وفي الجزء السادس من رواية لن استسلم دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء السادس من رواية لن استسلم
سندس دارتله قشة على خده
حل عيونه اسامة وقالها شن اديري اهني بري لعريشة امي والبنات
سندس:ﻻ مش ماشية اصﻻ انا جيت خصيصا ع خاطرك
اسامة:وعﻻش ؟
سندس:هكي نبيك … وزادت قربت منه
اسامة:اتحشمي ع وجهك تحسابي روحك صغيرة
سندس:ﻻ عارفة روحي مش صغيرة افهمني انا نبيك يااسامة كل مانشوفك مانتمالكش نفسي نبدى نرعش كلي مع بعضي
سمية لزينب:والله قالقة يازينب الحق انا مانبيش نخسره اسامة بالنسبة ليا هلبا حاجات نتمناه يفهمني والله اندير مستحيل بش يفهمني هههه لن استسلم يازينب لييين انطيحه
زينب:ياودي اسامة واعر هههه اشك انه حيطيح بسهولة هادي
سمية:ماهو قتلك لن استسلم
زينب:باهي شن رايك نمشوله وانا نرطب اﻻجواء هكي ونفتح مواضيع لين يهدرز معانا وبعدين نطلع ونخليكم شن رايك
سمية:فكرة حلوة زنوبتي امممموه
ومشو بيتجهو للعريشة
في نفس الوقت
اسامة لسندس:استغفر الله ..شن الكﻻم هدا ياسندس اطلعي من اهنا نوضي
سندس زادت عندت واتكت وقتله:ﻻااااا مش حنطلع
اسامة:انا اللي حنطلع اقعدي فيها .
طلع اسامة لبرا ووقف قدام العريشة طلعت سندس شبحتله وقتله انحبك غمزتله ومشت طلعت مشت لعريشة خ نفيسة
على جية زينب وسمية جايين من خلف العريشة
زينب:وسيما خيرك قاعد بروحك
اسامة:كنت متكي بس
هدرزت زينب شوية وقتله حي نسيت شيشة الميا مفتوحة تو نجي
سمية ل اسامة: اسامة نبي نقولك حاجة
اسامة تلفتلها وابتسم:مافيش داعي عارفك شنو بتقولي ومانبيكش اتبرري
سمية:ياودي فاهمني غلط
اسامة:ﻻﻻ مش غلط انا نصحتك وقتلك عبدو مش كويس ياسمية بس انتي مصرة خﻻص حتعرفيه كويس القدام بس ردي بالك تغلطي والله مانرحمك كنهدا
سمية:قصدك تبيش تسمع
اسامة:نسمع هي
سمية:انا امس بصددفة مشيت للمطعم وعلى جية عبدالله مانندروش عليه حاولنا نتفادوه بس هوا اعترض طريقنا وقالي تو نوريك على علقة مع الشبلي واصﻻ انا مانتبهتلكش اﻻ لما انت طيحت الطاولة
اسامة:باهي به عموما زي ماقتلك
سمية:مش مصدقني
اسامة:ﻻ مصدقك وتو نستادنك بنمشي نعوم شوي
خش اسامة للبحر وخدي معاه زينب زينب شاورت لسمية تعالي
سمية وقفت عالشط معش قدررت تخش رجعلها اسامة خداها وولو يعومو
شافتهم السوسة سندس خدت كورة وخشت طبق للبحر جت من ورا اسامة وتتدلع عليه وتتلصق وقتله :وسيماااا
اسامة:نعم 
سندس:تعال نعومو داخل
اسامة:ﻻ غريق خليك اهني
طبعا ماسمعتش كﻻمه وخشت داخل
سمية انتهزت فرصة وقربت من اسامة
وقتله اسومي
اسامة:هههههههه قوية اسومي
سمية:هههه محﻻ شعرك ف الميا
اسامة:بجديات؟
سمية: والله بجد
اسامة:هههه ماكنتش نعرف …وخدي بليده اميا ودارها ع وجها وبيلعبو
سندس بدت تصيح:اسااامة بنغرررق اساااااامة
سبح اسامة لجيهة سندس وتشعبطت فيه طبعا ماصدقت ودارت روحها روحها سايخة
سمية لزينب:والله اﻻ اثمتل عليه هالكلبة هادي
زينب:مش جديد عليها جو هدا
سمية:حي عليا ياخوفي يضيع مني اسامة
زينب:ديري جهدك
سمية:عندك علم انه بدي يكلم فيا ببرود واﻻه تمنيت يكشخ ويهزب زي قبل
زينب:حي علمها الحقيرة ﻻ بجديات زودتها
سمية:خيرك؟؟؟وتلفتت سمية وشافت الشوفة وقالت: خزي عليها المعفنة خلي نمشيلها نوريها شن شادة فيه هكي
زينب:قعمزي واهفتي تعرفي كان كلمتيها حتمشي لامك وتبكي وتزيد دوة ماصارتش
طلعها اسامة لشط وقالها خﻻص خليك اهنا
سندس:اسامة مانقدرش نبعد عليك
اسامة:شن تبي انتي بالزبط
سندس:نبيك انت زي ايام قبل
اسامة يكشخ:قتلك انا اللي فات انسيه ماتدويش عليه حتى بينك وبين نفسك فاهمة
سندس:مانقدرش ننساه احﻻ ماضي
اسامة:شن احﻻ ماضي كنا صغار راه انا يمكن 15 وانتي 13 معش ندكر حتى شن قتلك ريحيني تره
مدت ايدها لشعره …بس اسامة خواها
سمية لزينب:ياودي هدا باين عليه ايحبها
زينب :ﻻ مايديرهاش ماعتقدش … اصﻻ خوي رافض البنات
سمية:امممم حتى كان رافض البنات انا لن استسلم
طلعو من البحر ودارو شواء مع اسامة وبصرو وهدرزو وضحكو ومع المغرب سمية وزينب مقعمزين جنب العريشة يهدرزو
سمية لزينب:دبريلي ف حل كيف ندير مع اسامة
زينب:احسن شي تصارحيه
سمية:شن نقوله؟؟؟اني نبيك ونحبك
زينب:ايه ..
سمية:امممم به حنحاول لكن اخر مرة يعني حنكثف محاولتي وبنقوله وخﻻص وحنعتبرها اخر محاولة
زينب:فيه تناقض ف كﻻمك امبكري قلتي لن استسلم وتوا اخر محااولة ؟؟؟
سمية:ايه بجديات خﻻص تعبت شوفي كم سنة وانا نحاول وكل عام نقول لن استسلم
لمحت زمرت وضحت ضربت امثلة وخوك وﻻ هنا…وهادي طبعا محاولة غير ..ﻻني حنعترفله فمانقدرش نحاول بعدها كان صدني فهمتي ؟؟
زينب:ان شاء الله مرة هادي تشد
شوي
الكﻻم هدا كله طاح ف ودن سندس ﻻنها مقعزة ف العريشة …طلعت وطلت من عريشة لقت اسامة مقعمز ع الشط خشت لعريشته وطلعت نقاله من جيب سرواله.. وطلعت نقالها كتبت مسج انحبك حبيبي ودي اتكون معاي ديما خلي العويلة يرقدو ونسهرو احنا جنب البحر اممموووه انحبك …. ورسلتهاله
وخدت نقاله وكتبت حاضر ياروحي ياريتهم يرقدو من توا بش نكون جنبك معش متحمل نبعد عليك امممموه حياتي نموت فيك
ورسلتها لرقمها ومسحت الرسايل وتقارير وطلعت
زينب لسمية:بنمشي للحمام حشاك تو انجي
سمية :اوك
انتهزت الفرصة سندس وجت لسمية وقتلها سومة شن الجو
سمية:باهي
سندس:تجي تعومي شوية
سمية:ﻻﻻ مش خاطري
سندس:اوك براحتك … بس امبكري بصدفة سمعتك تتكلمي ع اسامة
سمية:امتى
سندس:توا وقت كنتي تقولي لزينب نحاول … عموما راهو اسامة يحبني وانا نحبه من كنا ف العدادي نحبه هلبا حتى شوفي الميدالية هادي هوا جابهالي وقت كنا صغار فيها صورتي وصورته وردي بالك اتخشي ف النص بينا او حتى تفكري تقولي لزينب واﻻ خ نفيسة ﻻن حنعرف شن نديرلك اها وكان قلتي لاسامة اكيد حيقولك مادخلكش هادي حياتي احفظي امية وجهك خير
سمية:مستحيل اسامة يشوف لواحدة زيك
سندس:هادو الرسايل ياحلوة
قرت سمية رسايل وانصدمت
سندس: هي سﻻم تو
سمية مصدومة وغصتها العبرة وقالت فبالها هدا باش يكلم فيا ببرود اليوم وتجاهل وهوا تاريته خايف ع مشاعرها
ﻻزم نمشيله اكيدة كدابة سندس
وناضت مشت لاسامة على شط البحر وقعمزت جنبه
سمية:حلو الغروب صح
اسامة:ايه
سمية:اسامة لو مثﻻ قتلك اني معجبة بشخص شن بتكون ردت فعلك
اسامة:هادي حياتك و نصيحة من اخ لخوها اتردي بالك ع روحك.. صحيح اني نخاف عليك لكن انتي راسك يابس وحديري الحاجة فنخليك اديريها قدامي خير من وراي
سمية فبالها ياودي معقولة تحب سندس يااسامة حتى انها مش كويسة
سمية:انا شنو بالنسبة لك
اساكة حس انها تبيه بس هوا مدايرها اخته قالها:انتي اخت لم تلدها امي
سمية ضايقت معش قدرت تشد روحها وقتله: باهي ماتوقعتكش اتحب سندس
اسامة تلفتلها مع تفنيصة:من قالك نحبها؟
سمية خافت حست ان كﻻم سندس صح متع انه حيقولها هادي حياتي فرقعتها وقتله: ماحد قالي لكن تصرفاتك معاها هكي ادل
اسامة: نقولك حاجة بينا ماتقوليها لحد الحق هكي ماليشي عﻻقة ال…
قاطعاته خ نفيسة جاته تصيح من بعيد اسامة تعال فيسع اختك كلت حوتة وزرطت شوكة
اسامة ناض يجري مع امه ولحقتهم سمية
عيونها معبيات دموع حست ان كﻻم سندس صح وان اللي كان بيقوله ماليكش عﻻقة بيا …((ببرغم ان كلمتين مختلفات لكن احنا البنات لما نسكرو روسنا مايقدرنا حد هههه)) واسامة مظلوم كان بيقول
ماليشي عﻻقة بالتصرفات.. هيا نوعيتها تبي كل شي ليها بس انا ماندورش ف نوعية هادي من البنات..
جي اسامة لاخته لقاها فاتحة عيونها ومخنوقة
فتح شكارة الخبزة وطلع فردة وطلع الوسط متع خبزة وقالها كولي يازينب الوسط كولي
كلت زينب الوسط متع الخبزة وتسرحت مشت الشوكة ا
اسامة يبتسم :خلعتينا عليك يامنجوها
زينب:مش عارفة كيف زرقت الشوكة جعانة شوره
فات شوي وسمية تبكي وقالت فبالها الموضوع طلع صح وانا معش نبيك يااسامة متعجرف اصﻻ مش عارفة شن عجبني فيك واحد عصبي يدره ف الكبد ﻻزم نشوف حياتي ومن هاللحظة ومش حنفتح موضوعك نهائي وحنمنع نفسي من تفكير فيك …
ومن غيضها خدت سمية نقالها وقررت تتصل بشاب متع المطعم…
يتبع…….
لقراءة الجزء التالي : الجزء السابع من رواية لن استسلم
لقراءة الجزء السابق : الجزء الخامس من رواية لن استسلم
للإطلاع علي فهرس اجزاء الرواية : رواية لن استسلم جميع الاجزاء كاملة
جميع الحقوق محفوظة للكاتبة لوزة .
