وفي الجزء الرابع من رواية صدفة ولكن للكاتبة لوزة يا تري هل سيحدث شيء يقلب موازين الرواية رأساً علي عقب ام لا ؟ دعونا نعرف إجابة ذلك في السطور التالية بإذن الله .
الجزء الرابع من رواية صدفة ولكن
في مكتب مايا اللي صار ان محمد من طوله معش قدر يطلع من ورا المكتب جاي بين زواية ودولاب المكتب فعتر وطاح وجبد معاه خيط التليفون وكان الموقف مضحك فضحك وضحكت مايا
انتهى الدوام ومايا تتصل بعماد بس عماد مايردش عليها
روحت مايا وحاتم للحوش لقت هالة في المطبخ ودنيا وفرح وخ فطومة يهدرزو ويتفرجو على تلفزيون سلمت سلام علكيم وقعمزت معاهم قتلهم بنبدل ونصلي الظهر وبنرقد مش خاطري في الغدي وخشت لدارها لحقتها فرح قتلها
خيرك مايا انحس فيك مش تمام
مايا : من بكري نتصل ب عماد مايردش
فرح بالك مشغول
مايا: مش عارفة من الصبح معش ريته بعدين استنيته في الريسبشن ماجاش زي عوايده فيه ان
فرح : غير بدلي انتي توا وصلي وعاوديله في العشية توا قايلة الكل اعصابه محروقة من زحمة الطريق والنو
جتها هالة : مايا ايمن روح وقالي احتمال المدة الجاية ايجي يخطب
مايا : بجد؟؟؟ والله فرحتلك باهي ان شاء الله عالخير ياااا رب <3<3<3<3 ..
روح عماد من العمل وكان خلوقه ضايقات درس السيارة
يضرب عالدومان 
ويقول كلهم هكي النهارات ايبينولك الوجه الطيب وهما من تحت التحت 
قلت انا بعد اللي صارلي معش بنحط ثقة في بنت ومعش بنحب اصلا وكان بينتلها شوية اهتمام تعفس عليك وتمشي… اااخ الصبر ياربي انا الغالط
طلع عماد من سيارته وخش للحوش
ويشوف لنقال يلقى مكالمات من مايا رد عليها : نعم
مايا : الو عماد اهلين
عماد : اهلين
مايا : عماد اليوم شغلتني عليك 
عماد : قاعد
مايا : خيره صوتك متغير
عماد : مافي شي
مايا غير خيرك قول شنو فيه
عماد : علاش تهدرزي مع الموظف الجديد قولي علاش 
؟؟؟ شنو فيه مصرع اصلا درتي معاه دوة وشن جيبك ليه ؟
مايا : سمله عطيني فرصة نتكلم 
عماد : تكلمي هي نسمع
مايا : هذا الموظف الجديد المدير كلفني نعلمه شوي حاجات
عماد : باهي علاش تضحكي معاه
مايا : عماد قصدك انت تراقب فيا ولا شنو نبي نفهم
عماد : لو سمحتي على قد السؤال نبي الاجابة
مايا : خدت نفس عمييق وقتله صار موقف وحكتله شن صار
عماد : باهي باهي لكن مزال نسمع ضحك هكي بصوت عالي مرة تانية نقتلك فاهمة والاه العوج مانحباش ومزال تطلعي في البلكونة من غير شاربة ع راسك انوريك
مايا : هههههههههه
عماد : قلت نكتة انا ؟؟؟
مايا: كلمة شاربة قديمة ضحكتني ,,احم اوكي المهم بس قولي امتى شفتني طلعت للبلكونة
عماد : المهم حطي حاجة ع راسك …..معش ندكر شفتك وخلاص
وفاتت 3 شهور بيناتهم عسل في عسل 
واهتمام وعتاب ومكالمات في البلكونة قبالت بعض مسجات ويبعتلها في هداية مع منال اخته ويجيبلها ف شوكلاتة في العمل في الصبح وفاتو وقت جي شهر12 الشهر المحبب عند عماد قرر انه لازم ايدير خطوة ايجابية خلي نتصل بيها ونقولها اني نبيها
اتصل عماد بمايا وقال الو …
الو اهلين مايا
مايا : اهلين عماد 
,
عماد : كيف حالك
مايا : تعباااانة
عماد :خيرك شنو فيه
مايا : غدوة فظانية 
هالة وبيانها وتعبانة من بكري نوتي وانضم …حق بش قتلك والا نسييييت ؟؟
عماد :اها لالا مانسيتش بس نبي نقولك حاجة برغم ان وقت غير مناسب
مايا :تفضل عماد
عماد: مايا انا نبيك ومانبيش ندير دوة العلاقة لان جربتها فيما فات ومانجحتش فقلت انا يعني حتى اني نبي مايا نطلبها من اهلها كان تبيني تو توافق …… مايا انتي معاي
مايا من الفرحة قريب نقبت الصقف حطيت ايدها على فمها بش معش اتبينله فرحته وقتله اي معاك
عماد : عارف روحي مانعرفش نتكلم في الامور هادي حتى دوتي ملخبطة كان لاحظتي ههههه بس اهو
مايا : ههههه مش مشكلة
عماد : انت ماترديش توا فكري قبل
مايا : في عقلها والله موافقة ياعماد …لكن بترزن شوية هههه
قتله ..ان شاء الله خير لو فيه نصيب حنكون لبعض ان شاء الله
عماد : وتو يلا امشي ياشفشة مش حنكلمك لين نعرف الرد ابعتيهولي في مسج قلبي رهيف مانتحملش الصدمات ههههه اوكي
مايا : هههههه ان شاء الله يلا سلام
مشت هالة طبق اتصلت بفرح وقتلها توا اتكوني عندنا فيه خبر بنقولهولك
فرح : شنو لقيتيلي عريس ؟؟؟؟؟؟؟؟؟
مايا : لقيتلك وذنك تعالي فيسع
نادت مايا على هالة يا هاااااااااااااالة تعالي
وحكتلهم اللي صار وقالولها فوتي توا يووم فضانية و ردي عليه
بالموافقة
اتصلت مايا بوردة وقتلها بالله خودلي اجازة نسيت ناخدها
وكملت توتي هيا وفرح ودنيا وضمان الحوش وتسييق الدروج ماجي المغرب لين التلاتة صاخو على بعضهم من التعب خشو لدار الضيوف وقعمزو مشو فيها نومة
جتهم هالة : هههههههه نوضي فاطيمة مليكة ساميحة هدا مش مكان نوم انتي وياها نوضووو
مايا دنيا فرح برري يامعفنة تتسهوكي علينا
قتلهم فرح خلي انوض انروح وهيا طالعة لقت حاتم يشبحلها شبحة اعجاب قالت فعقلها نصوم نصوم ونفطر ع بصلة
خشت مايا خدت دوش ولبست توتة وقالت ل خ فطومة انا تعبانة بنرقد في الشك حتى نتعشى
خ فطومة بري كولي حاجة سلم بنيتي اونه ع طاولة تلقي بيتزا وبعدها ارقدي
مشت مايا خدت بيتزا كلتها وخشت لدارها ورقدت مافاقت الا ع صوت هالة مايا دنيا فيقووووووو فيقووووووو
مايا :ساعة كم
هالة ساعة : 7
مايا و دنيا : مصحك شنو 7 اتنوضي فينا 
هالة : نوضو ها نشعل الضو تي نسيتو اليوم فضانية وبيان نوضو
مايا : باهي باهي اهو نايضة … ساعة كم بتمشي مزين
هالة : ساعة 9
مايا باهي ان شاء الله
خدت نقالها لقت مسج من عماد : يسعد صباحك ياعسل
بعتتله وصباحك اسعد
وفات الوقت وجت ساعة 9 رفع حاتم هالة وفرح للمزينة
بينما مايا مشت هيا ودنيا ايجيبو ف الحلويات وروحو
وقفت مايا قدام دولابها بطلع لبسة فبعد ماطلعت الدولاب كله استقرت على فستان دانتيل بسيط عنابي اللون قصير
بين تحضيرات وتنسيقات وصلت ساعة 8:15 مساء وصلوا عيلة ايمن جايبين سوابيتهم حطو مايا وفرح ودنيا الشوكلاتة وعصير الهفانا وبعد نص ساعة من مشاورات والمداولات في المربوعة جي حاتم وقال عطيتها خلاص وزغرتو مايا وفرح وطلعو هالة من دارها لابسة فستان زهري حلو وخششوها لدار الضيوف جت خ فطومة للمطبخ وقتلهم هيا بسرعة وتو فرح بالله نادي امك خلي اتعاونكم اهني انا غير مانقدرش نخلي العويلة بروحهم
فرح : تمام خالتي فطومة تو ناديها ونتمو كل شي
تعشو الرجالة والنساوين وبدي البيان خش ايمن لبس الدبلة لهالة ومشو يصورو وتم البيان ع خير
روحو الناس وضمو مايا ودنيا كل شي ف مكانه بدلت مايا ملابسها واتكت ع سريرها وبعتتله مسج كتبت فيه : مساء الخير .. انا موافقة عماد ..
يتبع ……..
لقراءة الجزء التالي : الجزء الخامس من رواية صدفة ولكن
لقراءة الجزء السابق : الجزء الثالث من رواية صدفة ولكن
للإطلاع علي فهرس أجزاء الرواية : جميع روابط اجزاء رواية صدفة ولكن للكاتبة لوزة
جميع الحقوق محفوظة للكاتبة لوزة .
