وفي الجزء السابع عشر من رواية محظوظ ولكن دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء السابع عشر من رواية محظوظ ولكن
عمر : شنو فيه وينه الظابط
صﻻح : اونه ف حجرته
عمر : به خلي نخشله
صﻻح : خيرك مش لابس لبسة العمل
عمر : نسيتها ف سيارة ف الساكو
صﻻح : برا البس فيسع قبل مايشوفك يديرلك مرداح
عمر : باهي هي
وعلى طلعة الضابط كبس عمر مع صﻻح.. فقاله : طيب فيك ياباشا ..
عمر : مساء الخير …
ض محمد :وينك لتوا
عمر : صارلي ظرف عطلني
ض محمد : الظروف ماتطلع اﻻ عالخدمة كان ماشي القهوة واﻻ صالة الحديد مافيش ظروف
عمر : ماحدش يختار الوقت اللي بيصير فيه الظرف
ض محمد : ماشاء الله متأخر ومازال اتناقش
سكت عمر واكتفى بنظرات
خش ضابط للمكتب ووراه عمر وقعمزوا هما اﻻتنين
ضابط : فيه كورس سيفتي وامن وسﻻمة لمدة عشرة ايام. بنبعتك ليه وبعد الكورس فيه اجتماع
عمر : تمام وين ؟؟
الظابط : لتركيا ..
عمر : اهاااا والله حلوو نغيروا جو
محمد : قلنا كورس !
عمر :هههع ايه قصدي نغيروا جو بالقراية ليا مدة ماقريتش
ض محمد : به به نوض شد مكانك وراك ترقد و اتخش هجرة غير شرعية
عمر : كون هاني … امتى السفرة
ض محمد : اﻻسبوع الجاي
عمر : ان شاء الله .. هي نستادن
طلع عمر من المكتب …
وماشي ل صﻻح عيونه يلمعوا
صﻻح : هاه شنو عطاك ع راسك او
عمر : عطاني احﻻ خبر
صﻻح : شنو
عمر : بعتة ل تركيا عشرة ايام
صﻻح : زفرت
عمر : والله مانزفرت عطاني بعتة
صﻻح : به خيرنا احنا امنا ارنب واﻻ كيف
عمر : هههههه معليشي صلوحة خيرها ف غيرها
صﻻح : العام اللي فاتت بعت خالد وعطاها مبلغ بدوﻻر ف حسابه يعادل 2000 دينار باليبي و اقامة بالبﻻش
عمر : اووو 2000 كويسات والله نبيع السيارة ونزيد عليها وناخد حاجة مقومة
صﻻح : بدي حتى ايخطط ..
وتم الدوام عالساعة 7 صباحا وروح
تعبان ومرهق
خش حوشه
عمر : السﻻم عليكم
ليال : وعليكم السﻻم صباح الخير عموري
عمر : صباح الفل شن اديري سمله فايقة من صباح الله خير
ليال : صليت الفجر وقعدت نستنى فيك
عمر : تقبل الله …
ليال : منا ومنكم صالح اﻻعمال
عمر : تعبان بنخش نرقد
ليال : به
ويادوب عمر بدل حوايجه واتلوح عالسرير واتكمكم ف اليرغان
وكيف بيتلدد بالنوم انفتحوا عيونه
ليال شغلت المكنسة الكهربائية
{ياغبرة ياحرفة بش قات تعبان بنرقد }
حط المخدة ع راسه وغم وذانه مافيش فايدة
عمر يصيح : ليال لييياااااال انتي يا دوشة
ليال طفت المكنسة وجاته : نعم ناديتني عموري
عمر : هرهوري على دماغك تو بش قتلك تعبان وبنرقد نزلت عليك النظافة وبتكنسي… ساعة 7 راهو !
ليال : ماه معش عرفت شن اندير
عمر : ديري اي حاجة ماتزعجنيش تاعب النهار المبارك الليل كله حال عيوني ومقعمز في نتصرفق ف الصقع
ليال : امممم به خﻻص معش ندير دوشة ارقد .
ولى عمر واتكى وهوا متنرفز
شوي ليال شغلت الغسالة وزعميتها سكرت الحمام … بش معش يطلع صوتها …
فجاة فاق عمر
{ﻻ اكيد ماتفهمش ماتستوعبش …اكيد راقد ف راسها ديناصور .. اكيدة هالبلي هادي الصبر ياربي }
وناض بغل غله طلع ع وسط الحوش طفى تاكوات الضي كلهم ورجع
ليال ف الحمام… حي الضي هرب
تو كيف بنكمل غسل حوايج … اممم خلي انخش انطيب الغدي وخﻻص .
وبدت اتقرض ف البصل واتبوخ ف الرشتة و وريحة البصلة تفحفح
ودار عمر مردودة … وخش هالداكا التفحفيح لخشم عمر
إمف إمف >> عمر يشم في ريحة اﻻكل وماعرفتش كيف بنمثل الصوت هههه
وفجاة
{حسبي الله ونعم الوكيل فيك ياليال يابنت امنة }
خدي يرغانه وفتح باب داره ع وسعه وطلع منها… شافاته ليال
ليال : عممررر وين ماشي
عمر : اسكتي حتى كلمة … خير مانولي عليك والله طايرتلي لشياطين الزرق حولي من قدامي ..
وطلع وسكر الباب
ومشي رقد عند امه لساعة 2 الظهر
نازك : عمر عمر
عمر : والله ياليال كان ماتمشيش نقتلك
نازك : هههههههه شورها مدايرة فيك حالة لين تتكلم بيها ف الحلم
عمر : شنو ..اه نازك ساعة قداش
نازك : 2 الظهر
عمر : باهي نومة مليحة مش اخت الجيش اللي فوق كسرتلي رقبتي اتقول فمعسكر النهار المبارك
نازك : ههههه خيرها
عمر : مروح بنرقد لقيتها صابحة من ساعة 7 هاك ياكنس بالهوفر هاك ياغسالة تشتغل نضتلها بي غل غلي طفيت عليها التاكوات
نازك : هههههه جو عليك
ليال : السﻻم عليكم
خ وداد : وعليكم السﻻم
عمر ل نازك : تدكر القط
ليال : عندكم ضي اﻻي ؟؟
خ وداد : ايه عندنا
ليال : اللطف انا هارب من 7 الصبح لتوا
{ اللي يسمع ايقول ساكنة ف منطقة بروحها }
خ وداد : اللطف كيف ماهربش الضي اليوم بكل
ليال : اماﻻ شوره عندي عطل ف الضي … المهم جبتلك رشيتة ياﻻي
خ وداد : صحيتي بنيتس
ليال : سلمك اماﻻ وين عمر
خ وداد : اونه ف المربوعة
نازك : هههه جاتك جاتك خلي نهرب
عمر : تي اقعدي يامنجوهة
نازك : هههه ﻻ ابدا ..
طلعت نازك
ليال : شن الجوو
نازك : باهية كيف شن جةك انتي
ليال : اهو ماشية
وخشت ليال ل عمر
ليال : عموري
عمر : هاااه
ليال : هكي تطفش مني وتنزل ترقد اهنا
عمر : انتي معش بطلتي نقولك تعبان وماتبيش تعدلي اخر البسالة تطيبب بصلة ع الصبح
ليال شدتله ايده بين يديها وقتله : سامحني غير معش عرفت شن اندير …
عمر : مسلمحك صار خير
ليال : موتيتلك رشتة اللي تحبها عالغدي …
عمر : حق او
ليال : اي … نقولك حاجة
عمر : قولي
ليال : استحشتك هلبا
عمر : حق اتعالي اهنا امس فاتحة الفايبر بش قتلك تفتحيش
ليال :مافتحتش امس بنشوف حاجة عالقوقل وصلت النت فتح الفايبر بروحه …بس شفتك باعتلي قلب كبير
عمر : امممم باهي … بنقولك
جتني بعتة ع تركيا
ليال : حققققق هاااا حلوووو نمشوا نغيروا جو وننبسطوا انا وياك الله بمتابة شهر عسل
عمر : كملتي ؟
ليال : عﻻش
عمر : ﻻن اصﻻ ماشي بروحي
ليال : ﻻ باالله عليك خودني معاك اول مرة نطلب طلب
عمر : ﻻﻻ جيهة العمل متاعي مش حتغطيلك حق تدكرتك
ليال : انا نتكفل بيها ارجوك عمر غير خودني معاك
عمر : ﻻ لو بنرفعك اكيد حنطلعك على حسابي حلوة حتى هادي نتكفل بالتدكرة
ليال : به موافق ارفعني هي
عمر : ﻻ
قربت ممنه وخشت ف حضنه وقتله : وراسك عموري
عمر : فيش
حطت ليال روس صوابعها ع خده وتحرك فيهم : عشاني موووري
عمر زاد خداها ف حضنه وسخفاته حسها طيبة هلبا وعفوية : به قوليلي كيف بناخدك هي
ليال قربت اكثر واكثر وعطاته قبلة رومنسية : اممموووه غير اتوكل وكل شي يصير كيف مانبوه ان شاء الله …
خداها عمر تحت اليرغان وقالها : يامجنونة احني ف حوش العيلة بطلي بﻻ تعسيل
ليال زادت تتعسل وقتله : مستاحشاتك هلبا
قرب منها عمر بياخد بوسة طلعت من تحت اليرغان وهربت منه
عمر : تعالي اهنا
ليال بدلع : ﻻﻻﻻ مانيش
عمر : تعالي والله نجيك راه
ليال : تعالى هي
وقفلها عمر ومشت تجري ويجري عمر وراها طلعت وركبت لدروج وراكب عمر كالأسد وراها وصلت قدام الباب
بطلع المفتاح
حصل عليها عمر لصقت عالباب زي الرسمة وقالها : حصلت عليك .
وكيف بيقرب منها بطريقة او بأخرى قدرت تفتح الباب خشت تجري للحوش ثم لدار النوم وسكرت بالمفتاح …
عمر ؛ افتحي ياشيطانة
ليال : عد للعشرة بس
عمر : 1 2 10 افتحييييي
فتحت ليال الباب وكانت ﻻبسة روب زهري يقتل وشعرها مفتوح بلونه اﻻصفر الحلو
عمر وقف للحظة اتشننج
{احساس غريب انحس ف روحي مشاعر مخلطة بين عقلي الرافض تماما ليال وبين خاطري اللي ملهوف عليها صوت العقل واﻻ لهفة الخاطر وحتى لو خديت بصوت عقلي وتلفتت ومشيت حنكسر مشاعر البنت }
ليال : عمووووري وين سرحت
عمر : ﻻﻻ شي …ياحلولو 
_
خش وسكر الباب … هههه
بعد نص ساعة
نازك : شنو ركبوا عمر و ليال
خ وداد : ايه ركبوا مهبلة طنجرة ولقت مغطاها
نازك : هههه خيرهم
خ وداد : احح ﻻ شي ركبوا وخﻻص
نازك : انحط الغدي واﻻ ماتبيش تتغدي توا
خ وداد : خليه الغدي عشي… وجيبي خلي نضوقوا رشتة هالمنجوها
نازك : به
جابت نازك مفرش طرحاته ووحطت سﻻطة وقعمزوا بياكلوا الرشتة
في نفس الوقت عمر طالع من الدوش
ليال :هيا عموري الغدي واتي
عمر : جاي هي… اكيدة رشتة ملبدة فبعضها
ليال : هههه ﻻﻻ
عمر : واكيدة البصلة نية
ليال : هههه ﻻ
عمر : واكيدة اللحمة مش طايبة
ليال :به غير تعال ضوق
عمر : هاه وهادي اتقعميزة … بالشكل هكي تبان حمرا وتفحفح لكن اكيدة معجنة فبعضها
خدت ليال الكاشيك وعباته رشته وقتله : افتح فمك عموري
فتح عموري ووكﻻته ليال الرشتة
يمضغ ويشوفلها >_> ض
وهيا تشوفله ¤_¤
عمر : ايييي يابطني فيها سم اييييي
ليال : ههههههه بﻻش برادة قولي عجباتك
عمر : ماشاء الله الحق
خ وداد : ريتيها هالمنجوها رشتتها مابنها
نازك : اي والله بنينة صح وناشطة
عمر : من علمك التطييب
نازك : ماما كانت طيابة قبل
عمر : ماشاء الله عسل الرشتة
ليال : صحتين عليك ..
وتموا الغدي وهنا يبصروا ويضحكوا وجابتله الفاكهة تقشرله وتوكله حس روحه عمر مدلع
{ادلع ياكايدهم …برغم انها مطفوشة اشوية اﻻ انها ماشاء الله عليها اتخش الخاطر }
ليال : ياريت يرجعونا الضي
عمر :حي هههه نسيت نحسابه هارب حتى انا
ليال : اماﻻ شنو
عمر : تو بالله عليك … بيهربوا الضي على شقتي والحوش لوطا ﻻ
ليال : وين نندري به نوض بربش الكابل بالك منه
عمر : مش كابل .. التاكوات نزلوا .. تو انديرهم ..
ناض عمر فتح التاكوت ورجع مكانه .
ليال : حبوبي نقالك ايرن
عمر : جيبيه تره
مشت ليال جاباته وجت
عمر : اها فرج
فرج : هيا كان بتمشي الصالة
عمر : نسيتها مرة واحدة … هيا شوية بس نوتي روحي وانجي
فرج : اوكي سﻻم
عمر : سﻻم
ليال :ماتقوليش طالع
عمر : اي .. بنمشي الصالة
ليال : باهي ربي يحفظك
وتى روحه عمر .. وهوا طالع من باب الحوش ﻻقاته مراة
المراة : السﻻم عليكم
عمر : وعليكم السﻻم ..
المراة : بالله هدا حوش فﻻن ؟؟
عمر : وصلتي ..
المراة : وانت عمر ؟؟
عمر : وصلتي ..
المراة : انا .. شن بنقولك … انا اسمي فاطمة
عمر : اهلين بيك بس من انتي تبي امي.. تفضلي خشيلها
خ فاطمة : ﻻﻻ انا … انا مرت بوك الله يرحمه
عمر : o_O … شنووو شن حسك قلتي !
خ فاطمة : اي غير اسمعني للاخير وماتقاطعنيش.. انا مرت بوك… و وحيدة مقطوعة من شجرة ماعنديش حد …اتجوزني بوك وستر عليا … وكان ديما يحكيلي عليك … بنالي حوش وكتبه ب اسمك قالي ماتقوليش لحد اﻻ لجارتنا بس اللي ساكنة جنبنا بش كان صارت حاجة اتجي اتقولك …المهم جارتي اتوفت الشهر اللي فات وانا مرضت بالسرطان اللهم عافيك.. ومعش فاضلي هلبا ايام… ماعنديش حد انقوله على هالسر اﻻ انت … دورتك وليا تﻻتة اسابيع نمشي وننشد ﻻن بوك ماقاليش وين حوشه هدا … بش معش مثﻻ انجي لامك واﻻ حاجة … عموما هادي وصية بوك مخليهالك… وهادي عقد الحوش
عمر : شن اتقولي انتي والله ماستوعبتش اللي اتقولي فيه
خ فاطمة : هدا اللي صار ياولدي و اهو ايام والله ياخد امانته وتعال خود الحوش … هي بسﻻمة
عمر : غير استني ياخالتي فاطمة استني
خ فاطمة : انعم
عمر : امتى صار هدا كله
خ فاطمة : قبل 30 عام بعد ماتوفى خوك
عمر : اما خو اللي اتوفى خوي حاتم قاعد عايش
خ فاطمة : خوك التؤم اللي انحرق مسكين …
عمر : وين وكيف مش فاهم شي
حكتله خ فاطمة على حادثة اللي صارت وكيف ان خ وداد قعدت تسحن في بو عمر طول عمره ومحمﻻته الذنب
عمر : ﻻ حول وﻻ قوة اﻻ باالله ..
ماحد حكالي …
خ فاطمة : خلي نمشي انا توا عطيتك اﻻمانة بش يكون ضميري مرتاح … وصية بوك كاتبها بخط ايده و العقد مسجل و الحوش في عين زارة بالسﻻمة
قعد واقف عمر مصدوم.. معش فهم شي من شي راسه تشوش ..
فتح سيارته وقعمز فيها بيقرا وصية بوه
** عزيزي عمر .. اكيد تقرا في وصيتي توا ومصدوم من اللي صاير .. صح انا اتزوجت قبل 30 عام من فاطمة … لقيتها حالتها المادية ماتسمحش فقلت نستر عليها . ادعيلي بالرحمة ياولدي وماتنقمش عليا انا درت الخير بس..وكتبت الحوش بأسمك ليك انت بس ..راك اتفكر تقسمه على حاتم .. حاتم فاتح محل اللي وراء الحوش وعاطيهوله من قبل ..وهدا الحوش ليك انت ياعمر حاجة خاصة .. رد بالك على روحك ياعمر انعزك ياولدي ونتمنى اتكون في حياتك محظوظ زي ماديما اتقولي وانت صغير … انا محظوظ يابابا ﻻن انت معاي … حتى انا محظوظان عندي ولد زيك طيب وماشاء الله عليه وفخور بيك انك غطاس درجة اولى حققتلي الحلم اللي كان خاطري فيه من صغري… رد بالك على روحك واول ولد ايجيك سميه عمار .. راك تنسى ياولدي … ربي يحفظك .. ابوك عبدالرحمن..
طبق الورقة عمر ودموعه شبوب شبوب …
{عﻻش ايدسوا عليا عﻻش … عﻻش تكرهني امي هكي.. داسة عليا وداسة عليا خبر عمار …توا بس كيف عرفت امي عﻻش تعامل فيا هكي مدايرة ان بوي طلعني انا بلعاني وخﻻ عمار الله يسامحك يمى فيه حد بيقتل ضناه ..الله يرحمك يابوي الله يرحمك ويغفرلك يوسع عليك }
ولع سيارته عموري وطلع يلود في الشوارع … حتى الصالة فاتها ومشي قعمز قدام البحر اللي علمه بوه السباحة فيه ..
{اخ ياربي بعد تﻻتة سنين من وفاة بوي توصلني رسالة منه حسيت انه معاي زي قبل ويكلم فيا … اﻻب امان وانا فاقدة اﻻمان .. استاحشت لما ينادي عليا ونكون معاه محﻻ هديكا اﻻيام ندفع عمري كله من اجل يوم مع بوي ااااه ااااه ربي يرحمك ويغفرلك …صح قبل كنت نقول محظوظ ﻻنك معاي … وتوا نقول محظوظ ﻻن كان عندي اب يفهمني من غير مانتملم اب لن يكرره الزمن وﻻ عمري حننقم عليك يابوي الشرع حلل ب اربعة وانا فرحان لانك سترت على ولية ماليها حد اﻻ ربي }
تررررن
عمر : ها فرج … مش جاي صالة راه
فرج : شنو المرا نساتك ف نشاطاتك اليومية
عمر : وحق ربي يافرج ماناقصك راه سﻻم ..
طفى نقاله وقعد مقعمز في البحر من ساعة 3:30 لساعة 9:15 في الليل …
استاقض لروحه وراه عمل ..
رجع للحوش ركب لحوشه طول ماخطمش ع امه … ركب دوش وبدل وهدا كله ماتكلمش مع حد حتى ليال تكلم فيه مايردش وطلع للعمل …
في العمل …
خالد : عمورة شج ياطيب
عمر : ماشي الحال … وين فرج
خالد : اونه ف القارب بيصطاد حوت قال
عمر : باهي …
نحى سوريته عمر وخش للبحر سبح لين وصل ف فرج
عمر : افرررج
فرج : ياكلب ياااكلب خلعتني
عمر :ماحسيتش بحد يسبح
فرج : ﻻ حاط اغاني ف وداني… وﻻش جايني سباحة مسافة هادي كلهاتو يضربك البرد
عمر :كنت محتاج اميا مصقعة تفيقني من اللي حاس بيه
فرج : اركب وانت قاعد ف المية صقعتني معاك
غطس عمر في الميا وقعد فترة
فرج : ربي يهدي قلتله اطلع زاد غطس … تي اطلع يابلي اتهربلي الحوت يا دمنقل ..
طلع عمر : مصدوم يافرج مصدوم
فرج : شن صدمك .. تي اركب يادراه تو تمرض.. نقعد غير نجري بيك ف العيادات.
ركب عمر عالقارب وعطاه فرج بطانية حطها عليه
عمر : مصدوم
فرج : درهتلي كبدي شن صدمك
عمر : بوي
فرج : خيره الله يرحمه
عمر : اتعيش وتترحم … اتصور طلع عندي خو تؤم ومات محروق
فرج : كيف من قالك ؟؟؟
عمر : تندري قصدك !
فرج : اه ﻻﻻ شن نندري هادي
عمر : تندري يافرج نعرفك لما تكدب اتحك وذنك
فرج : ايه دريت مالياش هلبا
عمر : وعﻻش ماقلتش ! لين نسمع مالغريب يعني
فرج : من منو سمعت
عمر : نحكيلك اتحل فمك نهارك مغبر … وحكاله عمر اللي صار
فرج : تتسهوك !
عمر : والله بجد
فرج : متجوز مرا تانية امممم واختي تندري ؟؟؟
عمر : هه كان تندري راه قايمة الدنيا فوقي لوطي.
فرج : اممم لكن والله انفتحتلك طائة القدر حوش جاك بالبارد البريدي اديره سوق واﻻ ادير محﻻت واﻻ تأجره اشيه واتقول مش محظوظ
عمر : اخطيني من هدا كله قاعد مصدوم ..وطايرتلي من امي كيف ادس عليا
فرج : اممم باهي شن بتقوللها ؟؟
عمر : غدوة الصبح ايدير ربي طريق ان شاء الله ..
فرج : يستر الله وخﻻص ..
وتم دوامه عالساعة سبعة روح ارتاح شوي ومع ساعة 10 خدي ورقة الوصية طبقها وحطها ف جيبه ونزل ل امه وعلى جية فرج جي بش يحضر الموقف
فطر فرج مع اخته ونازك كيف طلعت ماشية العمل .. عمر مقغمز يستنى امه اتكمل فطور بش بيفتح الموضوع
عمر : يمى .. هئ احم …
خ وداد : خير بﻻك تتنحنح واتحط
عمر : بوي الله يرحمه
خ وداد : تعيش واتترحم
عمر : خﻻلي وصية
خ وداد : خﻻلك طيح سعدك ومزالك
عمر : غير اسمعيني بوي خﻻلي وصية جابتهالي مراة
خ وداد : ئه ومن اتكون هالمراة
عمر : مرت بوي
يتبع………
لقراءة الجزء التالي : الجزء الثامن عشر من رواية محظوظ ولكن
لقراءة الجزء السابق : الجزء السادس عشر من رواية محظوظ ولكن
للإطلاع علي فهرس اجزاء الرواية : رواية محظوظ ولكن ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
