وفي الجزء الرابع من رواية جعلني انثي يا تري هل سيكون هناك احدث ممتعة ومميزة داخل طيات الجزء ؟ دعونا نعرف ذلك في السطور التالية بإذن الله للكاتبة ميشو محمد .
الجزء الرابع من رواية جعلني انثي
اينور خشت: السلام عليكم
عادل: وعليكم السلام تفضلي
اينور خافت بس شافت عادل كبير شوية تنفست بعمق وبصوت واطي: اني المحاميه
عادل: خير؟! ف حد طلبك؟!
اينور فداخلها، غبارتك راك ف مركز شن تكدبي: ياعمي اني نبي شخص هني نتكلم معاه ضابط مثلا
عادل طقطق ع غرفة النائب
النائب: اني قلت ممنوع حد يخش لم نكون مشغول
عادل: استني هني هو توا عنده متهم رح يتبت عليه القضيه ويكلمك
اينور: من المتهم؟!
عادل: الضابط هشام ال،،،،
اينور قربت للباب وفتحاته
النائب شافلها: تفضلي خير
هشام كان عاطي الكرسي بظهره للباب
اينور قربت خشت ووقفت قدام هشام
هشام تلاشؤ عيونه حس روحه لمحها شافلها ونزل عيونه ع اساس ميعرفهاش
النائب: اختي استني برا نتبت قضية للمتهم وت… قطعاته
اينور: ممكن نشوف وراق المتهم
النائب: شن تفضلتي !!!
اينور قربت للمكتب: نبي وراق المتهم هشام
النائب: ممنوع وين تحسابي روحك انتي اطلعي تفضلي
هشام فنص فها ويتكلم ومصكر سنونه: اطلعي يامصيبه
النائب شاف هشام: تعرفها؟
اينور: محاميته
هشام عرف انه لو كذبها ممكن اطيح ف مشكله: محاميتي
النائب شافلها وبدون مايطلب دليل انها محاميه مدلها ورقه
اينور تقرا فها: نعمم؟ مكتوب انه الضابط هشام متعاون مع المجرم زياد التجار وكاتبين انه بايع وراق وملفات ليه نقدر نشوف الدليل؟!
النائب: مافيش ادله ع شي هو ميبيش يتكللم
اينور مدتله الورق: انت عارف لو طلعت متهمه كذب شن يصير فيك رح تدفع فديه لانك ملفقله تهمه كامله وصدقني رح تجي ع راسك
هشام: ضمي فمك هدا النائب وين تخرطي من طلبك انتي
اينور شافت النائب: النائب؟! اي سيدتك وين تبينا نصكرو المحظر هني ولا ف المحكمه
النائب: لحظه فهميني شن عندك انتي لو في شي نتفاهمو هني
هشام: ممكن تخلينا نتكلمو شوية نتفاهم معاها
النائب وقف: تمام عندكم خمسه دقايق
اينور خافت من هشام المتعصب: لااا دقيقتين
النائب طلع
هشام: انتي كيف تخشي انتي بنت تعرفي شن يعني بنت تنسجن ف مجتمعنا
اينور: تبي تنحبس واني ظمير يائنب فيا فكرررت مرقدتش لقيت الحل انه لازم نحل القصة قبل ماتكبر
هشام غمض عيونه بعصبيه وفتحهم: وريني شن الادلة لعندك ولو لقيت ف خطر عليك رح تمشي تسمعي فيا ورح تقولي انك مش رح تستلمي قضيتي وريني شن عندك
اينور فتحت هاتفها: اني لم اتصلت بيا انت خفت انك تكون مجرم وصورت الوراق والبطاقه لكانو عندي
هشام تنفس بعمق: الحمدلله عطيني نشوف
اينور عطاته: هادم
هشام فتح الصور وشافهم وبعدين خش ع الرسايل شاف رسايل هو مش باعتهم
هشام ابتسم:ياشاطره انتي جبتيلي الرسايل هادم اهم من الصور الرسايل اني مرديتش عليك ويعني لرد عليك كان هو يبي لوراق والصور
النائب طق الباب وخش
هشام:سيدتك ف شخص كان عنده هاتفي وكان يتواصل مع المحاميه عشان تجيه وطبعااا هدا واصف ولد خوك هو لـ استلم اغراضي…ووراه الصور والبطاقة
النائب تعصب:واصف…قرب بيطلع
اينور:لحظه متغلطش ضروري تشده بدليل (تلفتت وشافلها) رجاءا ماتتهورش
هشام وقف: اينور
اينور شافتله
هشام: انتي الدليل
اينور عقدت حواجبها بعدم فهم
ــــــــــــــ
واصف ف مكتبه ترررن ترررن
واصف شاف رقم غريب ع هاتف هشام صكرر الخط
وصلاته رسالة(اني غيرت رائيي رح نعطيك الادلة بدون مقابل نتلاقو؟!
