الجزء الحادي والعشرون من رواية اولاد سلطان

ولبسة ايلاف : وتين هيا ماما

وتين: لا ماما نبي نقعد مع العروووسه

ايلاف تحشمت من خالت انس: وتين هكي ماما

وتين: ونبي ونبي خليني

ايلاف: باه اقعدي…وسلمت ع خالته وشيماء والباقي وطلعت

ركبت مع انس

انس لاف ايده بشاش ابيض: حليلي من البطه

ايلاف ضحكت بهدؤ:مسمحتكش عفكره

انس اضيق:حسيت حتى ني

ايلاف شافتله كيف زع:نبصر عليك سامحتك بس صغاري يقولولي ماتسامحيه لعند ياخدلك فازو نوتيلا

انس ضحك شد ايدها باسه: من عيوني

ووصلو ونزلو

غيرو

ايلاف رجفت وبدت تمروح ع نفسها بيدها

انس خش:خيرك نوو؟!

ايلاف تمروح بيدها :بركااان ،اني بندير دوشت ولبسة نفس القفطان لكانت بيه

ايلاف طلعت: قعدت بنفس ملابسي ومعنديش ملابس

انس فتح دولابها: اهو في

ايلاف: انس خيرك اني بطني واصله للباب هادم خلاص عليهم

انس ضحك وقربلها: متعبينك؟!

ايلاف:هلباا وبعدين يكبرو ويبدو يحبو بوهم اكثر واني ماحد حاسس بتعبي

انس ضحك:عادي اهو اني نموت فيك ساد وله

ايلاف ابتسمت لمسة لحيته: اصلا عادي انهم يحبو بابتهم

انس جبدها بقوة وحضنها:اااه استاحشتك يافرخه

ايلاف حضناته

انس بعد بهدؤ وفتح الدرج طلع بوكس

انس مده لها:اسف والله

ايلاف بعدت الخصله من شعرها وراى وذنها وخدت البوكس فتحاته ولما فتحاته عيطت ولوحت البوكس ووخررت للخلف وشدت وذانها

ايلاف ترجف شدت وذانها وتشوف ف البوكس ع الارض:لالا لالا لالا …قاطعها انس حضنها

انس خاف:اهدي خلاص اسف (شافلها ويتلامس ف خدها)فكرتها رح تفرحك

ايلاف ترجف: لوحهااا بلله لوحهااا برا

(كان السلسال لـ كان عند مازن لنحرق مع اهلها انس خداه وصلحه عند الذهب ورجعه جديد ومعاه ورد )

ايلاف مسنوده ع الحيط نزلت ع الارض:مانبييشششييي

انس قام البوكس وقطع السلسال:خلاص خلاص

ايلاف حضناته :هدا كابووس كابووس

ورقدت ف حضن انس ،انس خلها ترقد وخدي البوكس وحطه ف المطبخ ورجع جنبها ويمسح ع شعرها

تاني يوم

معتصم يزيد انفه ينزف اكثر من قبل وزادت مع النزيف يكحح بقوة وودم رجع لنفس المصحه دار تحليل

دكتور التحليل:انت جاي قبل صح؟!

متصم:اي حاي بس قالولي مافيك شي

الدكتور:انت من يوم اني سلمت التحليل لرسبشن اسمك حافظه اسمك معتصم سلطان ال،،، صح

معتصم استغرب: يعني بما انكحافظ اسمي التحليل كان فيه شي

الدكتور: انت مستلمتش تحليل لفات؟!

معتصم:صاحبي استلمه اسمه مراد وقالي مافيه شي وكل شي طبيعي وقالي ممكن النزيف مجرد ضربت شمس

الدكتور:ضربت شمس شني انت مصاب بسرطان ف المراحل الاخيرة

معتصم جممد

الدكتور:صاحبك كان يبي حالتك تدهور اكثر لو صاحبك وعمود ضهرك صح راهو وقف معاك وشجعك ع العلاج

معتصم: انت شن تقول اني عرسي الاسبوع هدا

الدكتور سكت

ممرضة خشت تستلم التحليل

معتصم رجع للخلف لعند نسند ع الحيط وف الممر الكل يشوفله

وهو ساند ضهره ع للحيط قعمز ع الارض

فجآة قربوله الكللل

…

ايلاف فاقت شافتله راقد جنبها ناضت بهدؤ غسلت وجها وطلعت للمطبخ وصلت ف الباب شافت البوكس قربت بخطوات تقيله وتشوفله

ايلاف: علاش في اليوم لـ شراه بابا لماما ينحرقو علاااش علااش اني مستحيل نحطه ف رقبتي ولا نلمسه تاني

ايلاف شافت المطبخ نظيف ودارت دوره ع البنت وكان نظيف بس يبي لمسه بسيطه قعمزت ف الصالة فتحت نت دقايق وناضت للمطبخ فتحت التلاجه بتجهز فطور بس كانت فاضيه

انس غسل وجها وقرب للمطبخ: صباح العسل

ايلاف تلفتت:صباح الورد

انس شاف التلاجه:امس فصيتها الخظره لكانت فاها عفنت لوحتهم

ايلاف:اي عادي خلها فاضيه عادي اطلع بروده شن رايك

انس ضحك:مبردك

ايلاف:شن بتفطرنا حني التلاته

انس: عادي نفطرو برا او نطلب ويوصلولي بسرعه

ايلاف؛ اني عادي عندي وجع ف بطني ومنحبش نفطر بكري اني كنت بنجهزه ليك

انس: البسي ناخدو من برا

ايلاف:لالا معنديش خلوق نتحرك انت امشي

انس:تمام…وطلع

طلع شعراته مشفشفيات بعفوية ولابس سروال توته اسود وتيشرت عادي اسود

ايلاف رجعت فتحت نت

دقايق فطرو وطلعو خدو ملابس لبعض انس ولـ ايلاف ولـ وتين للعرس

..

شيماء لبسة الفيلو لـ كان من مازن كبير فخم وتاج ملكي ومكياج ملكي بس مش اوفر

وضحى فيلو حلو وبسيط كبير وفيه ديل وتاج من ورد الياسمين

ومعتصم لبس البدله السوده

مازن لبس البدلة سوداء بس بطريقه تانيه يعني بدون جاكيت،لبس السروال وسورية بيضة وفاتح اول زر وقولف تابع البدلة بس لانه ميحبش البدلة بس

ووصلت شيماء بكري لانه عروستين

شيماء وصلت لصالتها دخلها انس لـ كان لابس سروال اسود وسورية سوداء وكلله ع الاسود ماتقولوش علاش هكي اسود بلعكككس الاسود اناقـه

وبدو يسلمو علها

ركبت وتين لـ كان شعرها فلو وربطه ف شعرها ورد احمر وفيلو كبير احمر

وقربو الكل يسلمو علها قربت ايلاف لـ كانت لابسة قفطان ازرق غامق كمام طايحات ع الكتاف وطويل وتسريحه ناعمه

ايلاف ابتسمت لـ انس:شنو انس حلو الشعور بالك تبي تجرب عروسه جديده؟!

انس ضحك:زيدي تباردي

كريمه وفاطمه وشيماء ضحكو

انس نزل ونزلت معاه ايلاف ف نفس الوقت بس بصدفه

انس شافلها: طالعه عسل …وطلع

دقايق تعشو

وخش مازن تحليقته ونظرته لـ كانت ع شيماء وهو من بداية الدروج

ووصل لعندها

شيماء وقفت

مازن شد ايدها وباسها من جبينها

وزاد صوت الزغاريط

شيماء بدت تبكي من الفرحه

جت امها وفاطمه ورانيا اختها يهدو فاها

شيماء هدت

رانيا تعدل ف مكياج شيماء

كريمه بدت تبكي: من صغرها عياطه

شيماء حضنتها وضحكت: يخليك ليا ومايوريني فيك شر

ببااختصار طلعوو لصالة مازن

ومشت معاها رانيا وكريمه وخالاتها وعماتها ووايلاف طبعاا وعهد

في كل عرس السيارة يمشو بسرعه بس ف عرس مازن شوفو شن صار

ايلاف ركبت مع انس وكانو اااخر سيارة انس اجتازهم كلهم بسرعه وجي قدام سيارة العريس واتصل بيه

مازن: شن جاي قدامي اختكنزل فها للغلا توا

انس: لا غاليين التنيين لكن هكي امشوو كلكم ببطىء نبو الدنيا كلها تسمع السيارات ورصاص خفض ف السرعه واهو تعلا قدامي

مازن: تمام هي بعد

انس صكر الخط وبعد مازن الاول

الطريق كانت طويله وهلبااا سيارات وليزاد العار انه صحابه جو بسيارات الشرطه وتخلطت الحكايه الدنيا قريب نقلبببت رصااص

في السيارة

مازن شاد ايدها: عجزت لعند خديتك خديتك.. وباس ايدها

شيماء اكتفت بـ ابتسامه

معتصم يسبقهم يجي قدامهم ويصطرب

انس شاف ايلاف جنبه: كانك مش حامل راني قلبت الدنيا

ايلاف: ومني لـ كان يجري وسبقهم قريب قلب السيارة بيا مالا

انس ضحك: بسيطه هادي

صدام شاف عهد: شفتي انه اني بديت واعي

عهد: اي واعي انت عرفاتك واعي من التسعه ونص الصبح

صدام يكلكس

وسيارات شرطه ع مدانيات ولـ زاد الجو انه صحاب معتصم زاد سيارات

بليبي نقوللكم الطريق ع حساب ولاد سلطان

شيماء ضحكت: من الفرحه قريب نزغرط حتى ني

مازن ساكت وكل شوي يهرب ف عيونه لشباك ويتجاهل فها

شيماء قامت الكاب وشافتله

مازن خناته دمعته لـ اول مررره

شيماء بنبرة باكيه ضغطت ع ايده: لا بلله كل شي الا دمعتك ياعمري اني ليك

مازن مسحهم

..

صدام: مش عاجبني اني نكون واعي وهادي… وهو يسوق جبد سلاحه من تحت الكرسي وسحبها وبدي يضرب

ووصل

ونزلو ولم نزلو صوت الرصاص اضعاااف

نزلو قعدو مع شيماء ف الصالة دقايق وطلعو

وبسيارات مشو لـ ضحى

تسريع

بعد مرور نص ساعه

وصلت شيماء مع مازن وقعدو الليلة ف الاستراحه متع مازن

مازن متكلمش بكل من لم مسح دموعها معاش تكلم

صكرو الباب

مازن كان بيجش طول بس وقفاته شيماء لشدت ايده

شيماء شدت ايده تعدل ف الجو: اني قتلك رح تندم انك خديتني

مازن تلفتت ضحك ع جنب وحضنها: بايخه مضحكش

شيماء بعدت بساته ع خده

مازن ابتسم: محلاها بوسة حلالي

اروع

شيماء ابتسمت

تعشو وصلو

شيمو دارت دوش سخون ولبسة روب الدخول ابيض بس قبل هدا كله تحشممت من مازن تقعد قدامه بـ روب لبسة اطول روب عندها وطبعاا لعند الركبة لونه ابيض ومشط شعرها بلمشط الحراري وصار حرريررر ودارت مكياج خفيف

وطلعت تسمع ف صوت اغاني جاي من برا الغرفة طلعت شافت مازن قرب طفها وتللفتت شافها

مازن مد ايده: تعاليلي

شيماء قربت وشدت ايده

مازن: منبيش ليلة دخولنا تكون عادية او متكراره فا جينا للاستراحه منقصك شي؟!

شيماء. لالا اصلا شنطاتي لقيتهم داخل

مازن يشوفلها وسرحان فها

شيماء تلبكت: خيرني؟!

مازن قرب بحركه سريعه وخطف بوسة من

وايدي تمر ع ضهرها

ـ ـ

عند معتصم شري شقه بعيده عن منطقته

ضحى خشت معاه نفس الشي تعشو وصلو

معتصم بعد الصلاة دعي الدعاء وقعمز ع السرير

ضحى دوشت وغيرت وطلعت شافت معتصم سرحان وقعد ببدلته

ضحى قربت: معتصم

معتصم فاق ع نفسه: نعم

ضحى: فشنو سرحان ؟!

معتصم وقف وقربلها: ضحى قبل مايصير بيني وبينك شي نبي نقولك ونكشفلك ع كذبه

ضحى ابتسمت: بس انت مكذبتش

معتصم: كذبت وقعدت كل تسال نستمر ف الكذب

ضحى ابتسمت: بس الكذبه هادي انت كذبتها عشان تحبني وتبي تتخلا عليا لانك مش واتق من نفسك انك تقدر تصوني

معتصم سكتت واستغرب

ضحى : تبي تضحك اضحك ع غيري مش عليا وع تمتيله لدرتهالي مع مراد

معتصم: تعرفي… قطعاته

ضحى بعياط: ايييي نعرف من لم شفت مراد في النظرة الشرعيه

معتصم: اي نظرة شرعيه شن تقولي انتي ؟!

ضحى: اي هكي صار بعد ماتصلت بيك وبعد مضربت مراد حصل رقمي وقالي بيشوفني وحلفلي انه لمصلحتي… قاطعها

معتصم تعصب: واني معنديش علم بشي؟!

ضحى بنبرة باكيه تشوف لعيونه: لاننننك سخص ميستاهلش

معتصم شاف لعيونها: بس الكذبة لكذبتها اني انتي فهمتها غلط

ضحى: بعد منخطبنا رسمي سمعت كل شي من مراد وبسبب عمامي الحشاشين وبابا مقدرتش نفسخ يعني اعرفيامعتصم سلطان انه اني مش حلالك جسديا ولا معنويا ولا جنسيا ولا حبا فيك سااامع اني مجوده هني ضيفه لا اكثر ضيفه لمده تلاته شهور بس ونشالله يكونو خفاف ظراف عليا وعليك… ووبتطلع

معتصم شد كثفها

ضحى: فللللت ايدي (رفعت صبعا بتهديد وعيونها حمر) رددد بالك تحاول تلمس… سكتت لم شافت انف معتصم ينزف

معتصم ايده ع انفه وخش الحمام (اكرمكم الله)

ضحى خافت مفهمتش بما انه مراد وضح الكذبه ليش انفه ينزف ونصدمت لم شافت معتصم يككح بقوة

ضحى رجفت كلها: معتصمم هدا شني خيرككك؟!

معتصم يككحح ف دم وانفه ينزف صكر الباب الحمام

ضحى تخبط: افتح معتصمم معتصمم افتح الله يخليك افتح

ضحى انهارت قدام الباب قعمزت ع لارض وهي تسمع ف صوت كحت معتصم القوية

بعد دقايق طويله

وقف صوت المياة

معتصم وقف النزيف وقعمز جنب باب الحمام يبكي بصوت يقطع القلب

معتصم: اني منكذبش ياضحى

ضحى جنب الباب تسمع

معتصم: اني مكذبتش كانت ف حاجه داخلي تقولي انه اني مصاب بسرطان مكذبتش

معتصم طلع ومررررخيييي

ضحى تشوفله: شن قصدك؟! انت رح تقعد الشخص الكذذذاب سامع كذذذاب

معتصم يشوفلها وصوتها ارتخي: سامحيني ع مشاكلي وع كلللل دمعه ع كل الماس نزلت من عيونك ياعمري كل شي درته معاك ومشاكلي مش قاصد شي بس اني … وسكت قعد يكحح بقوووة

ضحى تشوفله

معتصم شد ايده ف الدولاب: اني اني معتصم لكل همي ندير مشاكل كل همي ناس اديرلي اعتبار لم علمت خوك التدخين مكنتش نعرفك طول طوووول عمري مشاكل لانه تعبت من تجاهل بوي ليا تجاهل خوتي وامي واختي كنت نطلع ونخش ماحد يسال فيا ومهتم لـ امري ز انس وصدام وصلت لـ مرحله نضرب اختي … قطعاته

ضحى بنبرة كره : لانك مكرووه

معتصم عيونه يرتخو: مش ذنبي اني (راسه بينفجر) اني اني كلمتك ونبهتك تبعدي عليا… قطعاته

ضحى: نحببببببكككك

معتصم طاااح ع الارض

ضحى عيطت وقربت قامت راسه: معتصم معتصصممم

(معتصم لـ كان يحس ويشوف ف كل لحظه التجاهل لصايرله واي مشكله تصير يديرها ف راسه وهو يسكت كان يقولو عليه خوته وعيلته المتوحد لانه عصبي هلبااا واكثر من الباقي ولانه ديمااا ساكت ولانه مزاااجي ولانه يعذب ف جسمه ف التدريب وعايش ع التدخين و البروتينات والقهوة

وهدا لـ كان عايش فيه معتصم

بس ماعمره رفض طلب من اي حدد

كان يرفع فيهم وين مايبو وهو ساكت

كان يحب يفرح غيره )

ضحى حاولت بكللل الطرق تفيقه بس لا جدوه

تتبع…

لقراءة الجزء التالي : الجزء الثاني والعشرون من رواية اولاد سلطان

لقراءة الجزء السابق : الجزء العشرون من رواية اولاد سلطان

للإطلاع علي فهرس اجزاء الرواية : جميع روابط اجزاء رواية اولاد سلطان للكاتبة ميشو محمد

جميع الحقوق محفوظة للكاتبة ميشو محمد .