ننتقل في الرواية إلي أحداث كثيرة وعديدة بين ابطالها تجعلنا نتشوق أكثر لمعرفة المزيد وماذا سيحدث بينهم في ملحمة سطور الرواية وهل ستحدث أحداث تقلب الأمور كلها رأساً علي عقب ؟ أم ستسير الأمور كما يخطط لها، هذا ما سنعرفه قريباً جداً، لكن كل ما أقدر علي قوله هو هيا بنا لمتابعة أحداث الجزء سوياً والإستمتاع .
الجزء الرابع من رواية رجل يحببنه الكثير للكاتبة لوزة ليبية
هاني: واخيرا وصل نهاية الدوام 
حسام:ايه والله…زحمة اليوم تعبت حتى من التقعميزة على الكرسي ظهري وجعني 
هيثم: شيباني راحت عليك
حسام:تعرف شن ادكرت
هيثم:شنووو
حسام:هههههه ادكرت لما هاني كان سمين في ايام الثانوي خش الفصل بيقعمز و زووووط سرواله انشرك هههههه
هيثم:هههههههههههههههه
هاني:شوركم ماتنسو شي
حسام:المواقف الحلوة ماتنتساش ….
هنيوة هنيوة
هاني :شتبي
حسام:دنيا واقفة تقنص عليك
هاني:استغفر الله
هيثم:مادورهاش دير الحولة
هاني:تشاو خلي نروح درهتلي كبدي دنيت شياطين اهيا …
حسام:اهو نطلعو مع بعض ..
مشوو هما التﻻتة ووقت بيطلعو من باب المصرف دنيا غمزت ل هاني
هاني دار روحه ماشافهاش…
وكل واحد منهم ركب سيارته
حسام فتح روشن سيارته وقاله :هنيوة بش تجي ف العشية في القهوة
هاني:كان القهوة ع حسابك انجي هههه
حسام:والله ماعندك مشكلة احبيبي وفوق منها تحﻻية ع حسابي بحبح هي
هاني:تسلم تسلم ياقدر امنور
هيثم:شورنا مش غاسلين اوجوهنا ماحد عزمنا
حسام:انت بعزومة وﻻ من غير عزومة اتجي عارفك وجه فقر حشيشتك ماكلة بﻻش
هيثم:هههههه فاهمني يابرو تشاو تشاو ياقروب الشر
هاني:تشاو تشاو
وبعد نص ساعة من الزحمة ….
وصل هاني لحوشه فتح الباب وخش وينادي :عزووو حبيبي وينك انا روووحت ^^
جاته عزيزة تجري وخشت في حضنه وقتله:يااغﻻ من روحي استحشتك
هاني:يانظر عيني انتي… من بكري نعد في الدقايق امتى انروح
عزيزة:حتى انا ياعمري تمنيتك ماتمشيش للعمل بكل
هاني شاف لعيونها وقالها:انحبك سويتي
عزيزة:حتى انا انحبك ياغزالي … يﻻ بيبي بدل حوايجك خلي نجيبلك طاسة عصير …
هوب قامها هاني وقالها:اما غدي هدا مش وقته بكل
عزيزة:ههههه يامجنووووون
هاني:مجنون بيك
خش هاني لدار النوم هوا وياها حطها عالسرير وسكر الباب …
في الجامعة..
((الموقف واقعي))
مرام ل صاحبتها :تعرفي وفاء
وفاء:ها شنو
مرام:برغم ان هاني اتجوز اﻻ اني قاعدة نفكر فيه مش قادرة ننساه
نتمنى نكون حتى بقربه ولو دقايق
وفاء: سبحان الله قبل تضحكي عليا لما كان عندي حبيب متزوج وتوا قاعدة تبي هاني
مرام:كان انحصل طريقة بس
وفاء:فيه طريقة يجيك لعندك ويبوس ايديك
مرام:شنو شنو قولي !
