ووصلنا إلي نهاية الرواية وستتضح كل الأمور فيها ونتمني أن تكون همس العيون من الروايات التي اعجبتكم من الدراما والاكشن والرومانسية التي بها، وهيا بنا لنقرأ السطور الأخيرة لمعرفة هل ستكون النهاية سعيدة ام حزينة ؟
الجزء العشرون والأخير من رواية همس العيون للكاتبة لوزة ليبية
اياد يشوفلها ومصدوم ويفكر تي منو هدا اللي واقف معاها نهارها اكحل ع دماغها
نورس تلفتت بصدفة وشافت اياد فقالت ل عادل :كله منك اهو خطيبي شافني هي.اقعد اهنا ماتتحركش
ومشت وخلاته وجت جيهة اياد
اياد:شن تبيني نقولك برافو ! خاينة مع مرتبة الشرف !
نورس:ماخنتكش ماتخلطش اﻻمور منك ليك افهم قبل اياد
اياد يكشخ:شن تبيني نفهم شفتك بعيوني الزوز …تضحكي معاه
نورس:صح وصار … لكن انت ماتعرفش الحوار اللي دار بينا والكلام … ماتحكمش عليا بالخيانة هكي وخلاص كل شي اﻻ هادي
اياد:ووواااك يانورس تعبت من تبريراتك تعبت …فديت راهو وحق ربي ماناقص…
نورس:اسمعني قبل
اياد:نبي نفهم العوج ﻻش اديري فيه دكرتيني ب رهف نفس الشي ونفس الموقف بتفصيل ماخليتي منها شي
نورس:لهنا وستوب انا مش زيها صاحبتك اﻻولى ولو انك متليع منها مش بضروري كل البنات زيها ولو انك بتحط فبالك هيك مقارنات معناها حتى انا نقولك انت زي هداكا اللي كان واقف معاي
اياد:تي من هوا و وين تعرفيه انتي بش حتى تقارنيني بيه
نورس:هدا عادل يا اياد … ووقف عليا قالي انا نادم فأنا ضحكت قتله هدا وين ندمت انت ! وصدقني لو في موقف مشابه لهدا ورهف وقفت قدامك و حطاتك تحت امر الواقع كنت حدير زي ماانا درت ….
اياد:ماتبرريش لروحك نورس
نورس:مانبررش لروحي . عادل لو نبيه راني رجعتله من قبل مانرتبط بيك بس انا بعتله مسج وهزبته فيه وقطعت علاقتي بيه وقتي … مش نورس اللي تمشي لشخص باعها .. حطها فبالك اياد … ولو اني غالطة صدقني كنت حنعترف بغلطي وانت تعرف الشي هدا لكن انا مش غالطة واللي صار حكيته واونه عادل واقف تبي تسئله اسئله …. وتوا بنروح بصدق مانحبش من يظلمني
اياد:ديما بعفساتك وتقولي مانحبش من يظلمني سبحان الله المواقف ديما تصير قدام عيني..
نورس خنقتها العبرة وعينها بدمع فقتله:موقف ع موقف يختلف اياد …. وانا قتلك اللي صار.. وزي ماقتلك مش واثق من كلامي برا اسئله واعرف منه كل شي
وبينما اياد و نورس يتناقشو حس عادل انه تسبب في مشكلة بينهم فقرر انه يمشيلهم
تقدم منهم وقال:السلام عليكم
تلفتله اياد وعيونه غضب كان يلقى يعجنه طريحة
عادل:مماتبوش تردو سلام ….به عموما سامحنا ياخوي انا اللي وقفتها خطيبتك … و نتمنى ان ماتفهمهاش غلط …هيا اصلا ماعطتنيش وجه وان شاء الله ربي يجمعكم ويهنيكم تستاهلوا كل خير … الحق جيت نقول الكلام هدا ومتخوش اتصير عركة واﻻ تمد ايدك عليا حنخسر عملي المهم قلت عمل ندور تاني لكن نكسر حاجة بين اتنين مايجيش يكفي اني كسرت حياة ناس كويسة فيما فات
تنهد اياد وقال:صار خير صار خير
عادل:منور خوي ربي يحفظك … هي سلام عليكم
ومشي عادل وخﻻهم…
نورس:مروحة انا يا اياد
اياد:استغفر الله ﻻزم تحطينا ف مواقف زي هادي
نورس:المواقف اتجي لعندي
سكت اياد يفكر ويفكر وطال سكوته
ونورس تفكر … حي شورني قسيت عليه بالكلام افففف مطول لساني …به شن بندير نعتدرله وانا مش غالطة هلبا هكي …
اياد:خلاص اوكي روحي توا
نورس:اوكي مروحة …سﻻم
كيف مشت نورس خطوات قالها
اياد:استني
مسحت دمعتها نورس وتلفتتله وقتله :نعم
اياد شاف للكيسة بعدين شاف لعيونها ….
قعد يركز فيهم فقالها :عيونك يتكلموا نورس …
غمضت عيونها نورس وتلفتت لجنب نزلت من عيونها دموع
اياد:اشبحيلي اهنا … تي نكلم فيك
نورس:نعم
رفع ايده اياد وبطرف صبعه مسحلها دمعتها وقالها:معش تبكي نورس ..
اللي مصبرني عليك وع مواقفك هو جرائتك وانك صادقة معاي ولو على حساب نفسك حتى انك خايفة تخسريني اﻻ انك ماتكدبيش وديما تقولي ف الحق
نورس:كﻻمك وجعني اياد مس ف ذاتي …. انا مانخونش فيك حتى ف احلامي ف خيالي بنجي نخونك ف الواقع ! خلي ماضيك وراك اياد .. انا حاضر علاش تبي تمزجني مع بقايا ماضيك
اياد:انتي حاضري ومستقبلي يا زهور ربيعي …. انتي ضي العين ومانبي ضي العين لو غبتي عنها
نورس:انت حاضري ومستقبلي وكل دقيقة نتمناك اتكون يا ﻻاي
اياد قدملها الكيسة وقالها :تفضلي
نورس:جبتلي هدية
اياد:ايه خوديها
نورس:شكرا …. اااه محﻻها وردة اتهببببببل . رربي ايخليك ليا
اياد:ويخليك ليا … هي توا ارجعي للعمل
نورس:ان شاء الله… سلام
رتاج :الو نورس انتي وين
نورس:ف سيارة تعالي هي
رتاج:اوكي جاية هي
طلع اياد من كورنثيا وتوجه ل تاجوراء خطم ع سوق الخضرا خدي شوي خضرا وفاكهة وحطهم ف الكوفينو ورجع للعمل … وقعمز مع ايمن يهدرز …
اياد:جي صلاح؟؟
ايمن:جي ايه
اياد:وينه اماﻻ
ايمن :مش عارف اكيد ف مكتبك
اياد:به خلي نشوفه
ركب اياد ل مكتبه ولقي نقال صلاح لكن هوا مهناش
بعد شوي خش صلاح …
صلاح:السلام عليكم 
اياد:وعليكم السلام
صلاح:كيف الحال
اياد:باهي كويس
صلاح:خطبت واﻻ مازال
اياد:ﻻ ماخطبتش ومانبيش نخطب
صلاح:مسامحك اياد راه لو انك درت اي شي من وراي
اياد:مادرت شي من وراك ماتكسرليش راسي صلاح لحد اﻻن قاعد ساكت راه كدبتني امس و طلعتني بيوع وسكتت ومشيتها لكن كل شوية لوك لوك لوك خلاص ياراجل مانبيش نتجوز تو نرفضه وسيم واختي تفضل اخطبها مرحبتين بيك تمام هكي مش انا اللي نبيع صاحبي يا صلاح مش انا….. ادكر كم موقف ادكر قعمز وادكر
صلاح:وجعتني يا اياد
اياد:براااا
صلاح: باهي به عموما صار خير وسامحنا
اياد:مسامح تعرفني مانشيلش ف قلبي
صلاح:اوكي طالع انا تبي حاجة
اياد:ﻻﻻ سلامتك
صلاح:اوك سﻻم
نقال اياد يرن
اياد:ايوه
وسيم:مرحبا اياد شن اخبارك
اياد:تمام شن اﻻموري
وسيم:شنو صار العويلة يبو يجو
اياد:والله شن بنقولك … تفضل مرحبتين بيكم
وسيم:اما يوم هكي
اياد:يوم التلات ان شاء الله
وسيم:بإذن الله وانت طيب …
اياد:ماشي ماشي سلام
ومرو هالمواقف ع خير …وجي يوم التلات
صلاح:صار بيخطب وسيم اليوم
اياد:ايه وعمار قال بيخطب بنت الجيران
صلاح:به وانا امتى
اياد:شنو انت ؟
صلاح:بش طلبت منك اختك الثانية !
اياد:نحسابك بطلت معش فتحتلي الموضوع
صلاح:ﻻ غير كنت مشوش شوية
اياد:خﻻص تفضل اﻻربعاء غدوة
صلاح:تم
نورس: وسيم بيخطب يارتاج
رتاج:اها من بيخطب
نورس:بش قتلك اخت اياد
رتاج:صح ايه قتيلي
نورس:غير امتى انا بس
رتاج:بالك بعدها
نورس:ان شاء الله يارب
روح اياد للحوش وقال ل امه ع موضوع سارة
خ مريم:ياوالله نهار سعيد
اياد:بحبحي يمى هي بتعرسيهم مع بعض
خ مريم:الحمدلله غير امتى تحط عقلك ف راسك وتخلينيي نخطبلك
اياد:ان شاء الله غير نتهنى ع وخياتي قبل وبعدين ساهل
وووصل يوم الثﻻتاء وجو اهل وسيم خطبو سرور … وكانت عيلة اياد شبه موافقة …
وتانيوم جو عيلة صﻻح وخدبو سارة
وعيلة اياد موافقين ﻻن خ مريم تعتبر ف صلاح زي ولدها
وحددو يوم للفضانية وداروها مع بعض العيلتين ف يوم واحد عيلة صلاح وعيلة وسيم وكان بو نورس حاضر معاهم ويشبح ل اياد وحس روحه وكأنه شايفه بس ماادكرش وين
واتفق معاهم اياد وخواله وتمت الفضانية ع خير وتعشو وروحو
اياد:مباااارك وخياتي ان شاء الله كل شي بالبركة
سارة:الله يبارك فيك الفال ليك
سرور:الله يبارك فيك
عمار:باهي امتى بتخطبولي النهارات
خ مريم:لين نخطب ل اياد
عمار:تي هيا اياد هوينا عاد
اياد:تي غير ابني قبل
عمار:ﻻﻻ بما ان خواتي مشو قلت نفتح داري ع دارك ونديرها دار نوم بالحمام وخلاص
اياد:حيه عالتخطيط !
خ مريم:بنعطيك دار واحدة بس
عمار:وراسك يمى مابين مادرت حوش
خ مريم:باهي باهي يستر الله
اياد:راسي مصدع شوي بنخش نتكى
خ مريم:نوضي سرور عطيه حبة راس فيسع
سرور:هيا هي
خش اياد لداره واتكى ع سريره .. بعد شوي جابتله سرور البنادول وطلعت … كلاه واتصل ب نورس
نورس:ياهﻻ
اياد:اهلين بيك سنفورتي
نورس:استحشتك هلباااااااا اليوم كله وانت مغيب عليا
اياد:ماه اليوم فضانية خواتي واﻻ نسيتي
نورس:ﻻﻻ مش ناسية الف مبروك وان شاء الله ربي يتمملهم ع خير يارب
اياد:ان شاء الله … عقبالنا بيبي
نورس:ان شاء الله
اياد:امممم
نورس:فاش تفكر
اياد:نفكر نخطب
نورس:بجد
اياد:ايه ….امي بتخطبلي بنت جيرانة
نورس:هههه ياسر بلا جو
اياد:قنينة وحليوة و فرفاشة ومندفعة وانا نحبها وهيا اتحبني
نورس:هههه اتحب عينك
اياد:عيني فيها نورس وماتبينيش نحب عيني
نورس:حتى انا انحبك لكن معش تبصر عليا هكي بنخطب بنت الجيران
اياد:بنخطبك انتي ياهبلة …. موافقة ؟؟؟
نورس:بجدد تتكلم ؟؟؟ بجد حبيبي
اياد:ايه لكن حوشي مش واتي يحتاج تجراية خطوط ضي واميا و الزواق والفرش
نورس:معليشي بشوية بشوية
اياد:به شوية ونكلمك هي
نورس:اووكي حبيبي ..باي
طلع اياد من داره وقعمز جنب خ مريم وقالها :يمى … فيه بنية نبي نخطبها
خ مريم:ئه شن صار توا كنت ماتبيش تتجوز
اياد:ههههه المهم مع سبوع الجاي هكي شن رايك ف يوم اﻻحد
خ مريم : به … بنت منو اماﻻ
اياد:بنت فلان
خ مريم:اه باهي ان شاء الله تكون من قسمك
اياد:خلاص اتفقنا
خ مريم:ان شاء الله به ع بركة الله
** خش اياد تاني لداره واتصل ب نورس وقالها ان حكي لامه ويوم اﻻحد ..فرحت نورس ل هالخبر الحلو … وقالت لأمها ان شاب بيخطبها عن طريق رتاج صاحبتها … وصل يوم اﻻحد … رفع اياد امه وخالته بش يخطبو نورس … خطبوها … ورياض سئل ع اياد من وسيم بحكم ان وسيم خاطب سرور … وبعد عدة ايام اهل نورس ردو ع امالي اياد بالموافقة ودارو فضانية وبيان في يوم واحد … واخيرا ارتبطوا ارتباط رسمي رغم كل العقبات اللي صادفتهم
حددو عرس سرور وسارة وجوزوهم وحفلتهم كانت حلوة …عمار خشش سرور واياد خشش سارة لصالة شادين بعض اﻻيد ف اﻻيد …بعد عرس سارة وسرور ب اسبوعين عمار خطب بنت الجيران اللي يبيها
..كمل اياد حوشه وزوقه واتتثه وعمار نسق داره وفتحها ع دار اياد ونزكها وبعد عدة اشهر اتجوز اياد وعمار في نفس اليوم ….
دخل اياد ع نورس وهو طاير من الفرحة
اياد:السلام عليكم
نورس:وعليكم السلام
اياد:يسعد مسائك ياللي جمالك كيف اللولي … يسعد مساك يااغلى ماشافت عيني
نورس:ومسائك ياغﻻ روحي
قعمز جنبها اياد…وحط صبعين تحت ذقنها وقاملها راسها وقالها انحبك حبيبي … ومش مصدق انك معاي تحت سقف واحد … ان شاء الله ربي ايهنيني بيك
نورس:ويهنيني بيك دودي
قرب منها اياد وطبع قبلة على جبينها وقالها:ان شاء الله ربي ايقدرني نسعدك
نورس:ان شاء الله يارب …
اياد:بين صمت الشفايف … وبين همس العيون لك ف قلبي حب مكنون …
نورس:همس العيون ومااجملها من لغة لغة العيون
اياد:شيطانة مدكرة كلماتي ههههه
نورس:اكيد حبيبي
قرب منها اياد و اممممممووواااه
نورس انكسفت وخدودها راحو حمررر
اياد:ههه هي بدلي فيلوك الحلو وخلي نصلوا ركعتين …
نورس:ان شاء الله …. انحبك اياد
اياد:وانا انحبك يا روحي
صلوا ركعتين … وطفو الضي ورقدو …
بعد ايام … تقدم شخص ل هديل اخت نورس بس هيا رفضت تبي تكمل ماجستير وتستقل بنفسها
وعاش الكل في سعادة وهناء
*تمت*
لقراءة الجزء السابق : الجزء التاسع عشر من رواية همس العيون للكاتبة لوزة ليبية
لقراءة فهرس الاجزاء كاملة : جميع اجزاء رواية همس العيون كاملة للكاتبة لوزة ليبية
جميع الحقوق محفوظة للكاتبة لوزة .
