الجزء الرابع من رواية الزوجة التائهة بين الأحلام والواقع

وفي الجزء الرابع من الحكاية نحن مازلنا في بداية الأحداث وسنري المزيد من التشويق والجمال من ابداع الكاتبة كيندا، لذلك هيا بنا لنبدأ القراءة سوياً لاحداث الجزء في السطور التالية .

الجزء الرابع من رواية الزوجة التائهة بين الأحلام والواقع

هوا … مهم والموضوع التانى مش عارف كيف ينقولهولك الحق بس تسمعيه منى خير ماتسمعيه من حد تانى قى العزومه
هيا … شنى حبيبى ان شالله خير شن فى
احمد…..اى شاب اكيد مر بعلاقات عابره فى حياته وعلاقات جديه وانى قبل مانرتبط بيك كانت فى وحده فى حياتى وهيا بنت خالتى مريومه والبنت اسمها اميره وراهو صارت حتى خطبه بيناتنا لمدة 5 سنين بس لما كترت المشاكل وامها بدت تتشرط وهيا بدت تاخد فى كلام امها فوتها انى وامى الحق وقفت معاى لانا خالتى تمقعرت عليا وعلى امى هلبه وبدت تتشرط وتدير فى مشاكل مهم تفركش موضوعنا وهيا طبعا بعدى طول نخطبت.. وبعدها صار نصيب بينا وانى قوتلك لانا خالتى مريومه وبنتها بيجو نتوقع هالشى فامرات واحد من العيله تجبدلك سيره على الموضوع فانبيك تكونى عندك علم بس قدامهم ..

… طبعا بنت مصدومه متلخبطه متحطمه كل العلامات ماتتفسرش الا فى داخلها ومعش عرفت شن تقول هل تقوله علاش ماقولتليش من قبل؟؟؟ وهل كلامه يأكدلها انا مش رح يكون فى حب بيناتهم ؟؟؟ وهل هوا قاعد يحبها او لا .. بس نعقد لسانها وقعدت تشبحله لانا ملامحه فى الحكى ماتدلش الا على شى واحد انا هوا خطبها ردة فعل لما حبيبته اميره نخطبت بس وملامحه وهوا يحكى عليها تدل انا هوا مازال يحبها بس فى حاجات حارقتله قلبه لحد توا وخلاته يكره يسلم قلبه لاى مرأه وهدا الا زاد حارقها ووو فجأه جى سوال فى بالها حبت تسألهوله وطول نطقت بيه
ليلى … واميره شن صار فيها بعدما نخطبت؟؟
هوا .. سمعت انها فسخت قبل عرسنا بشوى
هيا … انت مازال تحبها ؟؟؟؟؟؟؟؟؟
هوا ….. ااااااااااااايه عاد مانبوش نسكروه موضوع هدا ولا شنى خلاص الا فات مات والبنت مشت فى حالها وانى تزوجت وانى قوتلك باش يكون عندك علم بس مش تشديهالى تحقيقات .
هيا .. اوك
وناضت ….. فجأه سالها وين ماشيه ..
هيا .. بندير دوش ونطلع
هوا .. باهى خلاص حتى انى ببنزل ساعه ونجيك ونبيك مش ترقدى اهو قتلك
هيا .. ان شالله
وخشت للحمام وفتحت دوش وقعدت تبكى وتدكر فى نظراته وهوا يحكى عليها وكيف ارتبك لما قالتله تحبها اولا وبعدها عرفت علاش عزوتها تعامل فيها هالمعامله مره مره لما تنوض عليها هبلتها لانا حست انها خدت مكان بنت اختها وحست بالغيره منها برغم انا هيا الا خاطبتها بس تمنت انا بنت اختها هيا الا تكون لولدها وقدرت من هنا تعرف كل شى وتفهم اللغز الا كان محيرها علاش هما يتصرفو هكى ..
دوشت ولبست بيجامة النوم وماكلفتش نفسها توقف على مرايه هلبه او تلبس اى شى ملفت لانا الا فى داخلها والغربه الا حست بيها خلها مش خاطرها الا تقعد فى دار بروحها بس وماتشوف حد قعمزت على زوايه فى دار نومها وقعدت تفكر لو انها قالتله انت علاش خدعتنى وماقولتليش من الاول شن بتستفيد ؟؟
ولو قالت لاهلها مش رح تستفيد شى الا انا ينحرق قلب بوها وامها عليها وينتكس بوها وخاصة انها متعلقه بى بوها هلبببببببببببه وبوها نفس شى
فقررت بعد تفكير انها تغفرله وتنسى وتحاول تنسيه حبه الاول وتمتلك قلبه برغم انها عارفه انا الا نكسر فى قلب احمد من اميره صعب هيا ترده بسهوله بس خلت ايمانها بالله قوى وقررت انها تستمر لاخر لحظه.
وناضت توضت وصلاة العشاء ودعت لربها انا يكون معاها لانها مش رح تقدر تتراجع او تحرق قلب امها وبوها عليها وبعد ماكملت ناضت بترد صلايه فى مكانها وعلى خشت احمد راجلها خش دار نوم ونادها وفاتت الليله وصبح فاقت من ساعه 8 ونص تساعد فى عزوزتها فى فطور
ليلى… صباح الخير ماما
ام احمد … صباح الخير شنى نوضتى اليوم باش تساعدنى سلم بنيتى نجيها يارب باهى باه مادمك جيتى خودى حطى طاوه على نار وديريلنا شكشوكه خلى انى نحط باقى الفطور ونطيب شاى وقهوه هي سلم بنيتى هى
ليلى .. حاظر
اوبعدها قعدت ام احمد تنادى ياااااااااااااصفاء يااااااااااااامروه نوضو يعطيهالكم الفطور واتى وقت على مدارسكم
وطبعا جمله هادى خلت ليلى تنسى همها وتضحك وتقول فى داخلها ماشالله عزوزتى عندها بلحوحه صوت تخلى ميت ينوض من نوم مفزوع مش عارفه كيف مازال راقدين جيران .. خش احمد للمطبخ وصبح ردو صباح بس ليلى فى شى خلاها ترد من غير ماتقيم عينها فى عينه واحمد حس بالشى هدا بس دار روحه احوال قدام امه ومشى الموضوع وحطو الفطور واللتمو الولاد نبيل وعصام والاهما اصغر من احمد والبنات صفاء ومروه وفطرو وكل واحد تسقد مروه لقرايتها وصفاء لجامعتها ونبيل للمعهد متعه وعصام لمحله وقعدت هيا وعزوزتها..
ام احمد … ليلى انتى شدى مطبخ والغدى وانى خلينى على الحوش وصابون خاطر الولاد مكدسيين حوايجهم يبو تصفى وغسيل وانتى كانا عندك حاجه تبى غسل هاتيها انتى وحميدا
ليلى … لاماما صحيتى تو نركب بعدين نغسلهم مش هلبه هما
ام احمد … باهى باهى مالا خلينى نبدا انى وانتى طلعى كويسة لحم خلى تدوب وابدى فى مطبخ
.. طبعا ليلى ظمت معايين فطور وطيب الغدا وتغدو وخلت معايين لمروه تغسلهم وركبت فوق توتى فى روحها باش تمشى لحوش بوها وتت روحها وكلمت احمد ومشو لحوش بوها وهما طول طريق ساكتيين
وفجاه احمد سالها ..

علاش اليوم لما صبحت عليك دوب مارديتى عليا وحتى عينك ما نهضتيهاش انتى اضايقتى من الكلام الا قولتهولك امس ؟؟
هيا.. لالا ماتضايقتش بس تمنيت لو انك صارحتنى من الاول
هوا … وشن فرقت يعنى ؟؟؟
هيا … اقلها كان ليا حرية الاختيار نوافق او نرفض لانا بنت خالتك مش زى اى وحده بعيده عليك هادى شبه ديما معاكم يااحمد وانى مش رح نتحمل نشوفها ونسكت ونتصرف عادى

هوا.. انى قوتلك انى نسيتها بدليل انى ارتبطت بيك وخلاص فوتيه هالموضوع وانسيه لانى مش ناوى نخش لحوش بوك وانى رافع راية نكد
هيا .. ابتسمت ابتسامة هزوه على جملته<< بدليل انى ارتبطت بيك>> لانا هيا عارفه انا هوا ارتبط بيها باش ينسى بس ويحساسها انا هوا قادر يتخطى علاقتهم وللاسف ليلى كانت السلوم الا هوا استعمله.
وصلو لحوش بوها وطقطقطو وخشو سلمت عليهم امها ودخلتهم لصاله هدرزو وتعشو وطمنت على بوها وحطت قناع سعاده ا للا متناهيه وبعد العشى روحو وهنا
.. وصلت لحوشها وقررت اول قرار انها مش رح تفكر تحمل بى بيبى الاما تتاكد انا هوا يحبها زى ماهى تحبه بس كيف رح تتصرف وخاصة انا هوا يبى بيبى ومفكر فى صغار هلبه وخاصة انا امه تزن عليه …..

يتبع……

لقراءة الجزء التالي : الجزء الخامس من رواية الزوجة التائهة بين الأحلام والواقع

لقراءة الجزء السابق : الجزء الثالث من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .