وفي الجزء السابع من رواية قد كفاني دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة آيه إبراهيم .
الجزء السابع من رواية قد كفاني
طلعنا احمد زوج مثاني وضعو المادي إتحسن شديد وإشترا عربيه وراجل مهاد عندو عربية طلعنا عاوزين نمشي قالوا نتقسم في العربات الشئ المحير إنو كان في تلاتة عربات وانا الحاجة العارفاها إنو مفروض يكون في عربتين المهم احمد وأنس وودعمو جو علينا قالوا لينا أركبوا انا وهيام وملاذ(أخوات انس ) ركبنا في عربية ومثاني وزوجها وبتهم في عربية وعمو عبدالله ومهاد وزوجها في عربية انا الوقت كلو سرحانة وما بشارك نهائي في الونسة والبنات كتر الله خيرهم حاولو يفرقو عني بس أنا كنت ما بتجاوب معاهم كتير ولي حوالي يومين فاقدة دفتري (مخزن زكرياتي) وصلنا البحر انا طوالي قعدتا بعيد عن الناس سمعتا زول من وراي بيقول لي مهجة إنتي بحر حقيقة ومجاز من غير ما أتلفت وراي قلتا أختى دربي يا ياسر وأدني دفتري سريع 
قال لي انا نفسي اعرف إنتي بتميزي الأصوات كيف !؟ قلتا ليهو ما مهم أديني دفتري وتاني بتمنى ما أشوفك
قال لي انا عارف لو قلتا لك آسف ما ح تصدقيني لانو انا جرحتك كتير بس انا ح أثبت لك اني بالجد آسف إبتسمت وقلتا ليهو ما بهمني ادني دفتري لو سمحت مد لي الدفتر وقال لي انا بالجد آسف شلتا دفتري من غير اي كلام ومشيت من المكان طلع هو ود عم أنس
بجانب ياسر : أكيد بتكون عايزين تعرفوا انا ليه رجعت بعد سنين في حياتهم أو بالأصح انا طول السنين ديل وانا مراقب حياتهم من بعيد تحديدا مهجة بعد اخدتا الكف من يد عبدالكريم(ياريت تكونوا متزكرين) قال لي بعد جيتو في المكتب انت يا ياسر جنيت ولا شنو !؟ قولتا ليهو ابدا لو عندك شك ودني المصحة قال لي يأخ إنت متين ح تفهم انو ما كل منتقبة مجرمة يعني انت إذا حبيت واحدة وكانت منتقبة وسرقة قروشك يبقى كلهم كدا !؟ طيب مافي ناس بتصلي وبتسرق انت ليه ما شايف انو كل المصلين حرامية !؟
انا هسي زوجتي منتقبة معناها زوجتي حرامية جاوبني ليه ساكت يا ياسر انت كدا بدمر حياتك وحياة ناس ما عندها ذنب عليك الله اقرب مثال لو كانت حرامية بالجد ليه ما شالت القروش الرميتها ليها متأكد البت القبيل دي كانت في امس الحاجة للشغل ارجع لي عقلك يا صحبي قلتا في سري صح كلامو والله ما بنكر انو كلامو إتقال في الوقت المناسب قولتا ليهو اعمل شنو يا عبد الكريم !؟ طلع ورقة كدا أداني ليها فيها عنوان بيت مهجة وإسمها بالكامل قال لي حظك سمح الورقة دي وقعت من مهجة (دي نفس الورقة الفقدتا لمن كانت راجعة من الشركة) امشي راقب تصرفاتها ولو طلعت حرامية انا بغير اسمي في الأول إترددتا لكن هو اقنعني وقال لي انا متأكد وجهت نظرك ح تتغير صدقني شيل لك حاجات وامشي بيها بيتهم عديل قلتا ليهو فكرة والله 
ومرقتا منو بالجد احسن زول مره على حياتي عبدالكريم صحبي واخوي ودايما ما بقيف معاي في حاجة غلط انا بعملها مشيت بيت ناس مهجة وسبحان الله زي ما قال عبد الكريم البيت من مظهرو بوريك كيف الأسرة دي محتاجة نزلتا من عربتي ووقفت بتأمل فيهو شديد ضربتا الباب على الخفيف كدا جات فتحت لي مرة سلمت علي من بعيد من غير ما ترفع راسها بس ما قالت إتفضل وانا كدا إتأكدتا انو مافي راجل في البيت وأبوها بالجد متوفي نسبة لي كلامها الكتبتو في الدفتر 
اديتهم الحاجات وركبتا عربتي ومشيت وانا اليوم كلو راسي مصدع وسرحان وضميري مأنبني وعايز أكفر عن ذنبي تجاه مهجة قلتا خلاص انا تاني يومي بمشي بيتهم والله بقدرني عليها بجيبها ليهم ومهجة ان شاء الله تشتغل معانا هنا في الشركة تاني بقيت قبل أطلع لي شغلي بمشي بيتهم في يوم كدا لقيت رجال كتار طالعين من بيتهم بجثمان سألتا عمك كبير كدا وانا بين عايز اعرف منو المات وما عايز قلتا ليهو منو المات وانا بدعي ان شاء الله ما تكون مهجة قال لي آمال زوجة محمد هنا أنا إتأكدتا انو دي أم مهجة لأنو إسمها مهجة محمد شلتا معاهم العنقريب ووصلنا وعملنا مراسم الدفن وقلتا في سري هو صح خالتو امال ما عندها ولد بس انا من اليوم بإذن الله كل حاجة تنفعها بعملها وأكون ذي ولدها قعدتا فوق رأس القبر بدعي ليها من كل قلبي الراجل القبيل سألتو داك قعد معاي وقال لي إنت بتقربك شنو المرحومة دي !؟ والراجل ظاهر عليهو تقي وشيخ قلتا ليهو آي حاجة قال لي كيف يعني اي حاجة !!! قلتا ليهو فيك تقول ولدها قال لي ما شاء الله نعم الولد والله يعني هسي جاي تقعد فوق قبرها خمسة دقائق وتقول لي ولدها !
كنت وين إنت وقت جاعو؟ كنت وين وقت أبوهم إتوفى؟ كنت وين وقت مهجة بتي عمرها ١٣ سنة نزلت إشتغلت وبقت شايلة مسؤولية البيت كلو !!؟
كمل غفلتك بناتي ما محتاجين لأي زول قلتا في سري خلاص إحتمال دا عمهم قلتا ليهو انت عم مهجة؟ قال لي انا ما بقربهم انا ابوهم صحبي واخوي قمنا من صغار مع بعض ابوهم بعد اتوفى بقيت بتولى امرهم ….(عرفتوا دا منو؟)
طوالي انا حكيت ليهو قصتي وإني أهنت مهجة وحاليا ندمان شديد وداير أكفر عن ذنبي بأي طريقة لانو ما مهجة البتتهان ودايرا هي تعفي لي بتمنى تساعدني في الأول رفض تماما يساعدني وكان زعلان شديد مني وبعد تعب حتى قدرت اقنعوا 
قال لي طيب هسي والله أختهم الصغيرة اتوفت واحمد ولدي كلمني وانا والله ما بقدر اشوف بناتي بنقصوا واحدة وراء التانية ،انا قولتا لا حول ولا قوة إلا بالله ياربي صبرهم قلتا ليو وهسي ما عايز تمشي تجيب البت قال لي م بقدر والله قلتا ليو م صح منك والله انت ابوها لازم تصبر المهم اتحركنا ورجعنا على بيت ناس مهجة لمن دخلتا اول حاجة وقعت عيني عليها مهجة كانت قاعدة بعيد وسرحانة ولا تبكي ولابتكلم جا ولد شاب كدا اتكلم معاهم بس ما في استجابة وكلهم رافضين انهم يدخلوا يغسلوها اتكلم مع مهجة واستجابة ودخلت غسلتا ومعاها البنات قلبي وجعني شديييد من الحالة الكانت فيها الأسرة دي وحمدتا ربنا على نعمة امي عايشة وما بتشكي من الم واخواتي سليمات وحاجات كتيييرة م كنت منتبه ليها انتهو من غسلها و ودعوها من كترت م كان بيكو اقسم بالله انا لمن دموعي نزلت معاهم شلنا الطفلة ومشينا بيها المقابر قلتا ليهم هنا المكان دا فاضي ابدأ احفر فيو ؟ الشاب القبيل داك قال لي لا م تحفر هنا انا بوريك تحفر وين اتقدم زيادة وكان في قبرين جنب بعض وتاني في اراضي فاضية قال لي يلا نحفر هنا قلتا لشنو بس المكان دا قال لي امي امال الله يرحما قالت لازم ندفنهم جنب بعض شايف القبر العلي يدك اليمين دا حق عمو محمد والتاني حق امي الله يرحمهم وهنا ح ندفن اختي
انا الأسرة دي كبرت في نظري يعني هم حين وبعد وفاتهم عايزين يكونوا جنب بعض الشاب داك قال لي لكن م عرفتك انت بتقربهم قلتا ليو لا ،وحكيت ليو قصتي وقال لي اسمك منو ؟ قلتا ليو بوريك اسمي لكن م تزكرو لمهجة قال لي جدا قلتا لي اسمي ياسر ودي كانت اول مرة اذكر اسمي من غير ما يكون كامل لانو لو قولتو كامل كل الناس بتعرف جدي وانا قررت انو يكون عندي مجد واسم خاص بي ومن هنا اتغير مجرى حياتي بقيت اوقاتي كلها في المسجد وشوية شوية بقيت م بصافح ومرت الأيام وانا بقيت مهتم بأمور ديني وما بعمل عمل مالم إتأكد منو في الكتاب والسنة انو مباح وخليت اصحاب السوء ومسكت في عبدالكريم قوي وبقيت بصل رحمي كلهم مع اني زمان كنت مفتري وبقيت احضر كل المناسبات ودائما مبتسم في الستين ديل اتخلصت من ياسر الجنو بنات ومن ياسر الجنو سجائر ومن. ياسر العصبي ومن يأسر البرفع صوتو مع والديهو 
بقيت شخصية غير
————————————–
———————
*☆يتبــــــــــــــــــــــــــــــــــــــــــــع☆☆*
لقراءة الجزء التالي : الجزء الثامن من رواية قد كفاني
لقراءة الجزء السابق : الجزء السادس من رواية قد كفاني
للإطلاع علي فهرس اجزاء الرواية : رواية قد كفاني ( جميع الأجزاء كاملة ) للكاتبة آيه إبراهيم
جميع الحقوق محفوظة للكاتبة آيه إبراهيم .
