الجزء السادس عشر من رواية عاصفة الصمت

وفي الجزء السادس عشر من رواية عاصفة الصمت دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .

الجزء السادس عشر من رواية عاصفة الصمت

مروة : خودي كندرة صفاء واطية
لبنى : تي رجل صفاء كبيرة عليا
يﻻ خليه وخﻻص بكل هالنزار جايب كنادر صواريخ
* وبينما هيا ﻻبسة فستانها اﻻحمر الحلو اﻻنيق وشعرها مسرح طلعت لمراية وسط الحوش وجنب الباب جيهة المدخل واست كحل عيونها وكيف بتقيم تقرير متع نزار بتشوف هدا شنو انفتح الباب … طلقاته وبتهرب بس رجلها خوتها وقريب طاحت فمسكها نزار بكل خفة
وكانت المسافة متقاربة جدا … ينظرلها نزار بكل ود
لبنى ولو خدودها حمر فجأة ..
فقالها نزار خدودك طبيعي واﻻ مكيجة
لبنى بكلل ارتباك : ﻻ مش امكيجة
نزار : احيييه كتفي قيمي روحك ياضرسي
لبنى : رجلي متشكلة مش قادرة نوقف عليها
نزار : به عكزي وقعمزي عالكرسي كتفي ايوز فيا
شدت لبنى يد نزار وعكزت وقعمزت عالكرسي

طلعت خ رقية من دار جلسة وشافت نزار شاد كتفه فقتله : خيره كتفك
لبنى : دار
قاطعها نزار وقال : انضربت في الباب
خ رقية : سمله عليك …رد بالك
نزار : ان شاء الله …. هي شنو مازال ماتبوش تمشوا
خ رقية : ﻻ خﻻص كلهم واتيين
نزار : به خلي ناخد حاجة وتلقوني في سيارة
* خش داره نزار خدي حاجاته وطلع لسيارة

حنين : اسمعي مش ادليني بيه تلفونك… اعطيني نتكلم
غادة : بري من عليا بنكلم نزار
حنين : به وبعدك بنكلم انا
غادة : باهي بري … ..

نزار : يامساء الحب
يامساء السعادة
غادة : مساء الفل نزوري
نزار : حبيبي شوية هكي انوصل العويلة و نكلمك
غادة : مش اتعطل عليا
نزار : ﻻﻻ مش معطل اهو جايين لسيارة
غادة : اوكي باي

القيافة : ﻻﻻ امه مراة كبيرة مسكينة وهوا ولد واحد خليه لعيلته

بلقاسم : اها … قبل بنرفعه لتونس ينفدلي مهمة غادي … لكن مش مشكلة خﻻص … انا خلي نسافر توا والسبوع الجاي ﻻ اللي بعده نبيه يكون عندي .. فاهم
القيافة : ان شااااء الله …

نزار : وينها صالة
خ سمية : في راس حسن
نزار : اوك …
* فتح نزار اف ام … اغنية نبيه كفاف
لبنى : حيه نزار والنبي قوي فيها

ن …
لبنى : نبيه رداي …يكون معاي يساعدني حتى بالراي …
نبيه قراي حكيم ودبار ووراي
نزااار : هههه به شن رايك انقصها وكملي انتي غني وخﻻص
لبنى : ههه ﻻﻻ خﻻص خليها
* بعد دقيقة *
للبنى : نزار
نزار : اها
لبنى : بالله عليك خودلي السي دي هدا
نزار : به
لبنى : مش تنسى
نزار : ان شاء الله
* سكتت لبنى شوي …
وقالت : نزار
نزار : نعم
لبنى : زعما فيه راجل هكي زي اﻻغنية
* اكتفى نزار ب ابتسامة *
خ سميرة : اللطف اتحشمي يابنت
خ رقية : ريتي واﻻه معش فيه حشم …
خ سميرة : حالة ياوخيتي قبل نتحشموا من هالحاجات
خ رقية : بالله ﻻ عاد حشمة وﻻ واحدة
خ سميرة : هداكا ايماتنا انا وياك غير نسمعوا بموضوع راجل نتخزرطوا لين قريب نخشوا في الحيط
خ رقية : تتفكري في الخضار ياسميرة هههههه
خ سميرة : ههههه شن فكرك فيه يامنجوها
نزار : اهو الفضايح بيطلعوا هاه ههههههه شن قصة الخضار يمى
خ رقية : هههه مافيش قصص الهى فسواقتك
لبنى ل صفاء : بنهبل عليه يا صفاء ايهبل خوك
صفاء : ههههه انتي خﻻص عليك

{انا ﻻزم ندير راي … نسافر نسكن في الشرق وندور خدمة غادي … لكن غادة …ﻻﻻ مستحيل نسافر ونخليها }

{شن السيارة اللي تلحق فيا … هادي}
* زاد نزار السرعة وزادت السيارة اللي تلحق فيه السرعة

خ رقية : بشوية ياوليدي خيرك تجري
خ سميرة : اهو بيديرها طيارة هي

{السحنة هدا شن يبي ومن باعته احسن شي انتوهه }
* وهوا يشوف للمرايا ولبنى
عايشة الدور تحسابه يشوفلها …

ومن هون لهون طلع نزار من زنقة زلقي قدامه السيارة اللي اتلحق فيه … وقف نزار سيارته وسيارة مرش امظلم واقفة معش فهم شي نزار
{سيارتي نوعا ما كركوبة وسيارة هادي كبيرة و جحجا لو تحركت بسرعة 200 وخشيت عزنقة المقابلة الضيقة مش حيقدر يلحقني حيرجع ويوخر من نفس الشارع اللي جي منه بش يقطع عليا الطريق .. وهكي لو تحركت بسرعة 200 وخشيت منها حنحصل شوي وقت بش نقدر نهرب منه ونتوهه ونطلع عجردينة ثم نوصل لصالة انحط العيلة في حالة انه مالحقنيش طول }
صفاء : شن فيه يانزار …
نزار :طبسوا روسكم لوطا وماحد يتكلم نص كلمة
* دار الكل زي ماقالهم نزار من سكات وطبسوا روسهم .. فجاة نزار وخر سيارته بكل سرعة وخش عالشارع المقابل وفعﻻ البي ام وخرت ورجعت من نفس الشارع
نزار : نحو كنادركم وحطوهم في يديكم لما نقولكم انزلوا انزلو طول
خ رقية : عﻻش شن فيه
نزار : ماتناقشونيش ياودي ديرو زي مانقولكم ووقت نوصلو الصالة انزلوا جري وخشوا صالة
خ رفية : ترعش فينا وخﻻص
نزار : مافيش رعاش غير ديرو زي مانقول
* الكل مستغرب من تصرفات نزار الغريبة نحو كنادرهم وحطوهم في عبهن
وصل نزار قدام صالة وقال : انزلوا فيييسع بسررررعة اجروووو
* نزلوا كلهم وخشو صالة وعطاها نزار الشياط …
شافه صاحب اللبي ام وقعد وراه لين نزار توهه …

{هييي توهته هالعافن هههه ادكرت جو افﻻم 007 تاريتني ننفع لهلحجات … مفروض ياخدوني نمثل فلم اجنبي}

الشقندي : هاه شنو ينفع ناخده عندي واﻻ ﻻ
هارون : نعم سيدي
الشقندي : شن صار بزبط
هارون : لحقناه وهرب منا على مرتين .. نعم كان معاه عيلته … وهرب منا وحط عيلته في مكان ما معرفناشي .. ووقت لقيناه تاني هرب منا …
الشقندي : تمام تمام معناها كويس في الهرب … مزال نجربوه في المطاردة وكان نجح حناخده عندي

{خلي نمشي نشري واقي حماية لصدر من عبدو السوسة … وناخد كمبيوتر ل للبنات…وناخد
لضرس اللبني سي دي اغنية كامل اﻻوصاف …شن تاني ياربي … خﻻص ونعكس شوية مع اﻻوﻻد بش مع ساعة 11 نمشي انروح بيهم }…

القيافة : برا ياسفيان لم الجميعا كلها وهد على الفتنة الكلب انا متاكد انه هوا اللي دار عملة اليوم
سفيان : الفتنة !
القيافة : ايه … وجيبه لعندي الكلب
سفيان : تم تم كون هاني

عبدو السوسة : وتعرف ويجيهم الديناري ياراجل ويشلط الميلن وجماعته
فاروق : ﻻ عاد بجديات
عبدو السوسة : والله جديات خطير الديناري… كان نلقى نولي زيه . يحسبولي الف حساب
فاروق : ههههههه تي انت سوسة شن جيبك لديناري
السوسة : سوسة لكن انوكل فيك عيش واﻻه تقبض ف فلوس واﻻه هه كان مش مني راك مش ﻻقي ماتاكل
فاروق : الله كريم

نزار : السﻻم عليكم
السوسة : وعليكم السﻻم . . كيف كنا ف سيرتك
نزار : قرمة اماﻻ
السوسة : هههه ﻻﻻ كنت نحكيله ع بطوﻻتك
نزار : حسستني قرنديزر
السوسة : ههههه فتت القرنديز انتا . .. هاه شن طلبك …. مسدس واﻻ موس بوخوصة واﻻ شنو
نزار : كان عندك واقي هات
السوسة : عننندي ويخي واقي اصلي حاجة صقع واصلتني من الجزاير
نزار : قصدك خانبها واﻻه
السوسة : ههههه ﻻش اتعري فينا
المهم حاجة صح …. ستنى شوية نجيبلك تختار

فاروق : كيف حالك ياديناري
نزار : اهو معدلة
فاروق : ديناري … تشغلني معاك
نزار : معش نشتغل ف شي انا
فاروق : اي حاجة حتى سواق متاعك فديت من الخدمة تحت السوسة
نزار : تي انا سيبت الخدمة راه خﻻص
فاروق : به توسطلي عند القيافة نشتغل حتى متع قهوة وشاهي
نزار : باهي تو نكلمه … غدوة ساعة 3 كون قدام مستودع القيافة تو انجي ونكلمه
فاروق : تمام بالله ماتقولش لسوسة
نزار : تمام
*طلع السوسة من المخزن وجابله تﻻتة واقيات صدرية … واختار منهم واحد نزار زلبسه وخلص السوسة وطلع مشي محل الحاسبات خدي كمبيوتر وطاولته …
خطم ع محل سي دي يات خدي السي دي ومشي لجماعته يهدرز

صفاء : ريتيه الكلبة بنت نعيمة
مروة : ايه درهتلي كبدي
لبنى : تعرفوا كان ماتهنيش روحها واتنزل مكسورتها مامظلة اﻻ نايضتلها ونريشلها شعرها
مروة : تحساب اﻻ هيا انخطبت
صفاء : ومشكلة فرخة الزفت
لبنى : كيف طالعة من تانوي هالقردة
* ناضت وردة ومادة مكسورتها وجتهم وقعمزت بحداهم *
وردة : شن مدايرات يابنات
صفاء : ماشي الحال
مروة : الحمد لله
لبنى : كويسة
*وردة اتواسيي في قصت شعرها ومادة صبعها متع شوفوا كان ماشفتوش *
بعد ساعتين
خ سميرة : خيره معش جي ولدك
خ رقية : ايه عليك حشمة حتى امالي العرس اقريب ايروحوا

حاتم : غير خوووود هالحشيشة خود يا دناريه
نزار : فكنا ياحاتم تعرفني مانحبش صنته هالعفن
حاتم : باه هاك خود طاسة وسكي
نزار : حشش واسكر ع راحت راحتك مش ﻻزم تعزم عليا
حاتم : تعلف يا ديناريه بجوز انا
نزار : واتجوز من شادك
حاتم : بنتجوز غدوشة
نزار : تتجوز عينك مش غير تتجوزها حاتم : تو اتشوف ولد عمها اوولى بيها يا دينالي
حاتم : &/#$ ماحد داخل عليها غيري
نزار : ماتنرفزنيش ياحاتم والله انوضلك راه
حاتم : ديرها كانك راجل يامان
* وناضله نزار يعفجه طريحة امقومة وقاله : بش تعرف تكتير الدوة شن شكلها ياخامر

