الجزء السابع والعشرون من رواية عاصفة الصمت

وفي الجزء السابع والعشرون من رواية عاصفة الصمت دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .

الجزء السابع والعشرون من رواية عاصفة الصمت

صفاء : لبناااااا
مروة : يافرحة ماتمت
خ رقية : ﻻ عﻻش ف الحالتين فرحة سواء ليكم واﻻ ليها … ونزيدكم من االخير نزار غدوة بيخطب وتي روحك ياصفاء …
* وقفت لبنى وبتتكلم معش قدرت شدت راسها وطاحت سايخة …
ناضوا مروة وصفاء يتجارو وحطوها عالمندار
خ رقية : هدا من الفرحة واﻻ شنو
صفاء : بالله اما فرحة
مروة : نوضي جيبي زهر صفاء فيسع …
خ رقية : وجيبي اميا وسكر
مروة : لبنى … نوضي … يالبنى
خ رقية : سمله عليك توا كنتي ﻻ بيك ﻻ عليك …
صفاء : هاك رشيلها زهر مروة
مروة : هاتي …
رشتلها مروة وبعد شوي فاقت لبنى .
خ رقية : خيرك اللطف
لبنى : حسيت ب دوخة ولفت بيا الدنيا ومعش ندري على روحي
خ رقية : اشربي ميا وسكر … اشربي
لبنى : به …
* شربت لبنى الميا والسكر وحطت الطاسة
صفاء : شنو اتحسي ف روحك توا
لبنى : باهي احسن من بكري

خ رقية : ريتوا الفرحة مادير او هههه من الحشمة لين ساخت
مروة : ايه ههههه يﻻ ربي يتمم ع خير
* سرحت لبنى … واجهشت بالبكاء
خ رقية : وهادي دموع الفرح هههههه
لبنى : ﻻ ياخالتي مش دموع شي . . مش دموع فرح
* وناضت تجري وخشت لدار وسكرت الباب … وتبكي … وخالتها تشبحلها باستغراب …

صفاء : خليها تو تهدى اكيدة اتفكرت امها
خ رقية : ابه بالك

عﻻش بس هكي عﻻش … كنت نبيك ليا يانزار …وانت بتخطب واحدة تانية … وفوق منها جايبلي عريس تمنيت متت وﻻ صار هدا كله .. عمري كله مشي وانا نتخيل ونرسم احﻻمي معاك يانزار البلي … وانت وﻻ عمرك عبرتني ..

سمسار : ب 25000 الف
نزار : ايه والله ماخسارة فيه دوبلكس ماﻻخير عجبني ابحق
سمسار : تمام …خﻻص مر عليا غدوة الصبح بش نتموا اﻻجرائات ونكتبوه ب اسمك
نزار : تمام بكل .. هي سﻻم عليكم
سمسار : وعليكم السﻻم …

{ﻻزم نبشر غدوشتي بالخبر الحلو}
نزار : يامساء السعادة
غادة : مسائك ورد وحنية
نزار : شن الجو حبيبي
غادة : تمام وانت حبوبي
نزار : بخير الحمدلله … قولي شن كنت اندير توا
غادة : شنووو
نزار : كنت عند السمسار و مشيت انا وياه بش انشوف ف دبلكس
غادة : حقااااا !
نزار : اييييه … وغدوة بنشريه
غادة : ياروح روحي انت والله فرحتني
نزار : ومازال ماريتي شي ان شاء الله ربي يقدرني نسعدك اكثر واكثر
غادة : ان شاء الله ويقدرني نسعدك
نزار : بيبي تو انكلمك بعدين عندي مكالمة انتظار
غادة : من منو
نزار : من واحد صاحبي سﻻمات
غادة : سﻻم

صفاء : ماديريش ف روحك هكي يالبنى
لبنى تبكي وتصيح : باهي عﻻش مايخدنيش انا عﻻش … ناقصة ايد واﻻ رجل … واﻻ فاش احسن مني اللي بياخدها … فاش
مروة : احنا عارفينه الكﻻم هدا لكن بالك ايحبها االي يبي يخطبها
لبنى : به وانا شنو انموت
صفاء : اهو جاك نصيبك واحد من صحايه شن تبي تاني
لبنى : باهي بنتجوزه وانا قلبي لشخص تاني
مروة : به يعني تقعدي تتفرجي ع نزار ماشي وجاي مع مرته وانتي تبكي ف تراكين
صفاء : ايه اما احسن تتجوزي واﻻ تتحسري
لبنى : مش حتفهموني نهائي فكوني منكم
خمروة : استهدي بالله وفكري بعقلك الحب ايجي بعد الزواج وتو تحبي صاحبه ويعوضك عن كل اللي فات
لبنى : خلوني بروحي خلووووني …
* قعدت لبنى على هالحال الى الليل … وهيا تبكي واتسح وواجعها خاطرها ومضايقة …
ساعة 1 صباحا …
خش نزار ولقي الحوش مظلم والدنيا راقدة …
سمعت لبنى صوت ان نزار خش للمربوعة فبعتتله مسج >> قاسي القلب … عديم اﻻحساس …
نزار >> عﻻش هدا كله ! اكيدة تسحني عالرقصة اطمني مش ناسي
لبنى >> مانبيش منك شي نزار
حتى حاجة خﻻص …. اللي وصلني منك ساد

{خيرها لبنة … شن فيه شن درتلها انا … غلطت فيها ؟؟ جرحتها بكلمة.. بالك قتلها حاجة بدون قصد ﻻﻻ ماقتلها شي .. خلي نبعتلها مسج تاني }
نزار >> خيرك لبنى شنو فيه ؟؟

{اياح مابتش اترد… والله حيرتنيني ياضرسي … }

حنين : شن جو نزار اماﻻ
غادة : من بكري ماتصلش … خلي نتصل بيه توا
حنين : باهي خلي نمشي ندور حاجة ناكلها

غادة : الو … اهلين نيزو
نزار : اهلين بيك
غادة : شن الجو
نزار : تمام ماشي اﻻمور ..
غادة : خيره صوتك حبيبي … فيه حاجة مضايقاتك
نزار : ﻻ مافي شي …
غادة : غير خيرك شن فيه
نزار : مافي شي لبنى خيرك قصدي غادة
غادة : يا لبنى اللي واخدة عقلك … من لبنى هادي
نزار : بنت خالتي
غادة : باهي خيرك تتنرفز عليا
نزار : اياح عاد
غادة : باهي خيرك حبيبي
نزار : الصبر
غادة : به به حنخليك اتريح اعصابك
نزار : تو انكلمك …
غادة : اوكي باي
نزار : باي

{استغفر الله والله لخبطتلي جوي لبنى… شن درتلها النهار المبارك ااااااه اكيدة على خاطر العريس زعما قتلها امي وهيا ماتبيشي ؟؟؟ باهي كان ماتبيشي عادي اتقول انا مش حنغصبها…. والله خلتني انفكر الا مانمشيلها في الدار }

* مشالها نزار لدار وفتحها بشوية ودار شق يبيت منه
ويقول بالهمس : لللبنة
* قامت راسها وشافت لقاته نزار غطت راسها وتلفتت … فخشلها ونخصها
لبنى تهمس : شن تبي
نزار : خيرك ماترديييش
لبنى : شن اتقول
نزار : قتلك خيرك مارديتيش ع المسج
لبنى : هكي مانيش رادة
نزار : شن فيه شن صار
* تحركت صفاء منزعجة من همس لبنى تحسابها تبكي فطبس نزار بش معش اتشوفه صفاء
صفاء : انتي بتهبلي فجرت نزار ارقدي تره معش تفكري فيه
لبنى : باهي اهو بنرقد …
صفاء : ونوضي سكري علينا هالباب مشرعتيه علينا
لبنى : باهي ياصفاء …
* تلفتت صفاء وتغطت …
نزار بالهمس : علاش بتهبلي فجرت نزار
لبنى : نزار برا ارقد
صفاء : اوووف عاد …
*وقف نزار وجبد لبنى من ايدها وناضت وراه وسكرت الباب … ورفعها للمربوعة ورد الباب وقالها : شن فيه
لبنى : مافي شي خليني فحالي

*طلع نقاله من جيبه وفتح نغمة راقصة …
وشدلها يدها..وقالها : ضرسي انا عارفك زعﻻنة على خاطر عطلت عليك وتحسابيني مانبيش نوفي بوعدي … والله عند وعدي …معش تبكي معش تبكي …
*حط يده نزار وراء ظهرها …وكتمت لبنى اللي فقلبها وسكتت وشبكت يديها وراء رقبته ورقصت معاه وشادة دمعتها بسيف … بعدين حست روحها بتبكي فحطت راسها على صدره … وبكت
غمض عيونه نزار وقالها : تعرفي ريحتك زي البيبي …….
* قامت راسها لبنى وجت العين ف العين وكانوا قراب من بعض …
نزار : ياربي حتى رقصت معاك مزال تبكي عاد
لبنى : ﻻﻻ غير دموع الفرح بس …

* غمضت عيونها لبنى وحركت يديها على ظهره وعيونها ادمع…. اتشبتت بيه بقوة ﻻن عارفة ان هادي اخر مرة حيكون نزار بقربها بشكل هدا … من غدوة حيكون ملك انسانة اخرى غيرها ….

{مش عارف هالشعور اللي يجيني لما نكون قريب عليها هكي… عندها انوثة طاغية .. محﻻها لبنى …ياحليلك يارامي}
لبنى : نزار
نزار : نعم
لبنى : عارف لما تبي شي مش قادر توصله وفجاة الشي هدا يصبح مش ليك حتى بمجرد امل …
نزار : كل عام عامين تقوليلي شي مش قادرة نوصله حاجة مش ليا .. شن هيا نجيبهالك
لبنى : ﻻﻻ ماتقدرش
نزار : هيا سادك من الرقص
لبنى اتفكر عﻻش يانزار انت مش حاس اني نبيك بشي عﻻش… وقتله : انت اتحس واﻻ ﻻ ؟؟؟
نزار : مافيش حد مايحسش بس سادك رقص هههه
طلقاته لبنى وقتله : مش قصدي هكي
نزار : اعﻻش تبكي
انفعلت لبنى وقتله : انت يانزار ماتحسش وﻻ عمرك حسيت بيا
نزار : عل
قاطعاته وقتله : ماتقوليش عﻻش ..قد من يوم انقول اهو ايحس اهو يفهم …فاتو سنين ومنين وانا نتأمل فيك ونتخيل فيك وانت شي وﻻ هنا اتقول انا مش انثى … راجل انا قدامك ماتشوفش فيا ؟؟ عتريس ؟؟بوعجيلة فتحي امسقم ؟؟.هاااه اتكلم ..اصﻻ انتو الرجالة انانيين ماتبوش اللي تبيكم …تبوا واحدة اعصابها باردة وتتجارو فجرتها…
فكل مرة نكون فيها جنبك نتمنى انك اتعبرني … اتعبرني بس واتفكر ان لبنى عﻻش تتصرف معاك هكي بطيب وحنية .. خليتني ندوي بيك طول الوقت صبح ليل ظهر عشية قايلة نزار نزار …
انت شنو عديم اﻻحساس واﻻ كيف
نزار : والله صدمتيني معش عرفت شن انقول
لبنى : ماعندك ماتقول مبروك عليك خطوبتك غدوة ومبروك عليا خطوبتي بعد غدوة … موافقة بيه صاحبك … بالك ايعوضني عالسنين اللي كنت حاطة فيها العين عليك …
نزار : ضرس
لبنى : ومعش اتقولي ضرسي مانيش ضرسك … الضرس لو صايرتله حاجة يتوجع صاحبه لكن انا متوجعة وانت مش حاس مش حاس غمضت عيونها وهي تبكي مع هالكلمة وحطت يدها ع عيونها و فاقت لنفسها بعد هالإنفعال…و الكﻻم اللي سطرباته وراء بعض واتحشمت من ولد خالها اللي يسمع ف الكﻻم ووراسه لوطة ف للارض …
لبنى : اسفة … اسفة مانندريش ع روحي نزار …بالله سامحني..
*شدلها كتافها وشاف ف عيونها وقالها : انا …انا كنت نحسب فيك زي اختي لبنى .. مافيش مرة فكرت فيك غير هكي لكن هدا مايعنيش انك مش انثى واﻻ بوعجيلة زي ماتقولي …ﻻ بالعكس انتي انثى وماننكرش لما صارت بصدف وكنتي قريبة مني في كدة مرة …امتلكتني عواطف جياشة لين انا معش فهمت نفسي لكن … عقلي ماتحركش ماتحركش بكل يالبنى مافكرتش فيك اﻻ انك اختي …
لبنى : حتى انت من اللحظة هادي انت خوي يانزار … خووووي
تنهد نزار وقال : سامحيني قد انكون جرحتك بدون قصد ضرسي لبنى : مش ضرسك
نزار : حاضر … باهي كيف ندير
لبنى : مادير شي وموافقة بيه صاحبك وراك اتغير اي شي وماتفكرش تسخف عليا وتوزع صاحبك وتعتدر من عيلة البنت وتخطبني ﻻن مش حنوافق بيك نزار

* تلفتت لبنى وطلعت بسرعة وسكرت المربوعة ومشت لدارها ..
{وااااه ياربي … كيف ماكنتش فايق بيها … ضرسي تبيني والله اﻻ قاعد مصدوم ..احيييه يابطني…. والله مافكرت ياناس صح كل تصرفاتها يوم استنتني وقت خداني الشقندي عنده وداوتني ووق خشت معاي تحت بطانية لما امها خشت علينا وانا فاقد الوعي …والله انا غبي جرحت البنت }

طول الليل ونزار يفكر ب لبنى …و ب لبنى ايفكر … ومداير طريق عالحمام بطنه توجع من هالصدمة
ولبنى قريب اطير ﻻن نزار خطوبته مامزالش عليها هلبا …

{ معقولة لبنى ! ضرسي ؟؟؟ تندروا عليها انتو ؟؟اه شنو تندروا ؟؟ باهي بما انكم تندروا عﻻش ماقلتوليش ! اقلها كنت نسحب نفسي شوية بش معش انعيشها فوهم }

*لبنى … ياريتني ماقتله نزار … ياريتني شديت روحي وماقتﻻش هالكﻻم ياريتني … عليك حشمة وخﻻص …. ﻻزم ناخد صاحبه بالك بش ننساه وفتك من وهم نزار والحب من طرف واحد … يكفيني اوهام ولله تعبت اتعبت

{بس انا قلبي رايد واحدة تانية يالبنى …. احسن شي بما انها موافقة حنكلم رامي ايجي يخطب غدوة العشية … وانا نخطب بعد غدوة … بالك تفرح ب رامي … واتنحيني من بالها }

وفات الليل بطوله وهما الزوز يفكروا ببعض هيا متحشمة منه وهوا حاس ب انها سبب تعاستها

تاني يوم الصبح … ناض نزار بكري ولبس وطلع من الحوش …
ساعة 10 صباحا
نزار : ايوه رامي … انت وين
رامي : انا ف الحوش
نزار : اسمع كلمت امي وقالت تفضلوا اليوم العشية
رامي : بجديات ؟؟؟
نزار : ايه …
رامي : باهي تمام …
نزار : وماتجيش للمكتب اليوم هههه خوده راحة
رامي : ان شاء الله … توصي بشي
نزار : سﻻمتك سﻻمات

{قريب ياضرسي اكيد حتفرحي ب رامي اكيد …خلي نتصل ب امي نقولها }
نزار : اها يمى …صباح الخير … ايه صح طلعت بكري … ﻻﻻ غير عندي شوي عمل … شن بنقولك العويلة اليوم بيجوكم بش يخطبوا لبنى
خ رقية : اللطف بش ع اساس اليوم بنمشوا نخطبولك
نزار : ﻻﻻ انا خليني غدوة ..
خ رقية : باهي جيب معاك شوي حلوات وعصير
نزار : ان شاء الله
خ رقية : وجيب باكو شاهي
نزار : ان شاء الله به …
وشن تاني
خ رقية : ﻻﻻ خﻻص هوا هدا
نزار : ان شاء الله سﻻمات …

{وتوا نتصل بحاتم ونقوله غدوة بنجيكم }
نزار : ايوه صباح الخير
حاتم : صباح النور
نزار : شن اﻻخبار
حاتم : تمام معدلة
نزار : اسمع يافار … قول لعيت عمك غدوة جايين ان شاء الله
حاتم : بكري بكري !
نزار : ايه بكري بكري
حاتم : باهي اوكي
نزار : هي سﻻمات عندي انتظار ..
حاتم : سﻻم

نزار : ايوه السﻻم عليكم … ايه اهو جاي … ايه معاي المبلغ تام … ان شاء الله مسافة الطريق بس ونكون عندك …
* مشي نزار لسمسار وتﻻقى مع صاحب الدوبلكس وشراه منه وانكتب الحوش بأسم نزار وسلمه المبلغ واستلم نيزو المفتاح … ومشي للمكتب … خطط وسالم نفد مهمة ورجعله ثمم سكر المكتب ومشي للمحل خدي ل لبنى فستان عادي طويل وخسر…. وخطم على حلويات النحلة خدي اصناف حلويات والسوبر ماركت خدي الحاجات الناقصة وروح للحوش … كانوا مروة وصفاء ايضموا ويسيقوا ولبنى مش باينة … كيف بينادي عليها كعادته ياضرسي … اﻻ انه سكت … وقال ل مروة : مروة … هاك الشكارة هادي اعطيها ل لبنى …
مروة : باه … نحطلك غدي
نزار : ﻻﻻ طالع … اهو الحجات فوق الطاولة يامروة كان نقصت عليكم حاحة كلميني
مروة : اوكي به

{فرحانلها وفي نفس الوقت انحس ف روحي مغموم … ﻻﻻ اكيدة شعور بذنب اتجاه لبنى ﻻني مانبادلش فيها الشعور }

صفاء : نوضي يالبنى خودي دوش و واستشوري شعرك … نزار مش حيفيدك بشي
لبنى : عارفة مش حيفيدني بشي نزار ايحب واللي يحبها عامياته

خشت عليهم مروة وقالت : لبنى نزار جابلك الشكارة اهياه
صفاء : شن فوسطها
مروة : تره …. اه قفطان حلو شوفي
لبنى : مانبيشي
صفاء : نوضي بالكي نوضي خﻻص اعترفتيله بمشاعرك واﻻه خﻻص المهم حاولتي نوضي شوفي امورك العصر قريب يأذن
مروة : هيا نوضي خلي احنا نكملوا ضمان ونوتوا الحلو …

غادة : توا قتلي امي ان غدوة بتجوا نزار : ايه … حقا خديت الدوبلكس
غادة : واااوووو الف الف الف مبروك علينا ياعمري ان شاء الله نسكنوا فيه طول العمر
نزار : ان شاء الله
غادة : بس خيرك هكي نبرة صوتك وكانك مش فرحان واﻻ صايرتلك حاجة
نزار : مش عارف انحس في روحي مغموم ومضايق …
غادة : عﻻش …
نزار : ﻻ شي .. هكي وخﻻص .. تو نكلمك بعدين
غادة : اوكي …رد بالك ع روحك ..سﻻم
نزار : سﻻم …

مضت الساعات … وجت ساعة 5 ولبنى كيف فكرت اتنوض تاخد دوش …دوشت وهيا تبكي سرحت شعرها وهيا تبكي ولبست الفستان اللي جابهولها نزار وهيا تبكي

صفاء : ياحمارة امسحي دموعك وديري كحل فمعاميك
لبنى : باهي ياصفاء باهي
مروة : الحوش يشرين
خ رقية : زودوا اقتحوا واحدة منكم وانتي يالبنة بطلي بكي اللي مش ليك عمرك ماحتاخديه مدام المولى مش كاتبه ليك
* انصعقت لبنى لهلكلمات ومسحت وجها … وطلعت مروة من الداؤ ومشت تفتح في الباب ومشت وراها خ رقية …. استقبلوهم جت ام رامي واخته وخالته هدرزوا وضيفوهم وطلعت عليهم لبنى وام رامي قريب طارت بيها و عجبتها … ولبنى مقعمزة وتحاول تبتسم برغم خانقتها العبرة ….
خ سعاد ام : والله رامي يشكر في نزار هلبا وقالي قداش ليا نبيها هالبنت … ياريت تحددي موعد الفضانية والله مستعجلين
خ رقية : ان شاء الله خير
خ سعاد : حكالي رامي انها عايشة عندكم و متعلقة بيكم اكثر من بوها
خ رقية : ايه … امها كانت عايشة معاي واتوفت قبل عامين
خ سعاد : الله يرحمها ويغفرلها
خ رقية : اتعيشي وتترحمي ..

* هدرزوا وتمت الهدرزة وروحوا عيلة رامي …. تم هاليوم عادي عالكل اﻻ نزار و لبنى
ف الليل ساعة 2
{عﻻش مخنوق انا ومضايق… ضرسي اكيد مبسوطة بجية عيلة رامي المفروض نفرح حتى انا … واﻻ انا حاس بذنب ؟؟؟ اكيد ﻻن صديتها ….ربي ايسهلك يالبنى ويسعدك حتتنحى هالغمة بعد خطوبتي من غدوشي حبيبي }

ثاني يوم … العشية مشت ام نزار واخته صفاء وخطبوا غادة … وكان الموضوع شبه شكليات ﻻن بوها موافق… روحوا عيلة نزار …
ونزار قاعد حاس بروحه مش تمام …
بعتتله مسج غادة >> الف الف مبروك علينا ياروحي
في نفس الوقت جاه مسج من لبنى لبنى > مبروك عليك … تتهنى ان شاء الله
فكتب بمسج >> الله يبارك فيك
كتب كلمة ضرسي ومسحها وكتبها ومسحها وكتبها ومسحها
{والله اﻻ مانكتبها ضرسي تبي واﻻ ماتبيش ضرررسي }…
* وماردتش عليه لبنى …
وبدت تتحاشى تقابله في الحوش وهوا مايروحش للحوش اﻻ ف ليل

بعد اسبوع بتحديد كانت فضانية وبيان لبنى في العشية … روح نزار ب لبنى من المزينة هيا ومروة … وحطهم ف الحوش … وخش للحمام …
لبنى قعمزت عالكنبة ونحت الوشاح والعباية وﻻبسة فستان زهري جميل جدا … طلع نزار من الحمام ووقف قعد يشوفلها … قامت راسها لبنى وشافت نزار …
سرحت لبنى وسرح فيها نزار … وادكر يوم الرقصة وكل شي … نزل راسه وطلع من الحوش …

ومع المغرب جوا عيلة رامي وجي بوها وبش بيتفقوا وتمت الفضانية روحوا الرجالة وخش رامي بش يلبسها دبلتها … ونزار واقف قدام الباب … جبهته تتعرق ويتفكر في لبنى وكل مواقفها معاه …

نزار : انعم غادة
غادة : وينك حبيبي
نزار : بعدين لبنى قصدي غادة
غادة : لبنى لبنى
نزار : ماهو فضانيتها اليوم هي سﻻمات
غادة : والله مستاحشاتك خليك هدرز انت نعش ادور فيا من نهار تقدمتلي
نزار : تو نهدرزوا غدوش سلام توا
غادة : انت معادش مهتم بيا نزار ..
نزار : غير فوتي هاليومين وتو نهتم بيك حاضر .. سلام
غادة : سلام

{ان شاء الله اتكون فرحانة لبنى مش مهم انا لو مغموم وشعور ذنب ﻻحقني المهم لبنى تكون فرحانة وسعيدة }

لبنى تفكر في خﻻل ما رامي مقعمز جنبها ويشرب فيها العصير >> سامحني يارامي والله تمنيتك نزار … بصدق قلبي قاعد معاه خايفة نضلمك معاي وانت ولد ماتتعيبش

{اه ياهمي انقلب بيا الحال من لما قتلي بشعورها امتى يتنحى الشعور بذنب امتى اكيدة لما تتعرس اكيد }

مكرم ~ تعالي ياحمارة تعالي نستنى فيك في السطح … اتعالي واﻻ نقول للقرد متاعك
غادة ~ مانيش جاية
مكرم ~ به اهو بنتصل بيه هي .. تو انوريك النجوم ف عز الظهر
غادة ~ ياسر يامكرم
مكرم ~ به تعالي نبي نهدرز عليك غادة ~ به شوية نشوف حاتم كان قاعد واﻻ ﻻ
مكرم ~ حاتم مهناش اتعالي هيا
* كدبت غادة ع امها ع اساس مرت عمها تبيها وركبتله ف السطح *
غادة : شن تبي هي
مكرم : تعالي سنفورة تعالي … شوفي القمر كامل اليوم وبحداه نجوم صغيرونات … تعالي قعمزي
غادة : به شن نبي ف القمر
مكرم : مايدكر فيك بشي القمر ..
غادة : ﻻ
مكرم : انا يدكر فيا بيك …
*قعمزت لبنى بعيد عليه شوي … لكنه شدها من يدها وقالها : صار نزار خير مني
غادة : انا نبيه وفضانيتي وبياني بعد تﻻتة ايام
مكرم : به به …
* نفخ مكرم في وذن غادة بنفخات بسيطة وهمسلها انحبك وحنقعد انحبك … وعارفك انتي عنيدة وتكابري …
* قاللها كﻻم رومنسي خارج النص .. وغادة كم يوم ماسمعتش كلمة حلوة من نزار فشدت روحها شدت وبعدها ودابت مع مكرم رومنسيات على ضوء القمر ….
واﻻخ نزار ياغافل ليك الله

بعد ماروحوا عيلة رامي وبارك نزار لرامي… وقعد مقعمز بروحه قدام الحوش لساعة 12:30
… فخش للحوش … وتقابل مع لبنى في الممر وقفت لما شفاته ووقف ويشوف ف عيونها … نزلت دمعة من عين اليمين ل لبنى …
نزار : الف مبروك ضرسي
لبنى : انا ضرس رامي توا مش ضرسك وعموما الله يبارك فيك … وعقبالك

* ابتسمتله وعلى خدها دمعة … تقدم ومد يده بيمسحلها دمعتها كالعادة بس ماقدرش لبنى مخطوبة ! سكر قبضة ايده ونزلها … غمضت عيونها لبنى لثواني وقتله : حبني او حب غيري صرت بعمري خيال قانعة واعرف مصيري مالي بقلبك مجال .
* كدابة طبعا *
رد عليها نزار : انت كالبيت الكبير اللي ضللني بوروده …صعب ابعد عن حدوووده ….
ومشي كل منهم ف عكس اتجاه اﻻخر …

يتبع………..

لقراءة الجزء التالي : الجزء الثامن والعشرون من رواية عاصفة الصمت

لقراءة الجزء السابق : الجزء السادس والعشرون من رواية عاصفة الصمت

للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة

جميع الحقوق محفوظة للكاتبة لوزة .