الجزء العشرون من رواية اولاد سلطان

انس تلفتت: في مقوله تقول

اذا غلطت في حقك ارجوك تسامحني لانه نهايتي كفن ابيض وقبر صغير يحويني

ايلاف تبكي: علاش مصدقتنيش وصدقت الناس علاش

انس بتكلم

ايلاف قطعاته:توا خلاص معاش عندي مانقول غير حسبي الله ونعم الوكيل

انس بصوت عالي: كنت متععععصصصب افهههمممي

ايلاف سكرت ودانها بيداها وزادت تبكي

كريمه خشت متعصبه:شن هدا نقص صوتك راك ف مستشفى

انس شاف ايلاف بتمعننن وتدقيق وطلع سرفق الباب بقوة

ايلاف زاد تبكي: علاش ياعمتي هكي صار معاي

كريمه تمسح ع راسها:لا لا خلاص اششش سلم بنتي كل شي يتصلح

ايلاف بكت بكت بكت بكت

جت الساعه 6 عشيه

ايلاف شافت ساعة هاتفها وبعدت الشرشاف:اني شن قعده بندير هني ..ووقفت

كريمه:قعمزي علاش ياعمتي هكي اديري

ايلاف:ماتخافيش ياعمتي اني كويسه

وفاء:كان تقعدي حتى الليل ز ماقال للدكتور

ايلاف:لالا نبيش،(قعدت تشوفلهم)ووتين وين

كريمه:روحت مع انس بيجيبولك حاجه صحيه تاكلها من الحوش

ايلاف:عمتي وفاء اتصلي بعمي يجيني نبي نروح

فجآة الباب نفتح وخشت وتين وانس ف ايدهم كياس

وتين قربت من ايلاف:جبنا اكلات من حنينه فاطمه وشيماء

ايلاف ابتسمت

انس:واقفه ع وين؟!

ايلاف شافت عمتها بمعنى اسكتي

كريمه:ياانس راهو تبي تروح كلمها سلم ولدي

انس شاف ايلاف:قال الدكتور غضوا تروحي كملي اليوم وغضوا روحي

ايلاف احترماته قدام امه

(اعرفي انه مهما كنتي متعاركه معاه ومهما غلط فيك خليك انتي بـ اسلوبك وبشخصيتك وخليك ع المبدى لتربيتي عليه)

ايلاف: مليت واصلا انا كويسه ياريت تصكرو ع الموضوع

انس:مش بكيفك…قطعاته

ايلاف شافتله: اني المريضه مش انت

وطلعت ووقعت ع ورقه انها تتحمل مسؤلية نفسها لو صارلها شي وفعلا طلعت

بس تفاجاة انه عمها ف الخدمه

ايلاف معندهاش حل تاني غير انها تركب مع انس يروح بها

كريمه ابتسمت وفتحتلها باب الكرسي الامامي

ايلاف فتحت باب الكرسي الخلفي وركبت وكريمه ركبت من قدام ووتين ف الوسط ووفاء جنبهم

وتين:ماما انتي مريضه؟!

ايلاف بصوت واطي: اي شوية متخافيش عليا باهي

وتين: علاش مريضه

ايلاف سكتت

كريمه:ماهو متاكلش كويس لـ مياكلش كويس هكي يصير فيه

انس: متبو شي من الطريق

ايلاف:وصلني لحوشك بناخد باقي ملابسي

كريمه سكتتت

وفاء متبيش تتكلم

انس: لـ يريحك

انس وصل وفاء الاوله وبعدين وصل كريمه ووتين قاللها تنزل مع كريمه ونزلت خافت

ايلاف تشوف ف الشباك ف الكرسي الخلفي

انس: ماتبي شي من الطريق

ايلاف ساكته ومنسجمه ف الطريق

ايلاف منسجمه ف الطريق: الحوش فات وين واخدين ارجع

انس ساكت ويسوق

ايلاف ضربت كرسيه:نكلم فيك ارجع وين رافعني؟!

انس ساكت

ايلاف: اططررشش

انس ببرود:نسمع

ايلاف:وقف السيارة

انس طلع وراق من الدرج لقدامه:خودي اقري

ايلاف جبدتهم بعنف شفتهم:شن هادم انس:اقرريهم

ايلاف حدفتهم ف الكرسي القدامي:اني تعبانه معاش نبي شي من حوشك رجعني او نتصل بشرطه

انس: اتصلي

ايلاف:انس خيرك هكي

وقعدو يسوقو يسوقو لعند حي اليل وهو ماشي

انس شاف بوابه

ايلاف خافت:انس متوقفش ممكن عصابه

انس:عصابه نعرف اسكتي متخافيش

ووصلو لعندهم وانس يصكر العداد

ووصلو في مكان مهجور

ايلاف:لو مش خايف عليا ياريت تخاف ع لفي بطني يارريت،وللعلم اني مستحيل ننزل معاك زيد قدم

انس وصل ونزل وفتح اباب وعيونه حمر:انزلي

ايلاف شافتله:مش نازله

انس شد ايدها:انزلي

ايلاف خافت نزلت

وخشو ولحوش صغيرمش مفرش فيه كنبة بس

ايلاف تشوف ف العنكوت والغبرة ف الحوش

انس فتح الدار لكانت مصكره بقفل خش وولع الضي

ايلاف خشت معاه كانو الحيوط مليانه صور شباب وبنات ووراق

ايلاف قربت تشوف ف الصور:انس من هادم

انس:هدام صور الناس لمستلم قضاياهم وباالف كسر رقبه باش نكسب القضيه ونكبر اسمي وكل صورة ووراها قصتها

انس قرب من الصور يشوفلها:استني(جبد صوره)هادي بنت شفتها هادي تزوجت وقتلها راجلها ومافي حد قدر

ايلاف خدت الصورة: صغيرة

انس: اي (جبد صورة) وهدا عنده بنت ومجرد ممرته سيباته عذب البنت وماتت بنته معاه

انس بعياط: نادم للموت انه اني نستلم ف قصص الناس نادم ع مهنتي النوم منرتاحش فيه خايف نظلم حد خايف نكون سجنت خايف نكون بسببي نعدم حد خايف يكون بسببي فرقت ام ع ولادها نادم ع شي اسمه قانون قصتك مع وتين من الهوس لراكبني من الناس وكيف الكل شهد عليك وخدي عليك صورة مش كويسه قلبي يقولي مستحيل البنت لتحبها هكي ادير وعقلي يقولي الناس وصحابك يبو مصلحتك في يقولولي البنت ممكن يبيعوها وفي يقولي البنت يقتلوها (ايده ع خدودها) صدقيني لصار معاك مجاش قطرة من عذابي ومن كلام الناس ليقولولي ااانت حرمت البنت من امها وفي ليقولو البنت هربت منك وفي ليقولو مش من حقك تاخد بنتك خوووك

ايلاف بدت تبكي بصوت واطي: اني مش واجعني لا الكف ولا كلامك ولا كلام الناس اني كلمه منك بس خلتني نكرهك ماعمري توقعت انك تضربني وتقولي اني عديمه ضمير وبزياده قتلي اني منستاهلش يكون عندي صغار ولا نستاهل تكون عندي عيلة انت مخفتش ربي فيا (زادت تبكي) اني لتقولي متستاهليش عيلة اني حتى عيون امي ماشفتهم اني حتى كلمة ياامي مانطقتها اني ماعمري حسيت بطعم عيلة

انس حضنها: الف قصة خشت راسي تشوشت من كلام بوي وخالتي فاطمه

ايلاف بعدت: مانبيش نتعاطف معاك واني حامله عليك ف قلبي خليني بروحي نبي وقت

انس: تمام

ايلاف: رجعني ناخد ملابسي.. قاطعها

انس: بس…. قطعاته

ايلاف: انس نبي وقت افهمني، متخافش اني مش متسرعه زيك اني رح نفكر ف صغاري ورح ناخد وقت

انس بغصه: تمام

ايلاف تلفتت تشوف ف الصور لفتت انتباها صور شاب مع انس قربت: انس من هدا

انس: هدا عاصم خوي اب وتين هدا الوحيد لكاتب وصيته بيده وراى الصورة

ايلاف لفتها:(انس بنتي امانه عندك وتين امانه عندك انت الوحيد المسؤول علها اني نوتق فيك) لفت للصورة شافتلهم: ربي يرحمه

انس: يلا مشينا

ايلاف: لالا خلينا هني اليله ممكن نتلاقو مع الناس المتع البوابة واصلا مش كويس المشي ف اليل بلله خلينا

انس يعني سبله وحصلها: تمام(شاف هاتفه) توا الساعه 2:10

ايلاف طلعت لصالة لكان فها كنبه وحده بس

انس قام الشرشف من فوق الكنبة ونفضه غبره: انتي ارتاحي اهني… وخش لغرفة طلع منها باكو كبير خش المطبخ خدي سكين فتح الباكو وطلع منه فرش متع سرير نظيف وجديد

انس؛ تعالي ارتاحي ع هدا

ايلاف: وانت؟!

انس: بعد لصار مزال نرقد اني

ايلاف: بس امك قالت انت مرقدتش بكل

انس: مدورينيش ارقدي

ايلاف حولت وشاحها وفتحت شعرها وعاوده قاماته وحولت عبايتها وكانت لابسة قفطان اسود صيفي تحت الركبه وواضح بروز بطنها

انس قعمز ع الكنبه

وايلاف تسطحت ع الفراش وقعدت تتقلب بملل قعمزت: اوووف شن هدا

انس: في شي

ايلاف تسطحت: لا شي

(طبعاا كلنا نعرفو انه الحامل مش بساهل ترتاح ف تقعميزتها او نومتها)

انس قرب: خيرك

ايلاف قعمزت: بطني مش مريحتني منقدرش نرقد واصلا نوو هني…وناضت فتحت الشباك

انس قام الفراش وطلع بيه فوق السطح وهو وينظف ف المكان جي ف دونه عيطت ايلاف لعيكتها بقوه نزل يجري

ايلاف واقفه فوق الكنبه: يايما تعاليلي

انس بيضحك: خيرك

ايلاف: زوز فيران زوز شفتهم زوز خوات

انس ضحك: مشالله خوات

ايلاف كشخت: اننسس

انس مد ايده: خلاص مشو هي تعالي

ومافاتت هادي اليل قريب ايلاف ركبها عفريت وهي موسوسه وخوافه

ايلاف تسطحت ع الفراش بس مش مرتاحه حست باانس رقد جنبها تلفتت

انس: قيمي راسك

ايلاف تحشمت قام راسها ونزلاته ع صدر انس وواخيرا رقدو

(ثلاث صفات للمتفائلين:

يبحثون عن الجانب المضيء لكل موقف.

يسعون لتعلم الدروس القيمة من كل مشكلة.

يبحثون عن الحلول بدلاً من لوم الآخرين.)

..

طبعاا شيماء ومازن ليلاتي مكالمات

..

ومعتصم يقرب يوم عرسه وهو مش عارف كيف بيحكيلها انه مش مصاب بالسرطان

تاني يوم

كيف بدت الشمس تشرق

راقدين ع نفس الوضعيه

انس فاق قبلها متحركش نهائي قعد يبعد ف شعرها من ع وجها ويتفرج علها قعد يتفرج علها لعند بدت تفيق وترمش ف عيونها هو عطول صكر عيونه

ايلاف قعدت تشوفله حطت ايدها ع لحيته: يارب مايحس بيا يارب … حطتها

ايلاف تتلامس فها: لحيتك طاولة

انس مغمض عيونه حابس ضحكته ضحك: طاولة وكرسي

ايلاف ضحكت ضرباته ع صدرة: بارد… وقعمزت

انس: نمشو؟!

ايلاف: اي بلله هيا جعانه اني… وناضت ايدها ع جنبها متشنج

انس: في شي موجوعه

ايلاف شاده جنبها: لا شي جنبي بس..ونزلت

نزلو لبسة وركبو السيار عطول

ايلاف:استنى ماتمشيش

انس بيولع:خيرك نسيتي شي

ايلاف:عندك خبزة اوشي ف التلاجه؟!

انس:اي بس اكيد يابسة علاش؟!

