الجزء الثامن من رواية محظوظ ولكن

وفي الجزء الثامن من رواية محظوظ ولكن دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .

الجزء الثامن من رواية محظوظ ولكن

ندى : نستاذنكم بنشوف رهف
ادم : تفضلي تفضلي
مشت ندى خشت ل المطبخ شربت اميا.. ووقت هيا طالعة انضربت ف ادم كان بيخش للمطبخ او باﻻحرى خشت ف حضنه بالغلط..للحظات هيا تشوفله وهوا يشوفلها ..
استدركت نفسها ندى وبعدت عنه وخدودها حمر …
ادم : اسف .. بجد اسف
ندى : انا اللي اسفة
كملت ندى طريقها لدار رهف وهيا بتموت من الموقف اللي صار ..

ادم يفكر .. محﻻها عن قرب … ﻻﻻﻻ عيب عليك ياادم … البنت بارك الله فيها جاية ع خاطر بنتك تلعبها وتونسها وانت بتلف عليها …
بس وكان لفيت عليها …ﻻﻻﻻ خليها ف حالها صغيرة وحلوة واكيد تبي واحد من سنها مش انا مطلق و عندي بنت مقعدة

شرطي : خود يمين يا صاحب الكيا … خود يمين
عمر : اهو بينفخوهم على السلفر هي
فرج : قتلك نحيه انا
عمر : الصبر وخﻻص
درس عمر يمين ودرست سيارة الشرطة وراه
نزل عمك الشرطي وجي جيهة سيارة عمر …
عمر : كان نندري عليك انتا والله ماوقفتها ياعافن
اياد : ههههههههههههههه خلعتك واﻻه
عمر : تخلعك غولة ….
نزل عمر وسلم ع اياد سﻻم حااااار
وكمل كﻻمه … وين معش تبان نسئلوا عليك ف العمل يقولوا واخد اجازة من غير مرتب … نتصلوا بيك رقمك غير مستعمل ..
اياد : شوي مشاكل هكي
عمر : ان شاء الله خير
اياد خليها ف سرك يالحوت ..
عمر : خيرك ضاعف هكي.. باين عليك مهموم ومتكدر
سرح اياد في تفاصيل ايام سودة خطمت عليه
عمر : ايااااادوووو
اياد : اها نعم ….ماشي نتﻻقوا يالحوت …
عمر : غير استنى عطيني رقمك
اياد : **09150155
عمر : تمام …اهو ينادي
تنهد اياد وقال : تمام …سﻻم عمر نتﻻقوا
عمر : نتﻻقوا
{راسي يضرب خماس ف سداس … خيره اياد مش فرحان مافيش مرة ريته هكي … برغم انها ماليشي هلبا كيف متجوز … زعما شن صار ف حياته وعﻻش اختفي فجأة هكي … وعﻻش لما سئلته خيرك اختفيت سرح …. اكيد فيه شئ … يﻻ استنوا لوزة احتمال اديرلكم جزء ثاني من اياد و نورس…}
فرج : خيرك مسبوه
عمر : مستغرب ف اياد حسيته مش ع طبيعته
فرج : بالك ظغط عمل
عمر : ﻻﻻ فيه حاجة … حق خيرك مانزلتش تسلم عليه
فرج : متسلف منه 100 دينار هههههه وكل مابنمشي نردهمله مانلقاشي خوه يقولي مهناش …وتوا ماتحتيش فلوس
عمر : ها ريت ماتلقاشي معناها فيه حاجة صايرة ل اياد

ساعة 6 المغرب …
هالة : تعرفي يامهبولة كان تحصلي ادم كل مشاكلك تنحل
ندى : ﻻﻻ وعمر ؟؟
هالة : اي صح نسيته
ندى : الحق مانكدبش عليك … ادم كشكل وطول وعرض ماشاء الله وباين عليه شخصية لكن مش عارفة
هالة : شوفي روحك انتي انا مانبيش نقول شي خير ماتصير حاجة وتقوليلي كله منك
ندى : لكن عﻻش انحس ان نستنى في غدوة بش نمشي لعندهم … عﻻاااش
هالة : يمكن انتي تعودتي على الفيﻻ بس
ندى : مش عارفة ممكن …. سكري سكري عمر خشلي انتظار
هالة : اووك باي …
ندى : الوووو
عمر : مرحبا
ندى : مرحبتين
عمر : كيف الحال ندوشة
ندى : الحمد لله
عمر : عاتب عليك انا
ندى : وعﻻش عاتب عليا يعني ؟؟؟
عمر : ﻻ اتصال وﻻ مسج وﻻ رنة
ندى : عندي شوي ظروف
عمر : ربي ايعاونك … حصلتي عمل ؟؟؟
ندى : اي حصلت
عمر : وين ؟؟
ندى : في معمل حلويات مناسبات
عمر : اها باهي كويس
لحظة صمت
{عمر … ليش ساكتة بس هدروي قولي اي حاجة سمعيني صوتك الحلو اللي زي النغمات لو بإيدي نخلي صوتك دقات قلبي …انا شخص محروم ولست محظوظ ان شاء الله هالمرة يكون عندي حظ تكوني من قسمي ياندى }
(ندى … خير بﻻه هدا ساكت الصبر ياربي هوا هكي وماعنديش خلوق نكلمك يابال ساكت )
عمر : صار هكي
ندى : هكي صار … ارتبطت عمر قبل هكي ،؟؟
عمر : ااااخ اخ … ارتبطت اي
ندى : وشن صار
عمر : حكالها اخر موقف تعرضله متع لمياء …
ندى : اها … معليش مش نصيبك
عمر : اي باعاتني قدام اول فرصة زواج
ندى : يﻻ ان شاء الله خير ..
لحظة صمت ….
وسكرت عليه ندى
عمر … زعما خيرها سكرت ..بالك امها خشت عليها ؟؟

ندى .. اف معش عندي ليه خلوق مش عارفة عﻻش … برغم ان قبل نفرح بيه لما يتصل حتى نكون مضايقة جوي يولي حلو لكن توا شن جد مش عارفة
>>> يامرايتي من كم سنة لليوم … اديش تغيرت …
بس ندى مابتش اترد ع عمر..

{عمر … ياربي امتى اتقولي هيا نشوفوا بعض بش كان عجبتها نخطبها طول مش ضروري حب حب المهم عرفت عليها حاجات وفهمت طبعها … ونخاف انقولها بنخطبك اتقولي ﻻ ونسد مسافة وتفوتني }

رهف : بابا
ادم : هاه
رهف : عمتي حسنة ماتبينيس نتصل ب ابلة ندى
ادم : وعﻻش تبي تتصلي بيها
رهف : نبي نقولها غدوة بنلعبوا بالطين وبنقولها حفظت الحروف ..
ادم … زعما نكلمها … ﻻﻻ مش حنكلمها خليها ف حالها …
رهف : هيا بابا نكلموها
ادم :ﻻﻻ سمموحة غدوة تو اتجيك والعبي معاها …

عمر : ها شنو ندو نشوفوا بعض ؟؟
ندى : اممم باهي خﻻص … غدوة هكي

يوم عن يوم عن يوم وفات سبوع ونص ع عمل ندى عند ادم …
ادم شاد روحه مايروحش للفيﻻ وحتى كان روح يخش لجناحه يرقد وبنوض العشية يمشي لصالة الحديد تفادي انه يشوف ندى … او تصير لقطة عفوية ويقعد في موقف محرج وندى زعلت ﻻن ادم معش يتواجد ف الحوش هههه …

يوم الثﻻتاء الساعة 9:55 صباحا
عمر : نبي نخطب
فرج : تتسهوك ؟؟
عمر : ﻻﻻ بجديات … قرار قداش ليا يوم نفكر فيه
فرج : من بتخطب ؟؟
عمر : ندى… لكن مش توا اقلها نشوفوا بعض وبعدها نخطب
فرج : وامتى بتشوفوا بعض
عمر : اهو اليوم بنفاتحها ف الموضوع وان شاء الله توافق
فرج : ان شاء الله

ندى مقعمزة تسرح ف شعر رهف ف صالة تحت وتتفرج ع تلفزيون طيور الجنة …
نزل ادم من جناحه … ﻻبس بدلة ازرق كحلي ومتأنق وريحة البرقان تنادي من بعيد … يلبس ف ساعته
وقف ع اخر درجة يعاند ف ساعة
ندى : صباح الخير استاذ ادم
ادم ماقامش راسه رد عليها : صباح النور ..
رهف : صباح الخير بابا
ادم : صباح الفل عسولة
استغربت ندى… ماعطاهاش اي اهتمام زي قبل …
رهف : بابا بتطلع ؟؟
ادم : اي ان شاء الله
رهف : خودني معاك
ادم : ﻻﻻ العبي مع ابلتك
شبحتله ندى ع جنب بعيونها الواسعتين الزرقاوتين
شبحلها ادم شبحة وللحظات سرح فيها كان متجنب انه يتلاقى معاها بأي شكل من اﻻشكال .. مايبيش يتعلق بخيط من الوهم او ان تصير بينه وبينها موقف وتسيب رهف …
وندى تشوفله وسارحة فيه بهديكا البسة الحلوة وطوله وعرضه
ولكن رهف قطعت الصمت والنظرات
رهف : طلعني ف العسية اماﻻ …
ادم : باه ان شاء الله..
رهف : بابا بابا
ادم : اها سموحة
رهف : جيبلي شوكﻻتة
ادم : ان شاء الله
وطلع ادم وتنهدت ندى وكملت تسريح شعر رهف

