الجزء السابع عشر من رواية الزوجة التائهة بين الأحلام والواقع

وفي الجزء السابع عشر هل يا تري الأحداث ستقف في صف بطل دون الآخر أم سنري أن الكاتبة ستنقلنا إلي نقطة جديدة نهائياً ؟ كل هذا سنعرفه في السطور التالية بإذن الله .

الجزء السابع عشر من رواية الزوجة التائهة بين الأحلام والواقع

قعد احمد يراجع فى المشروع وبعدين قام تلفون وقاللها …
احمد …. تعالى نبيك بسرعه
سكرتيره … حاظر …. وخشت للمكتب بسرعه .. … نعم بش مهندس
احمد…. انى مش اكتر من مره نقولك دققى فى حسابات المشروع وتفاصيل قبل ماتعطينى اى شى…. ردى …
سكرتيره…. علاش بشر مهندس انى راجعته اكتر من مره
احمد …. عااااااااااااااوديه كله من الاول ومش رح تروحى الما تكمليه كله وفى المروح كلمى واحد من سائقين متع الشركه يروحو بيك …. مهم انك تكمليه اليوم كله لانا بكرا صبح ضرورى مايتقدم للشركه المنفده ماااشى ولا كلامى مش مسموع نعود….
سكرتيره …. حاظر بش مهندش ولايهمك
قعد احمد يخدم فى شركه ومصكر باب المكتب عليه بينما هيا قعدت برا تعاود فى شغل من الاول ومره مره تخش تسال فيه على حاجات مطلوبه مهم فاتت ساعه ورا ساعه لحد ماجت ساعه فى 11فى الليل فا جاته وقالتله ….
سكرتيره …. بش مهمندس هدا الاطلبته منى وانى بنروح توا لانا خلاص بعد شوى معاش نحصل تاكسلى يروح بيا …
احمد … كيف مش قتلك يروح بيك واحد من سائقين الشركه ..
سكرتيره … الباين انا كلهم روحو ومعاش فى حد فى شركه غير انى وانت بس عادى مش مشكله رح نكلم راجل جيرنا كبيير فى سن ونوضه من نوم وعنده تاكسى يروح بياا شالله غير يرد عليا بس والحمد لله توا بس كيف دكرته ..
احمد …. لا لا خلاص مش ضرورى انى نحطك فى طريقى …
سكرتيره … بش مهندس مانبيش نتعبك معاى
احمد … لا لا انى اصلا كنت مروح … خلاص خودى حاجتك واطلعى نلاقاك برا فى القراج اوك ..
سكرتيره … اوك …. ومشت بسرعه واسة الروج متعها وبخة برفان قوى جدا وواسة شعرها وخدت شنطتها ونقالها وطلعت …. نزلت للقراج ووقفت بعيد على سياره تشوف فيه كيف راكب ويوخر يسياره وكانها تشوف للوحه فنيه وبعدها ابتسمة ونزلة راسها وقربت من السياره وفتحت الباب وركبت
وهنا طلعو بسياره وقعدت تتناقش معه وتفتح فى موضيع لحد ما وصلت رساله من نقاله من ليلى تقوله<< كلمنى حبيبى اول ماتروح …>> فابعد ماكمل قرايه رساله حط نقاله فى مكان مخصص ليه قدام مارشه وبعدها بشوى قالتله …
سكرتيره … انى اسفه انى خديت من وقتك يابش مهندس … وان شالله ماتضايقش زوجتك من موضوع..
احمد … سكت شوى وبعدين شبحلها وقاللها وشن الا صار باش مرتى تضايق .. وبعدين مااضنيش شى يخصك ومرتى اكيد رح تعرف ..
فاهيا ابتسمتله وزى من طعنها وبعدين نزلت راسها وقعدت تفكر لحد ماخطرتلها فكره فى بالها ..
سكرتيره … لوسمحت بش مهندس بندير مكالمه من نقالى
احمد …. اوك …خودى راحتك
سكرتيره … ….. طوووووووووووط …. الو ايوا ماما اهلين حبيبتى …. ولايهمك خلاص انى مروحه فى طريق
اوك … اوك …
وخدت نقالها الا هوا نسخه من نقاله فى شكل واللون وحطاته جنب نقاله وقعدو يتناقشو فى موضوع المشروع لحد مادرس بيها جنب حوشها بعد ماعطاته نعته هيا طبعا وبعدها قالتله …
