الجزء السادس والعشرون من رواية الزوجة التائهة بين الأحلام والواقع

هيا بنا لنبدأ قراءة الجزء السادس والعشرون من الرواية المميزة من تأليف وكتابة المبدعة كيندا رواية الزوجة التائهة بين الأحلام والواقع، ولنري الجميل من الكلمات والحوارات بين ابطالها .

الجزء السادس والعشرون من رواية الزوجة التائهة بين الأحلام والواقع

احمد…….. نزل عيونه شوى ودمعه زغللت من عينه وبعدين قاللها …نشهد بالله انك بنت ناس ربى يخليك ليا ان شالله حبيبتى وبعد ماكملو مشوارهم الحلو قررو يمشو ويقولو لام احمد على نبيل جديد الا رح يرجع فى الحوش بعد 4 شهور …..
واول ماوصلو للحوش ونزلو من سياره خشو للحوش ولقو ام احمد مقعمزه فى الصاله فااحمد قاللها ….
احمد ….. ياما ااااااا ياماااااا
ام احمد ….. ها شن فى طرشطنى وانت تقول تنادى فى ميت اللطف ياربى على اساس جايب صيد من ودنه ..
احمد……. بنقولك شى مهم ههههههههه نبيل جديد بيجى للحوش بعد اربعه شهور
ام احمد …… << ياوالله نهاررررر مبروك << وبعدين قعدت تبكى وقالتله >> والحمد لله يارب تاخد من هنا وتعطى من هنا الحمد لله ياربى حرمتنى من ولدى واعطيتنى ولد ولدى … ربى يفتحها فى وجهك يابنيتى زى ما فرحتنى
احمد ….. على اساس انا انى مالياش دور ولا شن ودعوه بزبط مالياش فيها …. هههههه
ليلى ….. باللهى بطلى بكى ياماما انتى هكى بتغششينى عليك ووالله ربى كريم يقطع من هنا ويوصل من هنا وحتى ربى عز وجل يقول “وَلَسَوْفَ يُعْطِيكَ رَبُّكَ فَتَرْضَى ” فاباللهى ياماما عاد افرحى وامسحى دموع ياسرك بكيتى 3 شهور
ام احمد …..<< وفى داخلها تقول ماهو مش كبيدتك الا تشوطه يامسكبنه>> اااااااه يابنيتى الحمد لله وخلاص …… بس تعالى هنا وحطى فى بالك وليدك تجيبيه من هنا وتحطيه عندنا من هنا ايوااااااااااااا هدا الوليد انى بنربيه زى نبيل الامانطلعه مهندس زى بوه
احمد….. على اساس نبيل دكتور وانى مانندريش ههههههههه … ماشى ماشى ياحاجه

ليلى …….. ههههههههه مالا حتى انى بنسمتر معاه هنى على الحل هوا ..

ام احمد…….. لاااااا يبنيتى انتى شدى خربتك فوق وخليلى ولدى نبيل لوطه وسلامتك وقلت سوك
ليلى ……. <<شبحت باص عيون لاحمد هنا وضحكت وبعدين قالتلها >> ان شالله ياماما هوا غير يطلع على خير وهوا ليك ماتخافيش مافيش فرق بينى وبينك …..

احمد …….مهم توا تبى شى هيا مالا تصبحى على خير
ام احمد …… تلاقو الخير ان شالله
ركبو احمد وليلى واحمد ميت بضحك على كلام امه بينما ليلى قعدت تعلق على كلمة عزوتها شدى خربتك بس فى اتناء تهدريزهم احمد جاته رساله من رقم اول مره يشوفه ولما فتحها لقها…..
رقم الغريب…… لو قتلك انى نحب نلقى مكان فى حياتك
ليلى …. منى حبيبى الابعتلك رساله فى هالليل ان شالله خير
احمد ….. ماتاخديش فى بالك هدم رسائل لبيينا بس تعرفيهم انتى عاد……. اسمعى ارقى انتى فوق وانى نكلم عصام شوى ونرقالك اوك
ليلى …. اوك نستنى فيك
وهنا احمد نزل لوطه وخش للمربوعه الا كانت فاضيه لانا عصام مازال ماروحش واتصل برقم الغريب مرتين بس تالت مره ردت وقالتله…..
رقم غريب ……. الو
احمد……. منى معاى
هيا ….. قعدت ساكته وماقالتش ولا حرف
احمد….. نبى نعرف انتى منى ومن الاعطاك رقمى
هيا …… شوف انى انسانه حبيتك من سنين وانت ولا قايمنى من ارضى وانى نشوف فيك من بعيد وانت ماتعرفنيش بس انى نعرفك ومن سنين
احمد ….<< طلع جنان برا يتكلم وقاللها >> باهى ومطلوب توا منى ؟؟؟
هيا….. انك تعطينى فرصه بس وانى مش طالبه انك تتزوجنى لا بس تعطينى فرصه نبينلك مشاعرى ونكون صديقه ليك ووقت ماتضايق اتصل بيا بس وانى مستعده نسمعلك لصبح
احمد …… اسف انى راجل متزوج واطلعى منها هالابواب
هيا ….. بس انى نحبك ومستعده انكون اى دورفى حياتك انت تبيه بس اعطينى فرصه
احمد …… توا نقكر فى موضوع ….. هيا سلام توا
وهوا صكر من هنا وعصام خش من هنا وهنا عصام قالله…..
عصاااااام….. شنى ماد وجهك فى جنان بروحك شنى مالا شدة معك فى موزه وتزبط فيها من وراى ههههههه احمد…….. تى باللهى بطل براده وقولى انت فاضى توا نبى نتكلم معاك
عصام ….. خلينى نتسمسم وبعدين ارغى لصبح
احمد …. تعاله ربع ساعه نبى ندوى معك فى شى مهم بعدين برا وانت ماتفكر الا فى بطنك وياريت باين فيك
عصام …. مارى ولاتكون حسود هههههههيا تعال للمربوعه تعال اصلا انتم الا يعرفكم مايعرف لاهنى ولا راحه..
احمد …. مررررررروه ….. جيبلنا طاستين شاى بسرعه…
عصام …. تفضل هيا واختصر لانى جعان واحتمال نولى عليك
احمد …… فى رقم توا بعتلى رساله فيها كدا وكدا م الاخير ورقم هوا انى حاس نفسى مار عليا صوته ونعرفه بس مش متاكد
عصام ….. باهى …… وانت بعد مابعتتلك رساله كلمتها …
احمد …. ايه وتصور قالتلى انت الا تبيه انى نبيه غير ارضى بس
عصام ….. وانت قصدك بتفوت ليلى برابعه ولاشنى
احمد …… اكيد لا يامتخلف بس انى نبى نعرف من بنت هيا ومش رح نعرف لحد مانستدرجها بالحكى …. ولو طلعت الا فى بالى قسما بالله الا ماتشوف ايام سودا
عصام……. معناها انى ننصحك مشى معاها واعرف من هيا بس بدون ماتلاحظ مرتك لانا الا انت تدوى فيه مش سهل راهو لوعرفت مرتك تى والله ماهى راحماتك ….
احمد ….. انى حاس انا هيا نفس بنت وكل مره تتطلعلى برقم ولو انى ماحطيتلهاش نهايه رح تقعد كل مره تنبتلى من تركينه فاانى انى نبى نتاكد منها بس وبعدين يصير شى تانى

عصام ….. والله يااحمد هوا انى لو زيك رح نتصرف نفس شى وانى عارف انك انت ماتبيش تكمل معاها وتبى تعرف من هيا بس لانك شاك فى وحده معينه بس نقولك من توا رد بالك ياراجل راك عندك عيل فى طريق
احمد …… باهى قولى شن حل انى حاس لو ماعرفتهاش وحطيتلها حد رح تتمادى ومرات حتى تخش بينا وتخربلى حوشى يااعصام ووالله انى تعبت
عصام …. باهى غير شفرتك وخلاص
احمد……. تى شن تحسابه بسهوله هيا تى قسما بالله الا ماتحصل رقمى وبعدين معقوله وحده زيها تخلينى انى كل مره نغير شفرتى وخاصة انا يتصلو بيها عليا متع شغل كلهم
عصام……. احمد رد بالك منها البنت راهو مش سهله شكلها اهو قتلك من توا الانا الا عندها جرئه تبعت رساله لواحد متزوج وفى نص الليل وتعرض نفسها عليه ماعندهاش مشكله تدير اى شى……. نقولك شى علاش ماتقولش لى ليلى وخلاص
احمد …… تى شن تبينى نقولها فى وحده تتصل بيا وقالتلى نبيك وانت كل حياتى ومش عارفه شن وبعدين حتى لو قتلها انت بتتوقع ليلى رح تسكت رح تقولى اعطينى رقمها وانى نتفاهم معاها ونقعد فى مشاكل وسين وجيم وبعدين انت عارف ليلى انا بدت تتحسس من ابسط شى وتمرض وتبنى انى نقولها ويبدا يلعب شيطان بدماغها ومش رح نستفيد شى انى نبى نشفر بنت هيا من حياتى بس كيف مش عارف
عصام …… باهى انت شن قتلها ؟؟؟
احمد …. قتلها توا نفكر …. نقولك شى تعرف بكرا بنتصل بيها وبنهددها وبنقولها لو تتصل بيا مره تانيه قسما بالله الا نطلعك ونبهدلك …… وفكنى من مشاكل لانى مش ناوى نخسر ليلى ولانحس انى فى يوم من الايام رح نخونها حتى ولو ماكانش قصدى

عصام …… باهى نقولك شى كلمها توا وقوللها كلمتين الا عندك وامسح بيها وسكر لانا توقع بعد ساعتين رح تتصل بيك ومرتك تشك فيك وتصير مشاكل اتصل توا بيها وامسح بيها لانا نمادجها مايرقدوش راهو الليل شغالنتهم هههههههه خود منى نصيحه راهو انى خبررررره
احمد …. اوك …..

عصام … …. خلاص اتصل انت بيها توا لبين ماانى جبت شاى وجيت لانا مروه شكلها ماتت فى مطبخ
احمد ….. اوك …… << وشد تلفون واتصل برقم مره واتنين وتلاته ….. وماردتش بنت….

عصام ….. خيرك شنى ماردتش ولاقولتلها كلمتين خت فت وسكرت

احمد …. لا لا ماردتش وانى توا مش رح نرتاح الا مانعطيها قدرها ونسكر …..

عصام …. ابعتلها رساله وقولها ردى عليا ….

احمد …. فكنى ياراجل مرات تصير عمله …
عصام …. تى ابعتها يارجل شن بتديرلك يعنى على اساس انا هيا تعرف رقم مرتك باش تديرلك عمله ابعت ابعت ولا خلينى انى نبعت ههههههههه
احمد…… اوك …..

وطبعا بعت احمد رساله وقعد يستنى وماتكلمتش لحد مايأس وقاله عصام ..

عصام ….. اسمع انت شكلك مطول وانى اه هه هه هه هه بنرقدددددد خلاص غدوا وراى

استلام بضاعه جديده وتستيفها ويوم يهد جبل فا بنرق اهه اهه اهه د خلااااااص

احمد ….. خلاص وانت قريب تبلعنى من كتر مافتحت فمك خلاص فهمنا بترقد ……هيا تصبح على خير

وركب احمد فوق وقعد يتملمز فى سريرويفكر ويقلب فى راسه الموضوع وقعد على الحال هوا لحد مارقد ….
وهنا ناض الصبح دار تشك اب على نقاله وبعدين خش الحمام دار لفته ولبس وطلع ومشى لشركه وخش كالعاده لمكتبه و
حط جاكيت على كرسى وقعد يخدم لحد ساعه 11 وساعه 11 خشت سكرتيره وقالتله …

سكرتيره ….. بش مهندس عندك توا اجتماع مع الوفد الالمانى والشركه منفده ….. وانى قولت لى وسام يوتيلكم غرفة الاجتماعات …

احمد …… اوك خلاص انى نازل ولما نرقى نبيك تكونى مجهزتيلى الاوراق المطلوبه لتوقيع العقد باش ندرس البنود كويس ونعرضها على محامى وفى حالة انا توا اتفقنا معاهم بكرا رح نوقعو العقود ان شالله ..
سكرتيره ……. اوك بش مهندس ولايهمك
وهنا هوا طلع ونزل لغرفة الاجتماعات وهيا خشت لمكتبها لحد ماتاكدت انا بدى الاجتماع وبعدها خشت للمكتب بسرعه وخدت جاكيت وطلعت منه نقال وقعدت تفتش فى سجلات لحد مالقت رقم ليلى سجلاته بسرعه فى ورقه وحطاته ووهيا كيف بتتطلع فتح مكتب وسام فاتلاقو فم مكتب من داخل فاهيا ارتبكت وقالتله …..
سكرتيره …….. انت شن تدير هنا ؟؟؟؟

وسام ……. انى بش مهندس قالى تلقى ملف ابيض فوق مكتب جيبه وجيبلى جاكيت متعى..
سكرتيره ……. اوك تفضل … وطلعت ومشت لمكتبها وقعدت تقلب فى رقم وتضحك وبعدين طلعت نقالها وسجلت فيه رقم ومزقت الورقه وفتحت الاورق ورجعت تخدم ….. وفاتت ساعه ورا ساعه واحمد كمل اجتماعه وركب فوق كمل باقى شغله وروح للحوش واول ماوصل لقى امه تكنس فى جنان فاقالتله …….
ام احمد …….. وليدى مرحبتين وترحيبه باهى باه الا جيت طيب فيك
احمد ….. شن الاخبار ماشى
ام احمد …… واللهى ياوليدى حال ضمان…. مهم انى كلمت ليلى وقتلها مفروض تتطلعو اليوم ياوليدى وتبدو فى حاجات مولود من توا لانا سياره خطر عليها فى شهور الاخيره……. وبرا
توا انت مانبيش نعطل عليك اكيد تستنى فيك فوق
احمد ….. ماشى ماشى يستر ربى …

ركب احمد وفتح باب شقه متعه وقعد يقول ……
احمد …… ليلى ليلللللى

ليلى …… انى هنا حبيبى فى مطبخ نوتيلك فى غدا

احمد …… شن الغدا اليوم رانى ميت بجوووووع

ليلى ….. فاصوليا ورز حبيبى نحى حوايجك والبس توتك وصلى يكون الغدا على طاوله باش
نتغدو

احمد …. اوك … حقا شن بنقولك امى كلمتيها اليوم ؟؟؟
ليلى …. ايه حبيبى وانت غير تعالى تغدى وتوا نحكيلك

احمد … اوك
مشى احمد للحمام ولبس وغسل طرافه وتوضى باش يصلى ولبس توته متعه وصلى وخش
للمطبخ وقاللها ….
احمد…….. اااااااااه ريحه فايحه من برا شيمتها تسلم ايدك

ليلى …. صحه حبيبى نصبلك شوى فاصوليا مع رز
احمد …. ايه صبيلى ….. مهم امى خيرها ؟؟؟

ليلى ….. هدا ماما اليوم شورا كلمت صفاء قالتلها كلمى ليلى قولها نبيها فاانى نزلتلها لوطه ولقيتها مقعمزه فاجيتها وصبحت عليها وقعدنا نهدرزو شويه بعدين قالتلى

على اساس نبدو نطلعو اليوم ناخدو ملابس البيبى لانا فى شهوره الاخيره يزيد تقل وتعب …… فاالحق هيا كلمها صح شن رايك حبيبى لو فاضى اليوم نطلعو ….
احمد …… خلينى توا نرتاح ساعه وبعدين نوض ونرفعك ماشى
ليلى ….. خلاص معناها انى بنغسل المعايين وننزل نهدرز على ماما شويه …<< بعدين سكتت شوى وقالتله>>…. احمد تلفونك يشرين راهو فى دار حسه

احمد ….. ونبى جيبيه باللهى
ليلى …. اوك ……………….. احمد راهو رقم غريب مش مسجل عندك
احمد …… هدا اكيد الخدمه ترا هاتيه << وناض من كرسى وطلع برا الحوش فى الاستراحه الا قدام باب الرئيسى للحوش وصكر الباب وقال …..

رقم غريب ……. اه شنى فكرت فى كلامى …… على عموم انى امس مابيتش نرد عليك باش نعطيك فرصه تفكر بس لانى عارفه انك متهور واكيد امس كنت رح تقول لا فاانى قولت بالك الليل يقلبها فى راسه
احمد …… شوفى قسما بالله انى قاعد نكلم فيك بااحترام لو مازال تتصلى هنا ولا حتى نشوف رساله منك قسما بالله الامانحطك فى راسى ونطلعك نطلعك ماشى وانتى مازال ماتعرفينيش باين ….
هيا………. ههههههههه هدا اخر كلام ليك متأكد

احمد……… انى قوتلك ورقمى معاش نبيه عندك خير مانجى انى تفترش تلفون فوق راسك مره وحده

هيا ……. هههههههههه اوك بس حطنى فى دماغك بس  ماشى سلام
احمد……. صكر تلفون<< وقال نموت ونعرف انتى منى بس >> وقعد يشبح لنقال شوى لحد ما ليلى فتحت باب وقالتله …

ليلى …… هههههه من هيا الا تموت و تعرف هيا منى ؟؟؟

احمد ….. << ارتبك شوى وبعدين قاللها >> لا لا ماتاخديش فى بالك هادى وحده خدت من
شركتنا مناقصه بس ….. وخلاص خلينى توا نرقد ولما نوض توا نضبح عليك باش تبدلى حوايجك ونطلعو …. ماشى حبيبتى .

خش احمد رقد بينما ليلى غسلت المعايين وبخرة الحوش ونزلت لوطه لحوش عزوزتها ولما
نزلت لقتهم مفرشين بساط فى جنان وحاطين منادير ومقعمزين فى شميسه يهدرزو فا قربت ليلى منهم وقعمزت جنب صفاء وقعدو يهدرزو من هنا وغاديكا لحد ماعزوزتها قالتلها

ام احمد ….. حقا يابنيتى نسيت نقولك باش تسألى امك كانها بتشرى حاجه قبل ماتطلعو وتشرو بالك يانارى هيا بتاخد كل شى لانا فى سربنا عندنا اول عيل ديما على مالى العروسه ….

صفاء ….. بس مفروض احنا مانلزموها بى شى ياماما بوها متوفى وخوت ماعندها فا مفروض كله يديره خوى بس

ام احمد ……. <<شبحة شبحت مش عاجبها كلام صفاء وبرمت شوربها وقالت >> واللهى الا تشوفوه مناسب ديروه مهم انى وقضتها بس ومافيش ملامه على حد

ليلي ….. سمعت الكلام وتحسست منه وماكانش عاجبها طريقة تلويح دوه من عزوزتها بس بلعتها وقالتلها …. ولايهمك ماما توا نتفاهم مع ماما ونقولها ماتشرى شى لانى بناخد كل شى انى واحمد  وماما وجودها جنبى هدا اهم شى بالنسبه ليا .

ام احمد ……. بااااااااااااهى سلملك ميمتك مالا

صفاء ….. ليلى تعالى نبيك شوى فى دارى ؟؟؟

ليلى ….. اوك شوى بس …… ماما بنمشى شوى مع صفاء تبنى …..

صفاء … تى ياودى هيا نعسها نوم والله ماتفرز فيك حتى شن قولتى تعالى تعالى نحكيلك اخر
مستجداتى ….

خشو لدار وقعمزو على سرير وهنا صفاء قالتلها …

صفاء ….تعرفى هدكا الا عندى تغير ياليلى ….

ليلى ….. شن قصدك ؟؟؟

صفاء ….. قصدى معاش مهتم بيا وديما لما نتصل بيه دوب ميكلمنى ويصكر ولما نقوله انت علاش تتصرف هكى يقولى لا وانتى انانيه ومش مقدرتينى …. بس ياليلى والله متغير هلبببببه تعرفى ممكن بدى يتصل بيا مره كل يومين بس ومايقعدش 5 دقايق ويصكر ….. انى نفسيتى تعبت خلاص معقوله من اول ماسافر وهوا على حال هوا تصورى قبل كنت نعدر فيه نقول بالك قعد جديد ومتلخبط وهكى بس مش معقوله ليه قريب توا 3 شهور وهوا على وضع هوا وكلما نقوله انت وين يقولى مع قروبى نتعشى مع قروبى نقرو مع قروبى نهار اسود …… وكله كوم وريتا زفت كوم تانى …
ليلى …… باهى هدى شن قصتها ؟؟؟
صفاء …… تعالى نحكيلك ياحنا … هدكا اليوم ياخد ويمجد فيها قالى البنت هيا ماشالله ….بوها ليبى وامها انجليزيه بس نولدت وعاشت نص حياتها فى بريطانيا وجت لى لبييا ممكن قعدت سنتين مع بوها هنا لما بوها انفصل على امها ورجعت لبريطانيا وياحنا تتكلم ليبى زينا قالى واحرف لانا بوها ديما يحاول يعلم فيها من لما كانت صغيره ولما مشت لليبيا ماشالله ولت نابغه فى الالفاظ الليبيه ….. لا ويقولى فيها ويضحك تقول من يدغدغ فيه …. ولما سالته قتله متحجبه ؟؟؟
قالى … لا لا عايشه حياة اوروب غادى مع امها بس فى حدود الاحترام يعنى تلبس ومش متحجبه بس ماديرش فى شى غلط …
ليلى …. باه وانتى من شن خايفه ؟؟؟

صفاء …….. بعد الا قولتهولك كللللللله تقوليلى من شن خايفه نهاااااار ابيض تى شن تبيهم
يتجوزو باش نخاف انى نهار ابيض عليك وخلاص

ليلى ……. هههههههههه لا يعطيهالك قصدى …… دقيقه بس وصلتنى رساله

صفاء …. من منى يامنجوهه ؟؟
ليلى …. باين من رقم غريب دقيقه بس نفتحها ……

يتبع …….

لقراءة الجزء التالي : الجزء السابع والعشرون من رواية الزوجة التائهة بين الأحلام والواقع

لقراءة الجزء السابق : الجزء الخامس والعشرون من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .