وفي الجزء الثاني من رواية صدفة ولكن للكاتبة لوزة يا تري ماذا سنري من أحداث جميلة مشوقة مع ابطالنا ؟ دعونا نعرف إجابة ذلك في السطور التالية بإذن الله .
الجزء الثاني من رواية صدفة ولكن
مايا مستندة على الحيط جبدتها هالة وقتلها هيا خلي نروحو فيسع نهارنا احرف من حاتم وهما ماشيين لحقهم عماد ويقولهم يااختي ياانسة تلفتوله وقالهم .
معليشي طاح منك تيزتانك 
مدت مايا ايدها وخدت التيزتان لاحظ عماد نقش حنة على ايدها وسرح شوي لانه ايحب 
الحنة
خلاص فهنا مايا شكراته وقتله بارك الله فيك وهالة قتله نفس الكلام وروحو ووصلو باب حوشهم طقطقو وفتحتلهم دنيا
مايا : بالهمس حاتم روح 
؟؟؟
دنيا : لالا مازال
مايا وهالة خشو للحوش وقالو سلام عليكم 
خالتي فطومة عليكم السلام خيره وجهك اصفر انتي وياها 
هالة صار موقف يمى … وقعدو يحكولها اللي صار
خ فطومة : نهار حرف باهي اللي خطم ولد الحلال ان شاء الله ربي يفتحها ف وجهه
خشت هالة ومايا لدار بدلو حوايجهم وقعدو يهدرزو على اللي صار وخشت دنيا للمطبخ دارت سلاطة فواكه على مرواحة حاتم قال لدنيا ديرلي نص تن وطاسة شاهي واحسبيني ف اللي ايدري فيه
دارت نص التن وشاهي وعطتهم لحاتم في داره
ونادت خواتها وقعمزو هما وامهم يتفرجو على تلفزيون اتصلت فرح بمايا
مايا : الو
فرح : اسمعي ميمي خالتي عرسها قريب اونه عندك علم
مايا : ايه
فرح : خلاص هيا راجلها عنده بعتة وحتسافر قتلي شن رايك نكلم المدير ومايا اتقدم اوراقها وبالك يقبلها المدير في الشركة
مايا : والله يافرح مش عارفة نسأل ام وحاتم ونقولك برغم ان عارف مش حيوافق حاتم 
فرح : اوكي شوفي وردي عليا
مايا : اوكي يلا بباي
خالتي فطومه : خيرها فرح ؟
مايا قتلي حصلتك عمل
فطومه : بالله فكينا من حاتم
مايا : بالله عليك يمى كلميه والا نقولك تو نمشيله انا نكلمه
طق قق
حاتم : ادخل
مايا : حاتم نبيك ف موضوع 
مايا : حاتم نبيك ف موضوع
حاتم : موضوع شنو قولي
مايا : فرح لقتلي عمل عن طريق خالتها في شركة
حاتم : منقص عليك حاجة مايا ؟ انا سيبت قرايتي من صغري بش نشتغل ونجيبلكم اللي تبوه حاولت اني نعوضكم
مايا : والله مش هكي ياحاتم بس من نظرة معنوية مش مادية
حاتم : باهي ايصير خير … كيف حالها فرح ؟؟
مايا : حالها باهي بس ليش تسأل عليها
حاتم : لالا هكي وخلاص عموما اليومين هادو مش فاضي بعد يومين تو نمشي انا وياك ونادي فرح بش تمشولها الشركة اللي قلتي عليها
مايا طارت من الفرحة ومن فرحتها لين نضربت في الباب وطلعت تجري لأمها وخواتها قتلهم يمى هالة دنيا حاتم قالي باهي على العمل
دنيا : بري ياكدابة
مايا : والله العظيم قالي باهي
خالتي فطومة : اياااه منين جاته على غير عادة ان شاء الله خير
هالة : غرييييبةةةة الموضوع وراه ان وقولو هالة قالت
فاتو اليومين وجي اليوم اللي تستنى فيه مايا ناضت ساعة 8 خدت دوش وصلت صلاة الفجر والصبح ولقت امها في وسط الحوش صبحت عليها وبدت توتي في لبستها وقعدت تستنى في الساعة 10 بفااارغ الصبر طق طق الحوش على تمام 9 ونص فتحت مايا الباب لقت فرح جت قتلها هيا
مايا : حاتم طلع من الصبح مزال ماجاش
فرح : ديما بعفايسه حاتم
مايا : تليفون ايشرين ان شاء الله هوا …… ايه هوا الو
حاتم : هيا اطلعي
مايا هيا طالعة طلعت هيا وفرح وسكرو الحوش وادكرت مايا ملفها اللي فوق الكمدينو قالت حي نسيت بري اسبقيني فرح تو انجي خير مايكشخ علينا حاتم قتلها فرح اوكي
خشت فرح لسيارة من الخلف وقتله السلام عليكم صباح الخير حاتم
حاتم : صباح النور وعيونه قولب قلوب استاقظ لروحه وقالا امالا وينها مايا
فرح : اونيه تسكر في الباب نست ملفها فرجعت تجيبه
خشت مايا لسيارة ومشو وطول الطريق حاتم فاتح اغنية فيروز انا لحبيبي وحبيبي ايلي ويشوف لفرح في المراية بس فرح مطنشاته بحكم ان مايا ديما تشكي منه من طبعه الواعر هههههه
وصلو لشركة وتلاقت معاهم خالة فرح وركبو لدوري الاول وتلاحظ مايا عماد خاطم ولابس بدلة ازرق كحلي وريحة برفان لاكوست وجت عينها في عينه واستغرب عماد من الصدفة الغريبة امس لقاهم في الشارع واليوم في الشركة ! وقال فباله شنو هادي طالعتلي في البخت والا كيف
خشت مايا لمكتب هيا وخالة فرح بش اتقدمها لمديرها واطلع على سيرتها الداتية وشبه وافق المدير
وقلها بعد اسبوع تقدري تباشري اهنا بش اتعلمك مفيدة كيف ايتم الشغل ودوامك حيكون من 8 الى 2
طلعو مايا وفرح وحاتم وطول الطريق مايا سارحة في الصدفة ..
فاتت ايام وجو سكنو الجيران الجدد
وكانت مايا وفرح في البلكونة مع المغرب طلع عماد قدام باب حوشهم فرح كانت شادة جيلاتي تاكل وعاطيا بظهر بتخش لوسط الحوش مشي جبدتها مايا تبيها تشوف عماد فعترت فرح وطاح منها الجيلاتي في الشارع قام عماد راسه واتخزرطت مايا من الموقف قالت لفرح حيه تو يحسابنا بلعاني انعاكسو فيه ابتسم عماد 
لمايا ومايا ابتسمتله وخشت
فرح : ياوخيتي عالزين اللي عنده حتى كان عاكسنا عندنا الحق انعاكسو ههههه
مايا ههههه هيا خشي خشي واحكيلي شن وتيتي لعرس خالتك
فرح : خديت كل شي تو نستنى في خوي بش يرفعني لحوش جدي انا وماما بتجي للحفلة مايا والاه؟
مايا والله ماعارفة تو نشوف
فرح : عاد غدوة اول يوم عمل
مايا : ايه بالك نلقاه عماد غادي الحق الولد عاجبني
فرح : سبحان مغير الاحوال كنتي ماتحبيش ولاد الجيران هههههه
شرين تليفون فرح ردت وطلع خوها قالهم هيا سلمت على مايا وهالة دنيا وطلعت
فات الليل على مايا وكأنه سنين وماقدرتش ترقد صبح الصبح ناضت تجري صلت ووتت روحها ودارت القهوة بالحبهان والزهر لحاتم وفيقاته بريحة القهوة خدي دوش وبدل ورفعها لأول يوم عمل قالها ساعة 2 انمر ناخدك
خشت مايا لشركة وركبت الدور الاول في لقت عماد في الممر شاد طاسة نسكافيه قالها صباح الخير قتله صباح النور
قعد يقول عماد بينه وبين نفسه سبحان الله ..عليها عوينات ماشاء الله
خشت لمكتب لقت زميلتها وردة صبحت عليها وبدت مايا تشتغل وتتحق من عملها من وردة زميلتها طلعت وردة من المكتب فعماد انتهز الفرصة خش للمكتب قال سلام عليكم
مايا : عليكم السلام
عماد : وين وردة ؟؟
مايا : توا قبل شوي طلعت
عماد : اها اوكي .. انا جاركم الجديد في الشارع اكيد عرفتيني
مايا : اها ايه شفتك امس في شارعنا وحتى لما صار الموقف
عماد : تمام باهي كان احتجتي اي حاجة انا موجود وهداالبيزنس كارد متاعي عليه ارقامي ليبيانا ومدار
مايا : اوكي مشكور خوي
وقلب مايا قريب يطلع على برا
وانتهى الدوام وجي حاتم روح بمايا طول الطريق سرحانة حاتم يكلم فيا وهيا ماتندر عليها منين زارقة<3
حاتم : تي انتي نكلم فيك 
مايا : نعم حاتم ماسمعتكش راسي مصدع شوي
حاتم : قتلك شنو اول يوم ان شاء لله شغل باهي ومافيش مضايقات 
مايا : لالا تمام ومعاي زميلة في المكتب تساعد فيا
وصلو للحوش ونزلت مايا مالقتش سيارة عماد مدرسة خشت للحوش لقت هالة بس مايا لهالة : وين ماما ودنيا
هالة : طلعو لحوش خالتي
مايا : هالة عماد عطاني الكرت متاعه قريب انطير من فرحتي
هالة بجديااااات ؟؟
مايا : اقريب انطير ياهالة زعما نكلمه توا ؟
هالة تي ارزني خير مايقول ماخفها روحت كلمتني طول … احكيلي شن صار في العمل اليوم
مايا : باهي امالا خلي ناخد دوش ونصلي الظهر ونخشو نوتو الغدي نتغدو ونهدرزلك شن صار
يتبع ..
لقراءة الجزء التالي : الجزء الثالث من رواية صدفة ولكن
لقراءة الجزء السابق : الجزء الأول من رواية صدفة ولكن
للإطلاع علي فهرس أجزاء الرواية : جميع روابط اجزاء رواية صدفة ولكن للكاتبة لوزة
جميع الحقوق محفوظة للكاتبة لوزة .
