وفي الجزء الرابع عشر من رواية إمرأة بلا هوية دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة بت محمد جمال الدين .
الجزء الرابع عشر من رواية إمرأة بلا هوية
رهف رجعت الشقه ودخلت الغرفه حقتا ولقت حالتها صعبه كأنو ميناس اتعمدت تنوم فيها وتخلي الحاجات زي م هي ،، عشان تجي رهف تشوف ويتحرق قلبها وفعلا طلعت منها و قفلت الباب بسرعه وقعدت في الهول تبكي وحتي عطرها فايح في الشقه كلها ،،،
رن جرس الباب مشت فتحت وكان خطاب ،،، سلم وقعد قريب منها وقال وهو بزح يدها عشان يشوف ليه مغطيه منو عيونها : حبيبي في شنو ؟ العيون الحلوه دي ليي مخبنها مني ؟
بعد زح يدها قال في خلعه : رهف مالك ؟ في شنو ي روحي ؟ حاسه بي حاجه ؟
وبقي يتحسس في وشها ويقول : حبيبه روحي 
منو الزعلك ؟ ميناس اتصلت عليك ؟
رهف في هروب : لا مافي حاجه.. انت كيف عامل ؟ صحبك جا من السفر ؟
خطاب : ايوه جا ،،، ح اعرفك عليهو يوم الحفله…. بالمناسبه بعد بكره عيد ميلاد ولدي ،
رهف : والله ؟ العمر كله ان شاء الله 
خطاب باس يدها : انتي اول المدعوين طبعا 
رهف : م بقدر اجي آسفه 
خطاب في اصرار وهو مبتسم : م علي كيفك الاء جايه في الطريق ح تمشي معاك السوق تختاري فستان حلووو وعندي ليك مفآجأة ح تغير مسار حياتنا كلها ،،،،،
رهف : خطاب انا م عندي نفس احضر حفله و
قطعت كلامها بعد سمعت صوت تلفونها ،،، رفعته وعاينت للرقم وعاينت لي خطاب ،،،
خطاب في حيره مسك التلفون وقال : ردي دي ميناس….
رهف اتوترت واشرت لي خطاب يسكت وفتحت الخط…. اهلين ميناس…
ميناس بعد سلمت عزمتها عيد ميلاد محمد وحرصت شديد انها لازم تجي…..
قفلت رهف وهي في حيره 
ياربي المره دي عايزه تصل لي شنو ؟ ولييي اصرت عليها شديد وم قفلت الا بعد اخدت منها وعد انها تجي ،،،،،
خطاب : كدا ي رهف؟!!! احنس فيك من قبيل رفضتي وبعد كلام ميناس اقتنعتي 
قبل م رهف ترد الباب خبط ،،، مشي خطاب وهو بقول : الجرس دا عملو لشنو ؟
جات الاء وسلمت وقعدت وعاينت لي رهف وقالت : جيت في وقت م مناسب ولا حاجه ؟
خطاب : جيتي في وقتك…
رهف : نورتي حبيبه
الاء : مفآجأة 
الليله بايته معاك ،،، عمي سمح لي بعد سله روح والا اتوسط لي خطاب 
رهف في فرح : واااو دا احلي خبر والله
خطاب : لييي انا بغير ،، اشمعني فرحتي كدا بعد شفتي صحبتك ؟
رهف ابتسمت : انت كمان غالي علي
خطاب قام ومسك رهف من يدها وقال : عيدي عبارتك دي تاني
رهف سكتت وحنت راسا في خجل وقالت : غيرت رايك من مشي السوق ولا شنو
خطاب : عنيده ومكابره بس حبيبه روحي والله
رهف : اسي انت م بتخجل من الاء دي ؟
خطاب : الويه دي اختي الصغيره ياخ
الاء قالت في استدراك : بالمناسبه نسيت اقول ليك ،،، بت عمك اشجان جاتك في الصيدليه بعد طلعتي وصادفت ميناس برضو جات تسأل منك وطلعو سوا ميناس واشجان ويظهر انها ح توصلها بالعربيه ،،،،
خطاب سكت ورهف قالت : اللما الشامي علي المغربي شنو ؟
الاء : الصدفه علي م اظن!!!!
خطاب انزعج جدا واستغل فرصه الاء بتتكلم مع خطيبها وقال بصوت منخفض : اشجان دي..
وسكت خطاب وبعدها كمل في تردد : م عارف اوصل ليك الفهم كيف ،،، بس كوني حذره منها…
رهف : عندي احساس انك بتعرفها ومن زمان كمان ،،،
خطاب في هروب : دي قصه طويله ودا م وقتها بس اعملي بي كلامي م حتندمي…
ميناس اتصلت على تسنيم صحبتا وطلبت منها تجيها البيت بسرعه واول م وصلت قالت ليها : عزمت غريمتي عيد الميلاد واتخيلي الظروف والصدفه خدمتني ولاقيت بت عمها وطلعت زوله ي لطيف منها تبيع بلد كامله ب ميه جنيه ،،،، لكن لازم تكون دي اخلاق البيئه الطالعه منها واحده زي رهف ،،،، بس قصاد المعلومات الادتني ليها، الالف جنيه م خساره فيها…..
تسنيم في خبث : انتي يختي بقيتي اخطر مني ،،، الشيطان يقول ليك ي معلمه بعد طفشتيها من البيت افتكرتك خلاص طلعتيها من راسك ،،،،
ميناس : اطلعها من البيت م كفايه 
لازم تطلع من قلب راجلي وللابد ،،،، لازم اطمم بطنو منها واخليه يكرهها ولو لاقتو في الشارع م يعاين ليها ويمشي يخلي ليها الدرب ،،،،،
تسنيم : لكن م كان تعزميها ،،، دايره بي وجع الراس شنو ؟ بعد الحفله قبلي عليها تاني،،،،،
ميناس : لا ي ماما ح تشوفي لما تجي بحصل شنوو م عايزه افشل ليك المفآجأة
تسنيم : هههههه ي لطيف منك….
خطاب مشي البيت وتاني رجع عشان يجيب رهف والاء من السوق وقبلها وصل الصايغ واشتري دبله جميله ومحبس وخباهم في العربيه و اصر يعزمهم عشاء في مطعم فخم في فندق ال…… وهناك مسك الكيس عايز يشوف رهف اختارت شنو ،،، بس الاء مسكتو منو وقالت وهي مبتسمه : ممنوع تشوف في الحفله زيك وزي الناس
خطاب : حرااام عليك انا ناقص 
بدون كدا قلبي واجعني
والله ي الويه لو قعدت احكي ليك عن حبي للبنوته دي عمري كلو م بقدر اخلص وصف
مافي بت قدرت تملكني وتسكن جوه خلايا الدم زي البت دي
الاء : احيييييي ياريت لو حسام يتعلم منك الكلام الحلووو دا
رهف : خلاص اتلميتو الاتنين ؟
خطاب : والله انا لو حصل لي شي تأكدي انو انتي السبب ،،،،
رهف في خلعه : بعد الشر
خلصو عشا ووصلهم الشقه وكالعاده وصي عم طه البواب ومشي
رهف اتصلت علي اشجان لانها جات وم لقتا في الصيدليه ،،،،،
اشجان : هوفا… اخبارك وصحتك ،،،،
رهف : اهلين كيفيك
اشجان : ح تمشي عيد ميلاد محمد بتين ؟
رهف : عيد ميلاد محمد؟ 
انتي عرفتي من وين ؟
اشجان : صاحبه الشأن عزمتني ،،،، الموضوع مضايقك ولا حاجه ؟
رهف : اطلاقا،،،، واضايق لشنو ؟ ميناس حره تعزم اي زول عايزه تعزمو ،،،،
اشجان : مشيت اشتريت لي فستان راقي في ناس مهمه جايه الحفله دي ،،،،
رهف : تمام ،،،، يبقي نتلاقي في الحفله ،،،،،
قفلت وراسا بقي يودي ويجيب ،،، اشجان لقت قروش وين عشان تقدر تشتري فستان ؟
قطع عليها حبل تفكيرها اتصال الاء : وين انتي ي زوله تلفونك مشغول ساعتين ؟ 
بنتأخر علي الكوافير ……
رهف : اوووف يعني كمان كوافير ومكياج وغيره ؟ طلعيني عليك الله من البرامج دي بمشي معاك انتي بس،،،انا م عايزه اعمل اي حاجه……
الاء : بالله عليك ؟ اسمعي انا م دايره معاك اي حركات والله تعملي اي شي وتجهزي انتي قدامي بعدين انا 
رهف : ورطه شنو دي ياربي ؟؟
حسام وقف السياره قدام رهف وركبت ورا وبعدها سلمت عليه بالمرايه ،،،،،،
لبست فستان اوف وايت طويل مفصل علي جسدها وشبط شفاف اغمض درجه من لون الفستان اما تسريحه شعرها كانت بسيطه وملائمه لملامحها الملائكيه واكسسوار زهري رائع منسجم مع الميك اب،، ركبو عربيه حسام ،،،،،، الاء طول الطريق : حسام شايف الملاك دا والله انا خايفه يسحروك وتحصل ليك حاجه ،،،، ي حافظ،،،
حسام م شال عينو منها وساكت طول الطريق مكتفي فقط بالنظرات ،،،،
وصلو بيت خطاب والحفله معموله في حديقه الڤيلا وكانت تحفففه مزينه بطريقه جميله والبالونات بالاحمر علي شكل قلوب
والمنظر يسلب الالباب
————————————–
———————
*☆إمتناني *
*☆بت محمد جمال الدين☆*
*☆يتبــــــــــــــــــــــــــــــــــــــــــــع☆*
لقراءة الجزء التالي : الجزء الخامس عشر من رواية إمرأة بلا هوية
لقراءة الجزء السابق : الجزء الثالث عشر من رواية إمرأة بلا هوية
للإطلاع علي فهرس أجزاء الرواية : رواية إمرأة بلا هوية ( جميع الأجزاء كاملة ) للكاتبة بت محمد جمال الدين
جميع الحقوق محفوظة للكاتبة بت محمد جمال الدين
