الجزء السادس عشر من رواية المشوه

غفران دارت كل شي عشان اطلع جهاد تطلع من الحوش وبحجة انها عند صاحبتها وبلعععكس هي كل يوم تمشي للمستشفى وتحقق مع الاطباء وتسال فيهم

غفران طلعت من المستشفى قعمزت ف سيارتها مهمومه: الكللل ضد جهاد الكلل الكللل

غفران خدت الاب توب ونزلت من السيارة وكلمت رئيس الاطباء وخشت لغرفة الكاميرات

غفران تشوف ف السجل: السجلات متع امس مش نفسهم متع اليوم منننن حدف السجلات مننننني

الدكتور: وين نعلم اني

غفران وقفت متعصبه : اسمع للعلم اني عرفت ان الغرفة فيها ممرضة يعني جهاد كانت موجوده معاه ممرضة ف غرفة العمليات وينهااا الممرضة مفقوده اني رح ندير ابلاغ ع الممرضة ورح ندير ابلاغ ع القلافز لكن معبي دم ف غرفة العمليات ورح ناخد البصمات منه لانه جهاد لم طلع القلافز كان ف ايديه يعني لقتل الراجل هو صاحب القلافز

فجاة تجي ايد شخص من الخلف وتغم نفس غفران

الدكتور رئيس الاطباء يشوفلها ويضحك

غفران عضت الشخص لمسكها من الخلف بقووة وضرباته ع بطنه بمرفقها الشخص رج للخلف شاد بطنه بوجع غفران دفت الدكتور بقوة الدكتور طاح وطلعت تجري نزلت لكن لم وصلت للباب شافت سيارات سود وشباب زحمه رجعت خشت بسرعه خش لغرفة الممرضات مرعوبه كانت ف ممرضة

غفران: لو سمحتي برحمة والديك تساعدين ارجووك

ممرضة: تفضلي خير

غفران طلعت هاتفها وفتحت الرمز حولاته الرمز من الهاتف وعطاته لممرضة: هدا هاتفي تعرفي المركز لفيه الدكتور جهاد هو مركز ال،،،،، تمشي للمركز تعطيهم الهاتف تمام ماتخافيش ومتعطيش اسمك للمركز

ممرضة خافت: حاظر

غفران: ارجوك ماتخافيش وساعديه بللهى عليك تمام

ممرضة: اكيد

غفران طلعت ونزلت بتطلع من الباب الرئيس شافتهم قدامها حاولت تهرب لكن شدوها

الممرضات يشوفو فيهم

الاطباء

لكن

رئيس الاطباء قاللهم: ماحد يخاف هادي مريضة نفسيا هاربه من المستشفى

وطلعو غفران

ف السيارة

شخص: شنو وضع البطولات هدا وااووو

غفران دفلة عليه:

شخص طربقها كف

..

..

..

..

..

غياث . لميس ياسر خلاص

لميس تبكي: مستحيل جهاد يقتل

غياث: واني عارف

تررررن ترررن

غياث. ايووة شن صار

صاحبه: ز مطلبت منا راقبنا المستشفى اليوم ف حركة مش طبيعيه تلاته سيارة سود وراى بعض خشو وفخمات وطلعو وراى بعض لكن خش صاحبنا للمستشفى وقال هادم جايين عشان ياخدو وحده مريضة نفسيا هاربه منهم

غياث: كيف يعني شن دخل مستشفى الامراض النفسيه بسيارات سود فخمات انت بعقلك هادي عملية خطفف الحقووهم … وصكر الخط

غياث: لميس اسمعيني بلا بكي

لميس شافتله

غياث: اني ندير ف كل نقدر عليه عشان خوك خلاااص اوتقي فيا

لميس ساكته

غياث: خليك قوية ياعمري عشان بوك اني طالع مشوار وجاي

لميس: باه

غياث باس راسها وطلع

غياث ركب سيارته متعصب : انت كيف متشكش ف السياراات فهمني انت غبييي ولا شنووو اني جااي وحسابك عندي انت خليك وراى السيارات

غياث ماشي للمستشفى وفجآة لحسن اللحظ يطلعوله تلاته سيارات من طريق المستشفى

غيات كان ماشي للمستشفى وهم طالعين بسرعه لففف السيارة ولحقهم

.

.

.

.

شخص ف السيارة: هدرزي معانا شن تشتغلي ياحلوة علاش ادوري عليا

غفران متعصبه: انت راجل؟!

الشخص : شن رايك انتي؟!

غفران ضحك مع انها خايفه: لو كنت راجل متقتل تبي تعرف من يكون الراجل الراجل لسجنته وهو مظلوم كلللل ناس شهدو عليا زور كلهم وقفو ضده الراجل لينقد ف ارواح الناس الراجل لـ لم يجيه شخص موجوع يعالجه ويهدرز معاه ويعاملة ز خوه … قاطعها بكككف

غفران خايفه وترجف لكن ضحكت : كلام الحق يوجع صح

.

.

.

.

غياث وراى السيارات وكل شويه يشوف وراى عشان يشوف جمعته وراه اولا لكن مكنوش وراه اتصل بيهم

غياث: وينكم انتم

جماعته: ندورو ع السيارات

غياث: السيارت قدامي حني قريب نخشو ف شارع ال،،،،، بسرررعه… وصكر الخط

تتتررررن ترررن

غياث هدي وسيطر ع صوته: ايوواه ياعمري

لميس: حبيبي وينك

غياث: خيرك ف شي

لميس: لا شي لكن اتصلو بـ بابا بيحولو جهاد لنيابه

غياث: مش رح يتحول حد رح يطلع جهاد اليوم ولو مطلعش اليوم اني معادش نبدا راجل

لميس: غياث معاد تقول هكي وينك

غياث: اني مشغول كلمي بوك ميطلعش من الحوش لا نيابه لا للمركز برا من الحوش متطلعوش

لميس خافت: لكن

غياث عرفها شكت فيه: نحبك باي… وصكر الخط

شاف المرايا وفعلا جمعته وصلو وكانو وراه

غياث اتصل بيهم: ايووا اسمع جهزلي مسدس وقرب ع سيارتي الشباك لجنبي مفتوح احدف للمسدس من الشباك معندناش وقت

صاحبه: تمام لكن غلط لنديرو فيه هادي شغلة للشرطه مش شغلتنا

غياث فصللل: ماتبيش تنقد البنت معاي ارجع من مسكك حني شغلتنا نحمو الناس بصفه عامه فاااهم قررب واحدف السلاح

صاحبه: تمام

غياث صكر الخط

وقربة السيارة وفعلا حدفوله السلاح من الشباك

غياث شاف السلاح جنبه اتصل: اسمع توا ممكن يشوكو فينا انتم نقصو ف السرعه واطلعو من قدامهم عشان يتحاصرو لان ممكن يشكو ف السيارات لوراهم

صاحبه: علم تو نتواصل مع الباقي

غياث: ميا ميا.. وصكر الخط

.

.

السيارة استمرت

تمشي حوالي ساعة ونص

غياث: الصبببر

خشو لمكان مهجوور وفيه خيم ز النجع

السيارات وقفووو غياث رجع بسيارته رجعععععع عشان ماحد ينتبه ع السيارة بيتصل بيهم لكن التغطيه صفر ونزل الهاتف ونزل بسلاحه

الخاطفين نزلو وخشو لخيمه من الخيم

.

.

.

.

الممرضة روحت مرعوبه غيرت ملابسها وطلعت للمركز لكن معطتش الهاتف لـ المركز: السلام عليكم

الضابط: وعليكم السلام تفضلي

الممرضة: لو سمحت نبي نشوف جهاد عدنان

الضابط: اكيد ياعريف

العريف: نعم

الضابط: نزلها

العريف نزلها وعطو علم لـ جهاد ف بنت بتزوره فكرها غفران

جهاد: مني انتي

الممرضة ساجدة: اني الممرضة ساجده

جهاد: وانتي شهدتي زور اي تفضلي خير

الممرضة: اني مشهدتش زور ومستحيل نشهد اني اليوم رجعت كنت واخده اجازة

جهاد: اهاا تمام

ممرضة: اليوم ف بنت عطتني هاتفها وحكولي علها انها كللل يوم تجي للمستشفى مانعرفش اسمها وياريتني عرفت لكن….. وسكتت

جهاد: اسمها غفران البنت ليش عطاتك هاتفها وينها؟

الممرضة: مانعرفش اسمها لكن البنت نخطفت اليوم

جهاد: من نخطف انتي شن تخرطي كيف شكلها البنت اوصفي البنت

الممرضة ترجف: قصيرة بيضة عيونها كبار

جهاد: مش هي…. قاطعاته

الممرضة: وعندها غمازة

جهاد. اطلعي ياسر كدب مش هي

الممرضة: لك،،،

جهاد قربع الباب: تعالللللل طللعههااا.. وعطاهم بظهره

الممرضة: افهممممني معرفتش نتصرف

جهاد عطيها بظهره: اطلعي وخيا مانبيش نغلط فيك بلكلام اطلعي

العريف خش وطلعها

الممرضة خشت لضابط لكن خافت ماعدش تقدر توتق ف حدد البنت هادي عنده خيبه كبيرة ف التقة طلعت البنت والهاتف معاها

.

.

.

.

غياث شاف لواحد يقول درسو السيارات ف الظل متع الخيمه معادش بنطلعو غياث شافهم ولعو السيارات ودرسوهم ف ظل الخيمه وخشو كلهم ف خيمه غياث معرف وين يخف روحه خش تحت السيارة حاول يتصل من تحت السيارة لكن التغطيه عفسة فيه

.

.

.

البنت خدت تاكسي واتجهة للمحكمه خشت وهي تررررجف شافت شخص ف الممر واقف مع مراة ويقوللها تفضلي ياامي اي خدمه واي وقت وباين عليه انه كويس يقول امي قربتلهم

ساجده وترررجف وواضح علها الخوف: السلام عليكم

واصف شافلها:وعليكم السلام

ساجده ترجف ف كلامه:ممكن شوية من وقتك

واصف:اكيد تفضلي معاي…وخش لقاعة متع المحكمه كانت فاضيه

واصف: تفضلي

ساجده تتررجف اول مرة تنحط ف موقف هكي:اني مانعرفش نتصرف ومانعرف حد هني انت شرطي؟

واصف: انتي قوليلي خيرك واني نقولك شن تتصرفي اني محامي

ساجده تنهدت:اني ممرضة تمام وعندنا دكتور ف المستشفى سجنوه بجريمه وهو مش مدايرها والمستشفى كلها شهدت ضد الدكتور لكن اني مشهدتش اني مكنتش موجوده وقتها

واصف: وشن لياكد انه الدكتور مش مجرم

ساجده:عندي اذله تتبت ان الدكتور بريئ ورئيس الاطباء لعندنا هو السبب وصاحب الجريمه هو ولده ولد رئيس الاطباء اسمه جهاد

واصف:يعني ف زوز اسم جهاد ف المستشفى

ساجده: اي وولده جهاد هو صاحب العملية هي القصة بدت ف عملية خشو الدكاترة التنين وتنين بااسم جهاد ومعاهم ممرضة مساعده ليهم جهاد ولد رئيس الاطباء هو دار العملية وارتكب الخطا الطبي وقتل المصاب والممرضة من يوم العملية مفقوده

واصف: انتي قلتي انك مش موجوده ف المستشفى من وين جايتك المعلومات هادي

ساجده: لانه رئيس الاطباء هو نفس بوي

واصف بصدمه:بتسجني بوك وخوك عشان شخص بريئ ومتعرفيش

ساجده: معاد تقولي خوك ولا تقولي بوك اني اسمي ف جميع اوراقي ف وراق التخرج ف وراق التعيين باسم جدي اب امي ميشرفنيش انه يكون بوي

واصف:شي شخصي لكن علاش مشكيتيش ف بوك

ساجده:مقدرتش نوتق ف المركز لانه رئيس الاطباء رح يعرف ان اني لمشتكيه

واصف: كلامك لقلتيه تقدري اطلعي بيه الدكتور

ساجده: نعرف لكن مانقدرش اني

واصف: اني ف شني تبيني نساعدك

ساجده:عندي هاتف فيه صورة جهاد طالع من العملية وفيه فيديو خطف بنت من المستشفى (طبعا هادي غفران)

واصف:للللحظه انتي كيف صورتي عملية الخطف يعني سمحولك تصوريهم او متعاونه معاهم!!!!

ساجده:الهاتف فتحته ع الكاميرا ودرته ف جيبي ووجهته عليهم وصورهم بدون مايحس عليا حدد

واصف؛ كويس عطيني الهاتف

وشاف كل شي ف الهاتف

واصف:الصور يسببو ف توقف المستشفى لانهم شهدو زور للعلم

ساجده: اي عادي تتصكر ف النهاية شهدو زور وانت تعرف شن يعني شهادة الزور

واصف:اني لنعرف بس للاسف انتي رح تشهدي ورح تكوني موجوده

ساجده:مستحيل اني قلت من الاول

واصف:الادلة اطلع الدكتور مية ف المية انتي ضروري تشهدي معاه

ساجده:اني لو نشهد معاه ندمرر

واصف: علاش او شهادتك زور حتى انتي

ساجده:مش اني لنشهد زور لكن مانقدرش

واصف مدلها الهاتف:اسف بدون شهادتك مش رح نساعدك…وعطاها بظهره بيطلع

ساجده:لانه بوي حالف عليا لو نسببله مشكله رح ياخد مني امييي

واصف تلفتت: مفهمتش

ساجده: رئيس الاطباء يعني بوي مطلق امي من12 السنه وامي حاولت تهرب بيا لكن بابا اعترض وغصبني نقرا تمريض عشان نقعد قدام عيونه لكن ماحد يعرف انه اني بنته لاني مانبي حد يعرف واني شرطت عليه ان ماحد يعرف ووافق وف يوم اني ف المستشفى (سكتت)خلاص الموضوع شخصي افهمني لو سمحت

واصف:اني نبي نساعدك لكن رح يسالوني من وين الدلائل شن رح نجاوب

ساجده بتتكلم

واصف: انتي تخافي لازم تتقوي لاني ف نهاية ف شخصين ف خطر البنت المخطوفه والدكتور وهادم ف ايدك انتي

ساجده سكتت وقت:تمام لكن رح تكون موجود انت

واصف ابتسم:اعتبريني اني استلمت قضية الدكتور رح نشوف الوراق وامتى عنده محاكمه ونقولك

ساجده: اني تاخرت هلبااا (شافت الساعه ف ايدها)موعد امي متع الدوا فات منقدرش نستنى

واصف:اوكى عطيني رقمك ونعطيك الموعد

ساجده:تمام…وعطاته رقمها

.

غياث حاول اكثر من مرة يتصل مقدرش بسبب التغطيه دار الهاتف صامت لانه ممكن ف اي وقت ترجع التغطيه

.

.

تتبع ………

لقراءة الجزء التالي : الجزء السابع عشر من رواية المشوه

لقراءة الجزء السابق : الجزء الخامس عشر من رواية المشوه

للإطلاع علي فهرس اجزاء الرواية : رواية المشوه ( جميع الاجزاء كاملة ) للكاتبة ميشو محمد

جميع الحقوق محفوظة للكاتبة ميشو محمد .