وفي الجزء السابع من رواية إمرأة بلا هوية دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة بت محمد جمال الدين .
الجزء السابع من رواية إمرأة بلا هوية
خطاب كان متجه عكس اشجان وبعدها قام عشان يسلم عليها واول م عينه وقعت عليها نطط عيونه في خلعه وقال بدون م يشعر : انتي ؟؟؟ 
اشجان ارتبكت شديد وبقت تتمتم : م مرحب بيكم اتفضلو ،،
خطاب لسه بعاين وهو مصدوم واشجان حاولت تتهرب وبقت تنادي : امييي تعالي سلمي علي بت عمي ..
جات بسمات سلمت
في برود وقالت : كيفك .. قالو فقدتي الذاكره … لكن ذاكرتك هي العليها هين ؟
كريم في ضيق : احم رهف بتتعالج حاليا وقريب ح ترجع ليها الذاكره ،،،،
رهف صافحتها في فرح وقالت : اتشرفت بمعرفتك 
كريم مشي الدكان يجيب بارد وخطاب استقبل مكالمه بره البيت ،،،، عشان يخلي رهف شويه مع اهلها،،
كريم رجع بسرعه من البقاله ودخل البارد المطبخ،،،
رهف قالت في حزن : احسن الله عزاكم في عمي 
بسمات : آمين يارب البركه فينا وفيكم،،، آسفه ي بتي م كان قصدي ازعل حبوبتك ، زعلت وسابت البلد ،،، وبعدها عمك مرض لحدي م اتوفي 
رهف : انا م متذكره حاجه وحتي لو متذكره نحن اولاد اليوم والمشاكل دي بتحصل عادي بين الاهل…
سكتت مسافه وقالت في حاجات كتيره عايزه اعرفها عن نفسي وعن اسرتي واذا عندكم صور لي امي وابوي وحبوبه الدكتور قال بتساعدني في استرجاع ذاكرتي ..
بسمات طلبت من اشجان تجيب البوم الصور وعرفتها بكل اسرتها وكمان عرفت انها كانت متزوجه وزوجها اتوفي بنوبه قلبيه وكانت حامل في شهرها السابع ،،، بعدها الجنين سقط وسافرت مع حبوبتها للجامعه دا بعد قررو يعيشو في الخرطوم،، مر الوقت بسرعه وخطاب استعد للمشي ورهف طلبت من بسمات الالبوم …
وبعد ناولتها ليه قالت : قاعده في داخليه صاح ؟ الزول دايما راحته في القعاد براه ،،، ابقي عشره علي نفسك ومره مره زورينا ،،،، رهف احبطت شديد اتوقعت يطلبو منها تقعد معاهم بس خيبو ظنها،،،،، اشجان قالت في تصنع : ابقي زورينا م تنقطعي بعد لقيتي اهلك واذا قررتي تتزوجي كمان اعزمينا م تنسي
طلعت رهف من عندهم وهي ماسكه دموعها عشان م تفضحها قدامهم واول م اتحركت العربيه بقت تبكي في تشنج ودا خلي خطاب يمسح دموعها في تأثر ويقول وهو بحاول يخفف عليها : هوني علي نفسك وزي م قلتي انتي عايزه تعتمدي علي نفسك وتثبتي وجودك وكدا كدا م كنتي ناويه تعيشي معاهم بعدين انا ح تسيبيني لي منو يعني ؟؟ ولا خلاص زهجتي مني يعني…
رهف : انا بحمد ربي انك معاي وانا فعلا م ناويه اعيش معاهم بس اتوقعت يعزموني ان شاء الله عزومه مراكبيه بس هم م عايزني 
طيب ليه كريم معذب نفسه وبفتش عني ؟؟ كريم شكله طيب بس م عنده كلمه…
بعد وصلو البيت رهف قعدت في الهول… شارده وحزينه وفكرها
مشغول ،،،،،،خطاب جا شايل شاندوتشات وبارد وقعد جنبها وقال : فراشتي الجميله لسه زعلانه ؟؟
رهف : اعذرني انا زي الغريق البتعلق بي قشه وفاكر انها ح تنقذ حياته وجودي مع اهلي بساعدني في العلاج ،،،،
خطاب في حنان : انا بلف بيك العالم كله لحدي ما ترجعي تتذكري اي شي بس عايزك تثقي فيني …
سكت وقال : خايف لما ترجع ليك ذاكرتك ،،، تنسيني تنسي حتي شكلي .
رهف : مستحيل انساك انت انقذت حياتي كنت لي زي شمعه نورت العتمه الكنت فيها…
خطاب قرب منها ومسك يديها وقال في حنان : انتي النورتي حياتي وغيرتي فيني حاجات كتيره…
سكت مسافه وواصل : وبكون اسعد زول لو قبلتي عرضي بالزواج منك….
رهف : الموضوع دا سابق لاوآنه… قدامي حاجات كتيره لسه،،، عايزه اتعالج وكمان القرايه،،،،وصدقني لو فكرت في الزواج انت اول واحد ح افكر فيه بس لو م كنت متزوج،، مستحيل ابني سعادتي علي تعاسه الغير ،،،،
خطاب : انا بحبك ي رهف 
م قادر اتخيل حياتي بدونك اتعلقت بيك وبقيت احبك بجنون وبغير عليك من النسمه…
رهف سكتت وم قدرت تقول حاجه……
خطاب فتح التلفزيون وبقي يحضر في برنامج عربي وبعد شويه صرخ في فرح : مهند سليم 
وطلع التلفون وبقي يتكلم
* حكم في برنامج… عديل كدا والله انا لما شفت صورتك م صدقت الا بعد ذكرو الاسم لكن تستاهل اصلا الحاجات دي بتشبهك يعني انت كلمتني بس م قلت لي البرنامج اسمو شنو ،،،
* تسلم كتير والله رفعت من روحي المعنويه…
* ايوه ارفع راسنا وشرف بلدك ،،،
* تلاته ساعات بالكتير واجي الخرطوم بنزل في الشقه علي طول اصلا تعبان عايز انوم الصباح بجيكم،،،
* تشرف والله اشتقنا ليك شديد ،،،
رهف عاينت ليه وابتسمت باين عليه صحبك شديد ،،،
خطاب : اكتر من اخوي ،،،،
خطاب شال الجاكت وودع رهف وهو بقول : اقفلي عليك الباب كويس وانا وصيت البواب يخلي باله منك ،،،،،
رهف : اوك م تخاف علي
خطاب بعد ركب العربيه تاني جا راجع وشايل معاه تلفون راقي وناوله لي رهف وهو بقول : آسف نسيتو في العربية مفروض اديك ليه من ساعه جيت
رهف اتغيرت ملامح وشها وردت: مستحيل اقبله منك دا باين عليه غالي شديد خطاب في ضيق : اوووف اسمعي بعد تشتغلي رجعيه لي اوك ؟؟؟
رهف : اذا اشتغلت سنتين م بقدر احلو لو سمحت رجعو
خطاب : طيب اتواصل معاك ب شنو ؟ سيبك مني ناس الشغل كيف يتواصلو معاك ؟؟
رهف : طيب اديني حقك الصغير دا بكفيني ،،،،
خطاب وهو طالع : اسمعي عايز اتواصل معاك واتس وايمو وفيس وتويتر واي شي ،،، م عايز مجادله الشريحه مركبه وبعد اصل ح اتصل عليك واذا م رديتي طوااالي بجيك راجع
رهف : مافي فايده
خطاب وصل البيت لقي ميناس قاشره ومنتظره في الغرفه ،، سلم عليها ودخل الحمام اخد دوش وجا رقد في السرير ولقاها بتعاين ليه سألها : حمودي كويس ؟
ميناس : كل همك بس حمودي
اذا حصل ليه حاجه ح تطلقني لانك مستمر معاي عشانو صاح ؟؟
خطاب قعد علي حيله وقال في غضب : بعد الشر عليه عليك الله في ام بتتمني يحصل ل ولدها حاجه زي دي؟؟ ساعدي نفسك والله ،،، لله الامر من قبل ومن بعد 
