وفي الجزء الأول من رواية أنت عدوي للكاتبة كيندا دعونا نتعرف سوياً علي بداية تفاصيل الرواية وعلي أبطالها وكيف ستسير الأحداث بإذن الله ، كل هذا وأكثر سوف نعرفه في السطور القادمة بإذن الله .
الجزء الأول من رواية أنت عدوي
كنزي … ماماتي الحلوه نبي نطلب منك طلب .. ماتقوليلش لا …
غاده … اها ان شالله خير ..
كنزي … وعد ها …. هههههه اني كل مانقولك احكيلي علي بابا وكيف تعرفتو تقوليلي توا نحكيلك … لما تكبري … باهي اني خلاص كبرت وعرسي شهر الجاي … احكيلي … ونبي ونبي ونبي مامتي الحلوه ♡
غاده …. شن تبيني نحكيلك … علاش تدكري فيا بماضي مات هوا وصاحبه … علاش تفتحي في المواجع القديمه .
كنزي …. ماما نبي نعرف بابا الله يرحمه كيف عرفك وكيف عرفتيه وكيف قدرتي تقنعي جدي تاخديه .. وعلاش ماعندكش صوره ليه ..
غاده …. (( تنهدة وغمضت عيونها وقالتلها …..
اول يوم شفته فيه كانت صدفه واني مروحه من الجامعه … اتفكرت في نص الطريق اني نسيت كتابي عند صاحبتي وكان تاني يوم عندي امتحان فيه … فارجعت بسرعه لأن جدك كان يستني فيا … واني كيف بننزل جيهة مدرجات لقيته قدامي مقعمز … واول ماخشيت جت عينه في عيني طول … وهنا حسيت قلبي وقف ونعصر … وهوا اول ماشافني لاارديا نحي نضراته طول … وعرفت انه نعجب بيا زي مااني نعجبت بيه …
كتزي … باه كملي ماما ..
غاده … ومنها قعدة نتلكك ونتأخر لين يجي لان اكتشفت اني موعد مرواحي كان هوا كيف يخش … فاكنت نتسبل لبابا اني بنتاخر وبنقرا ساعتين بعد المحاضرات باش نشوفه واستمر بينا موضوع هكي تلاته شهور … وكان الحب بينا يكبر بنظرات بس … لحد مافي يوم كنت مقعمزه اني وصاحبتي وفجأءه صاحبتي قالتلي بنمشي نجيب ميه ونجي … وقتلها ماتعطليش وكان قلبي يدق وعيوني تدور فيه … وفجأه لقيت حد وراي يقولي …
زيد … اسمي زيد … ولو تطلعي لحد غيري ممكن نقتلك ونقتل اي حد يقربلك ♡♡
واني هنا تلفتت وقلبي خلاص بيوقف وسكتت مع ابتسامه وقلبي يرعش وكيف بنتكلم قطع عليا وقالي …
زيد … اسمك غاده صح ♡♡ وامازيغيه ♡ وتقري هنا سنه تانيه … ومش مرتبطه ..
وهنا اني نفعلت طول وقولتله …
غاده … كيف تعرف عليا كل معلومات هيا … اسفه بجد اني مشغوله وبنمشي ..
وكنت نتمني انه يقولي اقعدي ماتمشيش وبالفعل وقفني طول وقالي …
زيد … اني نبيك في الحلال من اول يوم شفتك فيه ياغاده … انت خيرك خايفه مني وايدك يرعشو ..
غاده …
(( وهنا ارتبكت وقولتله )) لا لا عادي مش خايفه .. وبالفعل كانو يديا يرعشو وبنموت من الخوف وقولتله …
غاده … صاحبتي شوي وتجيك .. ومضطره اني نمشي .
زيد … ماتخافيش صاحبتك تبي نص ساعه باش تجي ..
غاده … كيف عرفت ان صاحبتي بتغيب ..
زيد …. اني نعرف عليك كل شي اكتر ماانتي تعرفيةعلي نفسك … بس خليني نعرفك علي نفسي …
احم احم … اسمي زيد .. دكتور سنه خامسه .. وامازيغي ♡
وهنا اول ماقالي اني امازيغي طاقة الفرح وسعاده انفتحلي … حسيت دنيا مش سايعتني .. وفرحت ومنها عطيته طريق كيف تبدا علاقتنا رغم ان في وقتنا كان موضوع صعب جدا … وخديت رقمه الارضي وخدي رقمي الارضي وبدت علاقتنا ببعض … وكنت ندير في مستحيل باش نتلاقي معاه … وخطتتنا كل شي مع بعض … وبعد سنتين حب ووقتها خلاص تخرج ودار امتيازه وبدي معيد في الكليه ويخدم في مستشفي … جاني يوم واحنا نتكلمو في الارضي وقالي …
زيد … بكرا نبي نشوف ظرووووي عندي ليك خبر اني متأكد انك تستني فيه قداش ليك …
غاده …. شن في قولي … معقوله بنستني لبكرا
زيد … مش رح نقولك … بكرا نتلاقو في الكليه نفس مكاننا ورح نقولك علي كل شي … ماشي حبيبتي … خلاص بنسكر اني توا وبنرقد وبكرا نتلاقو …
وهدا الا قالهولي بزبط … وواني هديكا الليله مارقدتش … وماصدقتش لين جي صبح … لبست احلي ملابسي ومشيت طول … ولقيته يستني فيا … واول ماشافني صبحنا علي بعض وقالي …
زيد اني طالب ايدك لزواج ومستعده نبيع دنيا ونشريك … ونبي نتقدم لاهلك ونطلب ايدك بس قبل كل شي عندي سر كبير داسه عليك … وصدقيني حاولت اني نقولك عليه بس كل مره كنت متردد ..
غاده … شن في خوفتني … تكلم زيد
وهنا وجهه وله احمر وقالي …
زيد … اني مش … مش … امازيغي …
وفجأه الخبر نزل عليا ساعقه … ساعقه … لان انتي تعرفي جدك وخوالك وقبيلتنا كيف … لو تموتي ماتاخديش عربي .. واول ماقالهالي مالقيتش روحي الا دموع بدو يصبو من صدمه ونضت نجري ماعرفتش اصلا نزيد معاه كلمه … علاقتي كانت معاه مستحيله …
كنزي … عارفه عارفه انتي رح تقوليلي علي جدي ربي يطولنا في عمره…
مامتها (( غاده )) .. وبرغم ان جدك كان سفير ودبلوماسي الا انه في عادات وتقاليد كان ماتحاوليش اصلا حتي تناقشيه … يعني لما انتي تقوليله بناخد عربي كانك قولتيله بنطلع من الاسلام ونولي مسيحيه … شفتي ردة فعل رح تكون لزوز نفس الشي …
كنزي … يعني معقوله مافيش امازيغي تزوج عربيه او عكس بكل …
غاده … فيه قليل جدااا بس نحنا مدينه متعنا ماتلقيش حد واخد عربيه وبدات بنت يعني راجل ممكن بس بنت صعب جدااا … مهم … بعدها قعدة نتهرب منه وهوا كل يوم وراي ويترجي فيا اني نسمعه بس … وكان يتصل علي الارضي ويبعتلي مع صاحباتي ويبكي يقوللهم اني نبيها ومن اول يوم حسيتها ليا ولهدا كدبت عليها وقولتلها اني امازيغي … ارجوووكم تقنعوها اني نحبها ونموت فيها … ومستحيل تكون لغيري …
وبالفعل بدي هوا من جيهة وصاحباتي من جيهه … لحد ماضعفت ورجعتله…. (( مع تنهيده من القلب مجروحه )) … ورجعنا نتكلمو كل يوم وقلبي يتعلق بيه اكتر وحياتي وروحي ترتبط بروحه يوم بعد يوم ومعاش نشوف في شي الا هوا … وهوا نفس الشي … وقررنا نتزوجو …
كتزي … كيف يعني قدرتي تقنعي جدي ؟؟
وهنا شبحت غاده للفراغ شوي … وقالت …
غاده … لا … للاسف …
كنزي .. باهي كيف تزوجتي بابا مالا ؟؟
غاده … خالك الكبير كان هوا الوحيد الا لطالما كان مش مقتنع بي هالافكار وفي الاول رفض لان كان عارف ان مستحيل يوافق حد … بس اني اقنعته اني نتزوج وهوا يكون وكيلي وبعدين نحط اهلي في الامر الواقع … في الاول رفض لانه ماكانش حابب تصير مشاكل كبيره واحتمال كبير يلزوه … ولكن لما لقاني نتعب ونقعد ايام حابسه روحي في دار .. اجبرته انه يوافق … وبالفعل … تزوجت اني وبوك بموافقة خوي الكبير واهل بوك … الا طلعو بعدين هما نفسهم مايبونيش ..
بابا اول ماسمعو لزوني وتبرو مني اني وخالك … وخالك لما صار هكي خدي ورقه وهاجر لكندا زي ماكان مقرر اصلا …
واني نقطعت علي اهلي سنه كامله ماشفتش منهم اي خبر ولا هما حاولو يتواصلو معاي ولااني قدرت نوصلهم … وفي سنه هادي حملت بيك وجبتك … و وبعدها بشهر توفي بوك طول بحادت سير وقعدة اني وياك فترة العده كلها مع امه بوك لاننا اصلا كنا ساكنين معاهم بحكن ان بوك كان في بداية حياته … وشاء القدر ان خالك الكبير مات بعد بوك بشوي فجاه بسكته قلبيه … وهنا اول ماسمعت مالقيتش روحي الا عندهم ولو بيقتلوني يقتلو بس نحظر دفنت خوي … وشوي شوي رجعت العلاقه بين اهلي من جديد وبيني وبدت لماةعرفو انه مات ومعاش عندي حد ورجعنا اسكنا معاهم وبعد موت خالك بشهرين جدك جاته بعته … سافرنا مع جدك وقعدنا عشره سنين برا وروحنا وخلاص هادي كل حاجه حابه تعرفيها علي قصتنا مع بعض …
كنزي … باهي علاش ماحاولتيش تتواصلي مع اهل بابا …
غاده … سافرنا اني وياك وانقطعت اخباري عليهم واخبارهم عليا وبعد ماروحت خدتني الحياه وخلاص … وجدك ماكانش يبي اي شي يرجع يربطنا بيهم ياكنزي ااااه منك ومن اسئلتك …
كنزي … وصور بابا علاش ماعندكش اي صوره ليه …
غاده … (( تنهدة وارتبكت شوي وحاولت تختصر الاجابه وقالتله )) صورنا وحاجتي كلها قعدة في حوش جدك لما كنت ساكنه معاهم ولما سمعت خوي مات خديت ساكو ملابسك بس وطلعت بيك وبعدها جدك منعني اني نرجع نمشيلهم وسافرنا طول …
كنزي … اااه معقوله ياماما ماحاولوش يشوفو بنت ولدهم الوحيده او يعرفوني او حتي يشوفوني …
غاده … (( بوجه متعفلق ضاجران )) … اووووف خلاص ياكنزي سكرينا هالموضوع وقوليلي مستعده شن جوك مع خطيبك ولد خالك … ومستعده ..
كنزي … (( بعيون مليانه دمعه )) .. نفتحلك قلبي وتصدقيني ♡♡
غادي … اتحفيني يا روح امك …
كنزي … مروان اني مانشوفش فيه الا زي خوي بس وماعمريش حلمت نتزوجه … انتم فرضتوه عليا واني وافقت لانكم انتم تبو هكي .. اني حلمت اني نعيش قصة حب ونختار اني شخص مناسب ليا ومش شرط امازيغي يكون امازيغي … علاش مش عربي زي بابا … ويكون الا قلبي يختاره وبس … زيك انتي ياماما ..
غاده (( تحول وجهها لملاح متعصبه )) … لانك غبيه .. ماينفعش … ماينفعش تغلطي نفس غلطتي لانك رح تدفعي تمن وتتعدبي طول عمرك زي مااني تعدبت …
وهنا غاده قعدة مصدومه من ملامح امها فجاءه الا تفجرت بدموع وقالتلها …
كنزي … علاش كيف دفعتي تمن طول عمرك … انتي خديتي شخص الا حبيتيه ووقفتي ضد الكل وقعدتي معاه لين مات … شن مازال تبي اكتر …
وهنا غاده نطت وقفت وقالتلها …
غاده …. سكريه موضوع خلاص … وولد خالك هوا شخص مناسب ليك واني ادري بسعادتك … ورح تحبيه بعد الزواج صدقيني .
ومشت وسيبتها ..
وهنا نطت كنزي بعصبيه ولحقتها وقالتلها …
كنزي …. (( تتكلم بعصبيه )) … اكييييد لو بابا كان حي ماكانش رده هكي وماكانش رح يفرض عليا نتزوج شخص اني مانحباش ومانبيشي بس لانه امازيغي … ومش رح يخليك تمشي كلامهم عليا …
وهنا غاده تلفتت بالقوه وضربتها كف وقالتلها …
غاده …. كلام جدك وخوالك يمشي عليك سيف … هما الا ربوك وكبروك وخلوك وليتي شحط وخديتي شهادتك … لولاهم راك متبهدله ومش هادي عيشتك .. وغصبن عنك تحترميهم وتحترمي عادتنا وتقاليدنا …
كنزي … بس اني عربيه حتي ولو هما مش مستوعبين ومن حقي اني نقرر … مش جدي او خالي يقررو عليا وبعدين خيرك انتي مااحترمتيش كلامهم وضربتيه في حيط وتجوزتي الا تحبيه …
غاده …(( بوجه عصبي )) .. لاني حماره وغبيه ومالقيتش من يفهمني العواقب القدام ولقيت اخ يساندي بس انتي ماعندك حد … وخلاااااااا ص معاش تناقشيني … بكرا بتمشي تديري تحاليا التلاتي ونهاية الاسبوع فاتحتك وشهر الجاي عرسك وتم فهمتي ؟؟
وقربعت باب دارها في وجهها ورقدت …
وكنزي قعدة طول الليل تبكي وتحس انها مخنوقه وبتموت ومافيش حد يقدر يساعدها او ينقدها من زواج رح يتم غصبن عليها وفقا لعداتهم وتقاليدهم فقط … وبين كل الافكار الا تتررود في دماغها ودموعها الا علي المخده ينزلو مشت في نومه مافاقتش منها الا علي صوت امها …
غاده … كنزي … حبيبتي … صباح الورد … نووووضي … خالتك تستني فيك وتي روحك بسرعه لبين مافطرت اني وياها وتطلعي معاها باش تديري تحليل …
(( وهنا مسحت علي وجهها وعيونها منفخات من كتر البكي وقالتلها )) …
كتزي …. ماما اني راسي يوجع فيا خليها بكرا ..
غاده … بطلي دلع خالتك تستني .. وتي روحك واطلعي بتمشي نفطر اني ..
وطلعت غاده وناضت ورها كنزي طول … خشت للحمام دارت دوش وتوضت وصلت ولبست حوايجها ووشاحها وطلعت … وصبحت علي خالتها وطلعو طول …. دارو تحاليل وبعدها خالتها قالتلها …
ميسون … شن رايك نعزمك علي حاجه حلوه انتي اصلا مافطرتيش♡
كنزي …عادي خالتو اصلا محتاجه نغير جو …
ومشو مع بعضهم لكافي وطلبو موكا فربتشينو ستاربوكس وسينامون … وقعمزو يهدرزو مع بعض … واتناء حديتهم قالتلها خالتها …
ميسون … احنا مش صحاب … ممكن نعرف علاش جوك مش حلو … وعيونك منفخات ؟؟
كنزي … لا لا مافي شي خالتو … شوية ضغوطات بس ..
ميسون … علي ماما الكلام هدا … قولي مني من الاخير من امك او خطيبك ؟؟
كنزي … الزوز ياخالتي … اني مش حابه نتزوج ولد خالي .. حاسه نفسي مغصوبه … ومضطره اني نوافق علي كلام جدي علاش ؟؟ علاش الا دارته امي يحاول يطلعه فيا اني … علي الاقل يخليني نختار شخص اني حتي ولو يبيه امازيغي بس .. تمام عادي بس نختاره اني مش هما …
ميسون … (( وهنا تنهده وقالتلها )) .. حكتلك امك ..
كنزي … حكتلي … وبعد ماحكتلي عرفت علاش جدي يتصرف هكي هوا خايف نغلط غلطت امي وناخدها بتسكيرة دماغ زيها … وامي تقولي لو كسرتي كلام جدك اني مش امك ولانعرفك … قوليلي كيف ندير ياخالتي …
ميسون … (( بوجه عليه علامات الخوف والارتباك وقالتلها )) … هيا امك حكتلك كل شي كل شي ؟؟
كنزي ؟؟ (( ملامح استغراب )) كيف يعني كل شي ؟؟
ميسون … (( جوابتها بارتباك ولعتمه وقالتلها )) … نقصد لوين حكيتلك هيا يعني حكتلك كل تجربتها والا عانتها …
كنزي … كل شي ياخالتي حكتلي لحد ما مات بابا … واني بعد قصة الحب الا بينهم قررت اني مانوقفش نتفرج من حقي ناخد موقف ونختار شخص الا نحبه والا يكون زي بابا يستحقني ويحارب دنيا علي خاطري … بس حاسه ايديا مكتفه وماعندي حد الا ربي … ماعنديش اي حل في راسي نقدر نقنعهم بيه … قوليلي اي شي ياخالتي …
ميسون …. مالقيت طب لعيوني ههههههه اني جدك يا كنزي مشي كلمته عليا زي سيف ومافي حد يقدر يقول معاه كلمه … لهدا هدي روحك وخليها علي ربي وماتعرفيش ربي شن يغير من الحال … اه لحظه تلفون يرن … اااه هدا مركز تحليل … وفتحت الخط …
ميسون …. الو … اها لحظه بس .كنزي قالولك يبو صور علاش ماعطتيهمش ؟؟
كنزي … اي نسيتهم مره وحده …
ميسون … الو اي احنا قراب منكم … ربع ساعه ونكونو عندكم …. تمام لا لا بعون الله مش رح نعطلو قبل ساعه 11 نكونو عندكم … تمام سلام . …
وسكرت … وناضو وركبو لسياره ورجعو لمركز تحاليل … وهنا ميسون قالت لي كنزي …
ميسون … اركبي بسرعه عطيهم صور وتعالي امك تتصل ..
كنزي … تمام … ونزلت من سياره وخشت للمركز … واول ماخشت لقت دكتور استقبلها وقاللها تفضلي اختي ؟؟
كنزي … اني كنزي زيد الهاشمي … درت تحليل عندكم وتوا ونسيت ماعطيتكمش صور … وانتم توا كلمتوني …
الدكتور … اي اي تمام خلاص وصلو ♡♡
وهنا ابتسمت كنزي وكانت بتمشي لحد ماوقفها وقاللها …
دكتور … عفو ممكن نسألك … انتي نفسه بوك دكتور زيد الهاشمي اخصائي طب الاطفال ؟؟ بصراحه من اكفاء دكاتره الا يعطو فينا في الجامعه …
وهنا كنزي سكتت شوي بوجه مش فاهم وقالتله …
كنزي …
يتبع…………
لقراءة الجزء التالي : الجزء الثاني من رواية أنت عدوي
للإطلاع علي فهرس الأجزاء : جميع اجزاء رواية أنت عدوي للكاتبة كيندا
جميع الحقوق محفوظة للكاتبة كيندا .
