول جبدت شعرها وحطت شوى مكياج .. وقامت شعرها بتوكة شداده … وخشت للمطبخ وحطت شاهى على نار وبعدها طلعت لوزامها والخلاط باش تدير الكيكه … .. وبمجرد ما كملت كل شى وحطت الكيكه على رخامه وشاهى .. وكيف بدت تغسل فى معايين … سمعت الباب نفتح وصوت صغار …
نسرين … وائل انت جيت ؟؟
وائل .. << لوح مفتاح على طاوله وقاللها >> .. اى جيت .. وساعه وطالع .. عندى مشوار .. وهنا جت بتتكلم بعدين سكتت .. وطلعت باش تشوف صغار ..
نسرين .. شنى تعبوك اليوم ؟؟
وائل … لا لا قعد لامى … وبدلتلهم توا قبل مانجيبهملك ..
نسرين .. مدايره كيكه وشاهى … نحطلك ؟؟
وائل .. هاتى ..
وقعمز قدام تلفزيون وقعد يقلب نقال …. وهنا حطت صغار فى دار نومهم بعد مالقتهم نعاسين وراقدين ومدلوخين من سياره وشمس … وجابت صفرة الشاهى وجت قعمزة جنبه …
نسرين … << بدت تصب فى شاهى وحطتله كيكيه >> .. الف الف مبروك على اختك ..
وائل … من قالك انتى ؟؟
نسرين .. رنا اليوم لما مشيتلها …
وائل … الله يبارك فيك .. انى ماشى اصلا بعدين على خاطر هالموضوع ..
نسرين .. وعلاش ماكنتش تبى تقولى ؟؟ لهدرجه انى غريبه بينكم ؟؟
وائل … انتى الا اخترتى تكونى هكى … لو كنتى استغليى سفرتى وحاولتى تقربى منهم وتصلحى علاقتك بيهم راهو مش هكى … بس انتى قمتى خشمك عليهم فامن طبيعى يشطبو عليك … وفى الاخير انتى عمرك ماتسمعى كلمتى … وتجى على راسك …
نسرين … انت خيرك تتكلم معاى هكى ؟؟ علاش تتصرف هكى بجد ؟؟
وائل … مافى شى ..
نسرين .. شنى يعنى مافى شى ؟؟
وائل … مافى شى .. انى طبيعى وعادى … شنى يعنى ظرورى ماترقص باش نوريك انى طبيعى ..
نسرين … لا لا .. حسسنى انك زوجى الا مستاحشنى ومستاحش شوفتى ..
وائل … رح نرجعو لنفس نغمات وانى مسافر …
نسرين .. شنى يعنى … خلاص انتهى حوار بينا ووصل لهنا
وائل … اى ابدى هيا … بلا بلا بلا بلا … وان توانت وان توانت … رواس امك ريحنى منك وبرى شوفى لروحك فى مرايه قبل ماتتكلمى معاى وتحسابينى … بلاش حتى شاهى مانبيشى … انى طالع ..
نسرين … استنى .. بنمشى لحوش بوى حطنى … مانبيش نقعد .. لانى لو قعدت قسما بالله نولع فى روحى وفى هالحوش …
وائل .. نستنى فيك فى سياره … وطلع وقربع الباب وراه …
وهنا خشت بغل غلها … وطلعت عبايتها ولستها فوق حوايجها وخدت صغارها وساكوهم والكيكه وطلعت بيها لحوش بوها …
نسرين .. طز فيك وفى الا يفكر فيك … وحتى الكيكه والله ماك ضايقها ومانى مخليتها …
قعدة نسرين تتمتم وهيا نازله وصغار فى ايدها … وبمجرد ماقربت من سياره … شافته شاد تلفون ويتكلم .. واول ماشافها وقبل ماتفتح الباب كان مسكر .. وهنا قعدة تشوفله شوى .. بعدين قالتله ..
