وفي الجزء الثالث والعشرون من رواية إمرأة بلا هوية دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة بت محمد جمال الدين .
الجزء الثالث والعشرون من رواية إمرأة بلا هوية
رهف في خلعه : شنو؟ انقره عديل كدا ؟ نحن قلنا عقد بس واتفقنا علي كدا
،،،،
خطاب وهو بضحك : بالله…… اولا بعد تبقي مرتي تاني اي حاجه اقولها تمشي عليها
،،،،
رهف : شنوووو؟ يظهر انك جنيت علي الاخر مافي تكمله زواج الا بعد اخلص علاج 
خطاب : م مشكله حبيبي 
انت تأمر ،،
رهف : يلا ي خطاب وصلني البيت حاسه مهند دا تعبان بالجد ،،
خطاب : طيب حبيبي بموت انا في قلبك الحنين دا ،،، بس خلي بالك انا غيوووور جدا
مهند : رهف بتحبك واكيد ح تكونو سعداء
خطاب : ربنا يديك بت حلال وتتزوج وتضوق طعم الحب 
مهند عاين لي رهف وقال في حزن : م اظن اتزوج انا 
رهف : لييي ياخ م تقول كدا…
خطاب في فرح : مهند دا اخوي وتوأم روحي م بعيد بعد الزواج اصر عليه يسكن معاي في بيتي 
رهف : يشرف اكيد
مهند : شكرا ليكم بس انا برتاح في بيتي ،،،،
رهف همست لي خطاب : شيل الدهب معاك وبكره جيبو ،،،
خطاب قال وهو ببوس يدها : حبيبي انا والدهب ملكك وحدك خلي عندك لانو حقك م حقي…
رهف : موش انا وانت واحد ؟
خطاب في حب : ياخ انا وانتي طيور بلا اجنحه روح واحده 
يا مني الروح يا انا
رهف اول م وصلت بيت عم طه مسكتو الدهب حقها وخلت معاها الدبله والمحبس
خطاب مشي للدكتور المتابع معاه وبعد عمل ليه فحوصات كتيره وشاف النتائج جا قعد في الكرسي وقال في توتر :انا من واجبي ك طبيب اصارحك بي وضعك واحذرك في نفس الوقت ،،،،
خطاب وهو بلبس في قميصه : خير يا دكتور مالك خوفتني انا بكره ان شاء الله زي المواعيد دي عريس
الدكتور : وضعك م بتحمل زواج اصلا ،،،،، مع الاسف قلبك بعمل بي نسبه 50% وممكن تنقص النسبه دي عادي انت مهمل يا خطاب زماااان قلت ليك مضاعفات مرضك بتعمل ليك فشل في القلب وقد حصل في حقن بكتبها ليك بتزيد من فعاليه القلب ولازم تكون تحت الملاحظه عشره يوم علي الاقل وبعدها نشوف الحقن تأثيرها كيف،،،، ولحدي م تجينا هنا ممنوع الاجهاد ،،،،،في خطوره كبيره علي حياتك ،،،،
خطاب طلع وهو محطم كليا…* ياريت لو م جيت للدكتور ولا عملت فحوصات عامه يعني خلاص حياتي ح تقيف ؟ لازم يكون في حل ،،،، اقول لي رهف شنو؟ كيف اقدر اكسر خاطرها تاني ؟؟ مستحيل !!!! حاليا ح اعقد عليها واسافر دول العالم كلها ،،، ح امشي الهند سمعت انها اتقدمت شديد في العلاج ،،، ايوه ي خطاب م تسمح لي حاجه تقتل فرحتك ،، الاعمار بيد الله ،،،،،
وصل البيت بخطي متهالكه ودخل غرفه حمودي وحضنو ونام جنبه لحدي الصباح ،،،،
رهف راقده في الكنبه وبتشرب في الشاي وهي مبسووطه جدا وجنبها طه وحليمه وقالت : اسي يعني بكره ح يكون عقدي ؟
طه في فرح : ايوه حسب نيتك ربنا اداك زوج سيد الرجال ديل كلهم ،،،،
حليمه : رهفوفه بتي الحلوه ان شاء تتهني وم تشوفي شر في حياتك قادر يا كريم ..
رهف : انا م مصدقه حاسه اني بحلم وح يجي زول يصحيني من الحلم دا الصباح…
طه : لا ي بتي انتي ما في حلم وربنا عوضك انتي عانيتي كتير ومرضتي واتعذبتي بس الله اداك زينه الرجال حافظي علي بيتك واكسبي راجلك واتحاشي ميناس لانها م ساهله،،،،
رهف : اكتر شي مخوفني ميناس وحاجه روضه 
حليمه ; م تخافي خطاب راجل وبقدر يحميك،،، مافي زول ح يقدر يتعرض ليك…
صحي خطاب من النوم بدري ولقي روضه في الهول قعد جنبها وسأل عن ميناس وردت امه : اجي 
انت م بايت معاها في الغرفه ولا شنو ؟
خطاب : لا كنت مع محمد… ناديها لو سمحتي ي امي عايزكم في موضوع
روضه بعد نادت ميناس : خير ي ولدي مالك في حاجه ؟؟؟؟
خطاب عاين لي ميناس وقال في جديه : بصراحه وبدون مقدمات انا عايز اتزوج علي سنه الله ورسوله…
ميناس بقت تعاين في ذهول وم نطقت بي كلمه………
روضه هاجت : يظهر انك جنيت علي اخر عمرك 
خلاص لقيتنا سايبنك علي هواك كل يوم مع وحده جديده ،،،،،، تتمادي وتقول داير تعرس كمان ؟ مالك الناقصك شنو ؟ مرتك حوريه وكامله الكمال لله… ولاده جابت ليك الولد البشيل اسمك ولسه لو ربنا مد في العمر بتملا البيت اولاد وبنات ،،،،
سكتت مسافه وبعدها واصلت : اسمع يا خطاب اذا عايز تعرس بت ناس م بنقدر نقول ليك شي بس م بنمشي معاك وم بتجيبها لينا في البيت دا ،،،، بس بتاعه الشوارع والسايبه الاسمها رهف لا والف لا واذا اصريت وعرستها لا ولدي ولا بعرفك وكمان تطلع من البيت دا او اطلع انا واختك ومرتك وولدك
ميناس فضلت تبكي في انهيار وم قالت ولا كلمه وكانت مصدومه لدرجه بعيده ،،،،،اما خطاب نادي هيلين وطلب منها تلم كل ملابسه في شنطه وتجيبها ليه ،،،،،
روضه عاينت للشنطه وقالت وهي بتبكي : يعني بايع الدنيا كلها عشانها ؟ م هاماك امك ولا ولدك ؟ 
خطاب قرب منها وحضنها وباس راسها وقال : انتو جزو لا يتجزأ مني ،،،مستحيل اقدر استغني عنكم بس م بقدر اعيش بدون البت دي ،،
ميناس بقت تنادي فيه بس هو طلع بسرعه وروضه قالت ليها في حزن والدموع في وشها : عمرك م قدرت تضميه ليك قدمتي لي رهف علي طبق من ذهب…
ميناس : اصلا انا بره حياته وقبل رهف كان خاتيني علي الهامش عايش حياته بالطول والعرض…
ضغط خطاب علي جرس الباب وبعد شويه جا مهند عشان يفتح وقال في خلعه : خير ان شاء الله م تكون حصلت مشكله بينك وبين ميناس ؟
خطاب : طبيعي تحصل مشكله واسيب البيت بعد خبرتهم بزواجي من رهف،،،،
مهند في خوف : موش شايف انك اتسرعت شويه ؟ ميناس صعبه .
خطاب :ربنا يسامحني في حقها لو شفت كسره نفسها والانهيار الحصل ليها،، والغريبه انها م قالت اي حاجه انا مشفق عليها…
مهند في ضيق : م تشيل همها بتعرف تدبر امورها… خليك انت في نفسك بس ،،،
خطاب في حيره : تقصد شنو ؟ في حاجه انت مخبيها علي ؟
مهند : لييي في شنو ؟
خطاب : مهند م تدس مني حاجه في عيونك في كلام…احكي ،،،،
مهند : بصراحه انا مشيت لي بشير الجاك في بيته،،، كلامه عن رهف يوم الحفله م اقنعني دردشت معاه شويه لقيتو حزين واموره جايطه ورجع يشرب تاني وحسيت انو زي الضميرو مأنبو ،،، سألتو مباشره عن رهف وعلاقته بيها اتخيل قال لي شنو ؟ قال رهف وحبوبتها فعلا ماديات وبستنزفو الاغنياء بس الشي الماحصل وكذب فيه حكايه انها بتمشي الشقه معاه وتسلمو نفسها ،،،
خطاب في فرح : يعني رهف م بائعه هوي او بت ليل ؟ طيب لييي قال لي كدا ؟
مهند في حزن : ميناس طلبت منو يقول الكلام دا عشان تقطع علاقتك بي رهف
خطاب في غضب : طول عمرها حقيره ميناس لما اتزوج رهف م عندي حاجه لي اي زول بقوم بي واجبي تجاه ميناس كامل بما يرضي الله ،،،،، ومهر رهف بكتب ليها الشقه الكانت قاعده فيها بيع وشراء ،،،،
————————————–
———————
*☆إمتناني *
*☆بت محمد جمال الدين☆*
*☆يتبــــــــــــــــــــــــــــــــــــــــــــع☆*
لقراءة الجزء التالي : الجزء الرابع والعشرون من رواية إمرأة بلا هوية
لقراءة الجزء السابق : الجزء الثاني والعشرون من رواية إمرأة بلا هوية
للإطلاع علي فهرس اجزاء الرواية : رواية إمرأة بلا هوية ( جميع الأجزاء كاملة ) للكاتبة بت محمد جمال الدين
جميع حقوق الرواية محفوظة للكاتبة بت محمد جمال