اول موعد لينا)
واصف: اول موعدد يعني الشخص ليبعت ف الرسايل مش شايف هشام (وين؟!)
وصلاته(كافي…… الساعه 12 بزبط)
واصف شاف الساعه 11:10(اوكى اني توا طلع للكافي نستناك غادي)
وصلاته (تم)
النائب نصدم: ف الشرطه مافيش واسطات ولد خوي رح ينفصللل فووورااا
هشام شاف اينور: انتي
النائب طلع
هشام حك بين عيونه بتوتر: مش عارف شن جيت بنقولك
اينور ابتسمت: خلاص اني عرفت وحسيت انك شرطي كويس مش ضروري تشكرني
هشام: من قال بنشكرك؟!(تعصب) علاش مهووسه ف التشكرات والاعتذارات انتي؟!
اينور: انت قليل اصللل 
بنقص منك كان قتلي شكرااا
هشام بيتكلم قطعاته
اينور: يلي ماتتحشم الحق فيااا
هشام: جهزي روحك لساعه طناش يابطه…عطاها بظهره بيطلع
اينور: بطل تناديني بااسماء عبيطه… بعدين وين طالع انت اقعد هني
هشام تلفت شافلها: اني رح نعطيك شي وسام شكر مثلا او هديه شكرا مش احسن؟!
اينور : اني بنروح باي…. شد عروة الباب
هشام: تبصري انتي؟! وواصف من بيقابل كان انتي بتمشي!
اينور شافتله: وااات تبيني اني نمشي للكافي مصح وجهك
هشام: هي خدمه
اينور تنق : مجرم هادا مقدرش
هشام: لالا انتي قوية كيف وعيطتي عليا ف الجبل ولا نسيتي صياحك يومها
اينور شافة: الساعه 11:20 فهمني شن ندير
هشام ابتسم: لالا ذكيه الباين عليك تصرفي بذكائك
اينور: شكراا
خمسه دقايق ساكتين
هشام: عطلل النائب اي هي يابنتي احكيلي شن بديري غادي اجلطيني بذكائك
اينور: استنى علاش تقولي بنتي انت كم عمرك؟!
هشام: 30سنه
اينور: اي واني 22 معنها شن تقولي بنتي ع اساس جو برستيج وهيبه هئحممم
هشام: عطيتك عمرك 17 او16 منضرك مايوحيش انك طالبة جامعه
اينور: منضري عادي غير قصيرة شوية بس انتم مزودينها
هشام: شوية؟! بنتي انتي قريب يعفسو عليك
اينور تعفلقت: اني شن درت بس ضيعة فرصة انه نشوفك مشنوق ومعفن ف الحبوس
هشام سكتت تنهد
النائب خش وخشو معاه زوز شرطه: اختي هادم الشرطين بيكونو معاك لو صار شي واني متاكد من ولد خوي وعارف مش رح يصير شي
هشام: نكون معاكم؟!
اينور: طبعاا انت اول واحد
النائب: لا هشام انت بتقعد ف الزنزانه عشان مايشك فينا واصف
وطلعو النائب ووالشرطيين
اينور بتطلع
هشام: ردي بالك (ابتسم) يابنتي
اينور شافتله: هو ماشيه لكافي مش لحدود اسرائيل
هشام وجها تغير لغضب: فاضي نتكلم معاك اني… وطلع نزل للزنزانه
وطبعاا الوقت هدا كله وواصف ف الكافي
ركبو ف السيارة واينور
يتبع …………
لقراءة الجزء التالي : الجزء الخامس من رواية جعلني انثي
لقراءة الجزء السابق : الجزء الثالث من رواية جعلني انثي
للإطلاع علي فهرس اجزاء الرواية : جميع روابط اجزاء رواية جعلني انثي للكاتبة ميشو محمد
جميع الحقوق محفوظة للكاتبة ميشو محمد .
