الجزء العشرون من رواية عاصفة الصمت

وفي الجزء العشرون من رواية عاصفة الصمت دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .

الجزء العشرون من رواية عاصفة الصمت

* خنقتها العبرة لبنى وخدت لصقة جرح تبي اديره ع خده… وﻻ اراديا انحنت بتطبع قبلة على خد نزار …. ونزار فتح عيونه … وراسه مشوش معش استوعب
طبعا لبنى منحنية ومغمضة عيونها وماشافتش نزار لما حل عيونه .. قبلاته ع خده … فغمض عيونه بقوة وفتحهم يحساب روحه ف حلم من ضرب وساطور وحبس الى لبنى مطبسة عليه بتقبله.. المهم دفها نزار وقال بنبرة حادة جدا : تو بش عيب عليك هكي … راجل مضروب قدامك واياماته سود على راسه وانتي اديري فيه هكي …
* انخلعت لبنى … واتحشمت ووجهى احمر ودمعوا عيونها …
لبنى حطت ايديها ع وجها وقالت : اسفة اسفة نزار
* وناضت تجري طلعت من المربوعة وسكرت الباب و خشت للمطبخ تبكي
{ااااخ ياضلوعي اخ حسبي الله ونعم الوكيل فيك يا شقندي الكلب والله اﻻ مانوريك …. }
* شاف جنبه لقي الحاجات اللي جايبتهم لبنى وجسمه كله مضمد وامطبب ….خنقاته العبرة عاللي صار فيه ووجعاته نفسه كيف اهانه الشقندي وكيف الساطور ضربه …

{بارك الله فيها لبنى الباين خششتني من غير علم العيلة … وانا كشخت عليها … لكن عﻻش دارت لقطة زي هادي انا لو في مكانها وهيا سايخة ماكنتش حندير هكي اللطف ظ… تخلطت عليا من كل مكان ﻻ لقيتها من غادة ﻻ لقيتها من حياتي الي فاتت اللي نحساب روحي وليت نظيف واهو الشر ﻻحقني ﻻحقني … اقريب ننتقل مكان تاني وﻻ نطلع منها ليبيا مرة واحدة .. ..اخ وووه عليا وووه ضلوووعي اااااي خزيه خزيه ديناري ينضرب هكي وجعتني حالي ياربي احيييه محرها …. والله يديا معاد حاس بيهم من كتوفي لتحت وظهري كله جروح يعطيك كسرة يا ساطور البلي &#@$
انحس بالعطش بنموت من عطشي اتقول فصحراء }
* بينوض نزار ومعش قدر جسمه مدقدق وكل جيهة من جسمه تشكي
نزار بكل نبرة عجز واسى وحزن وضيق نادي : لبنى … يالبنى …

* لبنى قاعدة ف المطبخ وقاتلة نفسها بكي …. وتسمع ف صوت نزار ينادي يالبنى
لبنى : ياكلبة بديتي حتى تتخيلي ف صوته والله بنهبل … خلي نمشي ف دار اندس روحي خير …
نزار : لبناااا عارف انك تسمعي فيا تعالي … تعالي يابنت بالله عليك

* كيف طالعة لبنى من المطبخ وسمعاته ينادي ويتكلم يقول لبنى … فمشتله …فتحت الباب بشوية وتبيت عليه وتبكي
نزار دايخ قالها : اميا يالبنى اميا …بنموت
*مشت تجري لبنى خدت مالقي طاسة ورجعت للمربوعة
عبتها وحطت المالقي ومدتهاله ومزال تبكي … ماقدرش نزار قام ايده نزار … وخدي طاسة وقام روحه شوي وجي قدامه الساطور فطاحت منه طاسه ….
لبنى : ستنى ستنى تو نجيب فوطة
* طلعت عسريع دارت حوايج ف فراشها بش معش يفبق بيها حد وفتحت الدرج خدت حبوب ايبروفين وجابت فوطة من دار نزار ورجعت للمربوعة …. مسحتله الميا من على بطنه ورقبته ومسحتله وجهه فيه شوي دم ع جبهته و راء ودنه وهيا مازالت تبكي …
نزار غصاته العبرة وقال : سامحيني يالبنى …معش تبكي والله انا تعبان تعبان من كل شي ومش ناقص نشوف حد يبكي … قدامي خصوصا انتي وخواتي بالله معش تبكي
* مسحت دموعها لبنى من سكات وعبتله طاسة وسندتله راسه ع ايدها وشرباته ميا ….
نزار : عبيها تاني عطشان
*زادتله طاسة ومدتله حبة اﻻيبروفين لجيهة فمه …
نزار : حبة شنو
لبنى : تخفيف الم
نزار : متع سنون هادي
لبنى : نتع كل شي تخفيف الم

*فتح فمه نزار وحطتله لبنى الحبة وسنداته تاني ع يدها وشرباته الميا*
نزار : صحيتي الله يبارك فيك
* لبنى مزالت ساكتة خدت كنتيرا بتلبسهاله *
نزار : ﻻﻻ مش ﻻزم
لبنى : انت ماتقدرش تتحرك ولو خشت عليك خالتي غدوة وشافاتك هكي حاترعش عليك جسمك زي الخريطة
*استسلم نزار وخدتله كانتيرا وتبكي دخلتله راسه فيها وبكل حنية قامتله يده بش دخلها ف مكانها
نزار : ايي اي اييي
لبنى : اهو كملنا خﻻص ….
نزار : بالله عليك معش تبكي قتلك سامحيني … ماكانش قصدي ردة فعل …
لبنى : نبكي ع نفسي يانزار
نزار : عﻻش
لبنى : انحس في روحي سخيفة ومنحطة بالموقف اللي صار

نزار : حاشاك حشاك …اﻻنسان عبارة عن كتلة تتحكم فيه المشاعر واﻻحاسيس ….وهدا جراير مسلسﻻت تركية ايسوقولكم في امور غلط ويخلوا البنت تتخيل وتعيش عالم وردي … انا ولد خالتك سترك وغطاك صح مانشجعكش ع هيك موقف… انأنبك عليه لكن ف نفس الوقت مانلومكش ممكن مشاعرك ف هديكا اللحظة كانت اتفكر ف مسلسل التركي فدرتي هكي…كل انسان يغلط ماناش مﻻيكة…واتفهمت الموقف لكن معش تعاوديها يالبنى … خﻻص معش تبكي …
* حطت يديها لبنى ع وجها فقالها نزار : معش تبكي عاد خيرك هكي …
لبنى : المهم سامحني مش قصدي
نزار : عارف انك عفوية … احييه يارجلي …
لبنى : خلي انلبسك تيشرت متاعك وارتاح وارقد ….

*طلعت خ سميرة من دارها وخشت للحمام
لبنى : اشبح من ناض وخش للحمام … هيا فيسع حاول اتقيم ايدك … ايوه تمام
* لبساته التيشرت وكيف بتنوض بش بتمشي لدارها… امها طلعت من الحمام …
لبنى : حييي طلعت يانزار …
*وهيا طالعة زي اللي سمعت صوت لبنى جاي*
نزار : به طفي الضي
* تقدمت ام لبنى وتحساب لبنى رجعت تسهر ف المربوعة
سمعت لبنى خطوات تتقدم فمشت خطوتين خدت يرغان الضيوف وفتحت تلفزيون وفرشت الغطاء فوق نزار وخشت بحداه وتكمكمت

فتحت ام لبنى الباب وشافت نزار

نزار : انعم خالتي سميرة
خ سميرة : خير نزار
* وهديكا لبنى لاصقة ف نزار
ونزار جنبه مشلوط بحديدة …
نزار : احيييه خيرات فيه احيييه فيه حاجة ؟؟
خ سميرة : ﻻ شي نحساب لبنى اهنا
نزار : ﻻﻻ شن لبنى اهنا ياخالتي ليل اللطف
خ سميرة : ههههه ماه امبكري كانت ف المربوعة نحسابها ولت
نزار : اها ﻻﻻ احيه
* لبنى ف عالم اخر تحت اليرغان … فاتت الخيال من غادي ونزار برغم انه مضروب وموجوع اﻻ انه حس بشعور جميل … انثى بجنبه كلها دفئ وحنان … *
خ سميرة : سمله خيرك احيه احيه
نزار : رجلي توجع فيا
خ سميرة : ﻻباس عليك ادهنها بزويتة
طفى تلفزيون نزار وضلمت المربوعة وقاب : ان شاء الله غدوة ندهنها غير ناعس توا تصبحي ع خير

خ سميرة : تﻻقي الخير
* طلعت خ سميرة وسكرت الباب
نزار : ياشفشة الشفوش يا شن بيقول فمي عليك
*طلعت لبنى من اليرغان وقتله بالهمس : كان مادرتش هكي راه دارتنا تهمة امي ونعرفها
نزار : باه و ﻻش تتحركي وتمرجي فيا ف جنبي وانتي عارفة اني متحندب ومضروب
لبنى : مانبيش امي تزبط خفت تلقاك فجاة وليت سمين واتشك فيا
نزار : ﻻ مظلم شاشة تلفزيون ياهمي انا …
لبنى : اممم…به بنسئلك
نزار : نعم
لبنى : عﻻش صار فيك هكي ..
سرح نزار شوية وقالها : متشبهين فيا …. واحد مداير عملة ويحسابوه انا …
لبنى : كيف يحسابوه انت … شن ماعندهمش ادلة واسم الشخص
نزار : ﻻ … هوا مداير عملة وشبحوه بشكل واختفي …المهم يدورو عليه شبحوني يحسابوني انا
لبنى : اها اوكي
نزار : بس قوليلي
لبنى : نعم
نزار : كيف هكي ماكنتيش متسرعة وماقلتيش ل امي وامك وخواتي فهميني …
لبنى : هكي زبطت من لما قتلي اششش
نزار : مش خاشة راسي انك فهمتيني لما اشرتلك اشششش وقت رفعوني الشرطة
لبنى : ههههه ماه قعدت انحلل فيها ف راسي قلت زعما قالي اشش بش معش يفيفوا بيا الشرطة واﻻ بش معش انقول للعيلة … وادكرت هداك الموقف متع كتفك والباب وقت ماقلتش ل خالتي
نزار : بنت واتفكر مش خاشة راسي … حتى وقت وصلت للقسم قلت اكيدة قالبينها عياط ف الحوش
لبنى : مابيتش نقولهم قعدت نستنى وخﻻص
* للحظات … سرح نزار في تفكير وتفهم لبنى للموقف .. وكيف انها غطت عليه .. وسهرت تستنى فيه
{سبحان الله ياربي كيف غطت عليا واستنتني … وقامتني من قدام الباب وضمدتلي جروحي … وتحملتني برغم اني كشخت عليها }

لبنى اتفكر >> محﻻك يانزار كل شي فيك حلو … طيبك تفهمك محﻻه والله محﻻه يجرح ويداوي نتمناك ليا امتى بتحس بيا امتى …
نزار : ربي يحفظك يالبنى … بري ارتاحي … الوقت تاخر …
لبنى : ان شاء الله … تو غدوة الصبح انجيك نطمن عليك …
نزار : تمام …
* طلعت لبنى وسكرت المربوعة وتسللت لدارها وخشت رقدت … وجي اتصال ل نزار من القيافة
{ووووه والله ماقادر نحرك ايدي بش نطلع تلفون من جيبي … هي 1،2،3 ايييي احييييه وووووه ووووه }
نزار : ايوه نعم ….
القيافة : الحمدلله ع السﻻمة
نزار : كيف عرفت
القيافة : ربحي جي قالي ان عيلتك قالوله جت الشرطة وخداته
نزار : عيلتي انا ؟؟؟
صﻻح : ايه اماﻻ عيلة امي !
نزار : والله بجديات
صﻻح : تي ايه
{معناها لبنى قالت لربحي من غيرها والله نهارها اغبر كان تطلع اتكلم فيه من وراي واﻻ هوا يستغل فرصة وجودي مهناش ويتصل بيها نهارهم اسود كان هدا }
صﻻح : الوووو
نزار : نعم معاك
صﻻح : خيرك اتبكشت
نزار : ﻻ شي غير التغطية هربت
صﻻح : المهم دوخونا ياراجل اتصوؤ نتصل من مغفر لمغفر حتى الكﻻب اللي مانبيش نكلمهم كلمتهم بش واخيرا وصلت لشقندي الخامر وقتله انك مدعوم وبش طلعك …كان هدا راك قاعد لتوا محبوس وماحدش يعرف طريقك
نزار : بارك الله فيك يالقيافة عارفك ماتقصرش
صﻻح : اشكر ربحي انا والله ماكنت نعرف الحق لين حي قالي
نزار : باهي باه …هي هاوينه يا لقيافة سﻻمات
{ربحي يالبنى ! ربحي .. اديري الغلط والشينة انا والله العظيم متسامح في اي موضوع وعاطيك عيوني بزيادة مش مفرق بينك وبين صفاء ومروة من اللي كان عمرك 15 العام …تحملت مسؤليتك انتي وخالتي ودرت معاها الباهية حتى بوها ما تلفتلها لوحها وخﻻص ومع هدا مش بجميلة هدا واجبي لكن اديري فيا هكي يالبنى … كنت نتمنى مانشدش عليك حاجة زي هكي كنت نتمنى انزفك لعريسك بيدي شخص ايجي من الباب شخص يكون راجل يطقطق علباااااب علباب يالبنى … حسبي الله ونعم الوكيل … خيرها المصايب تتلقط عليا من كل تركينة … اليوم من اوله مشكشك استغفر الله … ربحي يالبنى ! معناها هوا هدا الشخص اللي يتكلموا عليه صفاء ومروة ان لبنى اتحبه من طرف واحد وهوا مش مبادلها الشعور … صح مادخلتش انا ف الموضوع لكن نحسابها هكي وخﻻص بدون مكالمة وهيا تاريته تجري ف جرت ربحي وربحي مطاوعها يهدرز عليها وهيا اتحبه وهوا مايحبهاش …. اصبروا عليا انتوا الزوز …غير نبرا ونوقف ع رجليا بس ربحي مايحصلها عركة اﻻ زي زهير واحرف تو انوريكم المكالمات شن شكلها … والله البنات ماينفع فيهم التفاهم والطيب ينفع فيهم كشخ … هزب ويالله ايجو لطريق حبيبتي خانتني مع صاحبي بالاتبات والدليل …وبنت خالتي اتكلم فصاحبي …. به صبركم بالله بس وياويلك ياربحي الكلب انت واللبنة

*سحن سحن نزار وهفت عليه الوجع من حبة اﻻيبروفين اللي عطتهاله لبنى وخداه النوم *

ثاتي يوم ساعة 7 صباحا …
خ عايشة : غادة … ياغادة …نوضي يابنت كان بتمشي مدرسة
غادة : والله تع تعبانة يمى
خ عايشة : شن فيك
غادة : عندي حرارة وصداع
خ عايشة : هي نوضي بﻻ تزعبين
غادة : والله بجديات يمى
* حطت خ عايشة ايدها ع راس بنتها ولقتها سخونة زي الجمرة

خ عايشة : اللطف ! مناش جاتك الحرارة
غادة : مش عارفة
خ عايشة : به استني تو نجيبلك ليمة قارصة مشوية تحطيها ع راسك
* وكيف طالعة من دار غادة تﻻقت مع مكرم
مكرم : صباح الخير عمتي … خيرك تجري
خ عايشة : غادة مريضة حرارتها شايطة فيها النار
مكرم : خلي نرفعها مستوصف واﻻ العيادة
خ عايشة : زعما
مكرم : ايه ايه … اهو انا ﻻبس وواتي …لبسيها حوايجها
خ عايشة : انت ماعندكش سيارة يامكرم … خلي تو انديرلها ليمة مشوية كان ماتحسنتش تو نقول ل بوها يرفعها وخﻻص
مكرم : باه تمام
* خشت امها للمطبخ وانتهز الفرصة وتسلل لغادة وقالها : سﻻمتك غدوشي
غادة عيونها شبه مغمضات زي واجدة مسخسة و مبتسمة وتهلوس تتخايل فيه نزار : حبيبي .. ب ه ه باهي اللي كل كم كلمتني … معش تبعد ع عل عليا … انا ماعممري خن خنتك …انا نبيك انت
مكرم : عارف ياروحي انك ماخنتينيش عارف … وانا بحداك طول العمر
غمضت عيونها غادة وقاعدة تهلوس : انحبك …انحبك
فاقت حنين وسمعت اخر كلمتيم قالتهم غادة
مكرم : حتى انا انحبك حبيبي
حنين : مكرم شن ادير اهنا
مكرم : اه اسف اهو طالع هي …

طلع وسط الحوش وقعمز ويفكر ان غادة رجعت زي قبل وانها ماتغيرتش عليه … وانها رسمي تبيه ومشاعرها اتجاهه ماتغيرتش

حنين : غادة ياحمارة ….انتي ياكلبة
* على خشت خ عايشة وقتلها : اللطف البنت مريضة وانتي تقوليلها كلبة
حنين : خيرها توا كانت تدوي
خ عايشة : عندها حرارة يستر الله وخﻻص
* حطتلها ليمة مشوية
غادة : كل كلميه حن حنين ن ن نبيه
خ عايشة : شن اتقولي ياغادة
حنين : حي تهلوس شورها من الحرارة ياخالتي
غادة : م ماخنت ش … ني نزار … ني نزار ….ني زار … مش انا
خ عايشة : من نزار ؟؟؟؟
حنين : هدا هدا اﻻستاد نزار في المدرسة
خ عايشة : خيره وشن قصة خيانة
حنين : ﻻﻻ قالت ماخنبتش غير صونها مش مفهوم
خ عايشة : به شن القصة
حنين : بنت خنبت تلفونه ويحسبها هيا المهم في نهاية الدوام داروا تفتيش وحصله النقال من البنت
خ عايشة : وكيف يتهم هكي
حنين : قصة قديمة ليها من بداية الينة ياخالتي فوتيه المهم توا كيف بنهبطوا حرارة غادة
خ عتيشة : اهو نجربوا ليم كان مانفعش نقولو لبوها يرفعها وخﻻص
* بعد نص ساعة *

مكرم : ها شن صار عمتي
خ عايشة : باهي خفت عليها حرارتها
مكرم : اهو جبتلها دواء تخفيف حرارة … اعطيها منه
خ عايشة : باهي هي …

ساعة 8:15 صباحا …
ناضت لبنى اول واحدة قبل الكل … خدت دوش ولبست توتة جديدة وشعرها مبلول منسدل على كتفيها وبخت بخة بسيطة من برفان حلو …وخشت للمطبخ بتوتي الفطور ل نزار … دارت قهوة بالحبهان و شكشكت دحية وفتحت فردة خبزة ودارتلها هريسة عربية وحطت دحية وفوقها جبنة شرائح ساحت عالدحية السخونة …. وحطتهم ف سفرة….
نزار يحلم ان جماعة شدوه وغرقوه في البحر … وهوا يقاوم يبي يطلع ومش قادر … لين انقطع عليه النفس
وناض مخلوع
{استغفر الله العلي العظيم … اتغفر الله}
* وكيف ناض بش بيمشي للحمام ايعكز واحدة واحدة عليه … … خشت لبنى للمربوعة وقالت بكل سعادة : صباح الخير
* اذكر نزار عملتها مع ربحي قرن حواجبها وﻻ ارديا ولأول مرة نزار في حيااااااته ايمد ايده …وعطها كف امدرجح *

شن موقف لبنى من نزار … وشن حيصير في نيزوو وشن ييدير لربحي وشن صار في مكرم اللي يحساب ان غادة اتحبه …هدا اللي حنعرفوه في الجزء القادم ..

يتبع……..

لقراءة الجزء التالي : الجزء الحادي والعشرون من رواية عاصفة الصمت

لقراءة الجزء السابق : الجزء التاسع عشر من رواية عاصفة الصمت

للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة

جميع الحقوق محفوظة للكاتبة لوزة .