الجزء السادس عشر من رواية الزوجة التائهة بين الأحلام والواقع

وفي الجزء السادس عشر هل يا تري سوف نري أحداث جديدة بين ابطال الحكاية أم سيكون هناك رأي آخر من المبدعة كيندا داخل طيات وسطور الرواية ؟ كل هذا سنعرفه في السطور القادمة بإذن الله .

الجزء السادس عشر من رواية الزوجة التائهة بين الأحلام والواقع

احمد لوح الا فى ايده وطلع يجرى … وبعدها قعد يعيط ويقول ..
احمد ……صفاء هاتى شرشاف وهاتى مفاتيح سياره بسررررعه بسرررعه…. ليلى فيقى ليلى ….
والا يطلع يقعد يعيط ويخش يبكى ولما شافتها امه قعدت تعيط وتقول
ام احمد …. وووه عليا وووه …. ووووه قولولى شن صار خيرها بنت تصب دم من فوق ومن لوطه …. احمد ….. خلاااااااااااااااااااااااااص اسكتو مانبيش نسمع حد …وقامها فوق وحط عليها شرشاف وطلع يجرى بسياره للعياده واول ماوصلو دخلوها طول لقسم طوارى وقعدو يستنو برا لمدة ساعتين وبعد ساعتتين طلع دكتور وقاله احمد ….
طمنى دكتور شن حال ليلى توا …
دكتور …. الحمد لله ليلى حالتها تمام ومستقره بس المدام كانت حامل
احمد …. جاته صاعقه وقاله …. اه اه والعيل شن صار فيه
الدكتور …… واللهى شن بنقولك العيل احنا درنا جهدنا معاه وهوا حى الحمد لله بس نبضه ضعيف شوى وهيا نزفت هلبه فاحنى اعطينها ابرة تتبت وزدنها دم وركبنلها تغديه ورح تقعد مدة 24 ساعه هنا لحد مايستقر نبض العيل وبعد 24 ساعه اما…. يوقف نبض بيبى او يرجع طبيعى ..
احمد …. فى احتمال يعيش يادكتور … باللهى عليك طمنى
دكتور … ان شالله اكيد…. هلبه حالات يصيرلهم نفس الشى ويعيش الجنين متعهم لانك الحمد لله جبتها فى الوقت مناسب
احمد…. طمنتنى يادكتور…. باهى ليلى نقدر نروح بيها بعد 24 ساعه؟؟

دكتور … لو تبو تطلعوها من عياده عادى بس احنا ضربنالها ابرة تتبيت الجنيين فالزم الراحه التامه وممنوع الحركه ولازم مايكون معاها حد لمدة اقل شى 10 ايام وبعدها تتحرك لضروره بس ولو لقدر الله طاح بيبى اكيد فى اعراض رح تحس بيهم ومنها نزيف وعلى عموم انى رح نعطيك رقمى واى شى كلمنى طول عليه ماشى
احمد … باهى باه شكرا يادكتور بارك الله فيك بس نقدر نشوفها توا ؟؟
دكتور … لا لا توا انت روح استريح لانا هيا اصلا توا راقده وبكرا ان شالله صبح تقدر تجيها وتشوفها براحتك وتتطمن على بيبى ماشى ..\
احمد … باهى يادكتور صحيت بارك الله فيك والله طمنتى هلبه توا لانك مبكرى ركبت فيا الرعب لما قتلى كانت حامل ….. والله كانت هيا نزلتنى لسابع ارض …
دكتور…. هههههههه سامحنى واللهى احنا قداش منا باهى الا مانسيناش اسمنا هههههه
احمد … ههههههه لا لا عادى مافيش مشكله وسامحنى عطلتك على خدمتك فى امان الله
مشى احمد لريسبشن وكمل اجراءت العياده وطلع للحوش وهوا طول طريق يفكر فى الاصار والاوجعه انا ماتمناش يعرف خبر حمل ليلى بطريقه هيا بس قال بينه وبين نفسه اعود بالله من شيطان الرجيم قدر الله وماشاء فعل والحمد لله جت على هكى اهم شى العيل وليلى ينوضو بحال كويس هدا اهم شى … وقعدت افكار تودى وتجيب لحد ماوصل للحوش وهنا فتح الباب وخش واستقبلاته امه وقالتله …
