الجزء الرابع عشر من رواية همس العيون للكاتبة لوزة ليبية

وفي احداث الجزء الرابع عشر هل يا تري المواقف التي تحدث تؤدي بأبطالنا إلي الهاوية ام ان الطريق سيكون ممهد بسيطاً عليهم ؟ السطور التالية سوف تخبرنا وتجيب عن كل أسئلتنا فيها ، لذلك هيا بنا لنبدأ قراءة الجزء سوياً .

الجزء الرابع عشر من رواية همس العيون للكاتبة لوزة ليبية

لحق اياد الهكر وسمع صوت صيحة صوت مئلوف وكدب وذانه لما وصل اياد ف الهكر شاف نورس بين ايدين الهكر ومصوب سلاحه ع راس نورس انصدم اياد صدمة عمره ومعش فهم شي … يشوفلهم معش استوعب شي من شي .. نورس شن جيبها اهنا وكيف الهكر شدها هكي … زعما تعرف الهكر والا شنو

الهكر :عندك علم توقعتك متت بعد الضرب اللي حصلته من جماعتي ههههههه
اياد:مش قبل مانقتلك ياوسخ
الهكر:هههه وسخ صار به به حنمشيهالك
اياد يغزز ف سنونه ومغتاض وقاله:نحي يديك من عليها
هكر: اكيد اتبصر …ل
اياد: لا مانبصرش
اياد لا اراديا تحرك خطوة للقدام يبي يكمل لين يوصل ف الهكر بش بيعطيه ضربه في اي مكان ويخلص نورس من قبضته
هكر: لا لا لا ماتتقدمش ولا خطوة
اياد: عادي نتقدم وكان تعبيني رصاص مش مشكلة
نورس ميتة من الخوف تبكي وقالت :لاااااا
هكر: مش انت اللي بنعبيك رصاص… . هيا… وعارف الظابط اياد يخاف ع الناس المدنية ههههه وتو بنخليني ننزل واﻻ نقتلها
اياد اتكنطا وقاعد مصوب عالهكر
الهكر: نزل سﻻحك ياظابط اياد نزل … نقتلها راه تعرفني سفاح
نورس تبكي:سامحني اياد سامحني ماكانش قصدي
الهكر: اووو تعرفو بعضكم حلو حلو كان قتلتها توا معناها حتتوجع عليها مرتين هههههه
اياد:خليها ياهكر موضوعك معاي انا هيا ماليهاش عﻻقة
الهكر:اكيد ليها عﻻقة بما انها تعرفك …ياام اختك ياقريبتك ياخطيبتك يامرتك ياصاحبتك امممم يابنت الجيران
نستبعد انها اختك او قريبتك ﻻن وقت عملك وجاي داهم عليا ﻻش بتجيبهم … ونستبعد انها مرتك ﻻن يستحيل تجيبها معاك وتقحمها ف مشاكل .. خطيبتك ﻻ …مش ﻻبسين دبل معناها يابنت الجيران ياصاحبتك
اياد:تي خليها خير مانفرغ فيك الرصاص
هكر:تفرغ ف راسك نزل سﻻحك
اياد:مش منزل
ترك ترك (( الهكر سحب التامينة متع السلاح))
الهكر:نقتلها اماﻻ
نورس تبكي:ماتنزلش سلاحك اياد …خليه يقتلني
هكر:تسكتي ياجيفة كان خايفة عليه ماجيتي معاه
اياد:احترم نفسك
هكر:خليتلك اﻻحترام تي هيا نزل سﻻحك ماطيرهاليش تره
ترفز اياد وعض شاربه لين سال منه دم حس بلحظة عجز بدل من انتصار … نورس حولتله لحظة الفرح بالفوز ف هذه المعركة الى عجز وخوف عليها …المجرم قدامه واياد واقف مش قادر ايدير شي
الهكر:نزل سﻻحك ودفه برجلك طيحه لوطى ف العمارة فيسع
انحنى اياد حط سﻻحه وهوا بيموووت من القهرررر… ودفه برجله
الهكر : goodboy اياد goodboy