ايلاف نزلت:استنى…ونزلت خدت المفتاح من تحت الحجر وفتحت الباب وخش المطبخ وكل شوية تتلفت خايفه يجوها الفيران

فتحت التلاجه كانو فاها خمسه فردات خمزة خدتهم

انس خش:شن اديري

ايلاف عطاته خبزة:فتفتها للفيران حرام اكيد جعانين

انس:هبلتي انتي اني بنقتلهم مش نسكنهم ف حوشي

ايلاف تفتفت ف الخبزة: حرام اكيد عندهم صغار خليهم ياكلو هيا

انس ضحك وبدي يفتفت معاها

ومن الجوع جو تلاته فيران

ايلاف عيطت وطاح الخبزة منها: يماااا

وطلعو

في الطريق

وصلو لحوشهم

ايلاف خشت غرفتها فتحت دولابها وبدت تاخد في ملابس

انس خش وف ايده سفرة فيها عصير وتوست شكلاطه : وين؟!

ايلاف: انس اني قتلك نبي وقت

انس حط السفرة: افطري قبل

ايلاف اطبق ف ملابسها

انس تعصب بس مش مبين:قداش بتقعدي عند عمتك

ايلاف: لعند ولادتي

انس:نعمم؟!شهرين ونص!!!

ايلاف: اي شهرين ونص عشان تتعلم تسمع من الناس ومني مش بس تسمع الناس

انس: تي شن شهرين ونص النمم منحسش حتى انه بيجوني صغار

ايلاف:علاش لم ضربتني حسيت بصغارك مقلتش ممكن يصير لواحد منهم شي

انس:بس عمتك مش مجبورة بيك ياايلاف

ايلاف بدت تبكي:علااااش ف كل لحظه تحسسني انه اني ياتيمه علاااش

انس: اسمعيني…قطعاته

ايلاف:منبي نسمع شيييي

انس حس انها ترد ف كل شي بل ملي وخصوصا انها ردحركته لم رفض يسمعلها… طلع

ايلاف خش الحمام (اكرمكم الله) غسلت وجها ونظفت الحوسه لفي المطبخ وبخراته وهي تبكي طلعت شنطتها الصغيرونة ووصلها

انس: مش رح نضايقك لو احتجتي شي اتصلي

ايلاف: لو نموت مستحيل نتصل

انس: ايلااااف هلاااص انننسي

ايلاف: لعنده كرامه مينساش بساهل انت لم لوحتني لـ عمتي شن قتلك قتلي وقتها صوتي ماتبيش تسمعه صح واني هكي بندير

وصلها ورجع لحوشه

انس اول ماخش جاته ريحة البخور وشاف المطبخ نظيف من الحوسه والسرير ملموم

انس تعصب بدي يكسر اي شي قدامه

(اهم شي في القصة كلها انه مفيهاش الوهم والدوه الفاضيه الموجوده ف الروايات التانيات)

(والروايات ال هدكم وللهي ماليهم علاقه بحاجه اسمها رواية)

بعد مرور اسبوع

والناس كلهم سمعو بقصة ايلاف والكل يقول يناري ومسكينه

مازن حدد عرسه مع معتصم وتحدد بعد 25 اليوم بحكم التنين جاهزين

ايلاف صكرت سبعه شهور ع حملها

في يوم عادي وبدون موعد جتهم

كريمه ووتين

بعد هدرزه

كريمه:سلم بنتي مافي حد ميغلطش

ايلاف: حاظر ياعمتي

كريمه:ارجعي وحساسيه بعرس اخته صدقيني من لم مشيتي وهو نفس انس متع قبل العصبي ميجيناش الا لم يجيب وتين بس

ايلاف: جيتك عزيزة ياعمتي منردكش

كريمه:خالتك فاطمه بتجي لكن الحوش زحمه ويجهزو ،هي نوضي البسي وتعالي معاي

ايلاف:توا؟

كريمه:ايي توا

ايلاف: حاظر..وناضت مع وتين لبسة غيرت ملابسها لبسة عباية بيج كمامها واسعات وبطنها بارزه اكثر

ومشت مع كريمه ووصلهم معتصم

وصلو وكان انس قدام الباب معاه ولاد الشارع وسلطان وصدام

وتين نزلت مشت تجري:باااابااا

انس ضحك قامها:اووبااا

وتين اشرت ع سيارة معتصم:شوفي مني جبت معاي

انس قلبه شافلها

انس نزلها: بري خشي انتي كبيرة توا وعيب تقعدي ومعاي ولاد

وتين:باه…وخشت تجري

صح العرس مزال عليه 20 يوم بس ميخلاش الجو من شوط دربوكه

كانو دايرين شوط

وخشت كريمه تزغرط فاطمه شافت وايلاف ناضت تسلم علها وتزغرط بقوة عاد تعرفوها التزغريطه العاليه ونقلب الحوش زغاريط بقوة وتكنه عروس خشت

شيماء ادربك: اهو اجي اهو جينورهلقمر وضوي

نادوها نادوها ياناس يامرت الغالي وتاج الراس

اتجينا كل عشيه مرت وخيا غاليا

حييييي حي حي

ايلاف تحشمت قعدت تضحك

شيماء سيبت الدربوكه وحضنتها:نور الحوش

ايلاف: مبروك شيمو ربي يهنيكم

شيماء:حماتي عاد انتي

ايلاف ضحكت

قعمزو الكل يهدرزو ف ايلاف

خالات وعمات انس

شيماء في المطبخ تجهز ف قهوة مع ايلاف

ايلاف حولت عبايتها قعدت بقفطان مريح واسع تحت الركبه ونص كم

ايلاف تقيم ف شعرها: وتين ماما راك اطيحي باهي

وتين:وين عاصم

عهد:رقد عصومه خلي نمشي نشوفه..وطلعت

انس خش من باب المطبخ وقف جنب الباب وهو برا ينادي:شيماء يمااا

ايلاف بتهرب شدتها شيماء

شيماء شدت ايد ايلاف:خش مافي حد

انس خش وقلبه اول مشافها :انستينا

ايلاف:سلمك الله ياانسك

فاطمه جت:اهي رجعنالك مرتك معاش تزعلها ذهب هادي

انس ابتسم:حاظر ياخالتي

ايلاف تحشمتتت طلعت

انس دخل كياس خظره؛ اهي الخظرة لطلبتها ماتبو شي تاني

وجي اليل

شيماء: فرح ورانيا انتم بترقدو في داري

عهد قامت عاصم: هي تصبحو ع خير .. وطلعت

ايلاف توشوش: شيماء واني؟!

شيماء: لا ياعمري اني عندي راجل ونحس بيه لم يستاحشني فا يلا حوشك انتي

ايلاف: خززي

رانيا اخت شيماء: انسي لفاتت شي طبيعي تصير مشاكل بينكم

ايلاف؛ وتين وين

كريمه جت لصالة: ايلاف انس ف المطبخ تعالي اهو بيكلمك

ايلاف تحشمت قعدت مقعمزة متحشمه

وتين جت: يماا قالك بوي تعالي

ايلاف تحشمت اكثر وناضت خشت المطبخ شفاته يغسل ف ايده

انس تلفتت: اهلا

ايلاف: خيرها ايدك؟!

انس: نجرحت نصلحو ف السيارة برا وجبدت ايدي نفتحت

ايلاف: متخافش مش رح تموت تو تبرا وادير قشرة

انس: بري البسي عشان نروحو

ايلاف: هي بري وتين البسي

وتين طلعت

انس: وتين شني ليا اسبوع مشفتك

ايلاف قامت حواجبها: منخليش بنتي

انس ابتسم ع جنب

ايلاف تلفتت بتخش

انس حضنها من الخلف وايده ع بطنها باسها ع رقبتها وشوش: موليه عسل

ايلاف هربت وخشت لصالة ز المتكرهبه

..

شيماء: مازن رقدت؟!

مازن بيرقد الهاتف يطيح ويرتخى منه بصوت ناعس:نايض

شيماء: تو بيجيك كف يصحصحك

مازن ضحك وهو راقد: مرآة !!

شيماء: باي حتني بنرقد

مازن خداه النوم

شيماء صكرت الخط

تتبع…

لقراءة الجزء التالي : الجزء الحادي والعشرون من رواية اولاد سلطان

لقراءة الجزء السابق : الجزء التاسع عشر من رواية اولاد سلطان

للإطلاع علي فهرس اجزاء الرواية : جميع روابط اجزاء رواية اولاد سلطان للكاتبة ميشو محمد

جميع الحقوق محفوظة للكاتبة ميشو محمد .