وفي الجزء الأول من رواية ابواب الجحيم للكاتب محمود الأمين دعونا نبدأ ونري كيف ستبدأ أحداث الرواية ؟ في السطور التالية بإذن الله فهيا بنا ونتمني للجميع قراءة ممتعة بإذن الله .
الجزء الأول من رواية ابواب الجحيم
كان نفسي أوقف الزمن عمري ما تخيلت في يوم إني أوقف حكم إعدام واحاول انقذ انسانه بريئه من حبل المشنقه لانها بجد اتظلمت وكانت ضحيه كنت بجري زي المجنون ومعايا مأمور السجن عشان نلحق نوقف الحكم دخلنا غرفه الاعدام لكن…..
انا مش عارف ابدا منين لاني مش مصدق الي حصل لحد دلوقتي يمكن لاني حصلي خلل في المخ اتجننت يعني وحاليا انا في مستشفي الأمراض العقليه طيب انا مين…
انا اسمي وليد علي عندي 33 سنه عايش في القاهرة متزوج من منار وعندي بنت اسمها شهد
انا بشتغل محامي والحمدلله متميز في شغلي
طيب قصتي بتبدا منين
قصتي بتبدا في يوم كنت في المحكمه قاعد في القاعه وفي قضيه هيتحكم فيها قبل قضيتي القاعه كانت مليانة وعلى اخرها….
دخل القاضي ومعاه المستشارين وقال القاضي حكمت المحكمه وباجماع الاراء علي المتهمه فاطمه حسن المدني باحاله اوراقها لفضيله المفتي بصيت علي القفس شوفت بنت جميله جدا بتصرخ وبتقول حرام والله حرام انا مقتلتش حد وفجأه وقعت جوه القفس وفضلت تتشنج زي الي عنده صرع
شلوها وخرجوا بيها ونادوا علي القضيه بتاعتي خلصت شغلي وخرجت من المحكمه وعادي معنديش فضول ولا اي حاجه لان ده الطبيعي في شغلي
رجعت البيت واتغديت انا ومراتي وبنتي ودخلت انام لكني حلمت بيها ايوه حلمت بفاطمة كانت واقفه في القفس وبتبكي لكنها كانت بتبكي دم وفيه غراب شكله مقزز ومقرف بيحاول يدخلها القفس… صحيت من النوم مفزوع وقولت اكيد دي علامه عشان اساعدها…
تانى يوم الصبح اتحركت علي السجن عشان اقابلها واتكلم معاها طول الطريق في حاجه جوايا بتقولي ارجع بلاش
وصلت السجن ودخلت لمأمور السجن كان اسمه مسعد قام من مكانه بتواضع وقلي اهلا بيك
رديت عليه وقولتله اهلا يا مسعد باشا ودار بينا الحوار ده
قلي خير
قولتله في واحده هنا اتحكم عليها امبارح بالاعدام اسمها فاطمه
رد عليه وهو خايف شويه وقلي فاطمه حسن المدني
قولتله ايوه هيا دي انا عاوز اشوفها عشان همسك قضيتها
لقيته بيقولي مش هتعرف تعمل حاجه واحسنلك متقبلهاش
قولتله ليه؟
قلي دي مش طبيعيه
رديت عليه وانا مستغرب وقولتله ازاي يعني
قلي مجنونة ولا ملبوسه بقا نصيحه ابعد عن الموضوع ده
قولتله انا مصمم اني اشوفها وادافع عنها
قلي براحتك وضرب الجرس وجاله عسكري وقاله هتلي المتهمه فاطمه من الحبس الانفرادي…
بعد دقايق كانت واقفه قدامى باصه في الارض شعرها مغطي وشها
المأمور قام وبصوت مهزوز كده قال انا هسبكم شويه وخرج
لقيتها راحت وقعدت علي كنبه في اخر الاوضه ولسه باصه في الارض… قعدت علي كرسي قدامها وبدأت اتكلم وقولتلها فاطمه انا عارف انك مظلومه حاسس بكده بس عاوزك تحكيلي اي الي حصل علشان اعرف اساعدك فاطمه ردي عليا فاطمه…. 
رفعت وشها وياريتها ما رفعته لان ده لا يمكن يكون وش بني ادم عينين حمرا بوقه مقطوع سنان زي الابر شعرها الي كان جميل بقا مسلوخ من علي راسها وبصتلي وصرخت وهجمت عليا فضلت اضرب فيها وخنقتها دخلوا العساكر وشلوني لكن لما بصيت انا كنت بخنق فاطمه البنت الجميلة كانت بتبكي
جيه مامور السجن وحكتله كل حاجه … قلي منا قولتلك يبني دي مش طبيعيه
رجعت البيت وانا خلاص مقرر اني مليش علاقه بالموضوع ده تاني لكن واضح ان الموضوع مبقاش بارادتي
في اليوم ده نمت نوم عميق بدون كوابيس لكني قومت علي صرخه شقت الليل كانت مراتي قومت كانت مش جمبي جريت بره الاوضه كانت واقفه عند اوضه شهد وبتترعش قربت لكن…..
لكن الي شوفته مكنش طبيعي ابدا بنتي علي السرير بتترعش وبتتشنج وعينيها حمرا زي الدم نفس العينين انا شوفتها قبل كده لما روحت زورت فاطمه فضلت اقرأ قرأن زادت التشنجات وسكتت مره واحده اخدتها في حضني ومكنتش فاكره حاجه خالص
مراتي قلتلي في اي الي حصل ده
قولتلها مفيش حاجه هي دلوقتي كويسه يلا علشان نسيبها نرتاح ودخلت اوضتي وحاولت اقاوم النوم وافكر شويه لكني مقدرتش ونمت بس المره دي حلمت باوضه ضلمه ملهاش ابواب كلها حيطان وفي نص الاوضه حبل مشنقه وسمعت صوت فاطمه بتصرخ وبتستنجد بيا
وشوفتها بملامحها البريئه بس مكنتش لوحدها كان وراها في كائن مرعب طويل جدا عينيه الحمرا الي ظهرت في وسط الضلمه
صحيت علي ايد مراتي منار الي كانت بتقولي قوم يا وليد وراك شغل قومت واطمنت علي بنتي واول حاجه عملتها اني رحت النيابه وطلبت تفاصيل القضيه اخدت الملف ورجعت البيت وقعدت علي مكتبي وفتحت الملف وكان مكتوب التالي
قررت المحكمه إحالة اوراق المتهمه فاطمه حسن المدني الي فضيله المفتي لانها ارتكبت جريمه شنيعه بكل المقاييس فقد قامت بذبح ابنتها البالغه من العمر خمس سنوات
قلبت الورقه وكان مكتوب…. توجهت قوه من الشرطه بقياده الرائد حسن كامل الي مكان الحادث وقد وجدت المتهمه تمسك السكين الغارق بالدماء وامامها جثه ابنتها وكانت في حاله صدمه وبسؤالها عن زوجها امتنعت عن الاجابه. قفلت الملف وانا مش عارف هتصرف ازاي وقررت انا هروح لفاطمه واتكلم معاها لازم افهم مش مهم اي هيحصل
الاول كان لازم اروح المحكمه واقدم التماس عشان المحاكمه تتعاد واخد وقت عشان اعرف حل اللغز ده
… تاني يوم بعد ما روحت المحكمه اتوجهت للسجن واصريت اني اشوف فاطمه بالرغم من رفض مأمور السجن في البدايه لكني قبلتها بس المره دي كانت طبيعيه واتكلمت معايا ودار بينا الحوار ده….
فاطمه انا عارف انك بريئه حاولي تساعديني عشان اعرف اساعدك
ردت عليا انا والله مظلومه ومش عارفه ازاي قتلت بنتي… وفضلت تبكي
قولتلها احكيلي..
قلتلي الموضوع كله بدأ قبل الحادثه باسبوع بدأت اشوف كوابيس مرعبه واشوف حاجات محدش ببشوفها غيري جوزي فضل يقول عليا اني مجنونه ومخي ضرب
لحد اليوم الملعون كانت قاعده في البيت وهو كان نايم دخلت الحمام وسمعت صوت جمبي بيقول شيهراز شيهراز بصيت في مرايه الحمام شوفت ست بشعه مشوهه صرخت وخرجت اجري من الحمام جوزي صحي علي صرختي وحكتله قلي انتي مخك ضرب واتجننتي انا هسبلك البيت وماشي وخرج بعد شويه جات ست منقبه خبطت علي الباب فتحتلها الباب وقلتلي ممكن ادخل عاوزه اتكلم معاكي دخلتها وبعدين مش فاكره حاجه غير اني فوقت وانا واقفه والسكينة في ايدي حتي جوزي معرفش فين….
خلصت كلامها وانا فيه مليون سؤال في دماغي ومشيت ووعدتها اني هساعدها
….
بعد مرور يومين اتقبل الالتماس لكن الفرحه مكملتش لان بمجرد ما فاطمه رجعت السجن الجماعي اتهجمت علي مسجونه وكانت هتموتها واتخاد قرار استثنائي وهو تقديم موعد اعدام فاطمه…
فقدت الامل ويوم ورا يوم وخلاص باقي يومين علي اعدام فاطمه
كنت هنام عشان اواصل البحث تاني يوم يمكن اعرف الاقي حل للقضيه المعقده دي
نمت ولكني حلمت اني في مقابر وواقف قدام قبر معين ونفس الكائن المرعب ده بيدفن حد جوه بس المقابر دي انا عارفها كويس دي في طريق مصر اسكندريه الصحراوي قومت من النوم وقررت اني هروح المقابر وروحت ودورت علي القبر ولقيته فعلاً وكان مكتوب عليه اقرؤا الفاتحه للمرحوم مراد سعد
وانا واقف جالي التربي وقلي هو حضرتك تعرف الي مدفون هنا قولتله اه ليه قلي اصله في واحد خرجناه حي من القبر ده قولتله مين ده قلي من الصدمه هو مش فاكر حاجه بس ممكن تشوفه اتحركنا ووصلت لاوضه صغيره وفتحها……. انت
يتبع…
لقراءة الجزء التالي : الجزء الثاني من رواية ابواب الجحيم
للإطلاع علي فهرس اجزاء الرواية : جميع روابط اجزاء رواية ابواب الجحيم للكاتب محمود الأمين
جميع حقوق الرواية محفوظة للكاتب محمود الأمين .