اياد:خليها هي
الهكر: مستحيل نخليها لين نوصل ل سيارتي لوطى وماتفكرش تلحقني وديرلي خت فت …
نزل بيها هكر وعينه ع اياد ونورس تبكي
اياد اتحسر 100 … ويبكبك ويسحن غمتله رسمي … كيف بيتحرك خطوة للﻷمام
هكر:نشبح فيك ياظابط ماتتهورش خليني نكمل باقي الدوار وننزل ..
جمد اياد ف مكانه مش خوفا من الهكر ﻻﻻ خوفا على المهبولة اللي اسمها نورس… فجأة سمع اياد صوت رصاص
طاف طاف طاف
نورس تصيح :ااااااااااااا
طاف طاف طاف
اياد غمض عيونه وخنقاته العبرة ويفكر…حيه نورس قتلها الهكر وصيح صيحة قوية :نوووووووووورسسس …
نزل يجري ف الدروج زي المهبول لقي صلاح و وائل.. والهكر طايح سايل ف دمه ونورس رجليها معش حملوها فقعمزت ع درج وتبكي
صلاح:عارف عارف جيت ف الوقت المناسب …لكن شن ادير نورس معاك ؟؟؟معقولة اياد رافعها لمكان زي هدا
وائل:منو هادي قريبته ؟؟؟ ﻻﻻ يااياد من امتى نرفعو ف اقرابنا معانا لهيك مهمات وزيادة بنت انت هكي عرضت حياتها للخطر
اياد ساكت حتى كبمة طارتله من الموقف اﻻول زيدها حتى كلام صاحبه وزميله حس روحه عيل قدامهم
وائل:وخيرك سبقتنا قلنالك استنى هاه ماضربتاش بنار لين احنا جينا نقولك معش تتسرع لكن انت اتحب اتبان ف الصورة
اياد:وائل وحق ربي ماناقصك راه كنت حنقتله صارت حاجة خارجة عن المألوف
صلاح:يااا ايمن ضبح ع خالد وتعال قيمو الهكر حطوه ف سيارة
اياد نزل من الدروج وكمل طريقه ونزل
نورس :اياد … اياد
ولحقاته
نورس تجري ف الشارع … اياد اسمعني بس ….وصلت فيه وشداته من مرفقه
تلفتلها اياد ويكشخ:شن تبي ف عمي
نورس:انا مش
اياد:قلة ثقة ﻻحقتيني لهنا ماتقوليش تصير فيك حاجة انا المسئول
نورس دموعها مطر :انا مانندريش ع روحي
اياد :شن ماتندريش ع روحك تي كيف اتلحقيني اصلا شن تشوفي فيا ولد اصغير نرضع ف صبعي ..
ملحقتيني ع خاطر قتلك عندي موعد مش واثقة فيا … عندك علم كان وائل رجع للإدار وقال الكلام هدا حيحبسوني ﻻن حيحطو فبالهم اني رافع شخص مدني لسفاح اثناء تأدية واجبي وان وائل البطل هوا اللي خلصك من هيك حاجة بالله عليك روحي تره والله ماطايقك
نورس:اياد اس
اياد خبط ع مرش سيارة وكسره وقالها : تي روحي
غمضت عيونهل نورس وتلفتت ومشت لسيارتها وهي تبكي
خشت سيارتها وحطت راسها على الدومان نادمة عاللي صار

ركب سيارته اياد وطلع وطلعت وراه نورس
لاحظها اياد درس سيارته درست وراه… اتصل بيها
نورس مسحت دموعها وردت :الو
اياد: امعش تلحقيني ماشي خييرك انتي
نورس: مانعرفش الطريق اياد قلت نمشي وراك اقلها لين نوصل تاجوراء
اياد :به تلحقي فيا من غير ماتقولي ! من قالك ماشي لتاجوراء بالك مروح للحوش
نورس:باهي خلاص تو نسئل لين نوصل للحوش… هي سلام
اياد:لحقيني تو نوصلك
نورس:به