>>يامرايتي من كم سنة لليوم اديش اتغيرت
ندى … شن يبي هدا والله معاد عندي ليك خلوووق ياعمر …
شوية رهوفة تو انجي
رهف : به ماتعتليس
ندى : اووكي
مشت لزاوية من الفيﻻ وردت :
الووو
عمر : السﻻم عليكم
ندى : وعليكم السﻻم
عمر : شن الجووو
ندى : تمام وانت
عمر : تمام بخير … شن مدايرة
ندى : اهو مكسدة
عمر : استفقدتك
ندى : ماتفقد غالي
عمر : وينك امس
ندى : ماقدرتش نتكلم
عمر : اها به … ندوش
ندى : نعم …
عمر : خلينا نتﻻقو بجد هوا داك والله نيتي صافية مش اني نبي نلعب واﻻ حاجة
ندى : ماهو….
عمر : مامهوش ﻻزم نشوفوا بعض
ندى : ماني ….
عمر : ماماكش ماتعقديهاش نشوفوا بعضنا حتى من بعيد
ندى : ههههه باهي به … ساعة 4:30 ينفع ؟؟
عمر : حلو نكون مكمل دوامي ومتغدي
ندى : تمام …
رهف : ابلة ندى ى ى
عمر :من ينادي فيك
ندى : بنت جيرانة هههه يﻻ تو نكلمك بعدين
عمر : اوكي ردي بالك ع روحك
ندى : ان شاء الله… سﻻم

{ ضحكت يعني ئلبها مال وخﻻص الفرق مابينا اتشال احم احم صوتي خشين واﻻه هههه المهم انها وافقت توا ^^ ان شاء الله نعجبها بس… حنخطم ع الحﻻق يواسيلي اللحية نديرها خفيفة اممم وشن تاني اي نتصل بنازك تحددلي لبسة قنينة }
نزل عمر من سيارة واتصل ب نازك ماردتش فكتبلها مسج >>> حدديلي السورية البيضاء و السروال الجينز اﻻزرق وطلعي الجاكيت اﻻزرق كحلي ديريه بشياتة كان ﻻم غبرة واﻻ حاجة ^^

فرج : شن صار فيك
عمر : ديدتا عساعة 4:30
فرج : شن ديتت هادي
عمر : موعد ياسطل
فرج : اها مليح … ههههه تو بتتفاجئ فيك انك نفسه اللي تﻻقت معاه من شهرين
عمر : ههههه اي بالك تشبحني تكرهني ع خاطر عفستلها ع موبايلها بسيارة
فرج : انت وحظك عاد هههه
عمر : اسمع المهم كان سئﻻتك قول انك ماتندريش عليه موقف السيارة يعني ان انا ماحكيتلكش
فرج : تمام تمام

خالد ( شخص معرفة سطحية ل فرج ) خاطم من قدام الشركة
خالد : خييير يافروجة
فرج : خير ياخلودة شن جوك يابرو
خالد : ماشية ياقدر ربي يحفظك
فرج : امنور الله ايعزك احبيبي
خالد : ماتوصي بشييي
فرج : امنور سﻻمتك ياغالي
خالد : الله يسلمك ماعزا ..

عمر : وه وه وه مايدره ف الكبد وووه
فرج : خيره انحس فيه عادي
عمر : ياودي مئها رزين ع كبيدتي
…
يتبع……..

لقراءة الجزء التالي : الجزء التاسع من رواية محظوظ ولكن

لقراءة الجزء السابق : الجزء السابع من رواية محظوظ ولكن

للإطلاع علي فهرس اجزاء الرواية : رواية محظوظ ولكن ( جميع الاجزاء كاملة ) للكاتبة لوزة

جميع الحقوق محفوظة للكاتبة لوزة .