ميناس : مهما اعمل برضو م عاجبك ،،، اعمل شنو عشان تحبني وتشوفني زي رهف وغيرها ،،،،
خطاب قبل عليها وقال وهو بحاول يكون هادئ : انتي جميله جدا واي راجل في الدنيا بتمني يرتبط بيك بس حاولي غيري تعاملك معاي شويه يعني م تعامليني زي م بتعاملي باقي البشر المفروض انا زوجك البتحبيهو يعني التعامل معاي يكون غير ،،،،
ميناس : حسسني انك بتحبني وانا افرش ليك قلبي دا تمشي عليه ،،،،
خطاب : طيب انا اسف بس لو سمحتي م تدخلي حمودي في خلافاتنا و
ميناس في غضب وصوت عالي : تااااني حمودي ؟؟؟
خطاب قام بسرعه وطلع من الغرفه مشي رقد مع حمودي،،،، وهو بقول : مجنونه مجنونه مافي شك
صحت رهف نص الليل بصوت جوطه وحركه م طبيعيه… قعدت في نص السرير وبتحاول تستجمع قواها… مسكت شعرها بي بانده وعاينت للساعه جنبها… لسه بدري علي الصباح طيب في شنو ؟ الصوت اختفي رقدت عشان تواصل نوم بس المره دي سمعت صوت قريب منها…. نزلت من السرير بسرعه وهي بفستان النوم،،فتحت الباب في حذر ولقت الهول فاضي مافي حاجه… طيب الحركه دي جايه من وين ؟؟ رجعت غرفتها وطلعت التلفون واتصلت على خطاب رغم انو الوقت متأخر بس رد بسرعه : رهف خير في حاجه ؟ حاسه ب حاجه ؟ انتي عيانه ؟
رهف في خوف : لا بس حسيت ب خوف وسمعت اصوات غريبه
خطاب قفل منها وبسرعه طلع وركب عربيته بس ابت تدور خلاها ومشي ركب امجاد وفي سرعه البرق كان معاها ،،،،
رهف جرت في حضنه وهي بتقول : خطاب انا خايفه،،، مستحيل اقدر اعيش براي،،، ومستحيل اجيبك كل يوم بالطريقه دي انا ح اعيش في داخليه من بكره،،و بجمد الجامعه السنه دي لحدي ما ااسس نفسي وكمان اتعالج وكمان اجمد مشاعري
خطاب في حزن : يبقي حكمتي علي بالاعدام انت بتحبيني ي رهف ليه عايزه تكتلي الحب دا قبل م يتولد ؟ انا م بقدر اعيش لحظه بدون م اشوف عيونك عمري م حسيت ب احساس زي دا ،،، عمري م حبيت بالعنف دا انا
بتر كلامه لما رهف اشرت ليه يعاين وراه بس هو قال قبل م يتلفت : اه نسيت الباب انتي خليتي لي عقل لكن؟؟ لحظه بس اقفله واجي ،،،،
اتلفت عشان يقفل الباب بس لقي…….
————————————–
———————
*☆إمتناني *
*☆بت محمد جمال الدين☆*
*☆يتبــــــــــــــــــــــــــــــــــــــــــــع☆*
لقراءة الجزء التالي : الجزء الثامن من رواية إمرأة بلا هوية
لقراءة الجزء السابق : الجزء السادس من رواية إمرأة بلا هوية
للإطلاع علي فهرس أجزاء الرواية : رواية إمرأة بلا هوية ( جميع الأجزاء كاملة ) للكاتبة بت محمد جمال الدين
جميع الحقوق محفوظة للكاتبة بت محمد جمال الدين