* مسح حاتم فمه من الدم ووقف يدعدع من السكير وقال : ماك واخدها يادينالاي قول حاتم قالها
…طلع نزار وماعدلش ع حاتم نهائي …وخطم عصالة وكلم الشاب والشاب كلم البنت متع الصالة وطلعوا عيلته وروح بيهم
ولما خشوا كلهم لديارهم بش ايبدلوا …مشي نزار لسيارته قام كل الحاجات وحطهم ف المربوعة وسكر الباب …
نزار : يمااااااااااا ماطيبتوش حاجة
خ رقية مقعمزة في دار الجلسة جاوباته : ﻻﻻ مادرنا شي
نزار : فالحات والله ضاربينها عشي
ف صالة وانا مخلييني زي القزون
ماه قاعد من غير مراة الله غالب
كان هدا شاقية بيا
خ رقية : شن اتبرطم ياولد
نزار : ﻻ شي … شي
* خش نزار للمطبخ يقربج بيدير نص تن ع طلعة لبنى من الدار ﻻبسة توتة وقايمة شعرها فوق
خاطمة وشافت التقرير
لبنى …ايه حق خلي نشوف شن هوا هالورق …
وفتحاته لبنى وقرت اﻻسم …نزار خليفة فﻻن قرت قرت لين فهمت ان فيه اﻻيدز
وجهى ولى احمر وبكت ومشتله تجري ف المطبخ
لبنى : نزار نزاااار نزززااار
* تلفتلها نزار ولبنى  … خدي نفس نزار عميق وقالها : خيرك خيرك ياضرسي
* حاول يبعدها بس هيا شي امكبشة فيه لين معش عرف كيف يدير
لبنى : ن ن نزار …
نزار : خيرك يابنت
لبنى تبكي دموعها مطررر وقتله : اااانت فيييك… اﻻيدززز فيك اﻻيدزززز اﻻيدزززز
نزار : تي ﻻ
لبنى : ماتكدبش عليا فيك اﻻيدززززز
* سمع نزار دوشة مروة وصفاء تتقدم… فحاول تاني انه يبعد لبنى معش قدر فقالها : تي حولي يالبنى
* ولبنى ﻻ حياة لمن تنتدي قاعدة مثدومة ومن صدمتها معش تسمع فيه
فتحرك خطوتين ولبد وراء باب المطبخ وحط ايده ع فم لبنى وطبعا لبنى مزال مافاقتش لنفسها شن ادير من شدة الصدمة ….
صفاء : ريتيها بنت نعيمة جابتهالي صفااار
مروة : درهتلي كبدي

مروة : اماﻻ وين لبنى المعفنة
صفاء : تلقيها ف تركينة من التراكين تكتب ف اشعار حب هههه
مروة : مسكينة وياريته ايعبرها هوا
* لبنى اقريب اطير خافت صفاء ومروة يقولوا نزار … ونزار يشبح ل لبنى واشرلها على من يتكلموا
نزلت راسها لبنى …

مروة : لكن مسحت ع كبدي لبنى وقت ناضت رقصت ونخت بشعرها.. … لين بنت نعيمة انهزبت
صفاء : اصﻻ ماتعرفش ترقص وردة
مروة : لكن لبنى بريمو خاطري نرقص زيها ….

صفاء : ايه تو نقولولها تعلمنا
طشة ….نحسبك ف قهوة معاي
مروة : ايه ايه … واهو تلقيني ف دار جلسة سهرية قرمة اليوم
صفاء : ههههههه
مروة : احسبي نزار معانا خلي ايجي ايقرم معانا
صفاء : به ….

* طلعت صفاء لدار الجلسة ورفعت صفرة القهوة *
طلع نزار ولبنى من وراء الباب
نزار : شردتيني
لبنى : اسفة والله ماقصدي بس انت صغير يانزار شن جيب المرض هدا عندك
نزار : اس اس …
* شدها من ايدها وخدها للمربوعة وقالها : اسمعي التقرير اللي شفتيه مزيف …
لبنى : كيف
نزار : مدايره بش يعطوني امتياز في الشركة
لبنى : كيف
نزار : المهم مزيف
لبنى دارت شوارب الحرجانة … وبتبكي تاني زي الطفل وقتله : انت ادس عليا
نزار : وحق ربي مافيا حاجة يالبنى وحق الله ورسوله تقرير مزور
مسحت دمعتها لبنى وقتله : باهي ماتقولش ل امي عاللي صار غير مانندريش على روحي
نزار : شن بنقوولها …ربي يهديك وخﻻص … المهم ماتقولي لحد عالتقرير سر باهي
لبنى : باه ….
* تلفتت لبنى عالجنب وشافت الحاجات اللي شاريهم نزار *
لبنى : هااا كمبيوترررر
نزار : ايه ديري روحك ماشفتيشي نبيه مفجاة حتى ل مروة وصفاء
لبنى : به …خلي نمشي بحداهم اماﻻ
نزار : لبنى
تلفتت لبنى وقتله : نعم
نزار : معش ترقصي في العراس
ابتسمت لبنى وقتله : عﻻش
نزار : مرات ايصوروك بنقال ﻻ قدر الله … بنات الحرام كاترات
لبنى : ان شاء الله
نزار : هاك السي دي
لبنى : تسلم نيززو
نزار : حقا
لبنى : نعم
{زعما نسئلها من الشخص اللي يتكلموا عليه صفاء ومروة اللي تكتب فيه اشعار لبنى لكن ﻻﻻ بالك نحرجها مدام ماغلطتش وماكلمت حد خليها مانقدرش نجبرها تنسى شخص ما }
لبنى : نزااااار
نزار : ﻻﻻ شي خﻻص بري هدرزي عالبنات
لبنى : به
* طلعت لبنى وقعد نزار يخمم في اللي صار قبل شوي ….وبعد شوي فجأ نزار خواته ب الهدايا والكمبيوتر … وركبه نزار يقرا في اﻻرشادات ويركب في القطع وركب الطاولة وقعمزوا وحدة وحدة يتعلموا عليه *

ثاني يوم ساعة 10 صباحا في المطار
عماد : الحمدلله ع السﻻمة انست
مكرم : تسلم الله يأنسك ياعماد …. عماد : بايت عليك مرهق
مكرم : هلبا
عماد : شنو صفيت المهمة اﻻخيرة
مكرم : ايه … فديت من التصفية
(شغل التصفية وهو اي شخص ليبي يبي ايدير انقﻻب على النظام او يحرض ع انقﻻب من برا البﻻد يبعتوله شخص اللي هوا زي مكرم ويصفيه اي بمعنى يقتله )
عماد : كثرو الكﻻب الضالة ياراجل
مكرم : بكل ياراجل
عماد : هي خلي نحطك ف الحوش

مكرم : تمام به

نزار : غادة حبيبتي انا توا اول يوم عمل مايجيش نشد النقال ونهدرز
غادة : باهي اول مايتم الدوام كلمني مستاحشاتك
نزار : حتى انا ياروحي باي
غادة : باي

تووون تووون
خ عايشة : غادة نوضي افتحي الباب وانتي زي القطوس غياب من المدرسة ونوم وخﻻص
غادة : هيا هي
* ناضت غادة بتفتح الباب … وفتحت الباب …. ابتسم مكرم ابتسامة عريضة وقالها : السلام عليكم

يتبع………..

لقراءة الجزء التالي : الجزء السابع عشر من رواية عاصفة الصمت

لقراءة الجزء السابق : الجزء الخامس عشر من رواية عاصفة الصمت

للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة

جميع الحقوق محفوظة للكاتبة لوزة .