الجزء الثالث والعشرون من رواية الزوجة التائهة بين الأحلام والواقع

في الجزء الثالث والعشرون هل من رأيك سنري مفاجآة من العيار الثقيل تحدث مع ابطال الرواية ؟ ام سيتسير الأمور بكل سلام وآمان ؟ كل هذا سنعرفه في السطور التالية .

الجزء الثالث والعشرون من رواية الزوجة التائهة بين الأحلام والواقع

ام احمد …… لا لا باللهى اخطم جيب معاك نص صقيته …….. ااااااااااااااااااااه ياناس ياتقتلوه يانقتله … علاش من قالك انى نعلف فيهم للعيد برا برا وانت ساكت …..
كملو طريقهم و وليلى وصفاء مابطلوش ضحك وربك يستر فى عقابها ……. وبعدها وصلو للحوش ونزلو وهنا صفاء قالة لعصام ….
صفاء …. شوف كانا العروسه طلعت خفيفه معناها نديرلك رنه وانت انخصها بمسج باهى يتقلها وكان شديتها اتصالات ورا بعض معناها عليه العوض ومنو العوض ههههههههه
عصام …… حقا قصدك مرات تتطلع هكى
ليلى …. هههههههه لا لا عصام تجرى بيك هادى بس ماتعدلش عليها ههههه ان شالله مايصير الا كل خير وتطلع من نصيبك
ام احمد …. هيا يافرخة شيطانى انتى وهيا بنقعد هلبه انى مرشوقه هكى زى مسمار جحى …. تعالو شرينو مانشوفش مزبطش البطمه وهوا كله بطم
صفاء ….. تى غير شن ترصى ياامى هادى كاميرا ….. عصام هههههههه تعالى شوف امك شن تدير لا ومقربه زومتها تعطى فيهم فى شبحة زووووووم من توا …… ليلى وراس وخيتى شدى بكلاوه وبرى انتى توا نسبقك انى
ام احمد ….. ياوخيتى هالفانص هيا غير كانا تجينى بس شن تفتفت معاه توا تفكرت دوتها
صفاء …… خلاص هى توا شرينو ههههههه
مابوش يشرينو طبعا لين صفاء قالت لخوها كلمتين الا حاصلات فى رقبتها وجابت شكلاته وباقة ورد وجت ولما جت شرينو باش لما يفتحو مايلقوهمش متشرتعات كل وحده فى تركينه زى بوشار…… اما اهل العروسه على عموم كانو زى القناصين متشترتعين فى اجزاء الحوش جزء فى رواشن وجزء من فوق الحيط والجزء الاخر فتح الكاميرا وشاف زووووم عمتك ام احمد <<الوجه الباشوش >> …
فتحو اهل العروسه لى اهل عصام واستقبلوهم وخششوهم لصاله وقعدو يدو من هنا وهنا وبعدين قالت ام احمد …
ام احمد ….. خيرا العروسه ماشفنهاش مالا
سميره << ام العروسه >> … هيا هيا دقيقه بس اهى جايه اهو تو نخش ناديلك عليها …… خشى بنيتى خشى ومدى لعزوزتك قبل القهوه ….. هادى عروستنا …. رهف والله نحلف بى راسها مانحنت
ام احمد ….. اممممممممم << وفى داخلها تقول |>> اى اى حق نحلف عليك كل يوم انتى وياها تتجارو بالمغارف فوق راسها وشعرها نصه مطفرطس مش شحانك فيه عشنا وشفنا … طبخناك ياجرانه وعرفنا شن فيك >>…… صحيتى بنيتى صحيتى زيد فضلك تعالى قعمزى جنبى تعالى …..
صفاء ……<< وششت فى ودن ليلى >> بغض النظر انا البنت صاروخ بس باللهى رجليها احلى منى … قولى قولى عادى راهو تصير فى ارقى العائلات
ليلى ….. << قعدت تتبسم زى مهبوله >> وبعدين شافت لرجلين صفاء ونفلقت بضحك |هههههههههههههه >> وكلهم قعدو يشبحولها ويبو تفسير ^^
صفاء ….. درقت على ليلى وغمت طول رهف ….. رهوفه حبيبتى تخرجتى ولا لا ؟؟؟
رهف …… قاعده نقرا فى طب اسنان ومازالى سنه ونتخرج ماهو كاسبه انى
صفاء …… اه باهى ربى يوفقك … وبعدين فوتت شويه وقالت لى ليلى فى ودنها قصدك انى رجليا سيئات لهدرجه خزى عليك باهى كمتتى ضحكتك شوى وخفتى على مشاعرى
ليلى ….. صفاء وراس امك خلاص معاش قادره نشد ضحكتى وامك من بكرى قريب تاكلنى وانى شكل رجليك مابوش يتنحو من داكرتى هههههه
صفاء ….. محلاه شبشب رهف عطيها البلى شكلها بتاكل سوقنا هههههههه تعرفى صهيب كانا يشوف رجليها بس قسما بالله الا ما يطلقنى من قبل مايتجوزنى نهااااار ابيض رجليها زى وجهى انى هههههههه
ليلى …. درنا العار ياصفاء قسما بالله الا مايلزونا نهاااااار ابيض
