وفي الجزء السادس من رواية إمرأة بلا هوية دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة بت محمد جمال الدين .
الجزء السادس من رواية إمرأة بلا هوية
رهف فضلت مبحلقه فيه وم قالت اي حاجه بس كريم قرب منها وهو مبتسم وقال : حمد الله علي السلامه م مصدق اني اشوفك تاني ،،،،، شهور وانا بفتش فيك ،،،،، امي مرضت عشان كدا وقفت البحث عنك ،،،
رهف اتراجعت ورا ووقفت جنب خطاب وهي في قمه الدهشه و قالت : انت منو انا م بعرف زول اسمه كريم! خطاب : لسه م عرفتنا بي نفسك ووين كنت طول الفتره ديك ؟؟ البت دي فاقده الذاكره وفي فتره علاج ياريت تكون واضح وتورينا م يثبت انك بتعرفها ،،،،،
كريم : انا كريم عادل التهامي يعني رهف بت عمي عماد التهامي ،،،،،
سكت كريم وطلع جواز سفر فيه اسمه بالكامل ومداه لي خطاب وقال : فتشت عنها كتير الا بالصدفه لقيت ممرضه شغاله في المستشفي الكانت راقده فيه وحكت عن بت فاقده الذاكره ولما مشيت الاستعالامات عرفت انها هربت من المستشفي وضاع املي كيف القاك في البلد الكبيرة دي 
وبديت ابحث تاااني من جديد واسأل بس الحمد لله شفتك امس داخله الصيدليه دي لكن مسافه وقفت الحافله ونزلت لقيتك ركبتي مع الاخ دا ،،، وسألت الدكتوره الفي الصيدليه عشان اتأكد،، والليله جيت الاقيك او حتي اعرف خبر عنك .
رهف عيونها اتملت دموع وقالت بصوت مبحوح : الحمد لله يعني انا عندي اهل ؟
كريم قرب منها وقال في حنان : اكيد عندك اهل وكمان بحبوك شديد 
خطاب زح رهف وراه وقال في ضيق : تطابق الاسماء واضح بس انا لسه م مطمن،، مر علينا المساء تكون رهف خلصت شغل وانا كمان فضيت ونشوف البحصل شنو 
كريم بكل ادب : خير مافي مشكله،،، بس ممكن اتعرف عليك ؟ يعني بقصد صلتك بي رهف شنو؟
خطاب : خطاب سليم رجل اعمال صاحب الصيدليه دي اتعرفت علي رهف بالصدفه،،،،
رهف : خطاب ليهو افضال كتيره جدا علي انقذني من الضياع وعرض نفسه للخطر عشان يحميني واذا عايزه احدد ليك افضاله علي!!!! لحدي الصباح م ح نخلص.
كريم : عظيم يبقي مديون لينا بشكر…
خطاب : الواجب م عليه شكر وانا م عملت غير الواجب….
رهف : طيب ي كريم نحن موش من بورسودان ؟؟ انت جيت هنا كيف ؟؟
كريم في حزن : الوالد كان عيان ومتابع مع دكتور هنا واضطرينا نأجر بيت لانو فتره العلاج طالت وبعدها الحاج اتوفي وقررنا نستقر في الخرطوم خاصه انتي وحبوبه الله يرحمها جيتو عشان تستقرو هنا ،،،، يعني م فضل لينا زول في الشرق…
رهف في تردد : طيب التحاليل اثبتت اني كنت واضعه قبل الحادث !!!وين ولدي ؟ موش كنت متزوجه ؟؟ م تقول لي الولد مات ؟؟
كريم في ارتباك واضح :ددد دي قصه طويله لما نقعد بحكيها ليك…
قعدت رهف وهي فكرها مشغول ،،،،، خطاب لاحظ ليها ،،،، قرب منها وقال بصوت منخفض : م تشيلي هم حتي اذا طلع ود عمك وكان زول م كويس،،، م بخليك تعيشي معاه ،،، واصلي شغلك مع نبيل وم تحسسيهم بي شي لحدي م نشوف البحصل شنو…
رهف مسحت دموعا وقالت في حنان : الحمد لله انك معاي
خطاب طبطب عليها وقال في حنان : ربنا معانا نحن الاتنين
رهف بدت تتعلم الشغل بسرعه وهي بمزاج ممتاز لانها اخيرا عرفت اهلها حتي لو م متذكراهم المهم هم متذكرنها ،،،،،،،
ساعدت الاء ونبيل كتير ولما الساعه 4 جات،، الاء قالت ليها : هوفا يلا انتي تعبتي حبيبتي… ممكن تمشي البيت بعد دا
رهف سرحت مسافه وردت في حزن : امشي البيت ؟ انا عندي بيت اصلا ؟ انا انسانه بلا هويه…
الاء : آسفه حبيبتي م قصدي اقلب عليك المواجع بس انا خفت عليك لانك مريضه 
رهف : ولا يهمك بس طالبه منك خدمه ممكن ؟
ٱلاء : انتي تأمري حبيبتي انا والله حبيتك من شفتك 
رهف في ابتسام : تسلمي وانا كمان والله… عايزه لي سكن… يعني زي سكن الطالبات وكدا…عايزه اعتمد علي نفسي واتعالج ولو علي القروش م مشكله ممكن افتش شغل المساء كمان… ممكن تساعديني لحدي م الاقي نفسي ؟ م عايزه ابقي عاله علي زول خطاب افضاله كترت علي وحتي اهلي م عايزه اكلفهم حاجه……
الاء في حزن : اولا انتي انسانه كويسه وربنا ح يشفيك … حظك حلو في سكن موظفات وطالبات جنبنا… هي اصلا داخليه كليات خاصه وساكنين معاهم موظفات،،،،،، يلا بكره انا م شغاله بمشي ابحث ليك عن الموضوع دا اعتمدي علي 
رهف بدون م تحس جرت وحضنتها وقالت : شكرا ليك جميلك دا عمري م ح انساه .