وصلها قدام باب المركز وكيف بيدور بيطلع جي صلاح من الطريق المقابلة اشرله
درس اياد سيارته … ونزل صلاح من السيارة وجي جيهة سيارة اياد
صلاح :شنو ياباشا جو النمر المقنع ماشي بروحك
اياد:وديني ماناقص بصارتك ياصلاح
صلاح:به فهمني ﻻش رافع نورس معاك حرت فيك الحق
اياد:مارفعتهاش ياصلاح
صلاح:اماﻻ شنو
اياد:لحقتني
صلاح: كيف وعلاش
اياد: قلة ثقة ياصلاح… وقعت بعتتلي المسج ان الهكر روح وعرفنا
مكانه ..نورس كانت بحداي شدت فيا نقعد مشي قتلها عندي موعد صلاح: بش تتكنطا وتروح
صلاح: مشي لحقاتك
اياد: ايه
صلاح :لا ماعندهاش حق تلحقك… المشكلة مش ف هكي المشكلة ف وائل ان شاء الله مايدويش
اياد: يستر الله… اضايقت ياصلاح انا وتقث فيها وهي ماوتقتش فيا اتلحق فيا… لهنا وستوب بجديات كرهت العلاقات والارتباط
صلاح: بتسيبها قصدك ?
اياد: مخنوق ياصلاح تو نتلاقو بعدين
صلاح: اوك يابرو سلام

نورس خشت لمكتبها وهي تبكي
قعمزت عالكرسي وحطت يديها ع راسها
خشت رتاج للمكتب كانت ف مكتب زميلتها…
رتاج: ها شن صار… نورس شنو خيرك تبكي
نورس: مصيبة يا رتاج مصيبة
رتاج: شنو فيه
نورس: ((حكتلها بتفصيل))
رتاج: غبااااااارتك سودة كحلة على دماغك… ياريتك مالحقتيه
نورس:مصحك انتي اللي قتيلي لحقيه
رتاج: لا ياروحي لا… انتي لحقتيه من الاول ووقت وصلتي قدام العمارة كلمتيني وقتلك شن فيها ومشيتك طلعت عالفاضي
الشقة هديكا معش ولت متع الدوة نص كم فهمتي
نورس: وعلاش ماقتيليش من الاول
رتاج: اتصلت بيك 7 مرات وبعتلك مسج شوفي نقالك
نورس: انا غبية يارتاج غبية
رتاج: ايه لانه لو كان ماشي موعد بيقولك غبوووو
نورس: تسكتي خلااااص…
بنروح انا خوديلي اذن انحس في روحي مش عارفة كيف
رتاج : اوك تو ناخدلك

خدت شنطتها نورس وطلعت من مكتبها ونزلت دروج… وطلعت على البركيدجو ولعت سيارتها بش بنروح

اياد درس سيارته ع شط البحر.. ونزل منها خدي نفس عميق وقعمز يفكر… اخيه عالوقت اللي تحبه ايوجعك ماحسبتش ان في نظرك كذاب يانورس… انقهرت قدام الهكر انقهرت بعدد شعر راسي تحسرت رسمي…

نورس.. والله ماقصدي غيرة كلتني ان شاء الله تفهمني يا اياد… من حبي ليك تصرفت بطريقة هادي
حنخليه يهدا وفي ليل نكلمه

اياد: برغم اني نحبك يانورس الا ان لازم ننفصلو عن بعض … حب بدون ثقة كالنقش على الماء

يتبع………

لقراءة الجزء التالي : الجزء الخامس عشر من رواية همس العيون للكاتبة لوزة ليبية

لقراءة الجزء السابق : الجزء الثالث عشر من رواية همس العيون للكاتبة لوزة ليبية

لقراءة فهرس الاجزاء كاملة : جميع اجزاء رواية همس العيون كاملة للكاتبة لوزة ليبية

جميع الحقوق محفوظة للكاتبة لوزة .