الجزء الثامن من رواية الزوجة التائهة بين الأحلام والواقع

المواقف لن تتوقف وستزداد جمالاً وإبداعاً طالما ان المؤلفة هي كيندا، تعالوا سوياً نبدأ قراءة الجزء الثامن لنعرف هل سيكون هناك مفاجآة سارة تنتظر أبطالنا أم سيحدث غير ذلك ؟

الجزء الثامن من رواية الزوجة التائهة بين الأحلام والواقع

ملاحظه للبنات الا طلبو اعمار العيله ………
احمد << 30 سنه>> متخرج ويخدم مدير اداره فى شركه كبيره
ليلى .. << 23 سنه >> متخرجه من الهندسه
عصام<< 27 سنه >> متخرج من كلية هندسه نوويه وفاتح محل ملابس
نبيل <<24 سنه>> بس قاعد يكرك فى الكعك فى المعاهد العالى وطبعا كان موقف شوى قرايته بعد ما قرى التانوى وبعدها عدل مواده بالواسطه من بوه وقرى معاهد عالى طول بس شبه مدوام فى الجامعه من كتر ما مادا خليقته غادى
صفاء …. << 20 سنه>> وتحب دكتورها فى الكليه
مروه …. << 16 سنه>>وتقرى فى تانوى
اميرة …. <<28 سنه >> كانت على علاقة حب قويه بى احمد لمدة سنتين وبعدها نخطبو 5 سنين
………………………………………………………………………………………………………………………………….
لبست روب نوم حرير باللون الاحمر القاتم وبخت شوى برفان وطفت ضى دار وفتحت ضى سهره وفتحت اغانية فيروز << انا لحبيبى >> وقعمزت على سرير وطلعت من القجر كتاب جابته معها من لما كانت بنت لاحلام مستغامى << الاسود يليق بك>> وقعدت تقرا لحد ماسمعت باب الحوش الرئيسى تصكر وطبعا كملت القرايه عادى وفجأه شمت ريحة برفان احمد فى دار قامت عينها شافت احمد مبتسم وحاط ايده وره ظهره وكأنه مخبى شى ورا ه ولما جت عينهم فى عين بعض ابتسملها وطلع ايده وفيها سنسله دهب منقوش فيها اسمه واسمها وقاللها ….
….. كل سنه وانتى طيبه وان شالله كل سنه واحنا مع بعض لاخر العمر وهادى نعتبرها اخر محاولة ترضيه ليك لانك دهشتنى بصراحه ……
هيا …… ضحكت وبعدين قالتله انت كيف عرفت انا اليوم عيد ميلادى ؟؟؟
هوا …. اليوم وانى نكمل فى اجراءت السفر مبكرى قابلنى جواز السفر متعك فتحته وقعدت نشوف فيه وقريت تاريخ ميلادك وعرفت انا اليوم هوا عيد ميلادك ..
هيا …. شكرا وبعون الله مش رح نحيها من رقبتى ابدا بس حابه نسالك سوال ؟؟؟
هوا …. شن فى ..
هيا…. انت مازال تحبها اميره او لا؟؟
هوا … ليلى علاش تفتحى فى سيره توا
هيا … من حقى نعرف يااحمد لانا هيا واضحه انها مازال تحبك ومانساتكش وانى سمعتك لما قولتلها انك مازلت تحبها
هوا…… شوفى ليلى برغم انا الموضوع مش وقته ابدا بس حاب نقولك شى….. الا نحس فيه هدا شى يخصنى انى بس لانا الا مريت بيه مش شوى بس انى نحاول قد الامكان انى ننساها فا ماتطلبيش منى شى فى الوقت الحالى نعتبر فيه شبه مستحيل واما موضوع انى قتلها انى نحبها فا مفيش منها دوا هادى لانك لو سمعتى الكلمه الا قبل هادى وكلفتى نفسك وتسمعى الكلام الا بعد هالجمله كنتى عرفتى انى شن قوتلها وخلاصة الموضوع لازم ماتوتقى فيا وتعرفى انى مستحيل نخونك لسبب انى اولا ولد ناس وماتطلع منى هالعيبه وتانى شى انى اخر وحده نفكر انى نرجع نكلمها هيا ولو نبيها كنت استنيتها ورجعتلها او ليلة دخولنا سيبتك ومشيتلها بس انى خلاص حسمت الموضوع بينى وبين نفسى ومش انى الا نتخد قرار ونولى فيه مهما كان شخص وان شالله نكونو انتهينا من هالموضوع للابد
هيا …. وانى شنى بالنسبه ليك ؟؟؟
هوا … انتى مرتى الا ناوى نكمل معاها حياتى كلها وخلاص ليلى فضيها سيره اليوم اوك…
طبعا بعدها ناض من على جانب السرير وقالها انى بنخش ندوش وتيلى حاجه نتعشاها
هيا … حاظر …. وهوا خش للحمام وهيا خشت للمطبخ وتتله العشى خفيف وتعشو مع بعض وبعدها هوا خش لدار نوم وهيا حطت المعايين فى الحوض ومسحت طاوله وخشت لدار لقاته واخد الكتاب الا كانت تقرى فيه ويقلب فيه ويبتسملها بعدين قالها ….
هوا ….انتى من اول ماخديتى الكتاب وهوا اسمى مكتوب عليه بالبيرو فى صفحه تالته او انتى كاتبتيه عليه << مع غمزة عين على جنب>> وضحك ضحكه خبيته ….
هيا …. احمد لو سمحت هات الكتاب لوسمحت …
هوا…… وكان مانبيش نعطيهولك يعنى شن بديرى …… كانا تبيه تعالى خوديه انتى اسف انى مانجى لحد…..
هيا …. احمد هاته خلاص بطل براده وطبعا وجهها كله ولى احمر
هوا …. اعترفى اعترفى هههههههههه بتحبنى يا ليلى هههههههههه قولى قولى نحبك عادى راهو تصير فى ارقى العائلات ههههههه
طبعا هوا لما قاللها قولى انك تحبنى كان يبصر لانه ماتوقعش انها حباته وملك قلبها فى الوقت القياسى هدا بس هيا لما سمعاته يقول هكى حست انا هوا استهزء بى مشاعرها وانا هوا قاصد هالشى فا مشت وسيباته وخشت تجرى للحمام وقعدت لتوانى تشبح لمراية الحمام وبعدها فتحت دولاب الصغيرون الا فوق لافندينو << صيدليه >> وخدت منه شريط حبوب منع الحمل وخدت اول حبه بدون ماتفكر فى العواقب برغم ان الموضوع هدا كانت تفكر فيه من الليله الا عرفت انا احمد كان يحب اميره وانا هيا حياتها معرضه للخطر فى اى لحظه بس فى شى خالها تقدم خطوه وتاخد الحبوب ممكن لما شافت ردة فعل احمد وهوا يستهزا بمشاعرها من غير قصد طبعا بس هيا حست انا كلها على بعضها بمشاعرها ماليهاش مكان فى قلب احمد ..
وبعدها خشت لدار نوم لقاته مازال مستمر يقرا فى الكتاب وقالها …..
… ماعرفتيش من كتب اسمى على كتاب؟؟؟؟؟ ههههههههههه
شبحتله وقتله لا لا مش عارفه ممكن جارتنا وهاته لكتاب خلاص ولانقولك معاش نبيه خوده خلاص ….وغطت وجهها باليرغان .
مشى قالها غير استنى نبيك شوى بنقولك شى…… واطفى سهاره ومشو فى خبر كانا لحد صبح ساعه 6 وفاقو على صوت منبه ينوض فيهم باش يوتو روحهم لانا موعد طيارتهم ساعه 9 ولازم قبل ساعتين يكونو فى مطار … ناضت ليلى خشت للحمام غسلت وجهها وشبحت لدولاب شوى بعدين فتحاته وخدت حبوب منع الحمل حطتتهم فى جيبها وطلعت حطتهم فى شنطتها وهوا خش بعدها للحمام وطبعا خشت لدار صلاة الفجر وخشت للمطبخ طيبت القهوه وحطت الفطور على طاوله وفتحت فيروز بصوت واطى على اغنية <<بكتب اسمك ياحبيبى >> وقعمزة على كرسى وصبت فنجان قهوتها وبدت تشرب فيه لحد ما خش هوا وقالها اااااااه ريحة القهوه وصلتنى لحد حمام وفوقها فيروز لا لا هكى هلبا عليا هههههه …….. فاهيا ابتسمتله وقتله صباح الورد فا رد صبا ح الورد ياوردة عمرى انتى ههههههه وبعدين قاللها حقا على قولت فيروز << بكتب اسمك ياحبيبى عالحور العتيق>> ماعرفتيش من كتب اسمى على الكتاب ههههههه فاهيا تعفلت وناضت وقتله نسخنلك خبزه ولا تبى توست ولا بريوش ؟؟؟؟؟؟ فاهوا قالها …. سخنيلى شريحتين توست وخلاص ساعه 6 ومانبيش ناكل شى تقيل وبناكل توا غير لانا اكيد فى المطار بعدين بنتشحورو بس وكان هدا خديت قهوه بس …
وبعدها لبسو حوايجهم وهوا قاللها كانا هدا نطلعو طول وبعدين توا نكلموهم بالتلفون خير مانوضوهم من توا فاقتله اوك وطلعو وطلعو شناطيهم معاهم وتسقدو للمطار وصلو غديكا وبدو طول فى الاجرأت وبعدها فى تفتيش ووزن الشناطى وبعدها ركبو فوق يستنو فى موعد قلوع طيارتهم واستغلو هالفرصه وقعمزو فى كافتيريه المطار الا فوق فى مكان انتظار المسافرين وقعدو يهدرزو وقالتله لو طلبت منك تحكيلى على قصتك مع اميره تحكيلى او تعتبرنى غريبه عليك انى بجد المره هادى حابه نسمعك مش كزوجه ليك لا انى حابه نسمعك كاصديقه وشخص قريب ليك لانى حاسه فى غصه بقلبك فى كل مره وتحديدا من يوم ماعرفتك لحد ليلة دخولنا واستعجالك لحد كل يوم مرينا بيه مع بعض
هوا…… اوك من حقك تعرفى كل شى وانى رح نحكيلك كل شى بس نتمنى هدا الشى الا بتسمعيه مايغيركش اتجاهى او يبنى حواجز او مشاكل بينا
هيا …. نوعدك ان نتفاهم وضعك ومش رح يتغير اى شى
هوا … معناها رح تسمعى 7 السنين الا مرو من حياتى هباء منتورا والا سبب فى انهم خلونى شخص مكسور مش قادر نعطى تقه لاى حد لانى بطبعى لما نحب نحب وصعب ننسى وهدا الاخلى اميره تلعب بيا

بس توا خلينى نكلم اهلى قبل ونودعهم وانتى كلمى اهلك وودعيهم لانا مازال 5 دقايق على موعد طلعت طائره
طبعا ودعو اهلهم ومشو للممر الا يرفع لى ساحة طائره وركبو للباص ووصلهم لطياره واهنا ليلى مسكت ايد احمد وركبت معاه فوق وقعمزو وربطو حزم الامان وقاللها
احمد … تقريبا رحله من هنا لى لندن تستغرق من ساعه ونص لحد ساعتين ان شالله ماتتعبيش بس
ليلى .. ولا يهمك بس انت احكيلى باش نتسلو فى طريق
احمد… اوك …. هدا ياسيدى لما انى تعرفت على اميره كان عمرى23 سنه يعنى سن طياشه وهبال وهيا كانت عمرها 21 سنه وصار تعارف فى عرس اختها فى يوم الفاتحه متع اختها خشيت لجنان نبى ندخل صفر متع العشى وجت صدفه اننا تقابلنا وجت خدت منى صفره وقعدت تشبحلى وانى نفس شى ومن هدكا اليوم حطيتها فى دماغى وبديت سريك مريك على حوش خالتى ناقص غير نبات عندهم بس تقدرى تقولى مانفارقوش فى بعض حتى فى الجامعه وطبعا انى كنت فى اخر سنه وهيا كانت سنه تانيه ممكن فا من اول مانوضو من نوم لحد ماتوصل للكليه وانى معاها لحد مانوصلها لباب مدرج وحتى لما كانت تطلع كانت تشوف فيا قدمها فى مدرج ويخى مرات نسيب محاضراتى ونحضر معاها ….
مضيفة طياران ….. يرررررررجى من الساده الركاب ارتداء حزم الامان استعداد للانطلاق ويرجى الانتباه الا ملاحظات استعدادات سلامة الراكيبين وملاحظة اماكن الخروج من طائره فى حالة حدوت اى خلل وطرق النجاة …..
مضيفة طيارن …. تفضلى اختى وجبت الفطور انتى وزوجك وان شالله بصحه
احمد … شكرا اختى وممكن مياه لو سمحتى بس
المضيفه …. ولا يهمك …. تفضل ….. وانتى اختى؟؟؟ …. لا لا شكرا
احمد … مهم وين وصلت معاك ….. اه تدكرت مهم قعدنا على حال هدا لحد ما وصلت هيا سنه رابعه يعنى اخر سنه وبتتخرج وانى وقتها تخرجت وقعدت نخدم فا الا كنا متفقين عليه انا فى هادى سنه رح نخطبها ونقعدو مخطوبين لحد مانكمل حوشى وبالفعل كنت راجل معاها وخطبتها وفضيت فيها وبمجرد ماتخرجت درنا بيان ولبسنا دبل وامى وامها عزمت العيله كلها وقعدنا سنه سنتين تلاته امورنا ميه ميه لحد مابدت تشتغل خليتها ومابيتش نتدخل فى راغباتها طالما هيا عندها طموح تخدم وبالفعل خدمت وانسجمت هلبه وانى كنت اكبر مشجعين ليها لدرجة انا اول مشكله تجى تحكيهالى طول وكانت ديما تشكيلى من مديرها انا هوا حاط راسه من راسها وهوا مش كبير فى سن كان ممكن وقتها قالتلى انا كان فى جو 29 او 30 سنه وفى هديكا فتره كانتت تتغير وتبعد عليا بشوى بشوى ولما نسالها شن سبب تقولى لا واللهى ماعاش عندى وقت زى قبل … لا الخدمه هلبه وضغط معاش مخلينى نفضى وقعدت على الحال هدا لحد ما جى يوم عيد ميلادها اتصلت بيها ساعه 12 فى ليل نبى نقولها انزليلى نبى نعطيك هديتك وتورته متعك لقيت نقالها انتظار نصددددددددمت وهبلت ولما ردت عليا انفجرت فى وجهها وقتلها مع منى كنتى تحكى مشى قتلى مع صاحبتى اتصلت بيا ساعه 12 باش تقولى كل سنه وانتى طيبه بس طبعا انى مغفل صدقتها وتأسفتلها وهيا دروحها حرجت منى وبدت فى جو العياط وسكرت فى وجهى ومابتش تاخد حتى هديتى وقعدت كل يوم نتصل بيها ونتاسفلها وهيا ولا رد يانلاقاها انتظار يا مشغول يايضبح مايرد حد وقعدت على حال هدا شهرين لحد ما امها كلمت امى وقتلها بنتى خلاص معاش تبى ولدكم والميه وملح خف وقولى لولدك يجى ياخد حاجاته وان شالله يلقى بنية الحلال وانى طبعا فى هديكا الليله قريب هبلت والله حتى حوش سيبته وفكرت انى نمشى للبحر ونلوح روحى وقعدت فى الحوش شهرين حابس روحى لحد ماجى اليوم الا سمعت فيه انها انخطبت وكان بعد شهرين بزبط من تسيبتها ليا من غير سبب والصدمه الاكبر انا كان مديرها الا كانت تشكيلى منه فا بعدها بدت تتوضحلى الامور وبديت نفهم علاش سيبتنى مع العلم انى كنت وقتها موظف بسيط على قد حالى …. مهم قررت ندور مديرها هوا ونعرف ارقامه شخصيه وبالفعل حصلته فى ظرف يومين ومشيت لصاحبى الا يخدم فى لبينا وقتله نبيك تخدمنى فى شى نبى نشوف سجل رقم هدا << الا هوا رقم خطيبته >>فى اليوم كدا بتاريخ كدا منى كلمها وشوفلى رقم هدا امتى كلمها بزبط وقداش قعد معاها؟؟؟؟؟ ……..مشى رد عليه صاحبى وقالى اعطينى يومين وانى نعطيك الخريطه بزبط
وبالفعل اتصل بيا بعد يومين وقالى انا رقم هدا راهو اتصل بيها هدكا اليوم صبح وقعد ساعه واتصل بيها ساعه 12 بزبط وقعد معاها 10 دقايق وبعدها كلمها مع ساعه 1 ونص فى الليل
وطبعا انى تاكدت كل شكوكى وقالى انا رقم هدا كان يتصل بيها من سنه قبل موعد عيد ميلادها يعنى بالمختصر بدت تخون فيا من بعد ماسكرت سنه من خدمتها وسنه الا خانتنى فيها كنا خشينا خامس سنه مخطوبين …… وهيا هادى قصتى انى واميره ……
ليلى ….. ماتوقعتكش انك مريت بهدا كله يااحمد انت بجد انسان قوى ….. بس قولى بعدها شن درت
احمد …… قررت 2 حاجات اولها انى نشد فى خدمتى وبالفعل شديت وخدمت وتعبت لحد ماوصلت مدير اداره وتانى شى انى سكرت قلبى ولوحت مفتاحه فى البحر لانى تاكدت انى مالياش نصيب فى حب او انى لما نحب نولى غبى هلببببببببه …
ليلى …. بعد الا سمعته منك يااحمد مش رح نقدر نلومك او نعاتبك لانى رح نولى انانيه ومانفكرش الا فى نفسى بس ان شالله رح نقدر نرجعلك الشى الا نكسر فى داخلك ونلقى مفتاحك الا لوحته لانك اكيد مداير منه نسخه احتياطيه هههههههه
احمد ….. هههههههههه مرات ماتندريش
وطبعا على صوت همساتهم وضحكاتهم البريئه سمعو صوت صافرة الهبوط وبعدها المضيافه تقول
المضيافه…. انتباه……. على سادة الركاب ارتداء حزام الامان من اجل الهبوط مع الاتنباه على قواعد ارتدائه بطريقه صحيحه ….
فالبسو حزام الامان وهبطت طيارتهم ووصلو باامان اللله واعلنت مضيافه وصول رحلتهم بامان ونزول فا شدو ايديهم فى بعض ونزلو وخدو شناطيهم ومشو لللاوتيل ووقفو على ريسبشن شوى كملو الاجرات وخدو مفتاح وركبو واول شى قاله احمد لى ليلى ….
حمد لله على سلامه ان شالله رحله ماتعباتكش بس ..
ليلى … لا لا حبيبى …. كانت رحله تهببببل لانى فيها عرفت الجزء الحلو فى شخصيتك وجزء الغامض فيها ….
احمد …… باهى شن رايك توا نرتاحو شوى ونوريك الجزء الاحلى فى شخصيتى
ليلى ….. ههههههه اوك
وبالفعل بدلو ملابسهم ودارو دوش وخشو ارتاحو شوى وغطو فى نوم لحد ساعه 7 وساعه 7 بزبط ناضو وبدلو وطلعو وقررو انا يمشو على رجليهم اكبر قدر ممكن حتى يستمتعو وكانت سكنتهم بزبط بجانب هايد بارك فكان هايد بارك اول مكان يخشولها قعدو يتمشو بس المره هادى ليلى هيا الا قعدت تحكى على نفسها بس هوا يسال وهيا تجاوب
احمد …. شن اكتر شى تحبيه فى الراجل
ليلى ….. ههههه نقولك شى بس ماتضحكش انه يكون سى سيد هههه
احمد …… <<< يعنى كيف >>> ؟؟؟
ليلى ….. يعنى يكون قوى لكن حنين عصبى بس رهيف غيور بس حكيم ولما يحب يحب بجد وما يتخايلش انا حاجته تكون ملك لغيره
احمد ……. وانتى هكى تشوفى فيا ؟؟؟؟
ليلى فجأه احمر وجهها وشبحتله وقتله اكيد بدليل انك اول ماتعيط او تتعصب ننهار قدمك بالبكى …
واحمد لما سمعاها هكى ابتسم وشبحلها شبحه كان معناها عمييييييييق هلبه شبحه فى حنان واحتواء وهلبببببه حاجات بس هيا قطعت شبحه هيا وكملت طريقها وقالتله شنى ماتبيش تسالنى سوال تانى ؟؟؟؟
وكملو طريقم …………..
احمد …… سوال التانى هوا انتى ماتجوعيش يابنت لانى بصراحه ميت بجوع ومن بكرى ندير فى روحى ايتكيت ومانجوعش بس والله ماعاد فيها
ليلى …. ههههههه خلاص حبيبى حتى انى جعت تعالى نتعشو فى اقرب مكان
وطبعا بالفعل مشو لمطعم صغير وقعمزو ووصلتهم لستت الاكل الموجود وخدو منه شن يبو وحطولهم العشى وهنا احمد قاللها …
احمد……… سوالى تالت ليك هوا …..

يتبع …..

لقراءة الجزء التالي : الجزء التاسع من رواية الزوجة التائهة بين الأحلام والواقع

لقراءة الجزء السابق : الجزء السابع من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .