وفي الجزء العاشر من رواية عاصفة الصمت دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء العاشر من رواية عاصفة الصمت
نزار ل غادة : والله كلتني الشمس وانا نستنى فيك سنفورتي …
غادة : هههه اللي يبي الورد يتحمل شوكه
*وفجأة يطب عليهم حاتم *
حاتم : ماشاء الله
* تلفتت غادة وشافت حاتم وخافت ونزار انصدم *
نزار : ماتفهمنيش غلط ياحاتم … نيتي صافية وشريفة والله
حاتم : روحي ياكلبة فيسع
نزار : ستني غادة ..
*وقفت غادة مكانها
تلفت نزار ل حاتم وقاله : معش تقولها كلبة
حاتم : دخلك انت
*بيمد ايده حاتم بيضرب غادة فشدله نزار ايده وعوجهاله وقاله : بتضربها قدامي
حاتم يكشخ : تي دايرة الغلط وتبيني نضحكلها
نزار : ماغلطتش …. تي قتلك نبيها بالحﻻل ومستعد من اللحظة هادي نبعت اماليا
حاتم : ماعندناش بنات لجواز … تي روحي والله اﻻ مانقتلك غير اصبري بس خلي ناخد حقي منه هدا
*شد نزار حاتم من سوريته
وقاله : وحق الله ومن طاف ببيت الله اتمسها واﻻ اتمس شعرة من راسها مامظل اﻻ قاتلك قتل… وربي وربي ياحاتم حتى انكان قضيت عمري كله في الحبس وانت تعرف الديناري انديرها عادي
*خاف حاتم طبعا تعرفوه فار … وقال : ارخيني ارخيني ياديناري
نزار : البنت هادي ليا … فاهم ليا انا
حاتم : تي انت بنتجوزها مامسكر عليها حد باب غيري
اغتاظ نزار وضرب حاتم بونية وقال : افهم الكﻻم ليا انا ماتكترش الرغوة….لو انك تبيها كنت خديتها واﻻ خطبتها من بوها من قبل
حاتم : اتمد ايدك عليا يانزار
نزار : ونقتلك لو قربت منها … وجرب ودير الوعارة وبرا لبوها وقول نبيها حنخليك ف جحيم اكحل تتمنى امك ماولداتكش بكل
حاتم : روحي ياغادة
*مشت غادة وحاتم ضرب نزار بونية ف بطنها… وولوا زي الفار والقطوس هدا يضرب وهدا ينتش وصارت عركة طبعا اغلب ضربات حاتم ف الهواء ﻻن نزار يخوا فيهم*
نزار : تركب تنزل اتجنح غادة ليا … وانت عارف الديناري
حاتم : كان نقوللها ع خدمتك تو اتعيفك
نزار : من منطلق ﻻ ناخدها وﻻ تاخدها واﻻه
حاتم : سميه كيف ماتبي تسميه حنقوللها
نزار : تي باه حتى ولو …ماعمريش حطيته ف فمي بعكسك انت خليني ساكت …. واهو قتلك بتضربها البنت واﻻ بتقول ل امها وبوها حسابك عندي نقطعك بطرف وانت حي
حاتم : تي باهي ياديناري
نزار : وماتفكرش تبعتلي حد يقتلني اهو قتلك حنكتب ورقة لو صارتلي اي حاجة فحاتم هوا المسؤل
حاتم : فهمنا
نزار : خﻻص روح… نزعتنا النهار الله ﻻ تربحك
ام غادة : خيرك روحتي
غادة : السوق مسكر … قلت شوي تاني ونمشيله
*روح حاتم مكمود من اللي شافه وصل الحوش غير رايه ومشي للقيافة وقعد عنده *
*نزار روح للحوش ويستنى ف اتصال من غادة قاعد ع اعصابه *
ترررررن
نزار : الووو ….الووو
غادة : الووو
نزار : شن دار فيك ضربك
قولي الو غادة
غادة : ﻻﻻ ماضربنيش وماروحش للحوش بكل
نزار : باهي الحمدلله
غادة : اتهبل يانزار كيف ادافع عليا … من اﻻول خفت بعدين حسيت بالأمان
نزار : انتي اللي اتهبلي والله مانتحمل فيك حاجة …
غادة : وﻻ انا
نزار : اسمعي توا بنكلم اماليا و نجوا نخطبوا
غادة : ياريت بس عارفة ماما مش حتوافق
نزار : عﻻش
غادة : ﻻن عمري 16 العام و قريب امتحانات الشهادة
نزار : اه كاسبة سنة
غادة : ايه
نزار : اممم به انتي شنو موافقة
غادة : والله نتمنى اليوم قبل غدوة … لكن صدقنيي بخطوبتك انحس فيها مش حتخليني نطلع زي قبل
نزار : به انقولك … نعطي فيك كلمة لين تطلعي من الثانوي شن رايك
غادة : به موافقة
نزار : امتى نقدر انجيكم
غادة : امتى ماتبي
نزار : كانك عليا مدابيا من توا
غادة : هههههه
نزار : اممم به غدوة الصبح نبعت امي وخالتي باهي
غادة : هههه باه.. نيزووو بابا جي باي باي
نزار : باي عسولتي
حاتم : صار مزال ملحقنا الديناري
القيافة : بينفذ هالعملية زي ماقتلك
حاتم : كبدي عليه دم دم يااستاد صﻻح
القيافة : شن دارلك
حاتم : دار اكبر غلطة في حياته مستهين بيا ومش معبرني وﻻ حاسبلي حساب
صﻻح : اممم باين عليك شايل منه
حاتم : هلبا مش شوية
صﻻح : تو تتراضو الديناري قلبه طيب
حاتم يتمتم : نتراضى معاه في كل شي اﻻ هادي كان ماقلبتهاش على راسه مانتسماش حاتم
صﻻح : شن ااتقول مانسمعش فيك
حاتم : ﻻﻻ شي … من وراه التنفيذ هدا
صﻻح : شن تبي فيه انت ؟؟
حاتم : ﻻ هكي فضول بس
صﻻح : مش ﻻزمك تعرف … نوض نوض روح انا طالع لمكان
حاتم : باهي به
* طلع حاتم وهوا يفكر كيف بيوقع نزار في عملة مقومة …. *
نزار : كيف حال سنك اليوم
لبنى : الحمدلله باهية
نزار : شنو اتبلي في اللحم
لبنى : ايه طريقة جديدة خديتها من اسامة السيد
نزار : ماتقوليليش اللباز متع ام بي سي
لبنى : ههههه ايه
نزار : ياوخيتي عااضرس اللبني اللي يضحك ….
خ رقية : نزار نسيت المشروب
نزار : باهي تو نجيب يمى نبيك في موضوع
خ رقية : اه قول
نزار : تعالي نقعمزوا وسط الحوش
خ رقية : به هي
نزار : ضرسي ديرينا شاهي تربحي لبنى : باه
خ رقية : اهو قعمزنا شغلتني شن فيه
نزار : هدا احم هدا … نبي نخطب
خ رقية : والله هادي الساعة المبروكة
نزار : ههههه
*لبنى كيف طالعة من المطبخ جايبة الشاهي *
خ رقية : ومن هياا هادي اللي تبيني نخطبهالك عيلة منو
نزار : عيلة فﻻن
*وتسمع هالكلمات واطيح منها لبنى السفرة اللي فيها الشاهي *
نزار : سمله
خ رقية : خيرك يالبنى
*لبنى بين خنقة العبرة وبين شدة الصدمة وبين الصفرة اللي طاحت قالت : شي غير دخت بس ياخالتي
خ رقية : به خليهم تو اتجي مروة اديره … بري اتكي امشي ….يامرررروة مررروة
مروة : نعم يمى …
خ رقية : زودي فيسع خودي نشافة ونشفي الشاهي
مروة : من صبه اهنا
خ رقية : لبنى داخت وطاح منها
مروة : ها به دقيقة بس
لبنى واقفة في المطبخ وتبكي وقريب تاكل صبعها من الغيض
مروة : خيرك لبنى
لبنى : بيخطب يامروة بيخطب
مروة : منو ؟؟؟ نزار ؟؟؟ تتسهوكي
لبنى : وهيا فيها تسهويك هادي
مروة : امسحي دموعك وبري لدار مابين نشفت الشاهي وجيتك تو نهدرزوا
لبنى : باهي به
* مسحت دموعها ومشت لدار تبكي وتغرد *
نزار : خالتي سميرة تعالي قعمزي فيه موضوع
خ سميرة : اه ان شاء الله خير
نزار : اهو تو اتفهمك امي على كل شي … غدوة يمى باهي عالصبح قبل مانمشوا لصبراتة
خ رقية : باهي به
نزار : هي انا طالع توا
خ رقية : فمان الله
حاتم : يامرت عمي اتوقعي اﻻيام الجاية ايجوا ناس يخطبوا غادة ..
امها (عايشة) : ﻻ خطاب وﻻ واحدة بنتي مازال صغيرة نبيها اتكمل قرايتها وتطلع محامية
حاتم : اها به مليح … ومعش تخليها تطلع هلبا هلبا خﻻص كبرت
عايشة : عﻻش شن شايف عليها
حاتم : اح ﻻ مش شايف عليها شي لكن معاكسات وشباب واقفين بس
عايشة : ها باهي يستر الله
..وهكي ياحاتم جسيت نبض مرت العم بش يرتاح خاطرك … ايوه ﻻ جواز وﻻ واحدة خليك هكي ياديناري مازال مازالماريت شي … حتى النظافة اللي تبيها تو نخليهالك مستنقع بضفادع متعه غير اصبر بس ….
ساعة 8 مساء ….
حنين : فهميني والقراية كيف يصير فيها ليك اسبوع غايبة بسبلة بوك مريض واﻻمتحانات عالابواب
غادة : يستر الله المهم توا خطوبتي مع نوار
حنين : امتحانات قريب وتفكر في الخطوبة
غادة : انا نبي نكون مع نزار وبس ﻻ انفكر في قراية ﻻ علقم
حنين : وامك ؟؟؟
غادة : خيرها
حنين : بتوافق ؟؟
غادة : مانعرفش بزبط انحس فيها ﻻ تبيني نكمل قرايتي ونخش جامعة
حنين : تي اماﻻ ﻻش مخليا الولد يجي وبيخطب
غادة : تو بش قتلك امبكري بيعطي كلمة خيرك مش مركزة معاي
حنين : امممم باه نشوفوا اخرتها معاكم انتو الزوز … هيا صوت سيارة بابا جي … نتﻻقوا غدوة
غادة : اوكي به باي
صفاء : يالبنى ماديريش في روحك هكي نوضي كولي لقمة
لبنى : مانبيش مش خاطري
مروة : باهي شن بديري بتقعدي هكي من غير ماكلة اضري روحك راهو
لبنى : ان شاء الله انموت
صفاء : حرام معش اتقولي هكي..
لبنى : اصﻻ انا ميتة من غير نزار … انا جسد بﻻ روح … نزار روحي
صفاء : نوضي نوضي هيا عايشة حياتها وفرحانة وانتي مخليا روحك منكدة … انسيه نزار … ابدي صفحة جديدة مع نفسك وشوي شوي تو تلقي الحب اللي يعوضك عن كل لحظة
لبنى : مش متخيلة روحي من غير نزار …. 9 سنين حب من طرف واحد وتوا يصير هكي
طق طق طق
صفاء : ادخل
نزار : شفشات شن اديرو
مروة : شي مكسدات
نزار : ﻻﻻﻻ باين عليكم اتخططوا في مخطط شرير باين من عيونكم خصوصا ضرس لبني ههههه
صفاء : هههه فرقت حالنا اما مخططات هادي
نزار : اممم به نوضوا هي جبتلكم حاجة حتفرحكم ماﻻخير
صفاء : شن جبتنا
نزار : نوضوا هيا
* ناضوا صفاء ومروة وقفوا قدام الباب اﻻ لبنى *
نزار : ضرس لبني هيا نوضي فيسع مدايرلكم مفجاة
لبنى : باهي تو انجي
نزار : ﻻﻻ نوضي توا
* وتقدم نزار وشدها من ايدها ويجبد فيها ويقول : هياااا يالبنة
لبنى كشخت عليه : خليني ! ارخيني مانبي انشوف شي
* مروة وصفاء فتحوا عيونهم عﻻخير من ردة فعل لبنى …
انصدم نزار من كﻻمها كيف نطت فيه هكي بطريقة هادي . . فقالها : به اسف …
وطلع وسكر الباب …
نزار : استغفر الله العلي العظيم
هي تعالوا معاي
مروة و صفاء : هي
* خداهم نزار للمربوعة ولقوا فيها قفاطين مناسبات 6 قفاطين بكنادرهم و اكسسوراتهم …
نزار : هادو ليك ياصفاء … وهادو ليك يامروة .. وهادو لهديكا
مروة : مش معقولة
صفاء : رووووعة نزار مش عاديااات
نزار : عجبوكم
صفاء : هلباااااا شكرا نيزو
نزار : العفو
مروة : هادو قفاطين لبنى
نزار : ايه … اتفكرت وانا مروح قلت يبوا قفاطين لعرس بنت حليمة فمشيت وشريتهم
صفاء : خلي نمشي انقيس
مروة : حتى انا
* قاموا قفاطينهم وحاجات لبنة ومشوا خشوا لدار *
مروة : والله حمارة هي باهي … كيف اتكشخي عليه هكي
لبنى تبكي : بالله ماتزيدينيش من بكري نبكي على اللقطة ماندريش على روحي
صفاء : ماك حمارة والله صدقت مروة شوفي شن جايبلك قفاطين حلوات بكنادرهم … درتيله نفس اللقطة متع قبل 7 سنين
صفاء : ايه متع البنبلة
لبنى : ووووه عليا والله انا غبية
صفاء : غبية حق بدل ماتجبديه ليك وتثقولي كﻻم معسول… اتكشخي عليه تحسابيه صغير
مروة : شيباني راه 32 عام مش شوية والله وجعني الحق
صفاء : نوضي راضيه نوضي
لبنى : صعب
صفاء : مش صعب
مروة : نووووضي
*وبينما صفاء ومروة يقنعوا في لبنى انها تمشي تصالح نزار *
ترررررن تررن
نزار : ياالو
غادة : اهلين نيزووو
نزار : هﻻ بيك ياعيون نيزووو … توا كيف كنت انفكر فيك
غادة : هههه القلوب عند بعضها
نزار : حق ماكالمكش حاتم
غادة : ابدا
نزار : باه تمام اسمعي غدوة حاولي اتجي بحدا السوق مع ساعة 11 ضروري جدا بنعطيك حاجة
غادة : ان شاء الله به حنحاول
يﻻ توا ﻻزم انسكر
نزار : خليك شوية ياروحي
غادة : ماه مانقدرش بابا خش الحمام فقلت نكلمك نسمع صوتك ﻻني استحشتك هلبا يانيزو
نزار : ياحليلي من اللي مستاحشني حتى انا مستاحشك
*جت لبنى وطقطقت عالباب طق طق طق *
نزار : شوية بس
غادة : من جاك
نزار : اكيدة واحدة من خواتي
غادة : بالك بنت خالتك اللي حكيتلي عليها بداية تعارفنا
نزار : ايه مرات
غادة : تهدرز معاها
نزار : ايه عادي لبنى معتبرها زي صفاء ومروة اختي يعني
* وطاحوا هالكلمات في ودن لبنى وتألمت وتحسرت لنفسها *
غادة : اممبه يﻻ باي باي حبيبي
*توووت توووت تووت *
{اتهببببل قالت حبيبي محﻻهااااا كيف قالتها وووك عليا شعور ﻻ يوصف حسيت فلبي ايدق ف 200 خلي انشوف من كان ايطقطق }
*فتح نزار باب المربوعة ومالقي حد *
مروة : شن صار
لبنى : عنده مكالمة
مروة : اها
* يوم الخميس ساعة 10 صباحا مشي نزار لشارع المدار خدي نقال لغادة و حط شفرته الجديدة فيه ومع 11 كان قدام السوق … احتالت غادة على امها من هنا وهناك وطلعت لسوق *
غادة : صباح الخير
نزار : صباح الورد ياوردة .. كيف حالك
غادة : الحمد لله وانت
نزار : الحمد لله استاحشتك هلبا
غادة : حتى انا
نزار : مش حنعطل عليك خودي الكيسة هادي ﻻﻻﻻﻻ ماتفتحيهاش توا … بعد مانروح باهي
غادة : باه تمام
نزار : اهو توا بنروح و ناخد اماليا بش يعطوا فيك الكلمة ماتعطليش في السوق باهي
غادة : حاضر
نزار : ردي بالك ع روحك … سﻻم
غادة : سﻻم
*روح نزار للحوش *
نزار : ها شنو واتيين
خ سميرة : ايه واتية نلبس جبتي بس
خ رقية : وانا نلبس فريريشيتي وخﻻص واتية
نزار : اماﻻ هيا … وصفاء ومرة وضرس لبني وتوا رواحكم مع ساعة 12:30 بنطلعوا صبراتة
ضفاء : به
لبنى : مش ماشية انا
*اتفكر نزار موقف امس وكشر وقالها : براحتك يالبنى .
خ سميرة : راحت عينها شن بتقعد ف الحوش بروحها او … هدا ماناقص
نزار : اه نحسابك بتقعدي معاها
سميرة : ﻻ ياود خلوقي ضاسقات نبي انشم هواء
نزار : اماﻻ قولها توتي روحها بنتك بﻻ تزعبين زايد
لبنى : مانيش ماشية مش بسيف
خ سميرة : سكري فمك هيا عاد بﻻ دلع ولد خالتك اكبر منك تحشمي اللطف
*ناضت لبنى وخشت لدار *
خ رقية : هيا هيا خلي نمشوا توا وبعدين ساهل اتقول هكي غير تلقى صفاء ومروة يوتوا فرواحهم تو اتنوض حتى هيا
* روحت غادة للحوش وفتحت الشكاؤة ولقت فيه باكو مرسوم عليه نقال فتحاته لقت رقم مسجل باسم حنين … بربشت لين اتصلت بيه
غادة : الو حنين
نزار : ههههه تي هدا انا اما حنين
غادة : ههههههههه والله من الصدمة لين لخبطني نحسابه ايجي مسجل بارقام صحاب الشخص
نزار : ههههه مغباك يابنت … اسمعي انا توا جايينكم اهو كيف بنركب السيارة
غادة : تمام به
نزار : النقال دايرهولك صامت ماتبربشيشي هلبا بش معش تلغي الصامت وتنكشفي باهي
غادة : به
نزار : والباكو مزقيه طرف طرف وحطيه ف شكارة ولوحيه ف قعر الكناسة حشاك
غادة : لهدرجة تخاف عليا نيزو
نزار : كان ماخفتش على سنفورتي عسولتي على من بنخاف … يﻻ المهم سﻻم امي وخالتي جايين لسيارة
غادة : سﻻم
*بعد ربع ساعة وصل نزار قدام حوش غادة … ونزلوا رقية واختها وخشوا ….بعد كيف حالك والسﻻم وجو النساوين *
خ رقية : دلوني عليكم عويلة وجاية نخطب بنتكم لولدي احنا من عيلة فﻻن الفوﻻني
خ عايشة : اهلين بيكم … لكن والله شن بنقولك بنتي صغيرة حتى التانوي ماكمﻻتاش
خ رقية : اي بتعطوا فيها كليمة لحين تطلع من المدرسة
خ عايشة : ﻻ نبيها اتكمل الجامعة الحق
خ سميرة : البنت ماليهاش اﻻ حةش راجبها واحنا جيناكم من الباب وولد اختي والله مايتعيب ماشاء الله مهندس وبخديمته ومعيشه
خ رقية : وكان تبي نستنوها لين تطلع من الجامعة
خ عايشة : كم عمره
خ رقية : والله ماعارفة الحق كم ياسميرة ؟؟
خ سميرة : تقريبا 31 يا 32 عام حاجة زي هكي ماتشديش عليا
خ عايشة : نعم ! كبير عليها هلبا فرق بينهم قريب 16 العام
.*غادة تتسنط عليهم وقريب اتموت من ردود امها *
خ سميرة : اللطف شن درتيه شيباني قاعد ف عز شبايه
خ رقية : باهي اماﻻ… نستادونك وخﻻص
خ عايشة : سامحوني
خ سميرة : الزواج قشمة ونصيب واحنا مابنجبروك علينا … بسﻻمة ..
*طلعوا هما الزوز يتكركبوا ونزار قاعد ع اعصابه ف السيارة ركبوا لسيارة *
نزار : هاه شنو صار
*شنو بتكون ردة فعل نزار ؟؟
ولبنى شن حتكون ردة فعلها لهلخبر وحاتم … شن بيصير فيه لو سمع بديناري جي خطب … وشن داسله من دسائس ومؤمرات… هدا اللي حنعرفوه في الجزء القادم
يتبع……..
لقراءة الجزء التالي : الجزء الحادي عشر من رواية عاصفة الصمت
لقراءة الجزء السابق : الجزء التاسع من رواية عاصفة الصمت
للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