وفاء:لكن بالك تقولي وفاء متع دوة هادي وتمشي تدوي بيا
مرام:قولي
وفاء: ديريله كتيبة
مرام:كتيبة شنو
وفاء:ديريله سحر …
هاني:اممموه بيبي
عزيزة:تعجبني قبلاتك عزيزي
هاني:تعجبني شفتاكي زهريات اللون
عزيزة:احضني قبلني ضمني اليك فوطني ومكان ميﻻدي بين دراعيك
هاني: ابقي دائما وابدا بين دراعي …اممموه
عزيزة:حبيبي شن رايك نطلعو العشية
هاني:عادي وين تبي تطلعي
عزيزة:ندهورو شوية حتى في جردينة اللي جيهة الشط
هاني:من عيوني انت تؤمر ياجميل
بعدين ادكر صحابه عطاهم موعد
قال لعزو شوية نعتدر من حسام
عزيزة :ااوك
خدي نقاله هاني واتصل وقاله مش جاي
حسام:عﻻش شن عندك
هاني:طالع انا والمدام موووت ههههه
حسام:باهي به دير رايك اجري هي
هاني:اوك سﻻم
طق طق طق
عزيزة:الباب ايطقطق زعما منو
هاني:اكيدة رتوجة
عزيزة:لكن رتاج ف المدرسة توا امشي افتح بيبي بالك اﻻي
ناض هاني لبس كانتيرا ومشي للباب فتح
هاني:رتاج خيرك مامشيتيش للمدرسة
رتاج:قرنبيولي كان في السلة وعزيزة مانزلتش امس تغسلنا الحوايج
هاني:هههههه وانتي ماصدقتي عاد
رتاج:هاني انا حرجانة منك
هاني:عﻻش رتوجتي شنو فيه 
رتاج:انت من وقت تجوزت معش تحبني ومعش اطلع فيا زي قبل
جت عزيزة وقفت جنب هاني وقتلها:رتوجة شن الجو
عزيزة:باهي …قتلك ماما انزلي حطي الغدي
عزيزة:باهي شوية بس
رتاج:هي باي
هاني:اسمعي رتوجتي بعدين في العشية وتي روحك تو نطلعك
رتاج:هيييييي به يﻻ توا باي باي …
سكر هاني الباب
عزيزة اتبكبك على عزوزتها ماسد ضميتلها الحوش زيد فوق منها حطي الغدي تعبت انا
هاني:بيبي شن تفكري
عزيزة:ﻻ وﻻ حاجة حبيبي حناخد دوش عالسريع وبننزل نحط الغدي
هاني:اوكي زيزو
عزيزة:حقا وين بتاخد ريتاج
هاني:معانا بعدين
عزيزة:بيبي اول مرة نطلعوا اقلها نكونو بروحنا
هاني:هادي وخيتي الصغيرة
عزيزة:عشاني حبيبي
هاني:ﻻ والله مانقدر مربيها ع ايديا رتوجة مانقدرش نقولها ﻻ
عزيزة:اكيد حبيبي اختك اختي وامك امي غير حبيت نكونو مع بعض بس
هاني:ربي يحفظك بيبي
نضمت امورها عزيزة دوشت ولبست قفطان ونزلت لحوش عزوزتها خشت وسط الحوش لقت عزوزتها متكية مابتش تنوضها واتكهت للمطبخ واتصلت ب فيحاء لقتها انتظار
حطت نقالها عزيزة وبدت تحبحب في الكسكسي
بعد ربع ساعة اتصلت فيحاء
عزيزة:اهلين فيحاء
فيحاء:شن الجوو
عزيزة:وين هدا كله انتظار شنو درتي صاحب جديد؟؟
فيحاء:كنت نكلم في صاحبتي تحكيلي ع اختها مسكينة وجعتني
عزيزة:خيرها
فيحاء: تحب واحد وسيبها وتجوز
عزيزة:مصح وجهه
فيحاء:وﻻ نزيدك من الشعر بيت
عزيزة:شنو مش وقتك توا نسقي قولي فيسع
فيحاء :المشكلة ان معاها في العمل بيقعد قدامها يعني ديما
عزيزة:فكيني من مشاكل صاحباتك توا وانتي ترتارة اسمعي عزوزتي طيرتهالي ضمي امسحي حطي قيمي
فيحاء:ربي ايعاونك اسمعي ماما تنادي تو نهدرزو
عزيزة:به اوكي
خ سميحة:ياعزيزةةةة هيا وين الغدي قريب 3:30 راه سقدي روحك خل ناكلو هالفم ونخشو نرقدو عزيزة اتمتم استغفر الله ياربي …
وقالت لعزوزتها :حاضر ياﻻي ندير سﻻطة بس
وبعد شوي حطت الغدي ونزل هاني تغدو جميع غسلت عزيزة الماعين
وهيا طالعة من مطبخ طلت على عزوزتها وقتلها :اﻻي انا راكبة ماتبي شي توا
خ سميحة:ﻻﻻ صحيتي بنيتي بري ارتاحي
عزيزة فخاطرها باهي اللي عتقتيني … وردت عليها هي بسﻻمة
خ سميحة:يا عزييييزةةةة
عزيزة:نعم اﻻي
خ سميحة:في العشية بيجو نساوين بش تنزليلي
عزيزة:لكن ف العشية …
خ سميحة:ايه في العشية بش توتي روحك بري توا ارتاحي
سكتت عزيزة وانكمدت
وفاء:باهي اللي تمت المحاضرة اف قوايل ساعة 4 تعبت
مرام:من بكري انفكر في اللي قلتيهولي
وفاء:وها شن قررتي
يتبع……
لقراءة الجزء التالي : الجزء الخامس من رواية رجل يحببنه الكثير للكاتبة لوزة ليبية
لقراءة الجزء السابق : الجزء الثالث من رواية رجل يحببنه الكثير للكاتبة لوزة ليبية
للإطلاع علي فهرس الاجزاء كاملة : جميع اجزاء رواية رجل يحببنه الكثير كاملة للكاتبة لوزة ليبية
جميع الحقوق محفوظة للكاتبة لوزة ليبية .