ام احمد ….. شنى ياوليدى طمنى شن قالك طبيب؟؟؟
احمد … واللهى يا امى ليلى الحمد لله بس هيا كانت حامل
ام احمد….. وووووووه ياوليدى وووه حسك مافرحتنى شن صار فيه العيل توا ماتقووليش مات ؟؟؟
احمد…. قالى دكتور ضربتله ابرة تتبيت ونبضه ضعيف وقالو بعد 24 ساعه اما يرجع طبيعى او ربى ياخد امانته
ام احمد….. لا لا اللطف ياوليدى تف من فمك لالا بعون الله تنوض هيا وياه كويسين وقول ماقالتهاش امى ووالله حتى انى في نبيل خوك هكى صارلى نزلقت فى سانيه بهدكا الشبشب انايلو شورا لبقرا ديرتها تحتى وانى ماريتهاش مشت رجلى وجيت متكعبره لوووطه على جيت اللاى جتنى طووول قامتنى فوق ظهرها … ااااايه ايه مالا شنى فوق ظهرها كنا قبل صحاح مش زيكم توا وبلطتنى على هضكا سرير وجتنى القابله طول تجرى بفرشيتها وعلى ايامنا ماكانش عندنا هالتتبيت فا ظربتنى بونيه جابت نبيل فى فم قعرى الا كان زى توا ليلى بيطيح قالتلى …. صح انى بعدها صخت بس والله نضت ميه ميه زى فرس بعدها واهو توا نبيل زى زنبريك مايقعد فى مكان …. فالدلك ياوليدى كون فى روحك وبرا توضى وصلى ركعتين وبعون الله مايصيرله شى
احمد……. ان شالله يارب ….. اسمعى انى مانيش راقد فوق فريشيلى مندار فى مربوعه مع نبيل وعصام خلى نخش نصلى وقولى لوحده من بناتك ديرلى قهوه نحس فى راسى بيتفجر
ام احمد …. باهى باه وليدى برا توضى وصلى برا ان شالله ربى ينولك الا فى بالك ….. ياااااااصفااااااء ….. ياصفااااااااء وينك يابنت تعالى هنا سمعتى شن قال خوك ؟؟؟ اااااللطف خيره عيونك منفخات ؟؟
صفاء …. ايه سمعته انى اصلا او ماسمعته خش وقفت فم بابى وسمعت الا قاله ووسخفتنى حق ليلى حسيت نفسى انى سبب فى الاصارلها …
ام احمد….. لالا بنيتى استغفرى ربك ربى كاتبلها وخلاص ….سكرى هالموضوع وماتغشاشيش خوك اكتر وبرى ديرى قهوه لخوك واسالى عصام ونبيل كانا يبو احسبيهم
صفاء … باهى باهى خلاص ….. وهديكا بنتك مسكبنه وينها من مبكرى مختفيه
ام احمد …. انتى برى ديرى قهوه وانى توا نمشى نشوفها خيرها …
صفاء … باهى باه وفى داخلها تقول ااااااه نبكى على حظى منيل فى وجهى انى يتسكر كل شى انى اصلا كنت حاسه انا رح يصير شى بس قسما بالله ياصهيب الا ما ندمك على تسكيرة دماغك وتوا تشوف كانا مازال رديت عليك ولا عبرتك ……
عصاااااااام ….. هيييييييياااااااااااا انتى ياهبله وينك نكلم فيك وانتى فى ملكوت الله شن هالعيله الخلل ياربى ….
صفاء …. زمررررى عاد اختصر توا مش فاضيه انى تبى قهوه ولا مانحسبكش مع احمد؟؟؟
عصام …. مادما فيها احمد احسبينى معاه اصلا نبى نهدرز معاه الليله … بس هوا شن صار فى مرته ؟؟؟
صفاء … توا يقولك هوا …. وخوك الطايش نديرله ولا لا ؟؟؟
عصاااااام ….. تى وراس امك اسكتى اما قهوه هادى وزبده سايحه الا يكلم فيها بتلفونى ومن رصيدى من بيشربها هديكا … تى هدكا منه فيه مش محتاج قهوه برى برى ديرلى انى واحمد بس وكان طلع احمد قوليله عصام طلع فى جنان وقالك الحقنى ….
