الجزء السابع من رواية اولاد سلطان

الدكتور طلع: للاسف

انس كان منزل راسه وقف يسمع

الدكتور: حوالنا معاها بكل جهدنا بس للاسف خشت ف غيبوبة

انس: اي والمعنى

الدكتور: رح تمكل حياتها عايشه ع الاجهزة

انس: نبي ننقلها من هني نظملي وراقها وامورها

الدكتور: مافيش فرق بين هني ومستشفى تاني البنت…. قاطعه

انس بصوت عالي: ماتدخلللش نفد شن قتلك

الدكتور نزل

انس قرب من اب ايلاف: ننقلاها لمستشفى تاني ممكن ف حل تاني

صبحي منزل راسه: وان اصابتكم مصيبه فاقولو ان لله وان اليه راجعون

انس طلع هاتفه: ايوواه مازن نبي منك خدمه

مازن: خير

انس: نبيك تمشي للمطار توا

مازن؛ تم وعلاش

انس: شوفلي اليوم ف طيارات ووين متجهين

مازن: تمام

انس: تمام صحيت… وصكر للخط

وفعلا مازن طلع للمطار وكان في طيارة الصبح تونس

بس المشكله انه اب ايلاف رفض السفر ببنته

انس: البنت حالتها خطيرة وتموت لو تقعد هني

صبحي: خلاص المكتوب ما منه مهروب تقعد هني

انس اتصل بـ مازن وقاله مصارش

ــــــــــــــــــ

بعد مرور اسبوع

عهد كلمت اهلها ورفضت ادير حفلة السبوع بسبب حزن لعيلة

انس غير ملابس وطلع

كريمه: تعلا افططر

انس طلع

كريمه: وههه عليا من يوم الحادث وهو ز المسبوه

فاطمه: ربي يهدي باله

كريمه: انشالله يارب

انس خش للممر وكان فاضي

انس شاف ممرضة: وين اهل المريضه لفي غيبوبة

ممرضة: من دقيقه طلعو وطلبو منا نهتمو بيها ف غيابهم

انس: اهاا نقدر نخش نشوفها

ممرضة: تفضل البس وقايه

انس عقملو ايديه وخش

ايلاف محاطه من جاميع اعضائها بطوبووات واجهزة وراسها ملفوف بفاشه وبشرتها شاحبه

انس سحب كرسي

انس قعمز وقعد يشوف لجهت الشباك: تعبت ايلاف(لف الكرسي لها) اووول مخلوق تعلي صوتها قدامي اول بنت تكلمني بااسلوبك التافه وكللل هدا محصور داخلي ولم تكلمت… سكت شاف لشباك

صوت الاجهزة وخلاص

انس قرب شافلها: كل تفكيري فيك انك تنوضيلي بس ممكن ربي مش كاتبلنا نجتمعو بس ندرااا عليا…. وسكت مقدرش يحلف

بعد سكوووت

انس: بنحلف لربي لو تفيقي وبخير وبنوعد ربي مانجي جهتك وكل واحد فينا ف طريق لكن معنديش القوة نتخلى عليك او نشوفك مع غيري ولـ حارقني ومانبيش نشوفك ع السرير هكي

انس وقف:حياتك اهم من حبي واصلا انتي مرديتيش عليا ممكن يكون حب من طرف عهد عليا ياايلاف لو تنوضي معاد نجي لطريقك لانه لصار رسالة انه مش رح نكونو لبعض (ضحك بهزوه)هلبااا يقولولي انت ماتتكلمش هلبا وعندكش ف كثرث الدوه لكن توا خليتيني ز الغبي نتكلم معاك وانتي راقده رح نكون معاك كللل لحظه كلللل يوم بس فيقي ووعد معاد تشوفي وجهي انت فيقي بس

ــــــــــــــــــ

بعد مرور شهر

وايلاف ع حالها مافي شي تغير

صبحي معاها وزينب عندها وعيلة انس زاروها

.

.

انس لامعاد يتكلم مع حد كان يرقد ف الحوش بس وياكل ف شي خفيف عشان يقدر يقاوم ويوقف بس وعايش ع النسكافيه صبح وليل ودخان بس

انس خش للمستشفى وكان مش فاقد الامل

انس خش وقعمز ف نفس الكرسي وفي كل يوم لكن ف الشهر هدا بدي عصبييييي هلباااا وخلوقه مضايقه

انس قعمز ومتعصصصب ولم هد يتعصب يلدا بدون عقل وقف بعصبيه ودف الباب وخش غرفة ايلاف:لهني وبس ياسر نوووم نوضي تعبت وانتي راقده ومرتاحه تحركي

صبحي ناض وكان عارف انه واجعاته خطيبته:ادعيلها

انس قرب من السرير يهز ف السرير بشوية بيده:نووضي نكلم فيك تحركي مش قلتيلي راسك يوجع فيك نوضي قلتيلي بتروحي ترقدي ايلااف ياسر نوضي

صبحي: خلاص ياسر ادعيلها

انس قرب من السرير:لصار بسبب النحس للحقني وبسبب الكلام لسمعتيه نوضي الكلام لسمعتيه كذاب كذذذب اني كذبت عليك تحرررركي

الدكتور خش:شن في

انس:لعند امتي بتقعد هكي فهمني

الدكتور:لعند ربي يشوفلها

انس هجم ع الدكتور شده من رقبت سوريته:دكتور ولا وشهادتك مزورها نوضها شن شغلتك هني

انس دف الدكتور وطلع ركب سيارته وبكي اي بكي تخيلي روحك انتي ف معانه بلعكس لو حد فيكم ف مكان انس كان انههااااار من اول اسبوع مش رح يفهم كلامي الا ليعرفو يحبو بس لتحبيه مش رح تتحملي فيه دقت شوك

انس دمعته نزلت ودار راسه ع الدمان وبكي بغصصصصه من يوم حادث وهو كاتم دمعته

ـــــــــــــــــــــــ

ع الخط

مازن: اي اني تعبت من صوتك ع الهاتف بس ياسر تو بنقدرب اول خطوه وبنحاول نطلبك من بوك

شيماء: حتى ني استاحشتك

مازن:لعند امتى بنقعدو ساكتين

شيماء: خايفه اني

مازن: مافي شي يخوف نطلبك منه ويرد عليا بـ اي او لا بس

شيماء: صوت دوشة عندي بنصكر باي

مازن:اوكى باي:صكر

شيماء نزلت

كريمه تعيط:البنت وجعتنا كلنا مش غير انت باهي وكان ماتت معاد لا تاكل لا تشرب

انس مد ايديه:سعفتها بيديا قمتها ودمها يقققطر وانتي جايه تقوليلي كول

كريمه وجعها ولدها

عهد وشيماء ومعتصم وسلطان وصدام وفاطمه ووتين ع سفرة الغدي

انس بغصه: سعفتها جسمها دمممم بلكامل تقطططر واني تبيني ناكل بكل دم بارد… طلع وقربع الباب

كريمه قعمزت: اني في شنو غلطت خايفه عليه هو لاياكل لا يشرب وكل يومه ف الصالة الرياضية تي هو لا ياكل لا يشرب شن الرياضه ليدير فها

صدام: صورة البنت ارتسخت ف عقله خليه مع الوقت ينسى

سلطان وقف ماكله: البنت معندهاش نصيب تكون من العيلة تفسخو منها وادوري لـ انس غيرها ربي خلقها وخلق غيرها لعند امتى بنستو هدا نصيبها تعيش باقي حياتها ع الاجهزة والولد قريب يصكر ال30سنة لعند امتى بنستو لين يشيب

صدام: مننصحكمش ادوروله رح تصير مشكله

معتصم: وتين كولي ولا نوضي معاد تسمعي كلام الكبار

وتين حرجت نزلت من السفرة وطلعت تجري للجنان شافت انس واقف وشاد الهاتف ف ايده قربت

وتين: بابا

انس ابتسم وشافلها

وتين: امشي معاك

انس ركعلها: تمشي معاي لـ ايلاف

وتين: اي نمشو

انس : البسي سبيدروك

وتين خشت:شيمااء لبسيني تندره بنمشي مع بابا لبسيني التندرة

سلطان:خشي داخل تبي تولي متوحده ز عمك شيماء دخلها

وتين خدت سبيدروها من المدخل وطلعت تجري: لبسني

انس قعمز لبسها وطلعو

في السيارة

وتين: مليضه هيا (مريضه)

انس:ياريتها مريضه بس ياريتها مرضت يوم او يومين وتنوض

ووصلو انس ووتين خطفو الانظار ف المستشفى وتين تلحق ف انس

وتين كانت لابسه قفطان اصفر قصير وسبيدرو ابيض وشعرها اصفر وقصير مفتوح وتجري اتجاه انس

انس خش وكانت الغرفة فاضيه : تعالي مافي حد

وتين خشت وقربت من السرير:قعمزني ع السرير نبي نسووفها

انس قامها وقعمزها ع حافت السرير

وتين شدت ايد ايلاف: لاااف (ايلاف)

انس يشوفلهم

وتين حطت ايدها ع السرير ونزلت من السرير:يابابا لااف مليضه سحونه(بابا ايلاف مريضه شخونه)

انس قرب شد ايدها وفعلا كانت ز النااار

الدكتور خش:لو سمحت

انس:خير

الدكتور.سحاب المريضه كبر ياتدفعو الحساب يانسحبو الاجهزة

انس:تمام تو نجي نتفاهم معاك

الدكتور طلع

ايلاف كانت بيضااا ز الميته وبشرتها شااحبه

انس قرب ركز انه بشرتها شاحبها هلبااا عن قبل

قعمز مع وتين وقت وطلعو دفع الحسااب وروحو

ـــــــــــــــــــ

تاني يوم الجمعه

مازن ف الجامع صله

وطبعا الامام هو سلطان

بعد تمت الخطبه والصلاة والجامع فضيي

مازن قرب من سلطان:كيف حالك عم سلطان

سلطان:باهي الحمدلله كيف حالك انت

مازن:في نعمه عم سلطان لو فاضي اليوم بنجيك بعد العصر عندي موضوع

سلطان:اي تفضل

بعد العصر

العشيه

سلطان ونساوينه وكنته وصدام ف الجنان

رنن الجرس الباب الخارجي

صدام ناض

خشو النساوين وخش مازن

مازن: السلام عليكم. سلطان: وعليكم السلام

بعدددددد هدرزه طويله

مازن قام هاتفه واتصل ع رقم شيماء وحط الهاتف ع الطاولة مقلوب عشان تسمع الحديث

مازن: عم سلطان اني نبي بنتك بلحلال

صدام شاف بوه وسلطان شاف صدام

سلطان: بنتي شن وصلك لها

مازن: اني نخدم ف لامن وطلبونا كلية بنت باش نامنو الكلية ف فترة الامتحانات وخادي شفتها

سلطان سكت

صدام: يعني بتخطبها

مازن: اي بنخطبها

سلطان: انت نعرفك من لم كان عمرك 22سنه تقريبا ونعرف وين كنت وكل شي عليك لكن يامازن انت تعرف انه الخطبه تبي حد ولي امرك يتكلم

مازن استغرب: كيف ولي امري وانت تعرف انه اني مانعرف حد

سلطان: كيف معندك حد، نعرف انه معندكش ام واب لكن اكيد عندك عمام خووال كيف هكي

مازن سكتت

صدام: ماعنده حد يابوي

مازن: لحكوهولي الميتم انه عيلتي نحرقو واني الوحيد لعشت منهم وعطوني ادلله ع عيلتي عشت ف الميتم من لم كان عمره تلاته سنوات

شيماء ع الخط وتسمع فيهم

سلطان: اني عندي بنت وهادي الاخيرة ومانبيش نظلمها ونبي نعطها لولد عيلة اصل وفصل قول يامازن هدا من حقي ولالا من حقي اني بوها نامن ع بنتي مع ولد… قاطعه

مازن وقف: من حقك وكلامك كله صح، عن اذنك… وقام الهاتف وطلع

صدام: خيرك يابوي مازن كويس صح ديما متعارك مع انس لكن راجل وتعتمد عليه

سلطان: ولد بروحه معنده حددد وصغار بنتي بيكونو ز بوهم وبيقولو وين عمامهم وين اهلهم واني مانبيش نعطي بنتي خلاص

مازن ركب في السيارة وقام السماعه: توقعي ف مكانه ومزاال…. قطعاته

شيماء: معاد تكلم بابا يامازن معاد تكلم حد عليا معاد تطلبني خلاص اني بنتصرف

مازن: علاش مفهمتش

شيماء: كان كل مابتطلبني بيهينوك بعيلتك واصلك اني معادش نبي

مازن: انتي شن تقولي والكلام لسمعتيه عادي… قطعاته

شيماء: لا مش عادي بابا زلكك بشي انت صار معاك وربي هكي كاتبلك الشي هدا مش بيدك

مازن: شيماء اني متعودد وبنجيب معاي شيخ المنطقه ويكلمه

شيماء: تمام بس لو ماوافق اني بنتصرف

مازن ضحك: وشن بديري؟!

شيماء سكتت

مازن: اني معاك

ـــــــــــــــــــــــــــــــ

انس يخدم ومرات يبدا ف ساعات الدوام يطلع ويمشي للمستشفى مرات ميخشش داخل يقعد واقف برا لانه تعب من نفس الوضع ليشوف فها فيه

بين مجموعه شباب

انس يسكر

مع مجموعه مش كويسين

مراد شافه : انس هدا مش مكانك نوض

انس: بعد وخليك ف روحك

مراد خاف بعدد واتصل بـ مازن

دقايق وصل مازن

ومجموعه الولاد ليسكرو عرفو انه مازن شرطي هربو قعد انس بس

مازن شاف مراد: خلينا بروحنا

مراد روح

مازن قعمز جنبه: شن ادير انت

انس يشرب

مازن: خطيبتك ف المستشفى وانت تسكر هني بدل ماتمشي تصلي وتدعيلها

انس شافله: الصلاة تبي واحد نيته بيضه مش غير يصلي وخلاص

مازن: وانت نيتك بيضة نوض نمشوو للبحر تشم هوا نضيف تصحصح

وناضو مشو للبحر بسيارة مازن

واذن الفجر

مازن: تمشي تصلي

انس مقعمز ع الرمله: انت وصلني للجامع

مازن وصله وقعد ف السيارة

انس خش توضى

شيخ قرب: انت مش من هني صح؟!

انس كان ميحبش يرد لكن تحشم من الشيخ: مش من هني

الشيخ: كنت سكران صح

انس تعصب من القصقصة: ليش الاسالة شن تبي انت من الاخير

الشيخ : ضروري ماتتغسل قبل الصلاة

انس: اي نعرف بس اني مكاني بعيد ومانقدرش نرجع نغسل منلحقش

الشيخ: اهاا تمام اتوضى وخش لصلاة

انس توضى وخش وكانو كلهم يشوفوله كانو كلهم من للمنطقه وهو غريب

مازن نزل وخش توضى وخش وشاف انس القدام ومازن قعمز وراى عشان مايحسش عليه انس وصلو جماعه

انس كمل صلي وكلهم بدو ينوضو بس انس رفع ايديه وبدي يدعي

مازن وراى قام يديه وكمل دعاء

الشيخ قرب منهم: ربي يتقبل

انس ومازن: منا ومنك

انس تلفت: انت قاعد

مازن: مانبيش نفوت صلاة

وناضو

انس: نبي ندير شي كويس صدقه او اي شي

مازن: في جامع قديم وفيهم شيوخ تبارك الرحمن لكن الجامع بنيته ضعيفه ومبني من قبل هو بعيد من هني احاط ف راسي نصلحه

انس: وين الجامع

ووصلو الساعه 6:00ص

ومشو للجامع وكان جامع قديييم من ايام زمان

انس ومازن حول من رجليهم وخشو يشوفو فيه

كان فاضي مافي حد

فجآة خش شيباني ف ايده مكنسه والباين انه بينظف الجامع

انس تلفت شافه قرب منه: انت مسؤال ع الجامع

الشيباني: لا اني انظف بس

خش شاب ف عمر 26 سنه: السلام عليكم

انس ومازن: وعليكم السلام

انس: شن اسمه المسؤول ع الجامع

ايمن: الامام حسين

انس: اهاا يجي ف كل صلاة يعني خلاص مازن نرجعو في صلاة الظهر

ايمن: خير في شي

انس: لا شي ماتشغلش بالك

مازن طلع وانس بيلحقه لكن جت عينه ع المكتبه متع المصاحف وقرب فتحها وفتح المصاحف كانو قديم ووكلتهم الغبرة

انس: علاش ماحد يهتم بلجامع هني

ايمن: هو كان منظفش فيه اني والشايب هدا راهو قريب ياكله التراب

مازن رجع: هي وينك

انس: روح اني بنقعد

مازن: علاش شن بدير

انس مدله مصحف: شوف

مازن فتحه: الامام يبي الفصل ياخد ف فلوس الجامع وخلاص مش مهتم

ايمن: قدمنا فيه شكوه ف الاوقاف مافيش فايده

مازن شاف انس: اهو محامينا توا يتصرف

انس: اكيد بس لين نشوفه ونفهم منه

وبدو ايمن والشيباني ومازن وانس ينظفو ف الجامع

لعند ايمن اذن الظهر وجو الناس وجي الامام حسين

حسين: شن اديرو هني ومن انتم

انس: وعليكم السلام

حسين شاف الناس: من هدا

انس: اني اسمي انس سلطان

حسين: ومن طلب منك تلمس او تحرك المكتبه

انس ومازن نظفو الغبرة من المصاحف وغيرو مكان المكتبة

مازن: ماحد طلب منا

انس شاف مجموعه الناس: انتم علاش ساكتين علاش ماحد شكي فيه قصدي لدرجة انه المصاحف كتاب الله عليهم غبرة وجامع كبير ز هدا قريب يسكن فيه العنكبوت

ايمن: لانه مافيش جامع تاني ف المنطقه غير هدا والناس سكتو

انس: هي مازن

وطلع مع مازن للاقاف وشكو فيه ولم عرفو انه المحامي انس مشو الشكوه

ــــــــــــــــــــــــــــــ

بعد مرور ايام

انس ومازن جابو عمال ينظفو الجامع ويصلحوه وخدوله مواد تنظيف ومواد محتاجها الجامع

انس جاته حساسيه بسبب الغبرة روح للحوش يعطس

سلطان: هدا من النوم برا

كريمه: خود حبوب زكمه

وتين قربت من انس

انس: بعدي ريتحي غبرة توا ندوش ونلعبك

وتين ققعمزت

سلطان: سمعتي ريحته غبرة ز ولاد الشاورع

صدام وقف: انس تعلا نبيك

وركبو الزوز لغرفة انس

انس: شني

صدام: مازن طلب شيماء

انس: مازن مني؟!

صدام: صاحبك

انس: باه كمل

صدام: بوك رفض لكن قبل مايرفض سمعه كلام ممكن ان الولد يبطلب يطلب ويبطل حتى يخطب غيرها

وحكاله صدام انس نزل

انس: انت شيخ انت تي انت يهوودي مش شيخ

سلطان وقف: تتكلم مع بوك اننس

انس تعصب وجها احمر:ولد الناس جاك راجل من الباب وطلب بنتك هكي تقوله

شيماء تشوفلهم وفهمت

سلطان:الود لقيظ

انس: ماتبيشي قوله ربي يكتبلك غيرها ومانبيش نعطي بنتي مش تقوله وين امليك وعيلتك وين بوك تبيه يخلقهم ولا شنو لاااا وداير روحك شيخ وتفتي

سلطان:منعطيش بنتي لواحد ز هدا

انس: هدا الواحد قعد احسسن مني واحسن من صدام واحسن من معتصم متربي احسن من ولادك التلاته يصلي ويصوم ويرفع الراس

سلطان بيتكلم قاطعه

انس: لـ شيماء احسن من مازن مش رح تلقى واني قتلك وتعلا علم ع كلامي كان حصلت احسن منه لـ بنتك

سلطان:اني نعرفه لكن الولد….قاطعه

انس:انت شن تبي ف عيلته اهم شي سمعت الولد بس ومش كان هو يتيم معانها ماحد يناسبه

كريمه:انس هدا بووك تحشممم

سلطان: وكبرت ياانس وتعلي ف صوتك عليا

انس:ماعمري عليت صوتي ع حد مظلوم اني نوضحلك ومانبيكش تخسره لانه لو فات للوقت خلاص

انس ركب لغرفته دوش ولبس وطلع

للمستشفى

شاف صبحي

انس:سلام عليكم

صبحي:وعليكم السلام

انس:شن صار قعده ع حالها

صبحي هز راسه وخلاص

انس:اني بننزل لدكتور…تلفت بينزل

صبحي: طلقها ياانس

انس تلفتت: مستحيل

صبحي:اني بنمشي لتونس بنضرب الكيماوي وبناخدها لتونس

انس: اي خودها معاك لكن مش رح نفسخ بنتك خطيبتي والشي لصار معاها قضاء وقدر

(من كلمة قضاء وقدر انس انذكر انه ندر لربي يتخلا علها لو فاقت وفهم انه للشي هدا قضاء وقدر وانه حتى لو ندر انه يسيبها مافقتش)

صبحي بهدؤ:افسخ منها وشوف حياتك

انس: علااش نفسخ منها بسبب الحادث مش فاسخ… وطلع

انس ركب سيارته ومشي لشيخ وحكاله ع الندر

الشيخ: تصيم تلاته ايام اوتعطي صدقه جارية

انس: تمام بارك الله فيك.. وطلع

ــــــــــــــــــــــــــــــــ

تاني يوم

انس لبس وطلع

كريمه: تعلا افطر

انس يلبس ف سبيدروه: صايم

كريمه: صيام شنو يو الاتلات

انس طلع ومشي للمستشفى لكن كان الحساب ممدفوع المرة هادي قرب لغرفتها فاضيه طلع

انس لممرضة:وين البنت لكانت هني

الممرضة: الفجر طلعو بها بالاسعاف للمطار

انس طلع للمطار وسال ع الطيارات وبصدفة شاف الاسعاف قرب وشاف جاكيت ف الاسعاف والاسعاف فاضيه خدي الجاكيت لعرف انه مقاس ايلاف شاف السواق جاي تجاه الاسعاف

انس: وين البنت لكانت ف الاسعاف

السواق: توا ركبها الدكتور لطيارتها

انس ضغط ع الجاكيت بقوة وقعمز ع الكرسي وشد راسه بيديه

وهو منزل راسه يسمع ف صوت عجلات السرير جايين تجاه الاسعاف

انس قام راسه شاف ايلاف ف السرير ومرجعينها للاسعاف

الدكتور: النبض ضعف بسرعه الانعاش

انس شاف بوها : لو صارلها شي تتحمل مسؤوليتها انت

صبحي قعمز ويفرك ف ايديه بخوف

الدكتور: البنت ماتتحملش السفر نصيح ترجعها لانه ف اجهزة محتاجتهم

انس شاد الجاكيت:رجعها

صبحي:تمام رجعوها بس ياانس البنت منقدرش نخلها بروحها

انس:علاش بروحها اني معاها

صبحي:انت مش متزوجها

انس: نقرا فاتحتها

صبحي:بتقرا فاتحه بنت ميته

انس:هدا الحل عشان تقدر تسافر نقرا فاتحها وين للعيب ف الموضوع

ـــــــــــــــــــــــــــ

باختصار رجعو ايلاف للمستشفى

وانس كمل صيامه

انس رجع للحوش:بوي وين

سلطان:اني هني

انس: اني بنحكيلك العم صبحي مريض وبيسافر يضرب الكيماوي مرة تانيه وميقدرش يسافر ويرفع معاه بنته بسبب حالتها وميقدرش يخلها بروحها الحل

سلطان:وشنو الحل

انس:الحل اني بنقرا فاتحة البنت

كريمه فنصت فيه

شيماء حببت انس لانه حساته يحبها ومش رح يتخلا علها

سلطان: باهي لو تقرا فاتحها وتموت البنت بتبدا ارمل انت

انس: علاش تموت ممكن تفيق

سلطان: اني لو وافقة رح نوافق بسبب حالة بوها المريض بس

وفعلا يومين وقرو فاتحة انس والناس كلللها سمعت وبين الناس هادم سمعت بشرى خطيبة انس الاولة

تو ايلاف في غيبوبة تلاته شهور

صبحي سافر مع وفاء

وانس معاد فارق ايلاف

تتبع …….

لقراءة الجزء التالي : الجزء الثامن من رواية اولاد سلطان

لقراءة الجزء السابق : الجزء السادس من رواية اولاد سلطان

للإطلاع علي فهرس اجزاء الرواية : جميع روابط اجزاء رواية اولاد سلطان للكاتبة ميشو محمد

جميع الحقوق محفوظة للكاتبة ميشو محمد .