سكرتيره … شكرا بش مهندس بارك الله فيك .تصبح على خير …وخدت تلفون بسرعه وحطته فى شنطه وركبت …
احمد … لا شكر على واجب .. سلام
ركبت لحوشهم وهيا تضحك وهوا مشى وبعدين خدت نقال من شنطتها الا هوا نقال احمد شمت ريحته وتنهدت شوى وبعدين ركبت شقتها فوق …
بينما احمد طلع بسياره وهوا طول طريق مش منتبه انا نقال هوا نقالها واول ماوصل خدى نقال ودخانه وحطهم فى جيبه وطلع وخش للحوش هنا امه استقبلاته وقالتله …
ام احمد …. وليدى وصلت وينك طييييب فيك هدا وين ريناك … شن بتتعشى ؟؟
احمد .. ايه واللهى جعان بنموت … حطيلى انتى العشى على طاوله نركب فيسع نغير حوايجى ونجى …
ركب احمد وغير حوايجه ولبس بيجامة نوم وتوضى وصلى وبعدها نزل على طول وخلى حوايجه ملوحات على السرير ونزل قعمز فى مربوعه وقال لى صفاء ….
احمد …. صفااااااااااااء خودى صفرتى تلقيها فوق طاوله ..امك اكيد حطتها وهاتيها هنا
صفااااء ….. ماشى احمد … وخدت الصفره وحطتهاله وقالتله احمد ليلى مبكرى كلمتنى وقالتلى لما يوصل احمد قوليله يكلمنى
احمد… ايه ايه بعتتلى رساله مبكرى توا نكمل ونكلمها بس اسمعى ضبحيلى على عصام …
صفاء …. عصام عصاااااااااااام تعالى احمد يبيك
عصام …. اهللللللللللللللن وينك اليوم متشفر ياراجل ماشفناكش بكل ؟؟؟
احمد ….. والله اليوم تخايل جهدى تكسر عمتك سكرتيره لقيتها لاعبتلى فى جدول المشروع كله تقول عيل زفت وقسما نحرق دمى بس تعرف خليتها تعواده كله زى مراه طيبه….
عصاااام …. اهم شى حلوه هههههه كانا حلوه نجى نساعدكم انى عادى راهو والله مايحشمك الا لسانك ههههههههه
احمد …. هههههههه زى باقى البنات غير تصرفاتها على هيفا وهبى شوى ههههههههه
عصام ….. قصدك انت معناها عندك هيفا وروحت نهاااااارك سود هههههه
احمد …. ههههههههههه انى عنى ليلى سادتنى لكن انت جعان الله غالب مانلومش عليك هههههههههه
عصام … غير بجد بجد … شن صار فى موضوع الا قولتلك عليه …
احمد …. والله شن بنقولك البنت مادما ماتبيش جو تلاقيك وهكى وانت عاجباتك ننصحك برالها من باب وديرو فترة خطوبه مش شرط فتره قصيره وافهمها وقابلها فى حوش بوها براحتك ….انى هادى نصيحتى ليك الحق وريح راسك …
عصام … انت تقول هكى قصدك …. اصلا حتى انى هدا الا قولت بنديره …. باهى اسمع شن رايك توا تفتحو الموضوع للحاجه مادما حنا فيها خلى بعدين نتصل بيها ونتفاهم معاها شن رايك ؟؟؟
احمد … باهى باهى تو نشوف غير خلينى توا نتسمسم بس وانتم زفت عيله رغايه … شن هدا ماتتعبوش هههههه
عصام … باهى خلاص مالا نمشى نقول لصفاء ديرنا قهووه…………… صفاااااااااااااااء تعالى ديرلنا قهوه واحسبى الحاجه معنا
صفاء …. باهى باه … .. الو … حبيبى والله متحشمه معاك عطينى 10 دقايق بس وعادولى …
صهيب … لا انى فديت خلاص مش قادر نلحق معاك كلمه فى جرت خوتك زفت شن هدا ماعندهمش غيرك
صفاء …. دقيقه بس ….. عصاااااااااااااام تبيها توا ؟؟؟؟
عصاااام….لا لا ربع ساعه تانيه خلى يكمل احمد عشاه قبل وبعدين ديريها وطلعيها فى مربوعه
صفاء …. ماشى ماشى ….. ايوااا صهيب لو سمحت معاش تتكلم على خوتى هكى ايوووووا مالا شنى ماعندهمش غيرى ويحلفو براسى مايحنتو الله غالب
صهيب …. باهى توا شنى يا صفاء فكرتى فى موضعنا … انى والله تعبت بابنت الحلال ونبيك تكونى حلالى وبالله عليك خليها على نصيب وماتصكرى دماغك قدرت والله مانى مقصر ما حصلتش ماتبينى نديرلك طياره خاصه باش ترضى انتى عاد
صفاء …. باهى وشن الا يضمنى ياصهيب ..
صهيب … الا ضمنك كلمتى ولا انى مش عاجبك ولا تشوفى فيا مش راجل ……..تكلمى …
صفاء …. حبيبى انت احلى راجل فى دنيا وخلاص اوووك بس مهم انا لو ماحصلتش نبى نقرا غادى اى شى مهم نقرا ونطور من نفسى واول مانروحو نكمل قرايتى وهدا شرطى الوحيد فى حال انك ماحصلتش طبعا
صهيب …. اوك خلاص اتفقنا معناها الرجاله بيجو الاسبوع الجاى توا نقول لامى تتصل باامك وتتفاهم معاهم اوك … وتوا نوريك على ليلة امس قوتلك شوى ونتصل بيك فوتينى تى واللهى غير نتجوزو بس الا ما ندير فيك البهادل هههههههههه
صفاء … باهى باه خلاص هههههههههههه يومن عاش … توا خلينى نمشى ندير القهووه اوك
اسمعى ….. نحبك …
صفاء … حتى انى  برا خلاص قبل مانغير راى
مشت صفاء وطيبت القهوه مشت للمربوعه ولقت انا الكل ملتمين فاقاللها عصام ……
عصام …. طيب فيك باهى الا جبتيها قريب نادينا على جيران ههههه
صفاء …… خود هاك بسرعه منى تلفيونى يشرين
عصام …….انتى ديما اصلا…. جايك يوم اغبر انتى واختك مافيشى ضى على تلفونات
صفاء … باهى باه دير مافى راسك واسكت ….. الوووو ايوااااا اهلين للوشى نعم ايه اهو جنبنا احمد … باهى باهى خلاص
احمد …. هاتيها هاتيها …. الو ايوا ليلى …..
ليلى….. اهلين حبيبى …. اه وينك من بكرى نتصل بيك على نقالك مشغول ؟؟؟
احمد …. تى شنى مشغول يادوى انى من بكرى لوطه وتلفونى فوق ؟؟؟
ليلى…. واللهى من بكرى نتصل بيك مشغول ؟؟
احمد …. ترا صكرى شوى ونعادولك ….. خدى احمد تلفون وحطه فى ايده وركب فوق بسرعه وبينما صفاء يتخضر وجهها ويتصفر خايفه احمد يفتش تلفون ولا يتصل صهيب ويانهارها الاسود …
ركب احمد بسرعه طلع تلفون من جيبه وفتحه وهنا صدمه انا تلفونه خداته سكرتيره وهوا خدى تلفونها فهنى حس انا هوا فى ورطه لانا لو اتصلت ليلى والسكرتيره فتحت الخط وردت شن رح يصير ؟؟؟ ….. اتصل احمد بتلفونه وردت عليه هيا وقالتله …
سكرتيره …. اهلين باش مهندس سامحنى من بكرى نتصل بيك على رقمى من تلفونك نبى نقولك انا تلخبطنا فى سياره بس انت ماتردش ؟؟؟
احمد …. مش مشكله خلاص مهم بكرا ماتنسيشى معاك اوك ..
سكرتيره ضحكت ضحكه خبيته وقالت … اوك بش مهندس ولايهمك سلام …. وفى داخلها تقول مهم واخيرا عرفت رقمك الشخصى مش انت تتجكتر عليا وماتبش تعطيه اهو انى خديته خديته ..
بينما احمد قعد يقلب فيها فى راسه شن بيقول بيكدب على ليلى ولا يقوللها حق باهى من قال تصدقه وماتقولاش انا ربى فضحكم وانتم كنتم مع بعض فى سياره ولو كدب مرات ينفضح ويطلع مش راجل وتكبر مشكله وبعدين ضرب راسه على ايده وقام تلفون باش يتصل بى ليلى ولكن وصلت رساله على نقال فا جى بيفتحها اتصلت ليلى وقالتله ….. اها حبيبى شن صاير معاك شنى فى شى
احمد…

يتبع…..

لقراءة الجزء التالي : الجزء الثامن عشر من رواية الزوجة التائهة بين الأحلام والواقع

لقراءة الجزء السابق : الجزء السادس عشر من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .