وفي الجزء السادس من رواية محظوظ ولكن دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء السادس من رواية محظوظ ولكن
فرج : عمر .. بنقولك
عمر : ها قول
فرج : راهو ندى … كانت عندها عﻻقة مع شاب هيا تحسابه حق يبيها وهوا يلعب المهم ((خربش خربش خربش >>ياكل ف تفاحة ))
عمر : تي بطل ماكلة وقولي شنو صار
فرج : احح المهم هوا طلب منها فلوس على اساس بيجيبلها ماكينات خياطة من برا وتفتح مشغل بسيط
ضحك عليها خدي منها فلوسها وفاتها
عمر : باه عﻻش تحكيلي توا
فرج : قبل شوية كنت اتقولي كمل ووقت عرفت ان الموضوع مافيشي شي قتلي عﻻش تحكيلي
عمر : ﻻ هكي حسيته مافيش داعي نعرف ماضيها
فرج : المهم مشت و دوراته ولقاته مقعمز ف شارع من الشوارع اتصلي بكتيبة (بدون دكر مسميات) وجو طبوه
عمر : ماقوى قلبها …. معش عرفت سن نقول من جهة هدا حقها ومن جهة اخرى كيف بنت ادير هكي
فرج : والله البنت كويسة بس الزمان والهم اللي هيا فيه هكي خﻻها
عمر : حالتهم مادية شنو
فرج : مضعضعة
عمر : امممممم مسكينة والله
هالة : طيبت كاكاو بش يدفينا ف هالصقع
ندى : تو كاكاو بيدفينا ياهالة
هالة : اهو حاجة سخونة وخﻻص
حقا … اختي حصلتلك خدمة
ندى : اما واحدة من خواتك
هالة : وردة
ندى : اها وين ؟؟؟؟
هالة : في الشركة
ندى : اللي كيف تعينت فيها ؟؟
هالة : ايه
ندى : ماشاء الله وريدة دارت عﻻقات فيسع فيسع مع المدير
هالة : ههههه ﻻﻻ حتى انا هكي نحساب .. لكن هيا كانت خاطمة في الممر وهوا يتكلم ف تلفون انه يدور ف واحدة للعمل .. فابعد ماكمل مكالمة مشتله وحكتله عليك
ندى : امممم وبه شن بنشتغل
هالة : عنده اخته وبنته الزوز مقعدات مرض وراثي …
ندى : مش دكتورة انا !
هالة : تي ﻻ يبي من يرعاهم بس يعني بالنسبة لاخته كان احتاجت حاجة بتجيبيهالها وبنته نفس الشي
ندى : خدامة قصدك ؟؟
هالة : ﻻ مش خدامة تقريبا عنده مغربية حتكوني.. بمتابة ممرضة
ندى : ﻻﻻ فكيني بﻻ تمرميد زايد
هالة : باهي بش تمشي اطلعي مصروفك خير لين تحصلي عمل تاني خير من قعدة هكي … امك تحتاج دواوات وانتي تحتاجي فلوس بش تصرفي عالحوش
ندى : مش عارفة يعني بحكم انهم مقعدات معناها بنقعد معاهم مدة طويلة وانا مانقدرش نخلي امي بروحها مدة طويلة
هالة : تي اهو احنا جيران نتكفلوا بيها… انتي ماتعرفيش خالتي نوارة شن تعنيلي بمتابة امي الله يرحمها
ندى : الله يرحمها ويغفرلها…. باه وكان طلع وغد وكلب وبيستفرد بيا ف الحوش
هالة : ﻻﻻ تحكي اختي عليه انه شخص كويس على حسب ما سئلت عليه… كنهدا ماتجيبهولكش العمل
ندى : حنفكر …
فرج : اتصلت بيا الصبح قتلي بالك تحصلي عمل ف شركة اللي تشتغل فيها
عمر : تعرف مكانها وين هيا
فرج : ﻻﻻ ماتعرفش
عمر : هوووف ريحتني مانبيهاش تشوفني توا
فرج : تي العمل غير نحصله لروحي انا …بش حتى ندورلها كنهدا ماشاد سكيروتي
عمر : معناها تبيلها عمل كويس … برغم ان الحاسوب مطلوب
فرج : اي مستغرب كيف ماحصلتش
بالك عندهاش خبرات …
هالة : شنو تميتي بيه نقالي
ندى : ايه كملت بيه … سحيقا امتى يردونا الضي
هالة : بالك ساعتين اليوم
ندى : مزااااط وخﻻص …. حقا فرج عرفني ع ولد اخته
هالة : بجديات … احكي احكي
ندى : اسمه اااا
هالة : اه قولي
ندى تفكر بينها وبين نفسها كان بنقولها تو اتقول لبنت خالها واديرني انا خطافة رجالة … فكملت كﻻمها وقالت : اسمع عصام
هالة : وووه عندي معاه عقدة اﻻسم هدا عموما شن موضعه رسمي واﻻ هشك بشك كلمني وواعدني وفي نهاية سيبني ؟؟
ندى : الله اعلم ان قتله فرج مانبيش ارتباط فاشل بيجي رسمي باهي
هالة : ياودي احنا خايبات فيسع يفوتونا
ندى : ساد من الخيابة وطياح السعد خﻻص ندى المسكسكة راحت
هالة : هههههه ايوا ايوا
ندى : ههههه عندكم حكة طماطم وشيشة زيت بش نطيب العشي
هالة : اححح باهي تو نعطيك وانتي طالعة
ندى : اهو بنطلع توا وتو ردهالك وقت انحصل
هالة : امممبه هي تو نجيبلك
مشت هالة للمطبخ فتحت دوﻻب طلعت طماطم وزيت
فاطمة ((اخت هالة الكبيرة )) : لشنو هادو
هالة : ندى يناري تبي اطيب العشي فاطمة اتصيح : وانا دخلني ؟؟؟ نقعد غير نشري ف حكاك طماطم وزيت معاشي كله ماشي عليكم
هالة : تو بش اطلعي ف معاش ضمان متع بوي
فاطمة : معاش بوك مخﻻياته كان حد فيكم صارت فيه حاجة مرض واﻻ بلي على روسكم واﻻ كان ضحية عيد ياغبارتي السودة
هالة : باهي نقصي صوتك عندي عشرة دينار تو نعطيهالك …
فاطمة : اححح وخﻻص
قامت هالة طماطم وزيت وطلعت ل ندى وقتلها : هههه معليشي عطلت عليك
ندى : اها ﻻﻻ ادكرت قايمة مونة في دار الخزين فوق فيه طماطم وزيت معليشي تعبتك عالفاضي
هالة : بجديات
ندى : اي بجد … المهم انا توا مروحة
هالة : به خوديهم احتياط
ندى : ﻻ والله ماصارت هي سﻻمات هلولة
هالة : سﻻمات
روحت ندى وخشت لحوشهم المقابل لحوش هالة … وهي تفكر كيف فاطمة اتسم فيها هكي … الناس لبعضها …
خ خديجة (امها) : روحتي ياندى ؟؟
ندى : اي روحت … خديتي دواك يمى ؟؟
خ خديجة : ﻻ ياود
ندى : عﻻش يمى
خ خديجة تخمم.. بالله وينه الدواء يابنتي تم ليه يومين ايييه بالله
ندى : عﻻش ماخديتيش الدواء حبة العشية ؟؟
خ خديجة : هي تو ناخدها هي
ندى : به …
بعد شهر … من معرفة عمر ل ندى {عمر نبي نتﻻقى معاها … بس مش عارف كيف امممم خﻻص نقوللها وان شاء الله توافق .. }
ندى : سحيقة وخﻻص
خ خديجة : خيرك يابنتي وانتي من خشيتي للحوش وانتي شايطة …
ندى : مشيت بندور عمل ف مكتب مشي الحقير صاحب المكتب طلع سخيف كنطاني الحق …
خ خديجة : كشفه الله خزيه عليه حسبي الله ونعم الوكيل فيه
ندى : بنمشي نشتغل الشغل اللي جابتهولي وردة
خ خديجة : متع شنو
ندى (حكت الموضوع متع العمل )
خ خديجة : الوقت معش يربح يابنتي شن تمشي تشتغلي عند حوش ناس !
ندى : نمشي نشوف الوضع كان ماعجبنيش انبطل
خ خديجة : ﻻﻻ يابنتي فكينا تربحي
ندى : بجديات يمى خلي نشوف ﻻن ماعندنا شي باش ناكلوا …
خ خديجة : كح كح كح كحووووهئه
والله الوقت هئ حم الوقت معش يربح
ندى : ان شاء الله خير … انا نمشي غدوة ونشوف وضع العمل
فرج : فديت من خدمة السكيروتي الحرفة
عمر : احرف منك …
فرج : عمر عمر
عمر : ها
فرج : كحل ف هادي … كل ماتخش واﻻ تطلع من الشركة تشبحلك .. طرف طيار ياراجل … ع جسم رايح زي اللبوة
عمر : ماشاء الله عليها لفتت انتباهي
عمر : زعما ندى تكون من قسمي هالمرة يافرج
فرج : العلم عند الله …
عمر : ونعم بالله …
فرج : . تو كنا نتغزلوا ف البنت نقزتلي ل ندى
عمر : جت فبالي
فرج : نقولك شي
عمر : شنو
فرج : صح ندى كويسة لكن مش مﻻيكة فاحسن شي تعرف على اتنين في نفس الوقت … اهو فرصة البنت هادي معجبة بيك
عمر : برا العب بعيد توا بعد شهر من تعارفنا …بنتعرف ع واحدة تانية
فرج : ياخايب انت تبي تتجوز من حقك تعرف كدا واحدة وتختار اﻻفضل …
عمر : ﻻﻻ اهو قاعد ندرس في طبع ندى كان مشت معاي ومش خاينة وماديرليش ف الرز عظام زي اﻻوﻻت فمبروك عليها انا … حنخطبها بعد شهرين تانيات بتمااام وحتكون زوجة المحظوظ ولكن .. لو انها مالعبتش
فرج : ههههههه انت مش محظوظ ولكن انت بدون حظ
عمر : الحمد لله صابر وراضي
فرج : تو نقصقص عليها في اما قسم تشتغل وشن اسمها من جماعة ريسبشن ^^
عمر : تي تعاﻻ اهني يابلي ! ماتكلمهاش تي تعال
بعد شوي …
فرج : البنت اللي ف ريسبشن مابتش تقولي شي
عمر : باه ﻻش اتقصقص ع البنت
فرج : بش اتكلمها
عمر : ﻻ مش حنكلمها …
طلع نقاله عمر وكتبلها مسج
>> مساء الورد يلي احلى من الورد .. شن مدايرة ندوشة
ردت عليه بمسج<<مساء الفل…شي مكسدة نتفرج على تلفزيون
>>حاسده تلفزيون انا
<<ليش
>>ﻻنك قاعدة قدامه
<<ههههه
>> فاضية توا … نقدر نتصل بيك
<<اي فاضية …
عمر :الووو
ندى : ياهﻻ .. شن الجوو
عمر : تمام بعد سمعت صوتك
ندى : ان شاء الله ديما تمام
عمر : ندوشة .. بنقولك حاجة
ندى : قول ..
عمر : امتى نتﻻقو ونشوفوا بعض
ندى : مازال نحس فيها بكري o_O
عمر : قصدي امتى هكي حدديلي وقت
ندى : اممم خليها للوقت
عمر : مايجيكش فضول تبي تشوفيني ؟؟
ندى : اكيد بس عميرو انحس فيها مازال
عمر : اوكي اوكي ..كيف ماتحبي
ندى : مش تزعل مني
عمر { هوا فيه حد يزعل من العسل ؟؟ حد يزعل من الورد … حد يزعل من الفل }…
ﻻﻻ مازعلتش … المهم راحتك ندوشة
ندى :اوكي … يﻻ انا توا بنحط الغدي … نحسبك معاي
عمر : صحتين …كوليلي معاك
ندى : هههه ادلل … يلا بباي
عمر : سلام
يتبع ………
لقراءة الجزء التالي : الجزء السابع من رواية محظوظ ولكن
لقراءة الجزء السابق : الجزء الخامس من رواية محظوظ ولكن
للإطلاع علي فهرس اجزاء الرواية : رواية محظوظ ولكن ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
