وفي الجزء الرابع ماذا ينتظر أبطالنا من أحداث مشوقة ستحدث معهم ؟ هل يا تري سيكونون مستعدين لها ام لا ؟ كل هذا وأكثر سوف نعرفه سوياً داخل احداث الجزء في السطور التالية بإذن الله .
الجزء الرابع من رواية تزوجنا ولكن هل يبقي الحب
طلعت ونزلت سهيله لوطه وبينما هدى كانت متلفته جيهة مراية دولابها وتواسى فى حدايدها … وفجاه سمعت مؤيد طلع من الحمام وخطوته باتجاه .. واول مافتح باب دار نوم وجت عيونه على صورتها فى المرايه حس للحظه انا مالك الدنيا كله بين ايديه ووللحظه وقفت بيه دنيا وكان يتمنى هدى لو انها تقيم عينها عليه وتبتسمله بس للاسف هدى تابعت توسى حدايدها ولا كان فى اى حد واقف يشوفلها .. واول ماقرب منها خطوت وكانت المسافه بينه وبينها لاتتعدى مسافة الحاجب على الحاجب شدها من خصرها وقربها ليه وقعد يشم فى شعرها بينما هيا وخرت وقالتله..
هدى … سهيله تخش فى اى لحظه ..
مؤيد … انتى علاش تتصرفى هكى ؟؟ فهمييييييينى ؟؟
<< وفجأه خشت سهيله لدار وقالتلها ..
سهيله …. هدى اهماا لقيتهم فوق الكميدينو متعى …
وهيا قاعده ماكملتش كلمتها وخشت لدار لقت هدى ملامحها متعفلقه بينما مؤيد يشبح لهدى وباين انه كان مستنى الرد واول ماساد صمت شوى فى مكان خدى بعضه وتكل .. وهنا سيهيله قالتلها …
سهيله … خيركم ؟؟
هدى … لا لا شى هيا كمليلى .. وخالتى لوطا واتيه ؟؟
سهيله … ايه واتيه …
هدى .. خلاص انتى قررتى ماتبيش تمشى ؟؟
سهيله … لا لا خلاص
طلعت هدى للحفله هيا وعزوزتها وطبعا مؤيد هوا الا وصلهم ومع ساعه 1 فى الليل امه اتصلت بيه وقالتله هيا .. ومافاتتش ربع ساعه الا وكان عندهم واول ماوصلو للحوش ركب هوا للحمام وخش يدوش .. لانه لما اتصلو بيه كان وقتها فى ملعب يلعب فى كوره مع صحابه ومالحقش يدوش فاروح بيهم وخش للحمام .. اما هيا فالبست بيجامه الحريريه الحمراء واكتفت باانها تنحى توكات من شعرها وخففت شوى من مكياجها وطفت ضى ورقدت …
واول ماطلع من الحمام وخش لدار لقاها طافيه ضى وراقده فاقعد يشبحلها شوى وبعدين طفى سهرته ورقد حتى هوا .. وفاتت ساعات وراء ساعات على حواش عمى جمعه واول مافاقت صبح مع ساعه 12 ظهر لقت مؤيد نايض والباين انه نزل يفطر لوطه بماانه اليوم كان جمعه وماكانش حاب ينوضها ويزعجها ..
فاخشت للحمام دارت دوش وغسلت شعرها من المتبت الا من امس فى شعرها ولبسة بيجامة حوش محترمه وجبدت شعرها وقامته وبماانا مافيش حد غير محرم لوطه فانزلت من غير ما تحط وشاح على راسها واول مانزلت وخشت لقت سهيله تقوللها ..
سهيله … صباااح الورد .. هادى فيقه شكلها هههههه .. حتى امى ناضت توا مع 11 ونص وقالتلى راسى زى دربوكه من زمزمات امس والمنظومه ..
هدى … اسكتى تعرفى راسى احرررررف منها بيتكسررررر ..
سهيله … ههههه اهم شى العروسه شنى طلعت ..
هدى .. ههههه ماشالله عليها غير سمينه بس .. هههههه قوليلى وين مؤيد ؟؟
سهيله …. مشى مع بابا لصالة جمعه …
هدى … اوك مال خلى نخش للمطبخ ونشوف شنى فى ناقص على غدى ..
سهيله … اى اى مازال سلاطه وتوتى صفر بس .. اهو بنبخر الحوش ولحقاتك
هدى … والله مانى عارفه خالتى كيف بدير من بعدك بس .. ههههه
سهيله … ماتخافيش مقعمزه صدقينى ماعندى وين ماشيه .. قالو خوتنا المصرين << المتعوس متعوس ولو جابو فوق راسه فانوس هههههه >>
خشت هدى للمطبخ وبدت تقرض فى سلاطه
بينما سهيله لحقتها وبدت تسقى فى الرز بالبصله .. وكي يتحط دجاج قالتلها هدى ..
هدى … سهيله ننصحك دجاج حمريه قبل احلى ..
سهيله .. كيف .. اول مره الحق نعرف ..
هدى … تقدرى تاخدى طاوه وتحطى فيها شوى زيت وبعدين تصبى فلفل احمر او بزار على حسب بابا ماهو مرات ماياكلش الحار مهم تحطى واحد منهم .. وتخلى زيت يسخن بعدين تحطى دجاج وتحمريه فيه لين يعطى لون وتحميره وتحطيه فوق الاكل يطلع بنه وصنه خير من مسلوق بس فى مرقته ..
