الجزء الثالث من رواية رجل يحببنه الكثير للكاتبة لوزة ليبية

سنبدأ في قراءة الجزء الثالث سوياً حيث تبدأ الحبكة في الظهور قليلاً من خلال الأحداث داخل الرواية، لكن لا تتعجل بالحكم علي اي شخصية من الشخصيات قبل أن تري ماذا تخبيء لنا الكاتبة في ثنايا السطور والكلمات لربما تغير رأيك أو تري الأبطال من وجهة نظر أخري، لذلك هيا بنا لنبدأ القراءة والإستمتاع .

الجزء الثالث من رواية رجل يحببنه الكثير للكاتبة لوزة ليبية

فات الشهر اﻻول عسل في عسل
وفي يوم ما من بداية الشهر الثاني
عزيزة:هاني هاني …عمري نوض هيا
هاني:اها شنو فيه بيبي
عزيزة:اليوم عندك دوام ^^
هاني:اوكي اهو نايض هي
عزيزة:نووووض ماترجعش ترقد

هاني:باهي عزو ساعة كم +_+
عزيزة:ساعة 7:30
هاني:عﻻش مانوضتينيش بكري عارفة اليوم دوام
عزيزة:شنو مانوضتكش؟؟ من بكري نفيق فيك وانت تقول في بير 
هاني: محﻻ خدودك الموردات
برضاي عليك قومي اعمليلي فنجان قهوة هيك من يدياتك الحلوين
عزيزة:حاضر ابن عمي
هاني:ديريلي فطور معاها مابين دوشت وصليت الصبح
عزيزة:من عيوني حبيبي
وعالسريع خدي دوش هاني وصلى الصبح وفتح الدوﻻب خدي بدلة كحلة وحطها على السرير
جت عزيزة وقتله :الفطور واتي حبيبي
هاني:اوكي جاي هي …
عزيزة قعدت تشبحله وتشوف للبدلة اﻻزرق كحلي وجوها هلبا افكار تو كان بيتكم بيتلقطو عليه بنات وبذات بدلة حلوة والمصرف عاد واحدة خاشة وواحدة طالعة
فقتله:حبيبي عﻻش بتلبس بدلة
هاني : اماﻻ شن بنلبس 
عزيزة:البس كاجوال @_@
هاني:بيبي مجال عملي يحكم عليا نلبس بدلة ^^
عزيزة مشت جيهة الدوﻻب وقتله:باهي مش ﻻزم ازرق كحلي هاك رصاصية
هاني:مانحبش الرصاصي هلبا 
عزيزة:غير البسها حلوة 
هاني:به بيبي بري جيبيلي طاسة اميا
عزيزة طلعت من اهني وهاني ادكر ان اللون الرصاصي والبدلة هادي عنده معاه موقف فخدي برفان ودار بقعة في الجاكيت وقالها بصوت عالي حبيبتي الجاكيت فيه بقعة بنلبس اﻻزرق كحلي وخﻻص

عزيزة:باهي اوكي بيبي 
لبس بدلته اﻻزرق كحلي وطلع لوسط الحوش بعدين للمطبخ قعمز ع طاولة الفطور
هاني:الله محﻻها القهوة شن حاطة فيها صبعك ؟؟
عزيزة:ههههه ايه صحتين حبيبي
هاني:الله يسلمك ياروحي ….
بعد شوي …
هاني:هيا تو خلي نمشي هوا داك ساعة 8:20
لبساته عزيزة جاكيت متعه ووصلاته فم الباب
عزيزة:اليخاندرو سوف اشتاقو لك
هاني:وانا ايضا كريستينا
عزيزة:سأكون بإنتظارك عزيزي
هاني:حسنا احبكي _ الى اللقاء

طلع هاني وسكر الباب ونزل لحوش امه فتح الحوش وخش
هاني:صباح الخير ميمتي
خ سميحة:صباح النور هنيوة
هاني:كيف حالك اليوم
خ سميحة:كويسة الحمدوله خيرها مرتك مانزلتش امس؟؟ الحوش مقلوب وانت تعرف انا مانقدرش انوض
هاني:امس تعبت شوي تو اليوم تنزلك ان شاء الله …
خ سميحة:كل يوم تعبانة شورها قبل ف عمرها نجري جري
هاني:هههه ربي يحفظك يمى… هي ماتوصي شي ماشي العمل
خ سميحة:سﻻمتك وليدي ربي يحفظك
طلع هاني وركب سيارته
فتح fm جاته اغنية من شوقي ايلك دبت متت
وقعد يدندن بيها لين وصل للمصرف
درس سيارته وخش
حسام كان واقف ف المصرف ﻻبس بدلة قهوية وعاطي بظهر
جاه هاني من وراه دارله نطة وقاله ياﻻهوي عاللي ﻻبس قهوي
تلفت حسام وقاله:اوووووو هنيوة مرحب مرحب
هاني:مرحبا بيك ياطيب
حسام: ماحسبتكش بداوم
هاني :هوا داك ساد من قعدت الحوش ..
حسام:تي زدت قعدت انت عريس عاد ..شن مستعجل عالخدمة نتفكر فيها انا خديت تﻻتة شهور ونص
هاني:ههههه تﻻتة شهور حتى المرا قريب كنساتك كنس من الحوش
حسام:هههههه ﻻ وانت الصادق تقولي مش ﻻزم تمشي العمل
هاني:هههههه زي اللي حق وين هيثم وين… واﻻ غياب اليوم ؟؟
حسام:تو يجي تعرفه حشيشته التأخير
بعد ساعة
حسام:اهواه هيثم
هيثم:اووووو هاني
هاني:اهﻻ اهﻻ شن اﻻخبار
هيثم:معدلة شن اخبارك انت شنو مصرع داومت ﻻحق عليه الشقا
هاني:مانحبش نقعد هلبا ف الحوش
نضايق

في مكتب من المكاتب في الدور التاني من المصرف
منال:دنيا دنيا
دنيا:شنو
منال:شفت هاني
دنيا:احلفي ! وين
منال:وحق ربي .. شفته لوطا في الصراف …..تعالي وين ماشية
دنيا:نازلتله
منال:تعالي فكك من المشاكل

حسام ل هيثم :هيا سادك هدرزة برا لشباك المراجعة الناس تستنى فيك
هيثم: ليا شهر مقدم طلب نبيهم يغيرولي مكاني وهما شي
حسام:برا راجع امشي ههههه مراجعة لما سبق دراستوهو ههههه
هيثم كيف بيقرص حسام لمح دنيا وقال:هاني دنيا دنيا !
هاني:شن دنيا ياعليك سيرة عالصبح تعرف المرا اليوم بتلبسني البدلة اللي تحبها دنيا طبعا ماتندريش هيا
هيثم:تي نقولك دنيا تشبح اهني….حيه تتقدم شورها جايتنا
حسام:والله ربي يهديك ياهاني مش عارف كيف كنت اتكلم فيها
هاني :وووه مبردها النهارات
هيثم:عندك علم من عرفت بيك تجوزت تجي تسأل يوميا امتى بيجي يداوم
حسام:غريبة ماتصلتش بيك
هاني:حتى انا استغربت
دنيا وصلت عندهم وقتلهم:صباح الخير

خ سميحة:رتاج يارتاج
رتاج:نعم ماما
خ سميحة:بري ل عزيزة وقولها تجي اضم الحوش تو شوي تاني جارتي فتحية بتجي تهدرز
رتاج:به ماما
ركبت رتاج وصلت عند حوش هاني
طق طق طق
عزيزة:منووو
رتاج:انا رتاج ياعزيزة افتحي
فتحتلها عزيزة الباب وخشت رتاج
رتاج:صباح الخير
عزيزة:صباح الورد ياحلوة
رتاج:قتلك ماما انزلي ضمي الحوووش مخليتيه من امس حايس
عزيزة:هيا شوية بس نكمل ضماني وغسيل حوايج وننزل ع طول
رتاج:امممبه

حسام:صباح النور
هيثم:صباح النور هي نستأذنكم بنمشي لشباك الناس تستنى
….وهرب هيثم
حسام:اااا باهي اماﻻ انا عندي ناس واقفة قدام الشباك حتى انا
هاني ايفنص في حسام مايبيشي يمشي
حسام:اوكي نستادنكم

دنيا ل هاني:كيف حالك هاني
هاني:بخير … عندي عمل توا
دنيا:ايه حتى انا مش حنعطل عليك
…. قصدي هاني مبروك عليك الزواج من عزيزة .
هاني:وكيف تعرفي اسمها
دنيا:مش مهم …. المهم ماتوقعتكش هكي بطريقة هادي تنسى اللي كان بينا وتسيبني وتمشي
هاني:مافيش داعي نتكلمو فيه الموضوع هدا
دنيا:اها اماﻻ في اما موضوع تبيني نتكلم
هاني:خﻻص الحديث انتهى
دنيا:متأكد
هاني:عندي عمل انسة دنيا
دنيا:به به كيف ماتحب سلملي على فيحاء
هاني قرن حواجبه وقالها :منين تعرفيها انتي فيحاء
دنيا:مش مهم منين نعرفها هي سﻻم
ومشت وخﻻته
قعمز هاني على الكرسي سرح شوي وقرب كرسيه ل حسام وقاله
: تي منين تعرفهم
حسام:تعرف منو على شنو تدوي؟؟
هاني:دنيا قتلي اسم مرتي واختها
حسام:كيف صار منين تعرفهم ؟؟
هاني:مش عارف الحق
حسام:غير اسمع توا المصرف زحمة رايح زي خلية النحل تو بعد الدوام نهدرزو

ضمت عزيزة الحوش ونشرت الحوايج وحطت وشاح على راسها ونزلت لحوش عزوزتها
فتحت الباب بالمفتاح وخشت
عزيزة:صباح الخير اﻻي
خ سميحة:صباح النور شنو هادي النوضة او
عزيزة:فايقة من بكري سقدت هاني وضميت الحوش
خ سميحة:باهي ربي ايعاونك ..
وبدت عزيزة في ضمان حوش عزوزتها وغسلت الحوايج ونشرتهم
طق طق الحوش فتحت رتاج
خ سميحة:منو يارتاج
رتاج:هادي خالتي فتحية
خ سميحة:خشي خشي فتحية
خشت فتحية وقعدو يهدرزو
خ سميحة:ديرينا قهوة ياعزيزة
عزيزة:حاضر اﻻي شوية بس
دارت القهوة وقدمتها لفتحية

مع ساعة 11
كانو هاني وحسام وهيثم مقعمزين واخدين ريست بسيط خشت واحدة حليوة ونازكة
حسام وهيثم يكحلو
حسام:ياارض ¤_¤
هيثم:احفظي 
هاني ساكت ماباش يكمل الجملة زي العادة
تلفتوله حسام و هيثم يستنو فيه
هاني:خيركم تشبحولي 
هيثم:خيرك ماكملتش باقي الجملة ~_~
هاني:انا متجوز توا 
حسام:شنو تشبح فينا مطلقين واﻻ ارامل 
هاني:ههههه ﻻ مش قصدي لكن مايجيش نحس فيها
هيثم: هاني تره هنيلي روحك ‘_’ جو اللي ادير فيه…
حسام:ئه شن صار احنا نكحلو من بعيد لبعيد اجرمنا يعني واﻻ ﻻزم ادير روحك زعميتك احسن منا
هاني:  ماعليكي  ارتحتو توا
حسام:ايوه  تمام هكي
وصل مسج ع نقال هاني فتحه وقري اللي فيه وابتسم
هيثم:اووووه مسجات من المدام ياقعادك ياحسومة ماد وجهك زي الطاجين
حسام:شن يقعادي @_@ حتى انت تهز ف راسك ﻻ مسج ﻻ شي جفاف ههههه قريب يصيرلك تشقشق وتصدع في مشاعرك
هيثم:هههه عينك دارتلي رنة قبل شوية ^^
حسام:ياخايب الرنة معناها عاودلي بش تقولك وانت مروح جيب وجيب هههههه
هاني:ماعندكم غير النقان قروب نكدي ء_ء
حسام:به يامفرفح *_* احكيلي دنيا شن تبي منك امبكري
هاني:ايه هربت ياعافن امبكري واﻻ مع اني فنصت معناها اقعد
حسام:تعرفني نتجنب فيها المهم شن تبي منك
هاني:والله ماعارف شكلها مش ناوية على خير
هيثم:عﻻش شن صار
حسام:طلعت تعرف مرته و اختها ياراجل
هيثم:اوووف يا.. وصلت هادي للوتر الحساس
هاني:قتلي سيبتني… لكن ياشباب انا ماسيبتهاش هيا اللي بدت ادير في العوج..
حسام:زابط ايه وقفها عند حدها
هاني:كان بنكثر معاها في الدوة حتقلب عليا وبالك تحكي لمرتي بما انها طلعت تعرفها
هيثم:هدا ماضي مايحقلهاش مرتك تحاسبك عليه
حسام:والله النساوين وقت يسكرو روسهم ويجيهم الشوشو ويرتفع ترمومتر الغيرة واﻻه ﻻ يعرفو ماضي وﻻ كوكب زحل
هيثم:ههههههههه يعنجد كوكب زحل
هاني:يستر الله وخﻻص ..نوضو انت وياه نوضو المصرف زحمة الناس تستنى

دنيا ل منال:كان ماخليتاش يجي لعندي مانتسماش دنيا
منال :به شن بديري
دنيا:واحدة واحدة الصبر بس
منال:قوليلي عاد
دنيا شافت ل منال بنظرة خبث وقتلها:ماتستعجليش يامنال ماتستعجليش :Q

يتبع ……..

لقراءة الجزء التالي : الجزء الرابع من رواية رجل يحببنه الكثير للكاتبة لوزة ليبية

لقراءة الجزء السابق : الجزء الثاني من رواية رجل يحببنه الكثير للكاتبة لوزة ليبية

للإطلاع علي فهرس الاجزاء كاملة : جميع اجزاء رواية رجل يحببنه الكثير كاملة للكاتبة لوزة ليبية

جميع الحقوق محفوظة للكاتبة لوزة ليبية .