الجزء التاسع عشر من رواية محظوظ ولكن

وفي الجزء التاسع عشر من رواية محظوظ ولكن دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .

الجزء التاسع عشر من رواية محظوظ ولكن

خ وداد : وين مفتاح اﻻحتياط متع شقة عمر
نازك : في المزهرية لكن شن تبي فيه
خ وداد : بنركب انشوف شن عنده ناخد عقد الحوش
نازك : ﻻﻻ يمى شن تخشيله حوشه في غيابه
خ وداد : بري ياسوسة هاتيه فيسع
نازك : باهي به
خدت خ وداد المفتاح وركبت هيا …وحاتم ل شقة عمر …

حاتم : نستناك اهنا خشي شوفي ف دار نومه
خ وداد : به
خشت ودادوه وقلبت دوﻻب عمر

عمر : حيي نسيت ..
ليال : شن نسيت
عمر : حاجة مهمة اخيييه لين قلبي حسيته مقبوض … استغفر الله العلي العظيم والله كان نقدر انوقف الطيارة بس
ليال : غير شن نسيت ؟؟ فلوسك
عمر : ياريت ياليال ياريت

خ وداد : وين حاطه هالمنجوه
حاتم : لقيتي حاجة يمى
خ وداد : ايه ايه اهو لقيت لفة ورق

عمر : نسيت عقد الحوش والوصية
ليال : هااا جبتهم معاي حطيتهملك ف شنطك

خ وداد : هاك اقراهم العيون بالهون
حاتم : هاتي هي

عمر : اووووف والله ريحتيني الله يريحك وﻻ عمري حننسالك هالمعروف ياليال
ليال : ﻻﻻ مش معروف مافيش بينا .. متعودة وقت نطلع مكان بعيد نقيم اﻻوراق المهمة شهداتي و ايفادتي وهكدا بش حتى كان صارت حاجة لحوشنا لا قدر الله اقلها نلقى حاجة تصبرني ههههههه
عمر : ياوخيتي عليها والله كان نقدر انضمك ليا ف هالحظة راني درتها غير الناس بس
ليال : غمض عيونك وتخيلني ههههه

حاتم : هادي ورقة متع لعب الكارطة وتسجيل نقاط هوا وفرج وصاحبهم
خ وداد : هه عازة ياكبدي
حاتم : وهادي ورقة اشتراك في الصالة الحديد
خ وداد : هدا فاش فالح ينفخ ف هداكا الزسسم وخﻻص
حاتم : وهادي ورقة اشعار …
خ وداد : غبارة ناض حتى يشعر
حاتم : مافيش وﻻ ورقة مهمة
خ وداد : استنى تو نزيد اندور

ليال : وشوشلي شن تتخيل من بكري مغمض عيونك
عمر : اه شنو ههههه خداني النوم راه
ليال : اياح هوا هدا خيالك يعني

عمر : به غير اصبري هي خلي نتخيل من جديد
ليال : باه
ومسي فيها عمر نومة وبدي اينخط
هزاته ليال
عمر : هاه …. صوابعك يالبال معش تغرزيهم ف كتفي هزيني ب ايدك كلها …وﻻ تحفري هكي اتقول متقاب
ليال : ههههه به كنت اتنخط معناها ماتخيلتش
عمر : والله تعبان … استني هاه … غمضي عيونك انتي ..
ليال : هاه غمضت ..
عمر : اتخيلي سرير هكي
ليال : ايه ايه ^^
عمر : سرير في حوش ايطل على بحر
ليال : ياسﻻااام كمل
عمر : ونسمة خاشة و الستار خاش يرفرف
ليال : ياربي خيالك محﻻه
عمر : والشمس خاشة هكي شوية منها ساطعة
ليال : ياحليلي
عمر : وصوت طيور النورس
ليال : الله الله
عمر : وسرير دائري جميل وعمر ﻻبس كت ومتكي عليه وغمض عيونه ومشي فيها نومة
ليال : >_>
عمر : هههه خيرك
ليال : برا برا
عمر : حرجتي
ليال : خﻻص خﻻص
عمر : به نبصر نبصر … وكان عمر ﻻبس كت و متكي وفي حضنه للوش يوكل فيها تشوكلت ..
ليال : روووعة ^^

(رتاج ..25.. هالة 24.. في تركيا .. جايبهم راجل رتاج عشان امهم عندها عﻻج عند دكتور )

هالة : شن ترسمي
رتاج : صورة شخص يطلعلي ف الحلم كل يوم ..
هالة : ومن يكون
رتاج : والله ماعارفة …
هالة : به شن يقولك
رتاج : مايقول في شي يبتسم و وخﻻص
هالة : شركيها الورقة خير مايشوفها راجلك تفعدي ف سين وجيم ..
رتاج : هالزقاق هدا اف منه ياريتني نفتك من وجهه نادمة اني تجوزته
هالة : كنتي بتهبلي كان ماتجوزتيش
رتاج : وتوا بنهبل كان قعدت معاه

هالة : هدا نتيجة قرارك … اقعدي معاه واسكتي
رتاج : اخ بس كان انحصل هالشبوب وك عليا منه عالشعر اﻻصفر اللي عنده ايهبل عالعيون الملونات ماتفهمش شي
هالة : بالك تحلمي ب بريطاني ؟؟ ياودي ماعتقدش فيه ليبي بالمواصفات اللي قلتيها
رتاج : ان شاء الله ربي يجمعني بيه وخﻻص
هالة : تي اتحشمي راك متزوجة النهار المبارك … نوضي فزي خلي نمشوا لسوق ناخدو حاجات بعد غدوة مروحين…
رتاج: والله تعودت عالجو اهنا .. ليبيا مافيها شي ﻻ اماكن تريفيهية وﻻ واحدة
هالة : الله غالب شن بديري

الكابتن طيار : اعزائي الركاب لقد وصلنا وبحمد الله ل سماء اسنطبول سوف نهبط اﻻن يرجى ربط اﻻمان

عمر : انحس ف روحي جعاااان
ليال : تو نطيبلك حاجة بعدين
عمر : اهفتي شن طيبيلي تو نتغدوا ف مطعم الفندق

وهبط الطيار بطيارة… ونزل عمر وليال ف المطار استقبلهم شخص ورفعهم للفندق

ليال : محﻻها الغرفة
عمر : اي
ليال : عمر شن ادير
عمر : بنرقد ناعس
ليال : اللطف كيف ايجيك النوم هكي فيسع فيسع …
عمر : ايجي ايجي غير طبطبي عالمخدة هكي و حطي راسك هكي … ايواه … خﻻص …
Zzzzz ومشي فيها عموري نومة

خ وداد : شوره خداهم معاه يا حاتم
حاتم : ايه ممكن اتوقعي
خ وداد : باهي ياعمر به …
حاتم : احسن شي .. نكلموا فرج اكيد يعرف مكانه

ليال : عموري نوض ساعة 3
عمر : هاه تعالي ارقدي تعالي
ليال : ﻻ مانبيش نوض خلي نطلعوا
عمر : مافيش طلوع
ليال : عمر خيرك عالنوم سمله من كاتبلك كتيبة
عمر : 
{كتيبة مرة واحدة … ماقلتيش تعبان ناقص نوم حاجة … كتيبة عطك والله تكركيبة }
ليال : خيرك تشبحلي هكي
عمر : يعني كان ناعس وتاعب كاتبيلي كتيبة … بري امشي خشيلك ف تركينة من التراكين …اﻻيام اللي فاتت ماضقتش النوم
ليال : به
تلفلف عمر ف يرغانه … وقعمزت ليال عالكرسي تبكي وتنفنف

{اياح علينا عاد اهو بدت تبكي ششن ايحزها }
عمر : خيرك ليال
ليال : شي
عمر : غير خيرك
ليال : ياعمر ياعمر معقوووولة هكي ياعمر عاد بكل انت عمر
{ووووه عالزنين وووه}
عمر : تي بشوية خودي نفس بين كل كلمة وتانية
ليال : كل مانقولك حاجة اتكشخ عليا وحتى طلعة ماتبيش تطلع
عمر : باهي بطلي الصوت اهواه يشرين ف الدماغ خﻻص تو نطلعوا ف العشية واﻻ نقولك نوضي هي خلي نتغدوا برا
ليال : بجديات عمر بجديات اه قول عمر حقا بنطلعوا
{وووه على راسك ياعمر }
عمر : اسمعي نبرة الصوت هادي متع الزنين معش تدوي بيها مانتحملهاش حاد فوق الموجات الصوتية
ليال : هههههه حلوة فوق موجات صوتية

خ وداد : تي قول
فرج : مانعرف شي
خ وداد : تعرف بﻻ كدب هيا
فرج : مانندريش راه
خ وداد : تعرف كان ماتقولش مكان المرا ماني ماشية خاطبتلك البنت اللي تبيها
فرج : شن دخل هدا ف هدا تو
خ وداد : انا عندي يخش هدا ف هدا هاه شن قلت

هالة : شنو غدوة مراجعة متع امي واﻻه
رتاج : ايه …
هالة : اممم باهي خﻻص كملت شري حاجات …هيا نروحوا قبل مايروح سي البي ويديرلك مرداح
رتاج : فوتيه فوتيه مرداح حناه
هالة : باهي وامي خليناها راقددة تو تنشغل علينا
رتاج : نبي نخش مطعم انا جعانة
هالة : به بالك راجلك يروح ومايلقاش تعرفيه غيور
رتاج : يمشي ايملح اكبر غلطة ف حياتي اني تجوزته … اهواه مطعم السلطان احمد خلي نخشوله
هالة : احح باهي هي

فرج : النصيب على الله وانا مانعرف شي … وحتى لو نعرف مش حنقول وﻻ حرف
خ وداد : راسك يابس يافرج امتى بتتغير بس
فرج : وانتي حشرية و ماتحبيش الخير لولدك امتى بتتغيري بس
خ وداد : زمزاك وتقعد طول عمرك هكي نوض بالك من اهني
فرج :امروح اصﻻ كان نندري عليك مضبحة عليا عالموضوع هدا راني ماجيتكش

عمر : تي هيا … هيا ياليال
ليال : الوشاح بس
عمر : البسي هي
ليال : هي
{لفة اتنين تﻻتة اربعة ووشاح تاني ﻻﻻﻻ هلبا هكي }
عمر : شنن الوشاح التاني هدا
ليال : هكي خير
عمر : من اما ناحية
ليال : انحس ف راسي صغير كان مالبستاش
{الصبر يارب .. راسي صغير حق }
عمر : سقديني وراس امك
ليال : تميت هي

رتاج : شن بتطلبي
هالة : مش عارفة .. زعما دجاج بروست
رتاج : امممم ﻻﻻ انا بناخد نص دجاجة عالفحم
هالة : به اطلبي هي
رتاج : والله بنكلب بنكككلب
هالة : عﻻش
رتاج : بنهبل عليه شوفيه كيف رسمته … ستني ستني نطلعهالك الرسمة … كملتها … شوفي هاه
هالة : ابتهبلي انتي
رتاج : والله بنهبل عليه اول مرة نتعلق بحلم ب وهم زي هكي ياريته نحصل فانوس سحري .. ونطلب منه يجيبهولي .. ااااخ مريضة مانبيش حبوب مريضة مانبيش حبوب
هالة : اتحشمي ياهمي اتحشمي راك متجوزة خيرك

عمر : تعالي اهنا
ليال : به
{المعفن ايكحل فيها هالتافه غير ف بﻻد الناس كان هدا عفجته
طريحة ﻻ تاكل وﻻ تشرب }
عمر : شن رايك انخشو ل مطعم السلطان ايمن
ليال : ﻻﻻ انخشوا السلطان احمد
عمر : خيره ايمن من شن يشكي
ليال : ايمن المرش متعه معتم ومعبي غبرة اما احمد مهتم بنفسه ومرشه نظيف
عمر : ديما تقنعي فيا نوعا ما ذكية.. هي نخشوا ل السلطان احمد

هالة : ياقرررردة شوفي شوفي
رتاج : شنو
هالة : الرسمة ياحنارة اللي ترسمي فيها
رتاج : بري بﻻ تسهويك زايد
هالة : والله بجد غير شوفي
رتاج : ين وين
هالة : اووونه غادي … اهو يتقدم
رتاج : _

ليال : هكي قعمزت طووول …تبيش تجبدلي الكرسي واتقعمزني

{ايه جينا تركيا اوكي… لكن بش تتأثري بمسلسلاتهم ﻻ مافيش داعي }
عمر : قعمزي ياليال تو وقت انوضوا نجبدلك الكرسي ادللي
ليال : به اماﻻ ^^

هالة : ريحي روحك باين عليها مرته
رتاج : طز فيها مش شايفتها بكل

ليال : عمر
عمر : نعم
ليال : معاك انحس براحة سبحان الله ياربي هكي راحة تامة..
عمر : ايه وشن تاني
ليال : وانحس بروحي ديما فرحانة بيك هههه خخيرك تشبحلي هكي والله بجد..
عمر : حلووو ان شاء الله ربي يقدرني نفرحك العمر كله
ليال : ان شاء الله يارب .. امبكري نتفرج عليك وانت راقد … حسيتك زي البيبي نايم عطيتك بوسة ع خدك وانت فتحت عينك شووووية
وغمضتها
عمر : هههههههه غير تاعب والله كان هدا انقضيت عليك وريتك النشاب شن شكله
ليال : هههه مهبول واديرها

هالة : موتي باين عليهم متهنيين اونه يضحكوا وبعدين هني روحك وين تندري عليه شن جنسيته مايطلعلك مغربي واﻻ تونسي واﻻ مصري
رتاج : زعماااا … صح اي احنا مش ف بﻻدنا بش اتقولي ليبي … ايه ايه …ﻻﻻ ركبتيلي الشوشو خلي انوض نشوف
هالة : قعمزي ياحمار بﻻ عار
رتاج : انبحي

عمر : انا بنطلب وجبة نص دجاجة علفحم
ليال : زيك عموري
عمر : ﻻﻻ ماتاخديش زيي
ليال : عﻻاااش
عمر : بش اضوقيني وجبتك ب ايدك
ليال : هاااا به اماﻻ نطلب وجبة شاورما دجاج
عمر : تمام …

رتاج : غير ضمي فمك ياهالة تو انجي
هالة : حسبي الله ونعم الوكيل

وكيف طلب عمر وجبته ومشي النادل خطمت من جنبه رتاج ودارت روحها طاح نقالها تحت عمر
عمر : ياساتر
رتاج : حي نقالي
لملها عمر بتارية و كفر النقال ومدهولها
رتاج : حي عليا كما فسد
عمر : ﻻﻻ ان شاء الله ﻻ … طيحة بسيطة
رتاج : ان شاء الله … صحيت بارك الله فيك
عمر : فيك بارك الله

رجعت رتاج ل هالة وقتلها : موووتي ليبي هههههه
هالة : لتدكير فقط انتي متزوجة

ليال : حي نكالي سحيقة مصح وجها متزوجة و تتبسم
عمر : خيرها بسمتها حلوة شوفي هاه
وقت عمر قال الكلمة هادي رتاج كانت متلفتة ل هالة
وتلفتت فجأة
رتاج ل هالة : حي حي يشوفلي

وقت ليال قظشافت جيهة رتاج واختها لقت رتاج تشبح ل عمر وتبتسم …عمر نزل راسه طول بمجرد جت عينه ف عين رتاج

ليال : تو والنبي مطلعني بش تعاكس قدامي ياعمر … توجع اللقطة والله توجع
عمر : وحق ربي يا ليال وقت قتلك ماحﻻ ابتسامتها والله نبصر نبي نغيضك بس
ليال : شفت غيضي بعيني ياعمر .. تبادل ابتسامات .. كنت نتوقع اي شي اﻻ هادي …
عمر :والله ماصارت ياليال انا مش هكي
هزت راسها ليال وقالت : باهي به

{شن هالحظ ياربي كنت بنغيضها بش انحس بأحساس الحلو متع الغيرة انقلب الموقف وصار زعل }
عمر : خﻻص للوش عاد …
ليال : باهي عمر اوكي
عمر : باهي شن ايرضيك قولي هي !
ليال تشوفله وساكتة
عمر : به اسمعي انتي مش مصدقتيني ؟؟
ليال : مصدقاتك عموري خﻻص صار خير
{والله قلبها طيب الدعوة .. وعفوية وجميلة .. مش عارف عﻻش كنت نعامل فيها معاملة مش كويسة فترة الخطوبة وبعد الزواج }
عمر : ربي يحفظك

هالة : هي نوضي
رتاج :ﻻ مش حانوض لين انكلمه
هالة : اتكلمي طياح سعدك…
رتاج :والله مانايضتها لين نكلمه

ليال : عموري نبي نغسل ايديا .. تتعال معاي
عمر : ﻻﻻ بري فيسع خليني بحدا شنطتك وحاجاتك وقت ترجعي انوض انا .. مافينا متنضنا نهزو احنا اتنين للحمام ههههه
ليال : هههه به تمام

ناضت ليال وانتهزت الفرصة رتاج ونحت دبلتها وجت لعمر ومعاها الرسمة متعها
رتاج : عفوا لو سمحت
عمر : تفضلي
رتاج : انا مانعرفكش باهي .. وانت ماتعرفنيش لكن كان نقولك حاجة ماتصدقنيش
عمر : نعم شنو فيه
رتاج : انا نحلم بيك ليا شهر
عمر : شن الكﻻم هدا راك متجوزة
رتاج : هههه فال وعلى ربي الكمال مش متجوزة انا
عمر : به انا متجوز اماﻻ هي لو سمحتي امشي من اهنا
رتاج : شوف هاه حتى اني نرسم فيك كل يوم
طلعتله الرسمة ورتهاله وخدتها وطبقتها وحطتهاله عالطاولة ..
على طلعة ليال من الحمام وشافت رتاج واقفة ع عمر …

يتبع……

لقراءة الجزء التالي : الجزء العشرون من رواية محظوظ ولكن

لقراءة الجزء السابق : الجزء الثامن عشر من رواية محظوظ ولكن

للإطلاع علي فهرس اجزاء الرواية : رواية محظوظ ولكن ( جميع الاجزاء كاملة ) للكاتبة لوزة

جميع الحقوق محفوظة للكاتبة لوزة .