سهيله .. طلعتى فالحه وانى مانندريش .. خلاص تعالى انتى ديريهم مره هادى خلى نلقطها قبل وانى نكمل منك سلاطه
وتو صفر وحطو كل شى على خشت مؤيد وبوه وحطوا لغدا وبدو يتغدو وبعد ماتغدو هدى وسهيله قامو المعاييم وبدو يغسلو فيهم وماكملو حوسة مطبخ والغدى الا وهما والساعه 3 ونص وهنا طلعت وقالت لسهيله ..
هدى … هيا تعالى نتطلعو لجنان نشمو هواء ..
بس قاطعها مؤيد وقاللها ..
مؤيد … لا لا البسى حوايجك والحقنى فى سياره تلقينى ..
هدى … شن فى ؟؟
مؤيد … برى والحقنى وتوا تعرفى فى طريق مهم البسى سروال مش قونه ..
لبست هدى حوايجه ونزلت ولقاته يستنى فيها وهنا مش وفى طريق وكان الكل ساكت لحد ماوصل للمكان الا كان يبى يرفعها ليه واول ماوصلت قالتله …
هدى … وين بنزلو هنا … فى مدينة ملاهى بس …
وهنا هوا شبحلها وغمز عينه وضحك وقاللها ..
مؤيد … ورينى شجاعتك هنا هيااااااااااااااا..
هدى … انت تبصر صح هههههههههه لا لا ههههههه ناس يشبحو فينا نحى ههههههههه
وهنا قال لراجل ..
مؤيد … بالله ياخوى نبى نحجز 2 كراسى فى بساط الريح .. اى اى انى وزوجتى نبيهم جنب بعض ..
هدى … مؤيد حرام عليك انى ندوووووخ مؤيد وراس امك لااااااا
مؤيد … تى والله ليلة امس الا رقدتى فيها وفتينى الا مانخليك تدفعى فيها تكن غالى .. اررررركبى والله نركبك انى اركبببى ..
هدى …. ااااااااه خلاص بنركب … مانحبهاااااااااش ..
ركبت هدى من هنا وبدى العياط من هنا ومؤيد مييييييت بضحك وروحها قريب طلعت من ضحك واتناء العياط وهدى كيف تعيط وتقوله ..
هدى … مؤؤؤؤؤؤؤؤؤؤؤيد بنطيييييييح خلاااااااص
مؤيد …. نحبببببببببببك قوليهاااااا
هدى …. نكرررررررررررهك نزلنى ..
مؤيد .. << انتى هكى ولا لا باهى باه ..
وهنا طبس لمدير لعبه وقاله ….
مؤيد … بالله زيد سرعه ياخووووووى .. اى اى زيدد ..
مؤيد … شن رايك توا ههههههههههههههههههههههههههههههههههههه
ونزلت هدى من لعبه وشبه طلعت روحها ووجهها ولى زى الليم الشفشفى ومؤيد دموعه نزلو من ضحك وبعد ما نزلو خدالها غزال البنات وبدو يلعبو من لعبه الا لعبه لحد ماجت ساعه 9 فى الليل وكانت هدى بقمت سعاااااده .. واول ماطلعو من مدينة الملاهى وركبو للسياره قاللها ..
مؤيد .. وين تبى تتعشى ؟؟
هدى … ارفعنى لاى مكان على البحر … نبى نشم هواء .. حاسه دنيا لعبت بيا من كتر مالعبنا ..
مؤيد …. اووووك رح نرفعك لى مطعم حوت على البحر تاكلى ايديك وراه ..
مشت هدى للمطعم وقعمزت فى الاول وحطت ايدها على راسها من كترة دوخه واول مافاقت ورجعت عاديه طلبو منيو وبدو يتعشو ويهدرزو ..وهنا قاللها مؤيد ..
مؤيد … نحببببببك ..
هدى … شبحتله ولمعة عيونه وقالتله .. حتى انى نحببببك ونموووت فيك 
مؤيد …. خلاص معناها خلينا ننسو الا صار امس وولامس ونبدو من اول وجديد اوك ..
هدى … اوك حبيبى ..
مؤيد …. شن رايك فى قمبرى حاجه صح ولا لا ؟؟
هدى .. حتى شربة فوكه البحر مدايرنه بطريقه تهببببل عجبتنى هلبه والمطعم كله كلاسيكى وحلو ..
مشت سهريه فى قمت رومانسيه وبعد ماكملو عشاهم وتعشو خطمو خدو جيلاطى من المحل الا تحبه هدى مخصوص << ليمونى >> وبعدها روحو واول ماوصلو للحوش وركبو من دروج واول ماوصلو لفم شقتهم وفتح باب قامها فى غمره وقاللها ..
مؤيد … نووووورتى سور بيتك ياشابه هههههه << وسكر باب الشقه برجله >>
هدى .. نزلللللللنى مؤيد والله نعيط ونلم عليك ناس ..
مؤيد …
يتبع…….
لقراءة الجزء التالي : الجزء الخامس من رواية تزوجنا ولكن هل يبقي الحب
لقراءة الجزء السابق : الجزء الثالث من رواية تزوجنا ولكن هل يبقي الحب
للإطلاع علي فهرس الرواية : جميع اجزاء رواية تزوجنا ولكن هل يبقي الحب للكاتبة كيندا
جميع الحقوق محفوظة للكاتبة كيندا من ليبيا .