نسرين .. فى من تكلم كنت ؟؟
وائل … بنجاوبك برغم الطريق هالا تكلمتى بيها ماتسحقش الاجابه … امى . عندك مشكله ؟؟ كانت توصى فيا نجيب معاى شوية حاجات ناقصين …
نسرين .. مازال ساكو وصونيه فيها كيكيه جيبها من فوق ..
وائل … انتى مدايرتها للحوش صار ؟؟
نسرين ….. اى مدايرتها للحوش غير كنت ندوقك منها …
وائل … بصحه عليكم .. انى بنبات الليله …
نسرين … عندك مانع ولا بتحلف زى قبل وبتديرلى العار على كل مره نقول فيها نبى نبات ؟؟
وائل … لا لا سلامتك برى باتى وغيرى جوك ..
وهن نسرين جها صاروخ على راسها خلها تدشدش ومعاش تفهم شى … وبعدين قالتله ..
نسرين … علاش مبتسم ؟؟ غريبه .. ماكنتش هكى واحنا فوق ..
وائل … اوووووووو . خلاص حاضر رح نكد ونقرنهم .. ماشى ؟؟ تمااااام ؟؟
نسرين … وائل انت مش انت … انت متغير … مش انت راجل الا انى تزوجته ..
وائل … اى انى عبد السلام عامل نفسو وائل … بالله عليك بطلى تفاهة نساوين .. وانتم تشرو فى نكد شرى … ولما راجل يقول مرتى نكيد تعيطو وتقولو كيف ..
نسرين .. باين انك معاش خليت بينا اى لغه لى تحاور بجد … خلاص من اليوم الا يريحك ديره …
وائل … اوك …
وطبعا زى اى دعكه بين اى زوجين . تنتهى بهدوء وصمت طول طريق .. ووماقدر حد يكسر معاهم هالصمت الا بى وصول نسرين لحوش بوها ..
نسرين … ماتجينيش لما نبى نروح توا نكلم خوى يحطنى ..
وائل … ماشى …
وخدت صغارها وقربعت الباب وطلعت …
وبمجرد ماخشت الحوش … ووهيا قعده ماسلمتش .. لقت العيله كلها ملتمه فى الحوش والا هيا … خوها وامها واختها متزوجه …
نسرين … خيرك تبكى نوره … شن فى ؟؟
امها … شفتى ميحت بابى وحضى … جايتنى وتبى تطلق .. علاش علاش راجلى مش رومانسى ..
وهنا كيف بتقولها عندها الحق ياامى … قطعت عليها امها وقالت
امها … برى شوفى اختك نسرين ياحسرتك … … صار مش رومانسى .. شنى مالا عندك نيه تطلقى وتصيعى ؟؟ تى وحق المصحف الا تفكر تتطلق منكم ماعاد تفكر تتنفس يوم
خوها … يما غير اهدى شوى وكله ينحل …
امه … انت اسكت يا عيرة رجاله … كانك راجل وحاكم فى خوتك كانت قبل ماتفكر تطلق رهى حسبت بحسابك …
نوره … على شنى تعزرى فيا يااختى … برى اساليها قبل وقوليلها خيرك ؟؟ واسمعيها .. بعدين احكمى ..
امها … شنى يعنى ؟؟ ماتشكى من شى … تكلمى يانسرين … قوووووليلها واطبقيلها ودنها وقوليلها مافى شى ..
وهنا نسرين قعدة تشوف لى نوره وبعدين شبحت لامها وقالتلها …
نسرين …
يتبع………
لقراءة الجزء التالي : الجزء الخامس من رواية بقايا امرأة
لقراءة الجزء السابق : الجزء الثالث من رواية بقايا امرأة
للإطلاع علي فهرس اجزاء الرواية : جميع اجزاء رواية بقايا امرأة كاملة للكاتبة كيندا
جميع الحقوق محفوظة للكاتبة كيندا من ليبيا .