صفاء … باهى باه خلاص خلينى توا نمشى نحطها على نار …..
مشت صفاء وخشت للمطبخ ولقيت اختها مهمده عيونها ومهديه كانها مدايره عمله وتشرب فى طاسة ميه مشى حطت سزوة القهوه على نار وقالتلها خيرك اللطف اول مره نعرف انا عندك مشاعروحازنه على مرة خوك ومهتمه بى حد …. تكتب وتسجل فى تاريخ ؟؟؟
مروه ….. خلينى وراس امك فى حالى والله ماعندى نيه فى مشاكل خلوقى فى راس خشمى
صفاء …. شن فى خيرك …. قولى هبطتى قلبى شن فى انطقى ….
مروه….. نقولك شى وماتقوليش ؟؟؟ …. ظميرى يأنب فيا *_* وكانا ماحكيتش لحد نموت من تأنيب ظمير …. انى حاسه نفسى حقيره لدرجة انا ماقدرتش نطلع ونسال احمد شن صار فى مرتك وماقدرتش نحط عينى فى عينه
صفاء ….. شن درتى يامنجوهه قووووولى
مروه …. عرفتى ليلى علاش نزلقت ؟؟؟؟
صفاء …. لا لا علاش ؟؟؟
مروه …. ماه ماهو انى لما جبت تلج من فوق طاحو منى تلاجات وماقمتهمش نزلت طول …. وهما شكلهم دابو وليلى نزلقت فى ميه متعهم لانا مكعبات كانو كبار وشورا لما دابو دارو قعرورة ميه على الدرجه …
صفاء …. وااااااانى متاكده انك فتيهم لانك يااما سمعتى تلفون يااما تبى تتصنتى علينا اصلا هادى عوايدك والله ماتتحشمى اهو بسببك انتى العيل احتمال يموت وبنت قريب مشت فيها…
مروه …. وراس امك خلاص والله الا فيا كافينى من بكرى قريب نموت وحتى نوم ماجانى وووحى عليا كانا يسمع بيا احمد قسما بالله الا ما يعلقنى فى تريه ويشلبخنى الا ماشى والا جاى وبدات نبييل الا مايدرس جنبها التريه تدريس انى نعرفه متغلل عليا ….. شن ندير ياصفاء باللهى عليك قوليلى ….
صفاء ….. من اليوم انتى الخادمه المطيعه ليا اوووووك…. وبرى اقلبى وجهك لدار ماتقولى لحد حتى امى وانى كانا صار شى تو نتفاهم معاه …. توا برررررى اقلبى هيا
مروووه …….. صحيتتتى هلبببه نحبك امووووه … وفى داخلها تقول انى خادمه يابلوعة مجارى تى واللهى الا مانوريك غير يفوت الموضوع بس قالك خادمه قالك…..
صفاء …… ااااااحمد باهى الا جيتنى هنا فى مطبخ اسمع هاكا صفرة القهوه وهونا عصام يستنى فيك فى جنان وقالك تعالالى ..
احمد …. باهى باه مالا امى وين …
صفاء … امى خشت لدار هيا وبوى ورقدو وحتى انى بنرقد فاطفى ضى حوش وجنان مادما ضى مربوعه مفتوح ماشى وتصبح على خير وبالهى بكرا ماتنساش طمنا على ليلى صبح واحنا توا نشوفو واحد من الاولاد يرفعنا ….. حقا اسمع بنسالك قولت لام ليلى …
احمد …. ايه قولتلها اول ماوصلت للعياده بعد مادخلو ليلى .. ومافاتتش نص ساعه وجت ….واصلا هيا الا بايته مع ليلى خليتها كانا هدا مانخليهاش بروحها …
صفاء …. باهى وخى احسن مادرت وان شالله تنوض حالها كويس ياررررب
احمد …. ان شالله … خلاص برى خلى نطلع لعصام
طلع احمد لعصام ولقاه فم عتبة الجنان يدخن …. ولما عصام شاف احمد جى لوح دخان طول وقالله تعالى تعالى يارجل والله خضيتنا عليك انت ومرتك شن صارفيكم ؟؟؟؟.
احمد…. باه غير قبل مانقولك هات سبسى من باكو الدخان الا كنت تدخن منه توا هات ..
عصام … اما دخان يا راجل ههههههههه شن تخترف انت ؟؟؟
احمد…. تى بتجيب ولا ناخده انى بروحى هههههههههههه مادمك راجل ودخن ماتدرقاش عليا …
عصام … باهى باه خوده وانت زفت تزرط الواحد اصلا انى ديما نقول انتم عيله مايمشيش معاهم الادب والاحترام ههههههه… باهى غير قولى قبل شن صار فى ليلى …
احمد … والله هيا الحمد لله والعيل مش معروف بس دكتور طمنى وقالى بعون الله مش رح يصيرله شى .
عصام … كان فى عيل فى طريق باهى بااااهى الحمد لله واخيرا بنشوفلك عيل وانتى قريب تكلب عليهم ناقصك غير تحمل انت بدل المرأه ..
احمد .. ضم فمك ياحيوان وتحشم … واللهى انى توا اهم شى عندى ليلى تنوض حالها كويس والعيل صح يهمنى بس مش زى ليلى ..
عصام …. حتى هيا الكبيده ههههههه دكرتنى باللهى ونبى اسكت والله عقلى ليه مده يرفع ويجيب فى موضوع فى بالى وبصراحه خش لدماغى هلباااا يااحمد
احمد…. شن فى مالا وحده من زباين محل على قولت خوك
عصام ….. لالا واللهى ماصارت بس كيف عرفت انى ندوى عليها هههههههه
احمد…. من هيا ؟؟؟؟ تى واللهى انتم خلاص عليكم انى الا فاضى اصلا انى ندوى معاكم
عصام …. تى غر اقعد هنى ياراجل اهو بنحكيلك …. اسمع خليك هنا صب قهوه نقول لى صفاء تمدلنا مالقى ميه ونحكيلك….. صفاااااااااااااء صفاااااااااااااااااااااء انتى ياتنكوله ردى ..
صفاء …. الوووو دقيقه حبيبى بس …. ايوااااا عصام نعم …. باهى باه شوى بس …. صهيب شوى وعودلى عصام يضبح عليا .
صهيب ….. اوووووه توا ليا قريب خمسين مره نتصل ولما رديتى تفكرو ينادوك علاش ماقتيلاش راقده ..
صفاء …. خلاص 5 دقايق بس وعادولى اهو قتلك انى معاش عندى الا رنه بس من الكرت الا بعتهولى امس راهو .
صهيب … باهى باهى برى ندير نفص ونعادولك
صفاء …. اوك حبيبى ….. ,,,,,,, …….. مشت صفاء للمطبخ جابتله مالقى ميه وقالتله ….تفضل هيا ومعاش تنادونى خلاص بنرقد اووووووووف مش قنا ولا لين نكتبوها على ظهورنا…. شنى نجى نشربهالك ..
عصام …. برى اقلبى وجهك ولا نهفك تيرو نجيبك فى سرير نسيتى 500 الا خديتيهم منى صبح اه قووولى
صفاء ….. لا لا خلاص هههههههه نبصر بس…. وبدوق بنرقد توا ياعسل انت.. ممكن معاش تنوضى لووووووووو سمحت *_*………..
….وبالفعل مشت صفاء لى دار نومها ولقت خطيبها مكلمها مره بس شبحت لنقال شبحة شيطانيه وضحكت ودارت تلفون سايلنت وخشت رقدت فى الفراش وتسمع فى صوت عصام من روشن دارها يقول لااحمد…
عصام ……. هدا ياسيدى مره خشيت للفيس وانى مكسد فى المحل مهم دورا خشيت نقلب فى الاخبار شفت صفحة الخال منزلين خبر على حال بلاد فالحق قعدت نقرا فى تعليقات ….. لفتلى نظرى تعليق وحده من البنات الحق كان تعليقها محترم وفى سنون وعجبنى طريقة ردودها وحسيت انا من طريقة اسلوبها وردها هادى هيا الا تعجبنى ….. مهم بعتلها اضافه ووالله ماكان فى بالى الا بنهدرز بس …وقعدت نبعتلها اكتر من مره لين فدت وضافتنى وبعدها حطتنى فى الاف لاين تخايل ..
احمد…. ههههههه استحقراتك قصدك …..
عصام …. ههههههه هكى شى ….. مهم عمك عصيو دارلها زقزقاق وعرف وبديت مفددها كل يوم صباح الخير على خاص تصبح على خيرعالعام ههههه مهم بدى وجهى زى الخمسين قرش لين زهقتها وفى الاخير ردت ……وطبعاااااااااا فى الاول ترد وقايمه خاشمها وبعدين بعد مده من تهدريزنا شبه كل يوم واناقت خوك فى تهديرز ^^ تعرفنى انت عاد حدت ولاحرج هههههه طاحت على خشمها ههههههههه وبدت تحلف براسى ماتحنت هههههههه انى الحق البنت خشت لدماغى ونراقب فيها فى نت يعنى من ضايفه ومن تكلم وهكى وجربتها اكتر من مره ووالله بنت كوويسه هلبه وتعرف حتى لما طلبت منها تعطينى باس ورد ايميلها اعطتهولى ولقيتها مش ضايفه ولاد وحتى القوربات مش خاشه نهائيا الا فى قروب واحد اسمه قروب زوجة رجل ليبى على مااعتقد بس …..يعنى ماعندهاش على خلطت شباب نهائيا وبعدى انى صكرت الاضافه مره وحده …
احمد ….. باه زفت نفختهم ياعصام شن مطلوب ؟؟؟؟
عصام …. ههههه عارف انى بالك مع ليلى بس راهو خوك فى ورطه وواللهى محتار احنا مع بعضنا توا قريب سنه ونص والبنت بديت نشوف فيها مرتى من توا بس انى خايف من شى
احمد …. شن هونا اختصر وانت درت فيلم هندى ؟؟
عصام … كل مانقوللها نبى نشوفك تقولى لا مانقدرش لا خوتى لا مش عارفه شنى وفى نفس الوقت تلمحلى على خطوبه ؟؟؟
احمد…. تى كيف تلمحلك وانتم من شايفين بعض ؟؟؟
عصام …. ههههههه ماهو الحق هيا مره جت المحل هيا وامها وشافتنى وشفتها بس من بعيد لانا خشو للمحل تفرجو وطلعو ومن يومها نقولها نبو نتلاقو ونتكلمو على طبيعه وهيا تصكلى فى الازرق … وانى الحق احترت شن بندير ؟؟؟ من جيهه هيا عاجبتنى ومن جهه تانيه مانبيش نتورط وناخدها وانى عمرى مادويت معاها وجه لوجه ؟؟؟ فا شنى الحل توا ؟؟؟
احمد …. الحل توا انك تخلينى نرقد لانا غدوا عندى سته وستين مشوار …. بنمشى لى ليلى وبنخطم على شركه بناخد ورق مهمه …. وماتنساش بكرا كانا امك قتلك ارفعنى ترفعها …وبالنسبه للموضوع توا نمخمخمه فى دماغى ونعطيك الخلاصه ماشى … هيا توا تشاو عليك
عصام …. وانت من اهل الخير وانت دوه معاك زى قلتها برا برا مربوحه …
خش احمد للمربوعه وقعد يفكر فى ليلى وفى موضعهم وحملها وتخايل نفسه للحضات انه اب وقعد دماغه يرفع ويجيب لين خده نوم ومافاقش الا على ساعه صوت منبه نقال ساعه 7 ونص فاناض خدى دخنه ونقاله ومافتيحه وركب لحوشه خش للحمام دوش وصلى واللبس وطلع خطم على محل الورد وكان كيف فتح وخدى باقة رود على قرنفل و ريحان وطلع مشى لى ليلى فى مستشفى ووصل للغرفه فتح باب وخش لقى ليلى تشبحله وابتسمتله فا قاللها …..
احمد …. للوش حبيبتى الحمد لله خوفتينى عليك امس ياشفشه ههههه شن حالك توا
ليلى … الحمد لله حبيبى …
احمد …. جبتلك احلى باقة ورد لاحلى مره وام فى دنيااااا كلها
ليلى …. احمد باللهى عليك حوله نحيه مش طايقه لانشمه ولانشوفه بنرجع خلاص نحيه ومن غير قصد دفتها باايدها وطاحت باقت الورد لوطه ….
احمد….. قعد يشبحلها ونصدم من تصرفها فاقام باقة الورد وقاللها خلاص ها لوحتها ولوحها فى سلة الحمام وصدمه فى داخله من تصرفها وغير الموضوع وقاللها …. اه وين امك مالا؟؟؟
ليلى …. قوتلها انى انزلى افطرى وخودى قهوتك فى الكفتيريه الا لوطه لانها من امس ماكلت شى وهيا عندها سكر ….. اه حقا بنقولك دكتور قالى البيبى حالته تمام استقر نبض هههههه
احمد …. ايه كلمته دكتور وانى فى سياره وقالى البيبى تمام بس اهم شى راحه فالدلك رح نجيبلك شغله وانتى ارتاحى ماتديرى شى اوك حبيبتى
ليلى …. لا لا حبيبى مش ضرورى انى بنروح توا مع ماما لحد مانخف وبعدها نرجع لحوشى ويصير خير
احمد …. بلع صدمه تانيه وقااللها اوك الا يريحك هدا اهم شى ….. خلاص توا اعطينى حضن حبوبتى وبنمشى للخدمه ومش رح نعطل ناخد ورق ونوقع على مستنادت مهمات وناخد ورق دراسه جدول ونوليلك واصلا توا خالتى وامى وخوتى فى طريق جاينك اوووك حبيبتى …
ليلى …. اوك حبيبى ….. احمد ممكن تبعد شوى حبيبى ريحتك بتخلنى نرجع
احمد …. انى ريحتى بتخليك ترجعى ههههههه بجد انتى ولا تتسهوكى قصدى هدا كله على خاطر خضنتك ولا شنى
ليلى … لا لا حبيبى واللهى ريحة برفان الا باخها مش متحملتها بس ..
احمد…. باهى باه خلاص اهو طلع انى اووووك سلام..
ليلى …. احمد ماتزعلش منى والله مانقصد بس ××××××
طلع احمد وماكانش عارف انا ليلى تصرفت هكى لانا فقد الدم بسبب النزيف وسوء تغديه يعطو علامات نفس علامات الوحم ولوعة نفس وغير انها فى الاساس تتوحم …… وهوا فى الاساس مش عارف اصلا شن هوا الوحم لانا ماكانش عنده خبره بى هالموضيع وركب سيارته ومشى للشركه وهوا شبه سفار وصالتله ولما وصل لقى سكيرتيره فى وجهه …
سكرتيره …. صباح الخير باش مهندس
احمد …. وتيتى الورق الا وصيتك عليهم على مكتب
سكرتيره …. ايه باش مهندش
احمد …. اوك جيبى الورق المحتاجين توقيع وحطيهملى على طاوله
سكريره …. اوك وومشت جابت الورق وفتحت باب المكتب لقاته مقعمز على صالون الجلد الابيض الا قدام طاولة المكتب متعه ومطبق ايديه على بعض وسارح يفكر …. فاقالتله
سكرتيره …. عفوا بش مهندش هادم كل الورق الا طلبتهم منى تفضل
احمد … اوك حطيهم على طاوله وصبيلى قهوه من مكينه
سكرتيره …. اوك ..
مشت لمكينة قهوه وطبست لرف لوطى باش تجيب منه كلينكس وطبعا كانت قدامه بزبط وبعدين حطت مق فى مكينه وصبت القهوه وبعدها طبست على طاوله الا جنبه وحطتها جنبه وكانت قريبه منه لدرجه انها لما طبست باش تحطله فنجان القهوه وتوريله اماكن توقيع شعرها جى على كتفه .. وهنا شمت ريحة البرفان الا باخه هوا وابتسمت ابتسامه خبيته وبعدين خدت الورق وقالتله باش مهندس حلو البرفان الا انت باخه دوقك حلو وابتسمت ابتسامه تظهر طيبه ولكن معناها خبت وقالتله تبى شى تانى
احمد …. عفوا لا خلاص سكرى الباب وراك …
قعد احمد يراجع فى مشروع وبعدين قام تلفون وقاللها …
احمد …. تعالى نبيك بسرعه
سكرتيره … حاظر …. وخشت للمكتب بسرعه ..
احمد….

يتبع …..

لقراءة الجزء التالي : الجزء السابع عشر من رواية الزوجة التائهة بين الأحلام والواقع

لقراءة الجزء السابق : الجزء الخامس عشر من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .