وفي الجزء الرابع عشر من رواية عاصفة الصمت دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء الرابع عشر من رواية عاصفة الصمت
ترررررن تررررن
صﻻح : الوو
صوت غريب : انت نفدت العملية عن طريق دراعك اليمين … الديناري واﻻه
صﻻح : منو … منو معاي
صوت غريب : مش مهم منو المهم بتنفدلي مهمة انت وياه يا نبلغ الميلن انك وراء هدا كله
صﻻح : منو معاي قلت
الغريب : بلقاسم الحبيب
*فتح عيونه صﻻح عﻻخير ماتوقعش شخص واصل وراس وقنقول ايكلمه ويقوله نفدلي مهمة *
صﻻح : ان شاء الله … مهمة شنو
بلقاسم : تعالالي ف المكتب في ليل عساعة 12:30 وتو نفهمك
*توت توووت توت *
شنشوبة : خيرك يااستاد صﻻح
صﻻح :ﻻ شي … روحوا خﻻص لحياشكم ارتاحوا وشوفوا اموركم ..
الكل : اوكي هي السﻻم عليكم
صﻻح : ديناري خليك
نزار : اوكي …
صﻻح :قعمز قعمز
نزار : تمام .
صﻻح : انا عارف انك تبي اتولي نظيف … بس مرات حاجات درناها في ماضينا تقعد اتلحق فينا … وماننكرش اني نبيك معاي بس وهادي اكيد رغبتك لكن تاتي الرياح بما ﻻ تشتهي السفن
نزار : القصد من هالكﻻم
صﻻح : مش حيخلوك في حالك يا نزار … اتصل شخص وقالك نبيك تنفدلي مهمة
نزار : انت قتلي اخر مرة شن اتقولي شخص ومهمة
صﻻح : هدا اللي صار
نزار : مش حنفد شي
صﻻح : ياديناري
نزار : ﻻ ديناري وﻻ عاشور مانيش داير شي
صﻻح : هدا ماينقالاش ﻻ
نزار : انا بنقوله ﻻ
صﻻح : ماكش قده
نزار : اعلى مافي خيله يركبه … سﻻم عليكم .
صﻻح : يقتلوك حتى القتل هادو
* وقف نزار ومتجه للباب ومايبيش يرد على القيافة *
صﻻح : اسمع مني… نزار خايف عليك ياولدي …
* طلع ركب سيارته نزار وهوا متغلغل ضرب عالستيرسو ويقول : عﻻش عﻻااااش تعبت والله تعبت منهم قريب انولع ف روحي ونرتاح.
*روح للحوش خلوقه في تل اتصل ب غادة ماردتش عليه فخش للمربوعة وكل حد يبي يخشله مايخليشي لييين جت ساعة 12:30 في الليل *
صفاء : طفي الضي يالبنى
لبنى : به خيره نزار
صفاء : مانعرفش بري شوفيه كان تبي سكري عليا الضي خلي ننخمد
لبنى : به شن فيه
مروة : بﻻ تزنزين يا لبنى خلينا نرقدوا
لبنى : باهي باهي اهو سكرته انخمدوا
*طلعت لبنى للمطبخ خدت عصير برتقال ومشت طقطقت عليه
لبنى : نزار .. نزار
نزار : بري يالبنى
لبنى : جبتلك عصير
*خشت لبنى عليه ولقاته مقعمز *
نزار : شن تبي
لبنى :خيرك نزار
نزار : شي … تره خليني فحالي
لبنى : باهي جبتلك طاية عصير
نزار : مش خاطري في شي
*قعمزت لبنى بكل تطفل وحطتله العصير قدامه وقتله : ماعمري ريتك مضايق بشكل هدا..
نزار : شي ايضايق …
لبنى : سامحني مش قصدي نتطفل عليك
نزار : مش عليك … بس هكي فبالي حاجات اضايق …
لبنى : فضفض …
نزار : والله شن بنقول ياضرسي خليها في القلب وخﻻص
لبنى : ربي ايهدي سرك …
نزار : اخ اخ اخ وخﻻص … انفكر ننتقل بيكم لجيهة تانية
لبنى : اللطف
نزار : قلت انفكر
لبنى : وين بننتقلوا
نزار : مش عارف والله ماعارف المشكلة وين مابنمشي بيلحقوني
لبنى : من بيلحقك
نزار : ناس تافهة …
لبنى : ماتحرقش دمك عليهم
نزار : يستر الله … راك اتقولي للعيلة اني بننتقل بيهم
لبنى : ﻻﻻ مش حنقول …
نزار : قوليلي لبنى … الشخص لما يدير غلط ويبي يتخلص منه عﻻش ﻻزم يقعد يﻻحق فيه الشي اللي داره … عﻻش مايفوتوش الموضوع ويديروا الحولة … تعبت والله تعبت
نبي نشتغل شغل نظيف ع راحتي
* وفي هده الجملة نسي ان لبنى بحداه *
لبنى : هﻻش انت شغلك مش نظيف واﻻ شنو
نزار : اه ﻻ قصدي في العمل الواسطة والمحسوبية والجو هدا مايدوروش عالكفاءة فهمتي
لبنى : كلها هكي يانزار عندك من فظهرك شخص اتعيش امير … ماعندكش هاوينه زيك زي اي مواطن ليبي تلقاه خامر ماهنداش شهادة اعدادي وحاطينه مدير
ركز نزار ل لبنى وقالها : شن مدايرة ف شعرك
لبنى : تصفيفة جديدة عجباتك
نزار : ههه هه هههههههههههه وووك عليا جنابي ههههههههههه
لبنى : قصدك مش حلوة
نزار : ههههه رايحة زي الديك الطلياني
* حرجت لبنى وولى وجها احمررر *
نزار : حرجتي ؟؟؟
لبنى : ﻻ عادي
مد اييه نزار فوق شعر لبنى ووقف ع ركبيه وقالها : ياحراجة اصبري هاه لو هادي التوكة اتنحيها خيرها علقت هيا
* علقت توكة لبنى في شعرها وهيا كانت قريبة من نزار تمنت لو ان التوكة اتزيد اتعنكش ف راسها بش اتكون قريبة منه لفترة *
نزار : خير جدها توكتك
لبنى : اي اي راك اتقطعلي شعري
نزار : معش بت تتنحى
* قامت يديها لبنى وصادفت جت فوق ايد نزار … والتقت اﻻعين عن قرب … لبنى سارحة ف نزار ونزار سرح ومش عارف روحه فاش سرح
نزل ايديه نوار وقالها : مابتش تتنحى
لبنى : تو نقصه بالمقص اصﻻ نبي نقصه شعري
نزار : ﻻ ماتقصيشي
لبنى : عﻻش
نزار : هكي … مش حلو شعر قصير … خلي صفاء اتنحيهالك وخﻻص
لبنى : به … حق نبوا كمبيوتر نيزو
نزار : كمبيوتر اممم باه تو ناخدلكم واحد
لبنى : بجد
نزار : ايه
القيافة : يااستاد بلقاسم … االشاب حاليا مريض … نفد المهمة هادي وهوا تاعب
بلقاسم : شن مرضه
القيافة : اه عنده اﻻيدز … خليه يعيش مافضله من ايام مع اماليه واحبابه
بلقاسم : به جسمه فيه اﻻيدز اماﻻ
ايخططلي وجماعتي اتنفد
القيافة : ان شاء الله حنقوله
بلقاسم : وبمجرد مانعرف ان خبر مرضه كدب …. ياويلك انت مع هوا
صﻻح : ﻻ مش كدب … حقاني
طلب مني ليك خليه بس … واي مخطط انا حاضر حنخليه يخططلك ف كل عملية ويعطي الدوار لرجالتك
بلقاسم : اممم باهي خﻻص تمام
ثاني يوم …
غادة : حبيبي نيزو
نزار : ياعيونه
غادة : امس طول الليل وانا نفكر فيك … وانشغلت عليك
نزار : عﻻش
غادة : خفت عليك
نزار : من شنو
غادة : مانعرفش انت قتلي ماحدش ضامن عمره ومش عارفة شنو
نزار : ﻻﻻ ماتاخديش فبالك .. غير امس خاش عركة مع شباب
غادة : حسيت هكي … معش اتخش ف عركات نيزو … شن تبي فيهم
نزار : اهو المهم شن جوك
غادة : باهية امي باعتتني للمحل … شن رايك نشوفوا بعض
نزار : ياريت … امت بتطلعي
غادة : مع ساعة 12 هكي
نزار : حﻻص انكون مشيت لشركة وشفت اموري ونجيك بحدى السوق
غادة : اوووكي باي حبيبي
نزار : بايات ياقلبي
خ رقية : نزار ولدي وين ماشي من الصبح
نزار : بنمشي نشوف الشركة اللي قدمت فيها بالك صارت حاجة
خ رقية : اه به ربي يفتحها ف وجهك
نزار : ان شاء الله … مانوصي بشي
خ رقية : جيب خضيرة وانت امروح
نزار : باه ان شاء الله …
* وكيف نزار بيطلع جاته لبنى *
لبنى : نزار … نبو نطلعوا انا ومروة وصفاء … خلينا هالمرة
نزار : وين ؟؟؟؟
لبنى : محﻻت اللي فجيهتنا …
نزار : اكتبيلي شن تبي تو نجيبلكم
لبنى : ﻻ عاد هادو اكسسوارات وحاجات نبو نختارو على عينا
اليوم عرس بنت حليمة
نزار : تو نجيبلكم اكسيوار واﻻ مش عارف شن هوا
لبنى : نزار !
نزار : لبنى !
لبنى : بالله عليك
نزار : باهي باهي وقت انروح نرفعكم اخﻻص
لبنى : باهي اوكي
الفتنة : انا قتلك وخﻻص يستنوا فيه بس على غلطة الديناري متاعك كلهم متحلفين فيه
القيافة : تي معش ولى من رجالتي افهم
الفتنة : ﻻ فاهم … اتنفدوا من تحت لتحت وزعميتك نظيف مع تايد الجديد مافيش مستحيل
صﻻح : وبه انت من الكﻻم هدا كله شن بتستفيد
الفتنة : ﻻ مش موضوعي الديناري جايك بش نولوا شراكة في الخدمة الحلوة رجالتي ع رجالتك سمنة ع عسلة ونخدموا مع بعضنا
صﻻح : معناها عندك عداوات وجاي اتربط ف حبالك بش يبدى عندك ظهر
الفتنة : باهي شن ماتبيش قصدك
صﻻح : انت عارف ردي يافتنة
اكيد مانبيش
الفتنة : به به … ع راحتك يالقيافة
صﻻح : اكيد ع راحتي … وكان بتفتن اهنا واﻻ اهنا نعرف سن نديرلك …. ملفاتك القديمة عندي … ودوتك عالقايد مسجلة
الفتنة : باهي باهي وانت كل مادق الكوز بالجرة دوتك مسجلة خﻻص ماشي هاه
صﻻح : امشي ومن غير فتنة
* طلع الفتنة وهوا ايدور في مشكلة ايلفقها للقيافة …. فمعش عرف شن ايدير فقرر انه يتبلى على صﻻح عند الميان ويقوله …. اتصل بالميلن وقاله القيافة هوا اللي طب عليك ودارلك عملة متع المصنع ….
الميلن : من قالك يالفتنة ؟؟؟ بالك تبي اتوقع بيني وبين القيافة
الفتنة : تي شن انوقع بينكم فكر فيها … من يقددر ايدير حاجة زي هادي للميﻻن قولي اكيد شخص عنده تريس تحته ومش اي تريس تريس يخطط ويخطط مليح بكل
والشاطر يفهم
الميلن : ديناري قصدك !
الفتنة : ومن غيييره …
الميلن : ﻻﻻ عصابة الراس هادي … مايديرهاش فيا القيافة
الفتنة : القبافة واحد مصلحجي ايهمه نفسه … عموما انا قتلك وخﻻص … وانت وراحتك … سﻻم يالميلن
* حط النقال الميلن على الطاولة وقعد ايخمم … زعما اللي قاله صح ! ﻻﻻ القيافة مايديرهاش الفتنة يبينا نتعاركوا ….لكن عصابة الراس مايتجرئوش يديروها … عصابة الراس يخنبوا ف فلوس بس مش حشيش و ي ح ر ق وا المصنع بش معش نضارب عليهم …. كان نتحقق من موضوع ويطلع صح مامظل اﻻ مصفيهم واحد واحد
ساعة 11:35
غادة : حبيبي انا كيف وصلت السوق انت وين
نزار : اهو قريب نوصل زحمة بس … وعندي ليك خبر حلوة وحاجة حتعجبك
غادة : قولي حبيبي
نزار : ﻻﻻ وقت نوصلي يﻻ باي سويتي
غادة: بايات
حنين : غادة … شةفي هداكا
غادة : بﻻ معكسات
حنين : معاكستاش هوا من بكري يشوفلي …. به ارزني وخلي نخشوا السوق ..
*شوي تاني بعد ماخشوا خش وراهم الشاي *
الشاب : يابنية يابنية … خودي لرقم بس
غادة : ماتتلفتيش
حنين : تي اسكتي خليني
غادة : بش عندك حسن
حنين : متعاركين
*تلفتله جنين وابتسمتله وخدت الرقم ومشي الشاب
غادة : ارتحتي او
حنين : ايه ارتحت
نزار : الوووو
غادة : اهلا
نزار : وين انتي
غادة : ف قسم الغدائية
نزار : جاي هي
* دورها نزار لين لقاها ومشالها *
غادة : كيف حالك نيزو
نزار : تمام بشوفتك وانتي ياقمري
غادة : الحمدلله كويسة … قولي شن الخبر الحلو
نزار : اممم الخبر الحلو قبلوني في الشركة
غادة : الحمدلله ياربي الف الف مبروك ياروحي
نزار : الله يبارك فيك ياعمري
والحاجة القنينة …. هادي تفضلي هي
غادة : شن هيا
نزار : شوفيها بعدين .. يﻻ ردي بالك ع روحك نخاف يشوفك حد من اقاربك . .. ردي بالك ع روحك و ماتعطليش ف السوق باهي
غادة : خليك شوي تاني … ديما كل ماتشوفني افل من دقايق وتمشي
نزار : مانبيش حد يشوفك يامهبولتي
غادة : مايحي حد اهنا من اقاربي
{ياهمي شن بنقولك نخاف حد من الدرهات شوفوني معاك ويدبروا فيك شي اخخخ ياغدوش واﻻ تحسابي انا مانتقطعش ع خاطر مانقعدش معاك هلبا بس الله غالب}
غادة : دودي وين سرحت
*لمح نزار شخص ﻻبس نظارات وشاد ولده عمره في جو 8 سنين … كيف خش من السوق وعينه عليه وجاي جيهته .. فقرر ايدير فيلم وقال ل غادة : اللي يسئلك انتي ماتعرفينيش اوكي غادة : عﻻش
نزار ؛ ديري زي مانقولك …
غادة : به به اوكي
* والشخص يتقدم بتجاهم فعلى صوته نزار وقال : انتي خيرك اتلحقي فيا من بكري اتحشمي مانبيش نكلمك ….
سمعت حنين صياحه فجاته وقتله : خيرك اتكشخ عالبنت
* تلفت نزار ومشي وقدامه تﻻجة مرش يشوف ف تحركات الشخص جي جيهة غادة وفاتها ومشي ..
* قعد نزار ف السوق يراقب في غادة خايف عليها لين طلعت وطلع نزار وراهل وركب سيارته ومشي وراها وماطمنش اﻻ وصلها للحوش وان مافيش حد يلحق فيها …..
حنين : خير بﻻه كشخ عليك
غادة : مانعرفش خيره سرح فجاة بعدين زي اللي شاف شخص اتلكمس
حنين : قصدك خايف من حد ايشوفه
غادة : ﻻ بس نتوقع واحد من اللي دار معاهم العركة امس مش عارفة الحق عﻻش دار هكي
حنين : عركة شنو
غادة : تو نحكيلك بعدين
حنين : به وريني شن جابلك
غادة : اي هي خلي نشوف
حنين : محﻻااااها ياكلبة هادي اللي مرة حكيتلك عليها قتلك محﻻت اول ستمبرر ايبيع في بلوزات حلوات
غادة : هههه اهو طلعت حظي انا… ياوخيتي سلمه خلي انوض انقيسها
نزار : لبنى …. صفاء وينكم
لبنى : انعم … بنرفعنا توا ….
نزار :ﻻﻻ جبتلكم معاي اخرابيش تعالو شوفو
صفاء : خرابيش شنو
مروة : اكيدة اكسسورات ههههههه
لبنى : بش قلت بترفعنا
نزار : ﻻﻻ صار موقف قدامي هكي مايطمنش
لبنى : مواقفك ﻻ تنتهي نزار
نزار : ضرسي معش اتندكي ع روحك شن تبي في المحل …. جيبيلي خو يدلل خواته هكي
لبنى بكل تعصب
ونبرة حادة قتله : مش اختك انا
نزار : به ياجداي اهو جبتلكم المحل لي عندكم اختارو اللي تبوه وين
*لبنى تربطم بكلمات غير مفهومة تسحن ع نزار *
نزار : وين امي وخالتي
مروة : ف دار الخزين
* مشي ل امه وخالته وعطاهم تاكم ذهب ل امه وتاكم فضة لخالته ام لبنى اغتاضت وماعجبتهاش اللقطة ونزار ماكانش قصده غير مش رافع معاه فلوس فاطر ياخدلها فضة *
القيافة : الو
نزار : انعم
صﻻح : نوض فيسع وتعال نبيك
نزار : خليني بالله عليك مانبيش نشتغل
صﻻح : والله مازال اتكلمني بطريقة هادي مامظل اﻻ قاتلك نوض فيسع وجهك لعندي
نزار : ان شاء الله ان شاء الله سﻻم
{استغفر الله العلي العظيم … الصبر انا قريب انهج من هالبﻻد وخﻻص المشكلة وراي عيلة الصبر وخﻻص }
* طلع نزار بتوتة اللي عليه وحط سﻻحه فخسره و بوخوصة في جيبه ولبس شبشب صبع وطلع *
الميلن : اليوم …يخي تواااا توا اطبوا عليهم فاهمين ….
مهند : باهي كيف يااستاد بطب عليه شن بديرله
الميلن : اقتلوا واخنبوا واحرقوا
مهند : والديناري
الميلن : اقتلوه شن خايفين منه
مهند : خطير الديناري ماحدش يقدر عليه
الميلن : امك الخطيرة ابتمشي تلم جماعتك كلها وتمشووووله
مهند : باهي حتى ولو تاكدت انت انه هوا القيافة دارها
الميلن : كل الخيوط اللي فعقلي ادل عليه ادل عليه هوا مصنعي فلوسي بضاعتي كلمتي قدام التجار * ناضت عليه الهستيرية *
مهند : غير هدي اعصابك
الميلن :يا حشمتي قدام الناس الميلن خسر بضاعته وفلوسه يا وووووه هاتلي الحبة الحبة يامهند الحبة
مهند : هيا هي … دقيقة بس
غادة : تي فكيني ياحنين بﻻ جو مش حنعطيك النقال راهو
حنين : ماخصنيش فيك انا مكسدة ونبي نكلمه
غادة : تي انتي امتى عرفتيه بش حتى تتصلي بيه وبتهدرزي
حنين : تي بش انا وياك امبكري وعطلني الرقم
غادة : ايه لكن مش بش تتصلي بيه
فكيني غير يزبط نزار ويديرلي مشكلة
حنين : افففف منك وكيف بيزبط هي
غادة : مش عارفة
حنين : انتي ديما خايفة من نزار اترعي منه تعالو نطلوا ﻻ فكني نزار … تعالي نمشوا مكان بعد المدرسة ﻻ نخاف يشبحني نزار … تعالي نعاكسوا ﻻﻻ مصحك و نزار اف فددتيني نزار نزار نزار
غادة : انحبه مش مني
حنين : به بتعطيني النقال واﻻ ﻻ
غادة : ﻻ
حنين : ووووه والله معش نكلمك راه وﻻ عاد انجيك بكل…
غادة : خيرك هكي
حنين : خﻻص بﻻش معش نبيه تلفونك
غادة : باه هاك وقوليله ماتعاودش
حنين : مانبيش
غادة : تي خوديه … هاااك
حنين : باهي …
09250688**
حنين : الو مساء الخير
الشاب : توا صباح ياحلوة مش مساء حنين : به صباح الخير
الشاب : صباح الورد من معاي
حنين : انا اللي امبكري عطيتني الرقم …
الشاب : اه ايه ادكرت شن اﻻخبار
حنين : الحمدلله بخير
الشاب : شن اسمك
حنين : اسمي اممم
الشاب : شن اتفكري اماﻻ
حنين : ﻻﻻ شنو معقولة بنفكر ف اسمي ههه اسمي عفاف
الشاب : عاشت اﻻسامي …
*وصل ديناري ونزل من سيارته
نزار : خير ياشباب
زهير : خيرات يامعلم انستنا
شنشوبة : خيرات ياطيب
* خش نزار للقيافة *
الشاب : ايه شن قتيلي
حنين : ماقتليش اسمك
الشاب : اسمي زهير
يتبع……….
لقراءة الجزء التالي : الجزء الخامس عشر من رواية عاصفة الصمت
لقراءة الجزء السابق : الجزء الثالث عشر من رواية عاصفة الصمت
للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
