الجزء الثالث والعشرون من رواية عاصفة الصمت

وفي الجزء الثالث والعشرون من رواية عاصفة الصمت دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .

الجزء الثالث والعشرون من رواية عاصفة الصمت

{جذابة هالبنى … فيها شئ جميل جدا يصعب وصفه}
شد اطراف شعرها وكعادته بتصرفاته العفوية مع لبنى ﻻ اراديا حطه على خشمه وغمض عيونه و استنشقه بقوة واندفاع …
ومع استنشاقت نزار.. لبنى غمضت عيونها وارتعشت ارتعاشة بسيطة.. حست بأنفاسه اداعب رقبتها …..
لبنى : محﻻ انفاسك
* استاقض لنفسه نزار ورخي شعرها … وقالها : هههههه اتسهوكي عاد هي 
لبنى خجلت مشتها بضحكة : ههههه
نزار : محﻻ انفاسك ههههه شفشة
لبنى : ايه قصدي المستكة المينتا اللي تاكل فيها
نزار : ماناكلش ف مستكة انا o_O
لبنى : اماﻻ يتهيئلي 
نزار : ههههه  …
لبنى : اسمع اسمع
نزار : شنو شنو
لبنى : هات ايدك
نزار : عﻻش
لبنى : نقرالك كفك
نزار : سحر هدا واﻻه
لبنى : سحر عينك كان نعرف نسحر ماهدا حالي
نزار : باه هاه اقري هي

* شرين تلفون نزار بنغمة 007 ههههه مصدق روحه
نزار : شوية بس ضرسي
لبنى : به
نزار : اها سفيان
سفيان : احنا قدام الحوش
نزار : يارديف قتلك وراء الحوش بﻻ عار … ماتقوليش شنشوبة يلف ف حشيشة
* قالها بالهمس كلمة اﻻخيرة *
سفيان : ايه كيف عرفت
نزار : مصحك انت وياهم اقلبوا وجوهكم ف شارع التاني خير مايشوفكم حد من جيران
سفيان : هههه باهي هي
نزار : وشوية وجايكم … سﻻم

لبنى : صحابك
نزار : ﻻﻻ صاحبتي … خلي ناكل النص فيسع
لبنى : به رد بالك على روحك يانزار
نتش نزار النص ومشي نصه
لبنى : بشوية عليك
نزار : مستعجل طلعيلي تيشرت فيسع
لبنى : به هي …
* كمل نصه ولبس تيشرته وكيف بيطلع من الدار رجع وقال ل لبنى : اسمعي راك اتقولي ل امي اني طالع بنتعارك مع حد باهي
لبنى : ﻻﻻ مش حنقول ..غير رد بالك ع روحك
نزار : ان شاء الله … سﻻم

لبس نزار سبيدروه قدام الباب وطلع مشي لشارع الخلفي وركب مع جماعته *
حاتم : شنو فيه ياديناري قالي سفيان امر مهم
نزار : مهم نوعا ما
سفيان : وين الطريق
نزار : مانعرفهاش …
شنشوبة : اماﻻ كيف
نزار : زهير جي ؟؟
سفيان : اونه مقعمز التالي
نزار : زهيرووو ههههه والله ماريتك السمينا شنشوية امدرق عليك
زهير : ايه الفيل والنملة حق
نزار : ههههه ﻻﻻ حشاكم … من يعرف حوش الكوالي ؟؟
سفيان : تقريبا نزبطه
نزار : خﻻص ادعس هي
سفيان : تم …

غادة : حنين
حنين : شنو
غادة : مكرم
حنين : خيره
غادة : يبيني
حنين : شن جد عليك ماه ديما يبيك هوا
غادة : بس انا مانبيشي
حنين : تي امبكري الصبح كنتي اتقوليله انحبك انحبك
غادة : تي مش ليه انا شورني نهلوس من الحرارة وهوا جي قدامي ماندريش حتى عليه
حنين : انا مش عاجبني نزار كات تخليك مع مكرم خير
غادة : بس انا مانبيشي مكرم .. نبي نزار
حنين : ع راحتك
غادة : ومكرم الزقت مدكرلي السراكة الحرفة متع زمان
حنين : ماتقوليليش ايام السطح
غادة : ايه مش عارفة شن كنت انحب فيه هالدراه هدا
حنين : من يشبحك بس اﻻيام هديكا كنتي اتبيتي ع حاتم امتى يطلع يسهر مع صحابه وتركبي تتجاري لمكرم وقت كان يربي ف الحمام فوق
غادة : فيش داعي ادكريني خﻻص حب طفووولة كان عمري 14 العام راهو
حنين : انتي حبيتيه من كان عمرك 12 لى14 وتوا 16 شن فات يعني
غادة : فكيني منك ومنه وفوق من هدا كله قالي ماحد مسكر عليك باب غيري
حنين : يﻻ وخﻻص بوي قريب ايجي

نزار : هوا هدا الحوش ؟؟
سفيان : ايه
نزار : انزلوا هي … شنشوبة وحاتم وزهير وراء الحوش سفيان انت معاي … وكان جو من وراء الحوش صفرولي وكان العكس تو نصفرلكم
سفيان : الباين الحوش فاضي ياديناري
نزار : الضي مطفي صح … تره لود وراء الحوش يا شنشوبة شوف كان فيه ضي … وطفي هالحشيشة مش وقته
شنشوبة : ﻻزم نعدل الدماغ ياديناري مانقدرش نتحرك كان هدا
نزار : به برا امشي

* مشي شنشوبة ورجع وقال : مافيش ضي
نزار : هد الحوش تره بالك خشولهم وقتلوه وطلعوا
سفيان : خيرك ديناري بتركبنا تهمة هكي
نزار : ﻻﻻ مافيش تهم ان شاء الله هده يا شنشوبة
* هد شنشوبة الباب وخشوا ظﻻم داااامس … طلع نزار سﻻحه .. واشرلهم زوز يمشوا يسار وزوز يمين … وان هوا حيكمل طريق طول …
بربش نزار لين لقي تاكو الضي فتحه ….
جاه شنشوبة وزهير وقالوا : امان
حاتم وسفيان : امان
نزار : يا الحوش فاضي حق ياام كمين واحد من اتنين
* سمع نزار صوت حركة جاية من تحت … اشرلهم اششش … وتعالو وراي … مشي نزار بكل حذر ولقي زي الدروج نزل منه … وهد الباب برجله …لقي الكوالي شاد سﻻح ومصوبه ع مزار ونزار تفس الشي …

نزار : نزل سﻻحك
الكوالي : اه ديناري والله خلعتني
نزار : من انتا ؟؟
الكوالي : انا فيصل … الكوالي
(شاب في 35 من عمره حنطي البشرة قصير القامة ويلبس نظارات طبية وصوته رقيق شوي )
* شاف نزار وراء الكوالي لقي طفلة صغيرونة وشادة دبدوب وخايفة *
الكوالي : والله ماحسبتش انك حتجي مشكور بارك الله فيك
نزار : والله على خاطر هالبنوتة بس كان هدا والله ماجاي
فيصل : ربي يحفظك
زهير : شن اسمك ياحلوة
نزار : تره اسكتوا شوية … خليتوا الباب مفتوح
شنشوبة : ايه تقريبا
نزار : كوالي خليك مع بنتك اهنا
كوالي : ﻻﻻ بنجي معاكم انا مصرر
نزار : باهي حاتم خليك مع البنية وسكر الباب كويس
حاتم : اوكي
نزار : والباقي وراي
* طلع نزار ووراه الكل …
وصارت معركة عنيفة … الجماعة اللي جابة اكثر عدد من جماعة نزار … شنشوبة انضرب برصاصة ف رجله … نزار حفت رصاصة على فخده بس ماخشتش فيه … صوب نزار وبكل خفة ضرب شخص اتنين تﻻتة اربعة وطيحهم
انخدش نزار بخوصة في جنبه الموجوع … شد نزار يد الشخص وعصرها لين طيح الموس متعه
وضربه بونية والشخص زبط نزار موجوع في جنبه فعطاه بونيتين ع جنبه … طاح نزار مستاجع جابله الشخص شيتا ( بالطة ) وبيغرها ف نزار …. طلع نزار مسدسه وعطاه رصاصة فبطنه طاح الشخص والتوى نزار ع نفسه متوجع من جنبه وضلوعه ….
استمرت المعركة هادي قريب ساعة وربع …
انسحبوا البلقي من جماعة اللي جاية ضد الكوالي …
الخﻻصة من هده العركة … شنشوبة مضروب برصاصة في بطنه … سفيان مغروز ب خوصة في كتفه … زهير مشلوط في وجهه … نزار موجوع من جنبه ورصاصة حفت على فخده … الكوالي مضروب على عينه …

فيصل : والله ماني عارف كيف نشكركم ….
نزار : المهم سﻻمة بنيتك
طلع حاتم بالبنت … وروح نزار وجماعته …. حطوا شنشوبة ف المستشفى واستنوه لين طلع الرصاصة …
الدكتور : ﻻزم نعرف شن السبب مطر نتصل بشرطة … مرات اجرام
نزار : طلع الرصاصة ومن سكات
الدكتور : نطلعها لكن بنتصل بشرطة
نزار : يكون اخر يوم ف حياتك
الدكتور : تهددني
نزار : سميه كيف ماتبي تلفون واحد وتلقى روحك وراء الشمس
الدكتور : من انتا اصﻻ
نزار : حتى قلت اسمي ماعتقدش حتعرفني ….. عموما طلعله الرصاصة ومن سكات وبنلقاك متصل بشرطة عادي هما حيشوفوني حيولوا من نفس المكان اللي جوو منه وانت اللي حتحصل فيها … واهو قتلك وانت وراحتك

* خاف الدكتور من نزار ومن مﻻمحه الجادة …
فقاله : باهي به
نزار : ديرله بنج موضعي
الدكتور : تعال نحيها انت وخﻻص
نزار : ﻻ دير زي مانقولك بنج موضعي مش تام
*نفذ الدكتور كﻻم نزار *
وبعد ساعة …

نزار : نوض بالك
شنشوبة : خليني انبات اهنا
نزار : اتبات عينك نوض فز …
* ساعد سفيان شنشوبة وروحوا الكل لحياشهم ….

ومع ساعة 1 فتح نزار الباب بشششوية وخش … لداره اتلوح عسرير ومشي فيها نومة من التعب

* خشتله لبنى وحساته تاعب راقد زي الطفل …. قعمزت على طرف سريره مسحت على شعره وبتغطيه

نزار : ته ته تاعب ياض ياضرسي خليني
لبنى : بنغطيك بس
نزار : شن بتعطيني
لبنى : بنغطيييك
نزار : متفرجة ع تركي شورك الجو نو مش شتي يالبنة
لبنى انحرجت وقتله : به به تصبح ع خير
* كيف بتمشي شدلها
يدها وقالها : لبنة طيرتيلي النوم شن باخة
لبنى : صنة
نزار : صنة ف الليل
لبنى : ايه
نزار : شورك بطيحيني ههههههه
لبنى : هههه ﻻﻻ منزومة بيك
* جبدها نزار وقالها : غريبة البنات يتجارو عليا
* مع ترقيصة حاجب *
رخت ايدها لبنى من قبضة نزار وقالت : ههههه انا ﻻ
نزار : زعمك او
لبنى : ايه
نزار : اممم به …
لبنى : هههه باهي عﻻش ينعجبوا بيك … بالك انت تناشب
نزار : امممم تبي الحق
لبنى : اكيد
نزار : مرة واحدة بس ناشبت…
لبنى : مرة واحدة ….
يﻻ تصبح ع خير
نزار : خيرك ..
لبنى : ﻻ شي غير ناعسة بنمشي نرقد
نزار : احيييه اييي
لبنى : خيرك شن فيك
نزار : بري جيبيلي فاشة و حاجاتك بنطبب روحي
لبنى : سﻻمتك شن عندك
نزار : جنبي موجوع وفخدي مجروح لبنى : توا كنت ناعس وبترقد خطرلهم يوجعوك
نزار : كان النوم غاشي عليا وصنة اللي باختيها شرينت ف الدماغ طول لبنى : باهي دقيقة هي

* جابتله لبنى الحاجات وحطتهم جنبه وقتله : تبي شي تاني
نزار : ﻻﻻ ياضرسي صحيتي
لبنى : عﻻش اتقولي ضرسي …
نزار : مش حنقول
لبنى : نزار
نزار : ههه مش حنقول بري ارقدي امشي ليل عليك
لبنى : باهي يﻻ سعيدة …
نزار : سعيدة ومعش اتبخي صنة
لبنى : هههه

ثاني يوم نزار راقد ايشخر يجبد وايرد … جاه تلفون مرة واتنين وتﻻتة بلقاسم يتصل بيه وهوا شي ….مايندري عليها منين زارقة …

القيافة : حي علمه حيييه
سفيان : شنوو فيه
القيافة : عمك الحاج يتصل بنزار ونزار متبلد مايردش
سفيان : عمك الحاج هدا واصل او
القيافة : ايه ايه
سفيان : باه شن الراي نمشيله
صﻻح : اصﻻ ف خﻻل مانتكلموا اكيدة بعتله حد …

طق طق طق طف طف طف

خ رقية : افتحي الباب يالبنى ..
لبنى : هيا هي …. اهو بنفتح
* فتحت لبنى الباب واد به شخص حليق انيق … ذو عضﻻت وسيم
ب ابتسامة عريضة : السﻻم عليكم
لبنى : وعليكم السﻻم …
شاب : نزار قاعد …
لبنى : ايه قاعد … شوية بس من انقوله
شاب : قوليله رامي ..
لبنى : حاضر هي …
* مشتله لبنى وفيقاته وقتله عالشاب *
نزار : ماقالكش منو
لبنى : اسمه نزار قصدي رامي
نزار : مانعرفاش بري قوليله راقد امشي … قوليها من وراء باب راك تطلعيله
لبنى : به شوية بس …

لبنى : نزار راقد راهو
رامي : به قوله نوض
لبنى : راقد اللطف
رامي : قوله انا من طرف ب ح .. ولو ماجيتش معاي حيصير شئ مش كويس
لبنى : باه باه شوية بس

* مشتله لبنى وقتله عاللي صار *
نزار : ب ح تي منو …اه بلقاسم ايه ايه خﻻص لبنى اهو طالعله هي
لبنى : باه
* غسل وجهه نزار وطلعله
نزار : صباح الخير … تفضل ياخوي
رامي : صباح النور … اﻻستاد بلقاسم يتصل بيك من بكري وانت ماتردش …
نزار : كنت راقد بس
رامي : باهي هيا تعال معاي ببيك
نزار : شوية بس ناخد دوش وانبدل … استناني
رامي : تمام نستنى فيك في السيارة
نزار : تمام …
* وعسريع دوش نزار وبدل لبس سورية وسروال وطلع مع رامي
ورفعه رامي ل بلقاسم ….
رامي : استنى اهنا
نزار : باه اوكي
* خش رامي من باب مكتب … وبعد شوي طلع
رامي : تفضل هي …
* خش نزار للمكتب … مكتب فاخر اثاته فاخر … صور معمر تملئ المكان … *

نزار : السﻻم عليكم
بلقاسم : وعليكم السﻻم … كم مكالمة لقيت مني
نزار : خمس مكالمات … ومعليش كنت راقد ونقال صامت
بلقاسم : تفضل قعمز
* فتح نزار بطمة الجاكيت وقعمز وقال : معليشي بنسئلك
بلقاسم : ماحدش غيري يسئل اهنا
نزار : بس لو ان سؤالي مش ضروري ماكنتش حنقولك بنسئلك
بلقاسم : اسئل هي …
نزار : عملي كمهندس عﻻش لغيته .. كنت حنشتغل مع العشية لليل عندك و في الصبح في الشركة
بلقاسم : انا هكي اريحلي … اتكون متفرغ تماما … وراتبك حيكون ضعف الراتب اللي حتتقضاه من الشركة
* كيف جاي بيكشخ نزار ادكر كﻻم القيافة … فسكت *
بلقاسم : منين جاك اﻻيدز ؟؟
نزار : اه … في مداهمة من المداهمات … بنضرب شخص فا غرزلي يبرا كاتت حتجي في عيني بس انا حولت شوية فاجت في رقبتي …
بلقاسم : امممم …
* رشف رشفة بلقاسم من النسكافية وفتح القجر … طلع مفتاح ولوحه عطاولة قدام الديناري وقاله : هدا مفتاح مكتبك … مكتب استشارات هندسية … هوا المكتب نوعا ما وهمي… حطيتلك زوز رجالة كويسين في التنفيذ…رامي حيكون ديما معاك…شاب كويس حتستفيد منه و وليك كامل الصﻻحيات في تصرف ..
نزار : يستر الله
* شاف لساعته بلقاشم وقال : تقدر تمشي توا … واي مهمة حيجيبهالك رامي في ظرف اقراع وابعت لتنفيذ … بدير اي شي دير ماتجينيش اهنا بكل انساه المكان… الشرطة مش حتتعرضلك … وكان طحت في ورطة كبيرة ماتتكلمش انا حنطلعك منها
نزار : تمام
بلقاسم : اهم شئ الدقة واحترام المواعيد … تقدر تتفضل
نزار : سﻻم عليكم

* طلع نزار من عند بلقاسم وخداه رامي عالمكتب متعه ولقي سالم ومكرم موجودين والتقى الشخصان الذان يريدان نفس الفتاة ….

نزار : السﻻم عليكم .
مكرم وسالم :وعليكم السﻻم …
* مكرم ينظر ل نزار بنظرات حقد وبغض … على خاطر بلقاسم حطه تحت نزار … فتح المكتب نزار وخش وخشوا وراه هما التﻻتة
قعمز نزار والكل قعمز …
هدرز عليهم نزار وفهمهم طبعه ونمط عمله وكيف ايتم تنفيذ الخطط بدقة … ومن تاني يوم جابله رامي ظرف لنزار … وخطط ومكرم وسالم ورامي اينفذو بتمام …فات شهر…شهرين واستقوى نزار وتوسع نطاق عمله في كل مكان .. وطبعا مانساش القيافة يحسب فيه في كل شي ومرات يخططله… وبلقاسم فرحان بديناري … فاتت عدة اشهر … وطلعوا من سنة 2007 وجت سنة 2008 واتخرجت غادة من الثانوية وسجلها نزار في الجامعة تخصص طب بالواسطة والمعارف برغم ان درجتها كانت اتخشش علوم بس .. لبنى ومروة وصفاء قاعدين الحال كما هوا عليه … ﻻ شغل وﻻ شي خايف نزار عليهم… وخايف حد ايطق فيهم ويلويله ايده بخواته وبنت خالته… ومازال نزار معتبر لبنى زي اخته وطاير بحب غادة … ومكرم مجنون بغادة … رامي اعجب تماما ب لبنى … وعلى قد مادار عﻻقات قاعدة لبنى مرسومة فباله من لما فتحتله الباب
ووصلنا في 2009 اي ان اعمارهم
نزار >> 34 العام
صفاء ومروة >> 27
لبنى >> 26
غادة >> 18 العام …
شهر 2 … يوم اﻻحد … الساعة 4
مساء … ام لبنى مريضة ليها شهر ..عاينها نزار في كدة مصحة … بس كل مصحة اتقول مرض شكل
فقرر انه يرفعها للمعاينة برا

نزار طالع من داره فتﻻقى مع لبنى ف الممر فقالها : شنو كيف حال خالتي …
لبنى : قتلي خليني بنتكى شوي
نزار : به خلي نخشلها نقوللها حجزت تداكر بش بنسافر بيها
لبنى : بالحق نزار ؟؟
نزار : اي بالحق … الدكاترة اهنا مايفهموا شي ﻻزم نطلعها
* فرحت لبنى وقتله : به ..خش قوللها …. اكيد حتفرح …
نزار : هي …
* مشت لبنى قعمزت جنب خالتها وصفاء ومروة ونزار خش لخالته …
نزار : كيف حالك خالتي توا
خ سميرة : باهية اهو….
بالله نزار …رد بالك ع بنتي
نزار : شن اتقولي ياخالتي ربي ايطول ف عمرك ان شاء الله
خ سميرة : غير رد بالك عليها بش
نزار : ماتخافيش ضرسي في عيوني سومها من سوم خواتي صفاء ومروة
خ سميرة : ريحتني …. جيبلي ….جيبلي اميا عطشانة
نزار : ان شاء الله هي

* مشي نزار جابلها اميا ووقت
نزار : خالتي … خالتي رقدتي … خالتي جبتلك الميا …
* حط نزار الطاسة … وهزها مابتش تستجيب فعرفها اتوفت

يتبع………

قراءة الجزء التالي : الجزء الرابع والعشرون من رواية عاصفة الصمت

لقراءة الجزء السابق : الجزء الثاني والعشرون من رواية عاصفة الصمت

للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة

جميع الحقوق محفوظة للكاتبة لوزة .