الاء : ي بت جميل شنو نحن بنات زي بعض ودي ظروف حصلت ليك والمؤمن مصاب .
عاينت الاء علي الشارع وشافت الموتر حق نبيل وصرخت في فرح : بلبل والله الود دا اتعودت عليه خايفه اتطلق في سببه بريدو شديد يووووخ رغم انو غاب كم ساعه بس حسيت بي فراغ عجيب نبيل اخوي والله
جا نبيل داخل ووشه حزين وعابس سلم في هدوء وقعد….
الاء : خير ي نبيل ان شاء الله م يكون في زول من ناس البيت عيان ؟
نبيل في حزن : لا كلهم كويسين…
عاين لي رهف وقال : آسف لظروف خارجه عن ارادتي اضطريت اغيب الكم ساعه دي بس اوعدك اعوضك….
رهف : لا عادي المهم تكون بخير
نبيل : شكرا… علي فكره خطاب قال بجيك بعد شويه .
رهف : اوك
بعد ساعه خطاب جا داخل الصيدليه
واعتذر لي رهف عن انشغاله طول اليوم وطلعو علي العربيه وقبل م يتحركو قال : كريم اتصل وقال منتظرنا في البيت ،،،، رايك شنو؟ نمشي ولا م نمشي ،،،،انا البريحك بس بعملو ….
رهف في حزن : بمشي اتعرف عليهم بس م بقعد معاهم عايزه اعتمد علي نفسي ،،، عايزه اشيل هم نفسي، عايزه اشتغل وادرس، اساسا عمي متوفي وامي وابوي يعني مافي زول مجبور علي ،،،، والظروف بقت صعبه م عايزه احمل الناس فوق طاقتها مهما اصرو اني اقعد معاهم برفض بشده ولازم اقنعهم بي ضروره سكني في داخليه،،،،
خطاب اخد نفس عميق وقال : انا فخور بيك …
فجأه تلفونه ضرب وسكت الجرس كم مره بعدها جات رساله ورهف ح تموت عشان تقراها وعشان تاخد راحتها طلبت منو يجيب ليها مشروب رمان ومسكت التلفون وقرت ( بيبي اتصرف انا الشقه النازله فيها دي م عاجباني عايزه اسكن في شقتك حلوه ومريحه ) قفلت رهف التلفون وقالت في سرها اووووف بلوه شنو دي كمان ؟ نشوف يا انسه عدن ح تسكني معاي كيف في الشقه…
خطاب جاب ليها العصير ولاحظ لي وشها متغير سأل : قريتي الرساله صاح ؟
رهف : دي حياتك الشخصيه ملكك وحدك
خطاب : بس شكلك م بقول كدا 
رهف في غضب : علي فكره ممكن تجي وانا بمشي عادي….
خطاب : منو القال كدا ؟ انا امشي وعدن تمشي بس انتي م تطلعي من الشقه…
رهف ابتسمت واتحركو ،،،،
مشت العربيه مسافه 40 دقيقه وبعدها خطاب قال : دا الحي حق ناس نبيل اتخيلي!
رهف : نبيل ساكن هنا يعني ؟؟
خطاب : ايوه اخوك شاطر في الوصف عرفته علي طول بس انتظري اتصل بي كريم دا الشارع بس م عارف البيت وين ؟؟
رهف عاينت بالمرايه وقالت : خطاب انتظر شايفه كريم واقف قدام بيت هناك…
خطاب رجع بالعربيه ورا وقال وهو مبتسم : ماشاء الله فعلا دا كريم 
بتحفظي الاشكال كويس!!!
رهف : اكيد م عايزه ذكاء يعني ؟
خطاب تلفونه ضرب ورد في انشراح : *اوووو اخونا النجم المشرفنا دائما لما تجي لازم اتصور معاك سيلفي نظام شهره وكدا يعني ،،،،
* جايي المساء طيب تشرف والله ،،،،
وقف خطاب قدام كريم ونزل ومعاه رهف طبعا… سلمو وطلب منهم يتفضلو علي البيت جوه وقعدو في الصاله.
( رهف عماد ؟ مصيره الحي يلاقي )
اتلفتت رهف عشان تشوف صاحبه الصوت وكانت اشجان بت عمها في العشرين من عمرها جميله جدا
رهف في دهشه : انتي اشجان صاح ؟ مرحبا،،
اشجان عاينت ليها من فوق لي تحت وقالت : زي م انتي لسه بتصطادي الاثرياء والوجيهين ،،، بس م عرفتينا بي صحبك ،،،
خطاب كان متجه عكس اشجان وبعدها قام عشان يسلم عليها واول م عينه وقعت عليها نطط عيونه في خلعة وقال بدون م يشعر : انتي ؟؟؟ 
————————————–
———————
*☆إمتناني *
*☆بت محمد جمال الدين☆*
*☆يتبــــــــــــــــــــــــــــــــــــــــــــع☆*
لقراءة الجزء التالي : الجزء السابع من رواية إمرأة بلا هوية
لقراءة الجزء السابق : الجزء الخامس من رواية إمرأة بلا هوية
للإطلاع علي فهرس أجزاء الرواية : رواية إمرأة بلا هوية ( جميع الأجزاء كاملة ) للكاتبة بت محمد جمال الدين
جميع الحقوق محفوظة للكاتبة بت محمد جمال الدين
