الجزء السابع عشر من رواية خط احمر

فرح فنصت ف فادي

اسمهان شافت لفرح : بس

فادي: اطلعي احسن مايشوفوك ويقولو اسمهان بنت ال،،،، واقفه ع شخص معاق

اسمهان تعفلقت طلعت

فرح: انت شن قلت كيف تحرجني هكي مقدرتش نكذبك قدامها

فادي ابتسم: يومك طيب… وطلع بلكرسى

__________

.

جي اليل

الساعه 10:30

ترررن ترررن

رناد صكرت الخط

هشام(اطلعي لجنان حوشكم)

رناد فنصت ف الرسالة وقفت ع الشباك طلعت لصالة جدها وحناها راقدين كل واحد متلوح ف جهه رقدو وهما يتفرجو ع التلفزيون لبسة كبوس التوتة ودخلت شعرها وطلعت من باب المطبخ طلعت وبدت تشوف ف الجنان وكيف الكاشف عاكس ع عيونها الرماديات الله محلاهاا قربت من المخزن حست بصوت ف المخزن نفتح باب المخزن وجبدها وظلااااام

رناد خافت ف شخص يتنفس قدامها: اءا ه هشام

هشام شاد مرفقه بقوة متعصب: بتجي معاي رناد

رناد خافت بصوت واطي وهي حساته وقف قدامها بزبط: ولع الضي

هشام ولع فلاش هاتفه علها شاف لعيونه كيف باينات ف الضي رماديات كبار

رناد شدت الفلاش لمست ايده لفت الفلاش عليه: شن تبي مني

هشام: شن رايك انتي واحد بعقله منقز لجنانكم شن يبي

رناد فهمت غلط دفاته: بعد ياسرك تمثيل انت شن واجعك لو خديت شن تبي فيااا

هشام قرن حواجبه: توا اني جاي عشانك… قاطعاته

رناد: اني مش ز مفكرني مش كان طلعتلك يعني بنهدرز معاك طلعت عشان نفهمك انك ف جنان ناس متخافش ربي لو يشدوك مش رح يصبح عليك صبح.. وقربت بتطلع

هشام طلع: اني المريض اني لجايك ومنقز ز الحرايمي…قرب لسور ونقز مشي

رناد خشت

____________

.

.

تاني يوم

فاق ايهاب لخدمته طلع شاف غزل ف المطبخ ادير ف كيكة كراميل: صباح الورد ياكراميله

غزل ضحكت تلفتت: صباح النور

ايهاب قرب حضنها من الخلف ويشوف ف الكيكه: نشاط من الصبح غريبه

غزل شفتله ع جنب: تساير فيا عشان الكيكه مش ليك هادي بنزلها لحوش عميمه قالت انه بيجو خالاتك يعونها ف تجهيز نسيم

ايهاب بسها ع خدها: محلاهم الغمازات

غزل تلفتت:مش قتلي بتسافر بتاخد سيارات

ايهاب: غضوا مش اليوم

غزل ضحكت: احسسن توا بتستاحشني مش اربعه وعشرين وجهي ف وجهك

ايهاب: قلقتي مني الكدب اني يومي كله ف المعرض ساعه عشرة نطلع ونرجع المغرب امتى نشوف فيك

غزل: نبصر عليك

ايهاب طلع: ماتبي شي من برا

غزل: لالا باي.. استنى ننزل معاك

ايهاب وقف ف الممر يعدل ف روحه: هي

غزل لبسة قفطان كاتفه نظام ضيق من فوق وواسع من تحت مستور فيه حزام لونه موف غامق ولبسة وشاح اسود ونزلو مع بعض

ايهاب خش شاف امه بالك تبي شي

عائشة: سليمتك

ايهاب طلع

___________

.

.

بعد الغدي

رناد قعمز مع حناها

حناها: في ضيوف ف المربوعه راك تطلعي

رناد: هدا اكيد شيباني النحس محمود

حناها نزلت راسها

ادريس خش: ديرو قهوة لـ اربعه اشخاص

رناد ناضت جهزت القهوة قربت للمربوعه سمعت صوته

هشام: انت شن ليط علاقه مطلقه ارمله مليكش علاقه اني لبناخده مش جاي نخطبهالك

رناد يبست

جدها: اني قتلك مطلقه وبنرجعها لراجلها

هشام ضحك بهزوه:اي اتصل اساله هل بيردها؟!

وعطول ادريس اتصل ماصدق وكان جواب محمود لا اكيد عرفتو شن غير رايه

اب هشام: خود راي البنت خود

هشام شاف ادريس بتقه وقام حاجبه ونزله

جدها طلع ولقاها واقفه يابسه

رناد حدفت السفرة ع الارض: اني مش لعبة كل مره مع واحد سامع (علت صوتها وتبكي) لدرجه هادي اني رخيصه عندك شن لدرتهولك اني بنت ولددد يابناداااام

هشام سمعها داخل قرن حواجبه ومقعمز ع الكنبه ويهز ف رجله بعصبيه ميقدش يطلعلها

عمها علي طلع متغصب ويتكلم بصوت واطي ومتعصب:خشي اقلبي وجهك

رناد تبكي شافت لـ ادريس لـ مبتسم لم يشوفها تبكي او ضعيفه وشافت جدها ليشوف ف تاكم القهوة ع الارض ومتبزع

رناد شافتلها بغصه وشهقه: حسبببيي الله فيكممم هدا ماعندي(شافت لجدها وتبكي) عميه زوجتني لصاحبك مقدرتش ندعي عليك لانك جدي ومن لحمي ودمي ضربكم وذلكم (شافت لـ ادريس)وتحرشكم (شافت عمها) وتهجمكم وضربكم ولعند ليوم مطلعت من فمي كلمه عليكم بس توا خلاص كل شي الا شرفي…وخشت

اب هشام: شن لسمعته هشام مطلقه ويضربو فها ومتحرشين فها وهدا كله وتبهاااا شن انت شكلك واكله بريشه ( واكله بريشه بمعنى ساحراته)

هشام شاف بوه مغلول طلع وشاف القهوة ع الارض وشافلهم بوه طلع طول

هشام شاف بوه طلع شاف جد رناد: بنت ولدك واجعتها نفسها افهم تعرف كان الضمير بلفلوس راني شريتلك منه بس ممكن راقد توا ينوض ولم ينوض اذكر وجهي بعدين…وطلع

___________

.

.

جو خالات ايهاب عشان يهدرزو ع خطبت نسيم

غزل جهزت ضيافه وضيفتهم

خالت ايهاب الكبيرة شهقت: ليك سنه متزوجه محملتيش

غزل جسمها قشعر وساكته

عائشة:قتله من قبل نرفعها لشيخه ولا دكتور اي مصيبه مباش شيشي راس ز الللوووح

نسيم وشوشتلها:دوه فاضيه مدوريهمش

غزل ابتسمتلها وداخله نار

( الناس هادي قداش منكرهم ي ناس حصليلي ف الرقبه وربي ع علاش منخطبتيش وخيرك متزوجتيش وخيرك محملتيش كمية الوقاحه لعند الناس هادي تقريبا لو يشوفو عزوزه يقولولها خيرك مامتيش)

بنت الخاله الكبيرة: اني اختي الاصغر مني تزوجت بعدك واهي عندها ولد وعمره شهرين

غزل كانت تقدر تقوللها خيرك انتي متزوجتيش بس الناس تتعامل ع حسب ربايتها

نسيم وشوشتلها: نطلعو برا؟! هادم معاش بيسكتو

غزل نار داخلها: عيب رح يفكروني اضيقت

خالته التانيه: بري لدكتور لحقي ع روحك بالك تتعالجي

نسيم مقدرتش تتحمممل طلعت شافت ايهاب نازل من حوش: حي انت رجعت

ايهاب قربلها: ناديلي غزل قلبت الحوش كله نبي المقص وين ولا جيبيلي مقص من الحوش

نسيم: لالا بابا مقصنا لا عندك مقص دوره استنى انديلك مرتك؟(دارت هكي عشان اطلع غزل) وخشت ندتلها

طلعت وهي مش عبعضها: نعم

ايهاب شافلها من فوق للوطى: شن في خير؟!

غزل: شي

ايهاب: سمعتي شي ع اختك صاير شي؟! قولي!!

غزل بهدؤ: ايهاب خلاص مافي شي شن تبيني؟!

ايهاب: نبي المقص ملقيتاش قلبت الحوش وحتى بطاقتي

غزل ركبت وهي راكبه لدروج يتكرر كلامهم ف وذنها خشت شافت الحوش وخشت لغرفة النوم طلعت البطاقه والمقص ومحطتهم ع الزيانه وطلعت

ايهاب كان يمشي عادي بس هي اسرع شافها ف الممر وشد مرفقها: خيره خليقتك مقلوبه انتي ادوي شن في وراك قصه

غزل تعبو عيونها دموع نفضت ايدها: مافي شي افهم خلاص اوينه بطاقتك والمقص ع الزيانه ونزلت ومشت وراى الحوش تبكي مقدرتش تفتن ايهاب ع خالاته ومشت بدون ماتشوفها نسيم

ايهاب خداهم ونزل شاف نسيم ف نفس المكان: خيرها غزل؟!

نسيم: اضيقت وله عرفتها اضيقت قعدت نستنى فها منبيهاش تخش خلاص امشي انت تو نركبلها

ايهاب: شن في هي نزلتلكم

نسيم: منزلتش خلاص برا تو نركبلها

ايهاب فهم انه ف شي: انتي خشي تو اني نشوفها خشي

نسيم: تمام… وخشت

ايهاب ركب يتاكد وفعلا مهناش طلع من البلكونه وشافها وراى الحوش تبكي وتمسح ف دموعها ويسمع ف شهقاتها نزل مع الدروج

ايهاب: شن صاير

ومشي وراى الحوش

غزل حست بحد جاي مسحت دموعها وقربت ع اساس كانت بتخش

ايهاب قرب عادي: اهاا انتي خيرك واقفه بروحك هني

غزل دايره روحها عاديه: لا شي كانت بنخش جيت بنكلم رناد بس

ايهاب: بتكلمي رناد كيف ومعندكش هاتف… متعرفيش حتى تكدبي ادوي شن في

غزل بدت تبكي بجدد: مافي شي خلاص افهممم شن هدا… وخشت تمسح ف دموعها

ايهاب تعصب ضغط ع المقص يعرف خالاته لسانهم حار خش وندا نسيم

ايهاب: شن في خيرها لابسة خليقتها بلمقلوب هديكا

نسيم: شي هدرزت نساوين خالاتك وتعرفهم

ايهاب: نسييم ادووي فادي يستنى برا ادوي

نسيم: تي سالوها ع الحمل والصغار والدوه هادي ويسالو فها اساله ادره الكبد

ايهاب: امكك عارفها اني من الاول اني لحمار لجاي ساكن هني كان بالي مرتاح ف الشقه حماار… وطلع متنرفزز ركب مع فادي

فادي: عااام باهي قولي مستاحش مرتي بعطل

ايهاب يسوق متعصب: مرت شنو ونبي لعند ام لسانها بسبعه دوار يرتاح هو يرتاح

فادي: شن في

ايهاب: فكنا منهم نساوين.. وكمل سواقه

_________

.

.

يقين قعمزت ف غرفتها وتسكت ف ميرال لتعيط: ياعمري خلاص ماما قريب تروح تي حتى هاتف ماعنديش كنهدا راني كلمتهاا

وصال خشت ودفت الباب بقوة: سكتي هلمصيبه شن درتيلها كانت ساكته

يقين ف حضنها ميرال: خوفتيي البنت خيرك… توا فاقت وتبكي عطيتها الشيشه شفت حفاظتها مبتش تسكتت

وصال قربت خدت ميرال بعنف جبدتها جبد وهديكا البنت تعيط بطول حسها: اششش خلاص طرشتينا (شافت يقين) اسمعي انتي اني خطيبي بيجي هني بما انه الحوش فاضي وطبعاا خوله ف دارها تعرف انه بيجي هادي صوتها منبيش نسمع هو ميحبش الدوشه سامعه سكتها خودي.. حطتها ع السرير وطلعت

يقين خدتها وجربت تعطيها الشيشه تاني خدتها وسكتت

وفعلاا دقايق وفي صوت ولد ومش ف المربوعه لااا ف وسط الصالون

ميرال كملت الشيشه وبدت تنقنق

يقين خدتها ووقفو ع الشباك لانه وسكتت وهي تشوف ف السيارات من الدور التاني كل مره تفوت سيارة جنب الحوش دقايق ووقفت سيارة قدام حوشهم وكان منو؟! كان نفس الولد لشفته المره الاوله ولد خالتهم خافت ع وصال نزلت تجري وف حضنها ميرال وقفت ف الممر: وصااال وصااال

وصال طلعت متنرفزه: الجو لديري ف امه شن.. قاطعتها

يقين: ولد خالتك جي

وصال رجفت: اددم ولد خالتي سعاد (اخته رسل)

وصال: اسمعي توا تطلعي قبل مايوصل ف الباب تقوليله مافي حد بسرعه اطلعي … شدتها وتجبد فها للباب لبسة كبوس التوتة وفتحت الباب ووصال هربت خشت وخايفه

ادم نصدم: يساتر من انتي؟!

يقين من الخوف: مافي حد

ادم: تلزي فيا مني انتي كيف مافي حد؟!

يقين: اني اني بنت خو عمي عماد المهم مافي حد

ادم: تمام(مدلها كيسه) هادم طلبتهم فرح عطيهملها

يقين خدتها وميرال صقعت بدت تعيط: تمام شكراا

ادم: العفو… وطلع

يقين خشت ركبت تجري حط الكيسه وهي ترججفف

وصال ركبت: شن يبي

يقين: جايب دواء

يتبع …….

لقراءة الجزء التالي : الجزء الثامن عشر من رواية خط احمر

لقراءة الجزء السابق : الجزء السادس عشر من رواية خط احمر

للإطلاع علي فهرس اجزاء الرواية : جميع اجزاء رواية خط احمر للكاتبة ميشو محمد

جميع الحقوق محفوظة للكاتبة ميشو محمد .