الجزء الأول من رواية حالة حب للكاتبة لوزة ليبية

سنبدأ سوياً أعزائي القراء بقراءة الجزء الأول من رواية اليوم حيث بداية الطريق لأحداث شيقة وجميلة وممتعة جداً لذلك جهز فنجان القهوة الخاص بك وجمع كل تركيزك لقراءة رواية من أروع الروايات الليبية التي ستقرأها في حياتك، هل أنت جاهز لذلك ؟ إذا هيا بنا لنبدأ القراءة سوياً .

الجزء الأول من رواية حالة حب للكاتبة لوزة ليبية

{اسمي شمسي تخصصي طيران .. نشتغل كابتن اكيد …مواليدي 85 عندي اربعة وخيات متزوجات … انا خاطب بنوتة اسمها ريفاء }

اسمي ريفاء مواليد 94 نقرا في كلية الهندسة حبوبة … ومخطوبة لشمسي كابتني الحبيب

اسمي جمانة مواليد 92 متخرجة من كلية اﻻقتصاد خيري خوي من امي
… وخواتي من امي وبوي عفاف …نورة … وخطيبي اسمه حاتم حتعرفوا مواليدهم فيما بعد

جمانة – انت مادخلكش فيا
خيري(مواليد 86) – شن مدخليش فيك حلوة حتى هادي
جمانة – هادي حياتي وانا هكي مرتاحة
خيري – ماتخلينيش نطلع عن طوري جمانة
جمانة – والله انا كﻻمي ومش ساحباته بنشتغل يعني بنشتغل
خيري – تحسابيها سايبة واﻻ تحسابي تسكير الراس يمشي معاي فيقي لعمرك ياماما
جمانة – والله فايقة انا… وبنمشي وحنشتغل مش جمانو اللي يتحكم فيها راجل
خيري – كترتيه على ماوصوه راهو
جمانة – انت اللي كترثه ياخيري مش بتتشطر عليا وبتلعب دور اﻻخ اﻻكبر …زيد على هكي انت خوي من امي …بوي عايش ربي يخليهولي بتقول كليمة هاونيه تلقى مايجيك منه وانت تعرفه
خيري – هه ياودي بتصيعي انتي سطايلك
جمانة – الحمدلله بوي مربيني كويس ومش خدمة بتصيعني
خ نعيمة – خيركم اللطف ماتخلوش من ياخد دوش ع راحته سمله العظيم
جمانة – زودي لولدك يمى ايقولي شكلك بتصيعي ومش عارفة شن هوا
خيري – هي اشبح هي
جمانة – ايه هكي قلت شن بتغير كﻻمك توا
خ نعيمة – خيرك على اختك ياخيري
خيري – خلت فيها اخوة هيا. . قنالها فوتيه موضوع الخدمة شي سكرت راسها
خ نعيمة – وكان خدمت شن المشكلة
جمانة – قوليله والنبي
خيري – تي يمى هادي مش خدمة عادية …شن مضيفة طيران بالله عليك تو هي.. ياريتها موظفة واﻻ ابلة واﻻ اي شي تاني
خ نعيمة – جمانة بري دارك
جمانة – يمى خلي اناقش …

خ نعيمة – بري لدارك جمانة
جمانة – باهي اهو ماشية ………
خ نعيمة ل خيري – اسمع ماديرليش المشاكل مع حمد … مدام بوها متواجد خﻻص …هوا يحل ويربط ف موضوعها
خيري باستغراب قال – تي بش اختي
خ نعيمة – خويا في جنابك… بوها فوق راسها ويعرف اﻻصلح بيها وكان انت بتتكلم بيقولك شن عﻻقتك في الموضوع !
خيري – والله ماعيشة اهياه انا شايف العوج في بناتك وكل مرة اتقوليلي مادخلكش…(يعدد بصوابعه) واحدة كبستها موعد مع واحد …وواحدة كبستها تتكلم في تلفون مع واحد…. وواحدة فلقتها بمظيفة الطيران
خ نعيمة – اخﻻص ياخيري ماديرش المشاكل فكني تربح
خيري – باهي باه اصﻻ انا بنطلع منه الحوش مرة واحدة…. ﻻ نديرلك مشاكل وﻻ نصدعلك راسك خليك مع الحمد متاعك
خ نعيمة – استحي ياولد….هيييه وين بتمشي ..
خيري – ارض الله واسعة يمى خ نعيمة – خيري … ياخيري تعال انتا ياولد … … طاش هالولد هدا مش عارفة كيف بنتصرف معاه… ربي يهديه

نورة (مواليد 89) – خيركم مدايرين الدوشة فرخة جمانة… ماتخلوش من يرقد !
جمانة – هالخيري هدا قال شنو .. مايبينيش نخدم
نورة – هوا في كل شي هكي قاعدلنا اتقول حصلة في الري
جمانة – ايعفلق والله طلعني عن طوري
نورة – وشن تناقشي فيه وانتي حتى بوي ماسئلتيه
جمانة – بوي مش حيقول شي نعرفه انا …
نورة – قصدي ﻻش اتهابشي مع خيري قبل حتى ماتحطي ملفك
جمانة حطت تلفونها في الشحن وقالت – كنت نكلم ف صاحبتي بتلفون قتلها بنقدم ملفي بش نولي مضيفة طيران …مشي عنكش فيا ودرنا عركة
نورة – بالله مالقيتي تتكلمي اﻻ ف وسط الحوش
جمانة – ماجاش فبالي انه يتصنت هالدعوة
نورة واست مخدتها وحطت يدها تحت خدها وقالت – اييييه بالله ….الله يرحمك يا حميدة ياوخيي

جمانة – الله يرحمه ويغفرله والله كان لينا وخي زي النسمة اللي تقوليهوله يقولك حاضر وتم
نورة – حميدة واخد طبع بوي مش زي هالخيري طبع خوالي نسخة منهم
جمامة – حرقلي دمي
نورة – فوتيه تره ….تاعب وان شاء الله بوي يوافق ع موضوعك
جمانة – ايه ان شاء الله…. شن مازال ماروحتش عفاف ؟؟
نورة – ﻻ
* فجاة خشت عليهم عفاف *
عفاف مواليد (88) – سﻻم عليكم
جمانة – وعليكم السﻻم

نورة – تدكر القط
جمانة – ايجيك اينط
عفاف – بقات كلبات كنتوا اتقرموا فيا معناها
نورة – ههههه ﻻﻻ
جمانة – انا كنت نسئل عليك حسيتك عطلتي
عفاف – اه ماه طلعت من العمل وتﻻقيت مع جهاد  (حبيبها)
نورة – محقرك كل يوم موعد شوره
*عفاف لوحت شنطتها وقعمزت جنب جمانة وقالت – اخخخخ مش منا ياكبدي … اتخيلي اليوم اللي مانتﻻقوش فيه انحسوا روحنا مش عارف كيف حاجة ناقصتنا …
جمانة – سعدودك مش زي بالنسبة حاتم ديما مشغول مانتﻻقوش بكل اتقول مش خطيبته
عفاف – حاتم خليه بروحه طبعه دراه كبد زقة حشاك
نورة – ومعقد ماتفهميشي كيف

عفاف – لدرجة مرات انقول ان اختيارك كان غلط جمينوا
جمانة – مش مهم كﻻمكم المهم انا انحبه وايحبني وخﻻص
نورة – الحب مش كل شي ياعزيزتي وين مقومات الحياة في عﻻقتك معاه
جمانة – تو بعد الزواج يتغير
عفاف – اخخخ اخطوني من حاتم… خلوني هايمة مع جهاد محﻻه لما يبدي شخص مهتم بيك …ويطفطف عليك ويستنى غير امتى ترني عليه … تلقيه يمسي ويصبح عليك

نورة – تلقيه جنبك طول الوقت يفهمك وتفهميه
عفاف – وكان زعلك
نورة – طول يرضيك
جمانة – ههههههه الله الله موليات شاعرات وقصايد وجو
نورة – ههههه
عفاف نحت وشاحها وقالت – حقا قولو شن شفت
نورة قعمزت وقالت – شنو شنو قولي
عفاف – وقت خاطمين انا وجهاد فيه شخص يصيح يقول شخص يصيح ايقول ريفااااء ريفاااااااء
جمانة – عﻻش خيره
عفاف – مش عارفة ماشفت شي ومافهمت شي بس صوت شخص ايصيح بحرارة واضح من صوته
جومانة – بالك حد رايحة منه بنته واﻻ حاجة
عفاف – ممكن الله اعلم
جمانة – ان شاء الله يلقاها…. بري بدلي عفاف وصلي خلي نوتوا الغدي ونتغدوا بعدين نهدرزوا
عفاف – اووكي دقايق بس
~~~

شمسي – ريفاااااااااااااااااااء نوضي نوضي ياريفاء سامحيني بالله عليك نوضي ياريفاء نوضي
شاب – ﻻ حول وﻻ قوة اﻻ بالله
شخص اخر لصاحبه – ان شاء الله خير
شمسي – ريفااااااء ﻻماتخلينيش بروحي ياريفاءء

(قبل ساعة ونص من هدا كله قبل ماشمسي قال هالكﻻم وقبل حتى عركت خيري و جمانة وقبل ماتروح عفاف وتهدرز مع خواتها ركزوا بالله قبل سااااعة ونص راكم تتلخبطوا …قبل شنوووو قبل ساااااااعة ونصصصص اعتبروا ان مازال ماااا صار شي هههه واحفظوا اﻻحداث بش تربطوا عارفتكم انما اللبيب باﻻشارة يفهموو )

(مطار طرابلس الدولي الساعة 1 ظهرا هههه عارفاته ادشدش حطوا فبالكم انه مطار احﻻ حتى من دبي )
شمسي – عسسسولللتي
ريفاء – حبيبيييي حمدلله ع سﻻمتك ياعمري
شمسي – الله يسلمك مستاحشك موووووت ياروحي
ريفاء – انا اكثر والله
شمسي – اسمعي …اسمعي حبيبي خلي نتﻻقوا اليوم شن رايك
ريفاء – اممم خليها غدوا شموسي
شمسي – ﻻﻻ ضروووري فيه موضوع ﻻزم نحكوا فيه … مئجله من قبل سفرتي
ريفاء – اممم باهي شن هوا الموضوع
شمسي – ﻻزم نقعمزوا ونحكوا فيه مايجيش عالتلفون
ريفاء – اوكي به وين نتﻻقوا
شمسي نحى طاقية الكابتن وحطها تحت ابطه وقال – في مكانا… نفس المطعم
ريفاء – اوكي انا توا كيف طالعة من الكلية … حاجة نص ساعة بالكثير ونكون غادي
شمسي – تم وانا نشوف اموري ونبدل ونجيك من المطار دعس لعندك… ردي بالك ع روحك عسولتي
ريفاء – بإذن الله انحبك شمسي – حت انا ياعمري يﻻ سﻻم
ريفاء – سﻻمات …

معتز – شنو نسمع فيك اتنسق لموعد ومواضيع وحركات
شمسي – اي وانت ماعندك غير التسنيط
معتز – انت تتكلم بصوت واضح ..
شمسي – انت ودانك كبار زي الفيل
معتز – ههههه به غير قولي امتى ناوي ادير العرس هكي شمسي قعمز عالكرسي في المكتب وحط نقاله وطاقيته ع المكتب وقال – الشهر الجاي كان سخر ربي
معتز – باهي ان شاء الله ع خير
شمسي – بإذن الله …حقا ابعتنا اﻻغنية ياراجل شحورتنا عليها معتز – اما اغنية ؟؟ متع لليسا قصدك
شمسي – اي … بنديرهالها مفجأة بما انها كيف نازلة الغناية معتز – مقدمك بكلمة غناية ههههه
شمسي – ماه الكبيدة اتقول فيها غناية….فابديت نقول فيها زيها
معتز – هههه استقبل ياغناية استقبل
شمسي – اهاه قبول ….
معتز – وين رحلتك بدين
شمسي – ﻻ معش عندي … كيف روحت من بريطانيا مالياش هلبا بنزيد نطلع رحلة تانية هههه ماهبلتش
معتز – عندي رحلة لتونس يوم واحد… بنمشي لصاحبتي غادي انهيجوا طشة وانفرفحوا ع رواحنا
شمسي – ربي يهديك ماعندي مانقول …. هي وصلت الغناية خلي نبدل حوايجي عالسريع… نتﻻقوا غدوة يامان
معتز – سﻻمات يابرو

(بعد 30 دقيقة …متبقي ساعة )
ريفاء – اها حبيبي انا قريب نوصل
شمسي – انا في المطعم ياروحي
ريفاء – اوكي انا خشيت .. يﻻ باي
شمسي – اﻻ ماتسكريش بيبي … خليك لين توصليلي مستاحشك موت
ريفاء – هههه اوكي ياروحي
شمسي – انحبك … ونموت ونحيا في حبك ياريفت قلبي
ريفاء – ههههه حتى انا بيبي … واهووو وصلتلك
* مدت ريفاء يدها وقف شمسي وسلم عليها وقال – كان مش عيب نحضنك وبقوة هههه
ريفاء – ياااا ودي مجنون واديرها شمسي – هههه ياعمري انتي *كيف بتقعمز ريفاء مشي قالها شمسي – استني استني …انتي اميرة ونجبدلك الكرسي بش تقعمزي هههه تفضلي اميرتي ريفاء -ههههه يامجنون قتلك معش ادير هكي الناس تتفرج علينا شمسي – مايهمنيش الناس ….واصﻻ مانشوفش فيهم نشوف فيك انتي بس يامﻻكي
ريفاء – ياعمري انت والله انحبك
شمسي – انموت فيك …هاه احكيلي شن جو الكلية والمحاضرات شن مدايرة في غيابي
ريفاء – في غيابك الوقت يمشي بششوووية قتلني الوقت نعد غير امتى ترجع
شمسي – احرف منك يامنجوهة والله نقول ياريتها معاي في كل رحلة
ريفاء – قتلك نخش مضيفة طيران بش نكون جنبك طول الوقت سكرت راسك
شمسي – انتي مضيفتي انا بس ماضيفي حد ومانبيش حد يشاركني فيك … انتي ليا
ريفاء – وماحد حيشاركني فيك ياضي عيني … انت ليا
شمسي – ربي يحفظك … يﻻ احكي شن جو محاضرات تستوعبي واﻻ غير سرحانة فشموسك هههه ريفاء – اكيدة سرحانة فشموسي هههه بس نعجبك نستوعب تمام التمام الحمدلله .. برغم ان الدكاترة نفخ اﻻ اني نفهم
شمسي – مليح بكل ربي ايوفقك حبي ونشوفك مهندسة قد الدنيا بش تهندسيلي حياتي من اﻻلف الى الياء (مع ترقيصة حواجب) ريفاء ضحكت وحطت يدها ع فمها وقتله – هههه معش ترقص حواجبك اضحك فيا راهو
شمسي – رقصتهم عمدا بش تضحكي وتحطي يدك ع فمك من الكسوف ههه
ريفاء – هههه وعﻻش
شمسي – على اساس ماتعرفيش ان قداش مانموت فيها اللقطة هادي لما اديريها
ريفاء – هههههه
شمسي – بش تهندسيلي حياتي يابش مهندسة
ريفاء – هههه ماشاء الله انت حياتك امهندسا واتية
شمسي – هههه حق او
ريفاء – اي كابتن طيار ماشاء الله … واخد ماجستير في الطيران في سن صغير عيني مااضرك حبيبي وشبوب حليوة وانيق ربي يخليك ليا
شمسي – هههههه ومع هدا انتي اللي حتهندسيلي حياتي
ريفاء – من عيوني شموسي
شمسي – تسلم عيووونك … اي حقا …. جايبلك غناية
ريفاء – بالحق ؟؟
شمسي – اي
ريفاء – سبحان الله حتى انا جايبتلك غناية
شمسي – سبحان الله ياروحي سمعيني انتي قبل هي
ريفاء – استنى هي …. * التقطت التلفون ريفاء وتبربش ادور ع اﻻغنية وفي اللحظة هادي جاهم القرسون وقالهم شن تطلبوا واﻻ زي العادة هههه
شمسي – هههه ﻻﻻ خلي نغيروا اعطينا هفانا فراولة ومانجو القرسون – تم كابتنا … والغدي شن تطلب
شمسي – شن تبي تتغدي (مع غمزة )
ريفاء – ههه امممم وجبة فيليه لحم
شمسي – امم اوك زوز وجبات فيليه لحم و سلطة مشكل … وعصير اناناس
القرسون – اي شي ثاني شمسي – ﻻﻻ منور …
مشي القرسون وفتحت ريفاء اﻻغنية …بمجرد ماسمع اﻻغنية شمسي قام حواجبه وابتسم وعيونه قلوب قلوب
ريفاء – هههه شنو بيبي خيرك
شمسي – هيا هادي الغناية اللي بنسمعهالك
ريفاء – ياسر بﻻ جو
شمسي – وحق ربي اماﻻ هي هههه سبحان الله
ريفاء – هههه كيف خديتها من صاحبتي قلت وقت ايروح شموسي نسمعهاله
شمسي – وانا كيف خديتها من صاحبي قلت بش نسمعهالك تبادلوا نظرات حب هما اﻻثنين … وفاتحين اﻻغنية ومنسجمين فيها وكل واحد منهم راسم خيال حلو فباله … لين تمت اﻻغنية فبتسم شمسي وابتسمت ريفاء طلع شمسي من جيبه باكو مربع وقدمه ل ريفاء وقال – تفضلي بيبي
ريفاء – امممم هديةةة تسلملي حبيبي …
شمسي – افتحيها … * فتحتها ريفاء ولقتها سنسال ذهب فيه قلب فتحاته لقت صورتها وصورته
ريفاء – يااااا رووووحي مش عااااادية شمسي – عجباتك
ريفاء – متت فيها اتهبل
شمسي – انتي اللي اتهبلي …
* جاهم قرسون حط العصير الهفانا ومشي *
ريفاء – ايه شن الموضوع ياعمري
شمسي – اممم نبيك تفهميني ياعمري … مانبيش نخسرك بهالموضوع ومانبيشي يكون عائق بيني وبينك
ريفاء – خلعتني شن فيه شمسي – امممم راهو …اممم ماصارش من السكنة بروحنا
ريفاء – كيف
شمسي – يعني حنسكنوا في حوش العيلة مؤقت بش… ريفاء بكل حدة – عﻻش
شمسي – يعني زي ماانتي شايفة انا ولد واحد وخواتي متزوجات ريفاء تعصبت وقالت – به عﻻش اتعشم فيا من البداية بسكنة بروحنا وتقولي وتيت حوشنا بيتنا الدهبي ودرتلك في حوشنا حاجات روعة شمسي اتعفلق وقال – ريفاء معش تكلميني بطريقة هادي … الحوش واتي رسمي شن بنكدب عليك انا !
ريفاء – اماﻻ شن جد في الموضوع
شمسي – اختي عبير كانت ساكنة بحدى حوشنا اونه حاكيلك ﻻنه واخدة ولد جيرانة …فكانت يوميا اتجي وتعول امي وتقعد معاها
ريفاء – به وبعدين شن صار شمسي – قبل رحلتي اﻻخيرة راجل اختي جاته بعتة وسافر هوا ومرته … فافي اﻻكيد وقت بنتزوج بنسكن مع امي شن بنخليها بروحها
ريفاء – وين خواتك التانيات
شمسي – ريوفتي تتكلمي وكان ماتعرفيهمش انهم يسكنوا بعيد
ريفاء – بس والله مانقدر انعيش مع امك
شمسي – o_O
ريفاء – قصدي … قصدي انا مانعرفش انعول مراة كبيرة واﻻ نعرف نقعد معاها
شمسي – تجلطي فيا بكﻻمك راك تدوي ع امي … والله كان امك راني خديتها وجبتها ف حوشي انحب اﻻمهات و كل اﻻمهات نعتبر فيهم امي
ريفاء – صعب معناها هكي بنطيب ليا وليك وليها و كان خواتك جو صغار خواتك يقلبوا الحوش ويروحوا
شمسي بنظرة غضب – ريفاء انا قاعد شاد اعصابي …والله وقت نتنرفز انولي اخيه عليا
ريفاء رفعت حواجبها وقالت- به شن قلت انا
شمسي – معش تدوي ع امي وخواتي بطريقة هادي … ردي بالك احترامهم من احترامي ياريفاء…. وزي مامحترم عيلتك ومدايرهم عيلتي وحاطهم ف عيوني احترمي عيلتي
ريفاء نزلت عيونها واتهز في رجلها بتوتر وقالت – والله صعب
شمسي – استغفر الله ياربي… مش صعب انا نعاونك يوم انتي اطيبي انا انضم..و يوم انتي اضمي انا نطيب وهكدا
ريفاء – صعب صعب العيشة في حوش الشيابين ان شاء الله نكون قد مسؤلية نفسي
شمسي – ريفاء معقولة هكي تحكي …توقعت منك غير هكي
ريفاء – وحق ربي امك هيا امي لكن صعبة الحق …
* شمسي انصدم في ريفاء
وفي كﻻمها وقال – والله انتي تصعبي فيها
ريفاء – طول عمري نحلم نكون انا وياك بروحنا
شمسي – الله غالب هادي امي واللي مافيشي خير في اماليه مافيشي خير في حد
*واحتد النقاش بينهما الى ان
ريفاء – ياودي من بكري اناقش انا لين ريقي شاط قتلك صعبة العيشة في حوش الشيابين اختي هكي صارلها و روحت مطلقة
شمسي – تي خيرك خيرك شن كﻻم هدا طﻻق ومش عارف شنو ريفاء – هكي حتصير مشاكل شمسي – عﻻش اتقولي في احتماﻻت شر ريوفتي خيرك هكي ريفاء – مانعرفش انا رافضة الموضوع ياشمسي
شمسي – ﻻ اله اﻻ الله …
ريفاء – محمد رسول الله … اصﻻ بوي كان سمع بالموضوع ماعتقدش حيخلينا مخطوبين ﻻنه شارط من اﻻول حوش بروحي
شمسي – حوشك واتي يانهاري اﻻحرف مؤقت نعيشوا عند امي ريفاء – كم هكي
شمسي – حوالي عامين
ريفاء – شوية بس بنخش للحمام شمسي – اوكي …
* ناضت ريفاء وخشت للحمام واتصلت ب اختها *
ريفاء – ايوه منيرة
منيرة – ها ريوفة … خيره صوتك مش تمام
ريفاء – اسمعي… شمسي قالي بنسكنوا عند امي
منيرة – عﻻش
ريفاء – ع خاطر اخته مسافرة مع راجلها عنده بعتة فقالي بنسكنوا عند امي
منيرة – معليشي جاتك في شهر تحملي
ريفاء – تي اما شهر ..
منيرة – اماﻻ كم
ريفاء – قالي عامين
منيرة – اوووف هلبا عامين فكك مايصير فيك زيي و تطلقي وتطلعي ايدك ع راسك
ريفاء – به كيف الحل
منيرة – انتي شنو توا موعد معاه واﻻ كلمك بتلفون ؟
ريفاء – موعد
منيرة – حلوو ديري روحك زعلتي منه … وخليه واطلعي من المطعم ريفاء – زعما
منيرة – ايه ديري زي مانقولك تي احنا ماصدقنا انه معبي …. نبوه يكتبنا الحوش بإسمك وحالتنا تتنقرش …. وانتي تقوليلي بيسكن مع امه
ريفاء – اي والله حتى انا هكي جي فبالي
منيرة – اماﻻ شنو فجأة تلقيه يقولك بنبيع الحوش وخلينا عند امي وخﻻص… الرجال مافيهمش امان ..
ريفاء – ايه والله عقدني على قد ماناقشت معاه
منيرة – هه يفتحله ربي اصﻻ امي كان سمعت بيك تقلبها ديري زي ماقتلك
ريفاء – بس خايفة نخسره
منيرة – ريفاء ماتهبلينيش فدينا من اﻻيجار راهو ديري زي ماقتلك واسكني بروحك واتحكمي فيه من اﻻول بش اتختخيه ويكتب الحوش باسمك
ريفاء – وبه حتى ولو فرضا ماكتباش
منيرة – مش مهم المهم تسكني بروحك بش بعد عرسك بشهرين نجوا نسكنوا عندك اونه زي ماخططنا انا وياك وامي ع اساس صاحب الحوش طلعنا
ريفاء – به به تمام … يﻻ بنسكر توا منيرة – مش يلعب براسك ردي بالك … هي سﻻم
ريفاء – سﻻم

* رجعت ريفاء لطاولة وقعمزت ودارت روحها زعﻻنة ….
لحظات صمت وسكون كانت بينهم..
زعل شمسي حس روحه مش تمام فبيلطف الجو قالها – ريفاء بيبي خيرنا عاد
ريفاء مطرمة شوربها قالت – ﻻ شي
شمسي – استغفر الله … ريفاء اعقلي انا مانبيش نخسرك وندير في المستحيل ع خاطرك وانتي ابسط اﻻشياء ماتحاوليش تتفاهمي
ريفاء – احححح ياودي نستادنك شمسي والله راسي بدي يوجع من الموضوع
شمسي – قعمزي وين ماشية ريفاء – بنروح تو نهدرزوا بعدين
شمسي شدلها يدها شبحتله بحزن وفلتت يدها ريفاء من يد شمسي وقتله …

يتبع…………..

لقراءة الجزء التالي : الجزء الثاني من رواية حالة حب للكاتبة لوزة ليبية

للإطلاع علي فهرس الاجزاء كاملة : جميع اجزاء رواية حالة حب كاملة للكاتبة لوزة ليبية

جميع الحقوق محفوظة للكاتبة لوزة ليبية .