احداث تتالي والمؤلفة تبدع في تقديم الحب والجمال في سطور الرواية، الخيال جميل جداً عند رؤيته بين ابطالنا، يجعلنا نحب معه الكاتبة لابداعها الكبير في كتاباتها، لذلك دعونا نكمل قراءة الجزء السادس سوياً لمعرفة ماذا سيحدث مع ابطال حكايتنا ؟
الجزء السادس من رواية حنين الماضي للكاتبة لوزة ليبية
عقيل:الله اكبررر
سلمى:هه خلعتني
عقيل حط ايد فوق راسه والتانية ف خسره وقعد يرقص ويغني :العب العب ياولد شقلب هيا ماخصك ف حد
سوسن :ههههههههههه وه عليك ادير مستحيل بش معش ايصير اللي فبالي بالك
عقيل:تي اي اماﻻ شنو نبي نمنع حدوث كارثة انسانية.. وغمز ل سوسن
سلمى:اسكتوووو وقولولي من عبد الرحييم
عقيل يفكر فباله…زعما نقولها ؟؟؟ﻻﻻﻻ ﻻزم تعرف بروحها ﻻن كان بنقولها بتتشوش وبتقعد تجهد روحها بش تتدكر احسن حاجة تسكت ياعقولة .
سلمى:عقييييل خيرك ساكت منو هدا عبدالرحيم
عقيل:وين نندري نا …انتي قولينا من عبدالرحيم
سلمى:مانعرفاش اﻻسم هكي جي قدامي
عقيل:حاولي تدكري ^^
سلمى:لكن مش هدا البحر اللي فبالي
عقيل:اماﻻ كيف شكله
سلمى :فيه تقريبا دار هكي معش ندكر شن لونها….. توا نبي نمشيله توا ارفعني ليه البحر هدا
سوسن:بعيد ياسلمى البحر اللي فبالك في طرابلس
سلمى تبكي :ماخصنيش توا بنمشي لطرابلس حاسة ان فيه حاجة غادي .
سلمى تهمس ل سوسن : نشوف ف واحد ف البحر كان ايعوم يأشرلي مداير ايده وكأنها نقال .ولقطة تانية راكب موطو بحر ….
سوسن:يعاكس فيك يعني
سلمى:مش عارفة وتوا ادكرت عويلة مقعمزين لكن وجوه بس من غير مانعرفهم منو
سوسن:تو بشوية بشوية تتدكري…..عقيل هيا نروحو تو باتي يديرنا حالة
عقيل:اوكي هي
سلمى:ارفعوني لطرابلس فيه حاجة غادي بس مش عارفة شن هيا
عقيل:غير نروحو توا عمك مسعود ف شك يخليك تمشي طرابلس
روح بيهم عقيل وسلمى طول الطريق اتنق اتنق تبي تمشي لطرابلس
وصلو لشارعهم خشو
هدرزو وبصرو وضحكو قدام تلفزيون اﻻ سلمى مقعمزة ومتنكدة
خ رحمة:سوسن وسلمى نوضو حطو العشي هوا داك
سلمى :اوكي هي
خ رحمة:عدي ياسوسن شن قاعدة ترجي
خشو هما زوز للمطبخ
وتو العشي وتو الصفرة وحطوها ف وسط الحوش وقعمزو وتلقطو كلهم ع الصفرة
بعد دقايق
سلمى:عمي مسعود ….
ع مسعود:نعم
سلمى:نبي نمشي لطرابلس
ع مسعود:عليش شن فيه.
عقيل ياكل ويفكر فرصة نرفعها نا ….منه تتدكر ومنه نشوف ندوش حبيبتي
سلمى ل عمي مسعود:استحشت خالتي
ع مسعود:قولها اتجينا
سلمى:ماتقدرش تجي راجل خالتي ايقولها ﻻ
عمي مسعود:انا مانقدرش انشيلك
عقيل:انا نشيلها ياباتي بكرة ماشي عندي شوي امور ف طرابلس نرفعها تشوف خالتها و نا نشوف اموري ونروح بيها
عمي مسعود:امممممم
سلمى:بالله عليك ياعمي
عمي مسعود:باهي شيلو معاكم سوسن
عقيل:اكيد ياباتي شن بنعدى نا وياها برواحنا
ناض عقيل ومشي للكوجينة بيغسل يديه
لحقاته سلمى ووقفت جنبه تنظرله بعيون يملئوها حب
عقيل يهمس:كنك تحقيلي هكي يالهبلة
سلمى:اتهبل ياعقيل انت اكثر شخص وقف معاي …. ربي ايخليك ليا ياحبييي
ععقيل:له له له فكينا من الغراميات الله يربحك
سلمى:كنك بش انا خطيبتك … ماعمريش سمعت منك كلمة حلوة
عقيل:هههههه سلومة عدي ارقدي ليل عليك
سلمى:انت ماتحبنيش 
عقيل:وانتي ماتحبينيش 
سلمى:ومن قال 
عقيل:انا عارف الشي هدا 
سلمى:شن عارف o_O
عقيل :عدي توا ياسلمى بنمشي نتصل بصاحبي متع المطار نقوله يحجزلي تﻻت تداكر 
سلمى:هه كيف يحجزلك من غير ماتمشي 
عقيل:عادي يالشينة صاحبي هدا من كنا ف اﻻبتدائي يﻻ توا تصبحي ع خير 
سلمى:تﻻقي الخير ياعيوووني
تلفتلها عقيل وقالها :ياهبلة يالشينة ههههه
بعد عدة ساعات
سلمى ل سوسن:واخيرا كملنا توتاية شناطينا…ساعة كم توا
سوسن :ساعة 1
سلمى:خيره الوقت يمشي بشوية
سوسن :عينك فيسع مايمشي…. بنرقد انا تصبحي ع خير
تلفتت سوسن وتغطت ورقدت
وسلمى قعدت فايقة وهلبا كﻻم يتردد ف راسها لكن مش قادرة تربط بين الصور والكﻻم …. وتتدكر ف شاب يأشرلها ف البحر
ساعة 1:15 بعد منتصف الليل تاجوراء…مصيف فسطاط
مهند:اساويكم
عبدو:عليكم السﻻم
مهند:خيرك مهموم
عبدو:ﻻ شي غير نرجع ف شريط حياتي
مهند:مندو الوﻻدة واﻻ كيف هههههه
عبدو:ههههه يابارد قصدي من اول ماتعرفت على سالمة
مهند:اييييييه علينا من سيرة كل ليلة فكنا ياراجل من نكد
عبدو:ادكرت من اول ماكلمتها كنت ف المصيف بوها اجر عريشة وانا قعدت نشبحلها وهيا تبتسم وفي العشية خشيت نعوم شبحتها ابتسمتلي مشي درتلها هكي بايدي زعميتك نحصل رقمك
مهند:والنبي قداش مرة بتحكيهالي
عبدو:ووووه ماتخليش من يسترجع دكرياته والنبي برا من عليا بنروح هيا سﻻم
مهند:غير تعال ياعبدو تعال خﻻص
..
وصبح الصبح
نقال عقيل ايشرين
عقيل :اها مفتاح
مفتاح:تعال توا الحجز مفتوح بمجرد ماتوصل كلمني تو نديرلك واسطة على طول فييسع الطيارة ساعة 9
عقيل:اوكي هي
ناض عقيل وطلع من داره لقي سلمى ف وسط الحوش
عقيل:صباح الخير
سلمى:صباح النور
عقيل:وتي روحك بنطلعو بعد ربع ساعة ونوضي خميرة النوم سوسن وقولها توتي روحها فيييسععع ونوضي مازن بش يحطنا ف المطار
سلمى:هيا هي
مشت سلمى لدار فيقت سوسن وبعدها فيقت مازن ومافاتش 10 دقايق اﻻ وكانو واتيين
سلمت سوسن وسلمى ع خالتي رحمة وعمي مسعود وطلعو
و باختصار شديد وصلو لطرابلس عقيل:وينه هالكلب ايهاب قالي من اول ماتوصل تلقاني مدرس
سوسن:اتصل بيه
عقيل:من بكري نتصل مايردش
خلي نجرب هالمرة كنهدا ناخدو تاكسي
عقيل:ايوه تي وينك من بكري نتصل باهي وينك مانشوفش فيك ….. ايه ايه ريتك اهو جاي
سوسن :وين بنباتو ماتقولش في حوش ..
قاطعها عقيل:بتباتو ف حوش خالة سلمى وانا بنعدي لصاحبي
سلمى:نبي نمشي للبحر توا
عقيل:باهي هكي بنمشو بشناطينا نحطكم ف حوش خالتك توا و بعدين مع العشية نجي ناخدكم
سلمى :ﻻﻻﻻ توااا عادي وكان مشينا بشناطينا نخلوهم ف كوفني ايهاب صاحبك
عقيل:عنيدة انتي ياسلمى
سلمى:هيا وراس عقولة
عقيل :اوكي باهي هي
سلمى:ياوخيتي سلمه اتهبل انت ديما اطاوع فيا
سوسن:مش منه يطاوع فيك ههههه
عقيل:هيا انتي وياها الشبوب يرجى فينا
ايهاب:حمد لله ع سﻻمتك ياعقيل
عقيل:الله يسلمك
ايهاب:شن اﻻجواء
عقيل:عشرة ع العشرة شنجك انت يالطايح
ايهاب:مليح بكل … وين تبيني نحطك
عقيل:ف تاجوراء جيهة المصيفات
ايهاب:ههههههههه شن بدير غادي
عقيل:هههههههه بنعدى نرقص
وبعد 35 دقيقة وصلو لتاجوراء وبعد بشوية وصلو المصيفات
عبدو ل مهند :اسمع خليك اهنا انا مروح اونه تعرف تسعيرة العريشات
مهند:ايه نعرف لكن خليك …اليوم المصيف معبي مزز بالك تشد معاك
عبدو:ﻻ تشد وﻻ تطلق فكني تره
مهند:استنى استنى فيه عريشة الغطا متعها مش تمام تعال واسي معاي
عبدو:باهي اوكي هي
عقيل ل ايهاب :تمام اهو فسطاط
ايهاب :اوكي شن نستناكم ؟
عقيل:ايه مش معطلين دقايق وراجعين
نزلت سلمى وسوسن ومعاهم عقيل وخشو المصيف و..
يتبع 
………..
لقراءة الجزء التالي : الجزء السابع من رواية حنين الماضي للكاتبة لوزة ليبية
لقراءة الجزء السابق : الجزء الخامس من رواية حنين الماضي للكاتبة لوزة ليبية
للإطلاع علي فهرس الاجزاء كاملة : جميع اجزاء رواية حنين الماضي للكاتبة لوزة ليبية
جميع الحقوق محفوظة للكاتبة لوزة ليبية .