صفاء …. واللهى مايندرو عليها وين زارقه ا هههههههه ام العروسه هيا وامى يتكلمو زوز والكارته ماريت حد يسمع الا رهف فى وسطهم ومدايره روحها خجوله ههههههههه
ليلى …… اسمعى صفاء امك توا بتتفاهم معاهم ولا هادى جلسة تعارف بس
صفاء …. تى اما تعرف تى امى كلتهم بقشورهم نهااااار ابيض هادى تمجد فى بنتها وهديكا تمجد فى ولدها والكارته نحس زوز أللعن من بعض ههههههه
ام احمد ……. اه صفاء بنتى ماشالله توا خطبوها ناس تبارك الرحمن دكتور فى الكليه قد دنيا والعرس توا بعد شهر ياحنا …. ماهو مش فاضى بياخد دكتورا من بلاد برا …. شنى يقولولها ياصفاء ؟؟؟؟
صفاء …… بريطانيا ياماما ….. وطبست على ودن ليلى وقالتلها ان شالله ربك يستر وماتنطقهاش باط بس الحشايم
ليلى …… قصدى من بكرى مادين وجهنا وامك ماشالله مطلوقه زى الفرس باهى شن وضيفتنا حنا ؟؟؟
صفاء ……. على توا بودى جارد متعها ….. بس بعدين الحق ممكن نولو اخر الاخبار …..
ام احمد ….. اها خلاص مهم احنا توا زى ماقتلك احنا جاين باش نطلبو ايد بنتكم رسميا ومدبينا تردو علينا الاسبوع هوا باش على ضوها نرتبو ترتيباتنا للعرس لانا نبو نطلعو صفاء وندخلو عصام راهو …. وزى ماقتلك شاورو روحكم وردو علينا وتوا نخلوكم فى حفض الله هوا هدكا وان شالله تكون معرفة خير
دارو رنه لى عصام ولقوه يستنى فيهم فم الباب على احر من جمر وهنا استأدنو من اهل العروسه وطلعو وركبو فى سياره وقعدة ام احمد تحكى على الا صار بينها وبين ام رهف بينما صفاء قالت لى ليلى …..
صفاء ….. ليلى من بكرا بنغطس فى الكريمات وبوديكر ومونيكير ونبيك كوفيره متعى لو سمحتى نهار اسود معقوله حسيت روحى قدمها بو عجيله قسما بالله البنت ماشالله رجليها تتمنى منهم وجه ولا شعر شعر متعها تقول شعر حصان بعون الله من بكرا …. لاش بكرا من اليوم شعرى غاطس فى تومه وزيت زيتوووووون خلاااااص قررت
ليلى …. هنا شبحت لصفاء شبحت << ريحته وصلتنى من توا >> وقالتلها يانارى على مروه كانا بترقد معاك ههههههههههه تمشى تنتحر خير تومه وزيت زيتون ياظالمه فى الليل
صفاااااااااء …… ااااااااايه مالا شنى ودكرينى كل جمعه نديرله حمام زبده
ليلى ….. ااااااع ع ع صفاء لطف خيرك ههههههه حسستنى شعرك متفجره فيه قنبله هههههههه واللهى انتى تهبلى بدون اى شى
ليلى ….. وكله كوم وبطنى الا تدلبح كوووم تانى تقول تريه ….. نهار ابيض تقولى عليها لاتسوق لا تروق بنت ….. عصااااااااااااااااااااام عصااااااااام اوقف على اول صيدليه بسرعه
عصام ….. شن تبى يافرخه وانتى صوتك يجيب قداد
صفاء …… جيبلى زنجبيل الاخضر قول لصيدلانيه هكى توا تعطيك هيا
ليلى ……… صفاء نهارك ابيض على راسك خيرك يابنت
صفاء …… فقت على الواقع المرير الا انى فيه حسيت انا عصام لو تزوجه صهيب ارجله منى انى خلاااااااااااص لازم اعيش على قولت شيرين …. واسمعى بنقولك شى اى كناسه ,,,, بمبلى غاز ,,,,, تركيب خضره ,,,, بادين مياه ,,,, من اليوم انى الاسطى متعكم اى شى يخص دروج وركوب ونزول قولى صفاء بس وتلاقينى واقفه زى رشقه جنبك…… بعون الله قبل عرسى وزنى رح نخليه من 60 يولى 50 كيلو وتو تشوفى
ليلى ….. معناها تعالى ساعدينى فوق …. ههههههههه
صفاء …… من اليوم اعتبرنى خدمتك ياباشا ههههههههه
عصام ….. مالقيتهالكش فى صيدليه بكرا ان شالله نجيبه ……و وصلو للحوش مع صلاة العشاء وقعمزو كلهم فى مربوعه ولقو احمد ونبيل اصلا مقعمزين غادى من لما جو فا احمد قال لامه
احمد …… شنى بشريينى شن صار ؟؟؟
صفاء ……. الحق الحق طرف يااحمد ماشالله البنت قسما بالله غزاله
وعندها اخت سلمت وطلعت ماشالله قصدى ماتفهم شى من الاخير ….
احمد …… ههههههه مره جايه معناها انى معاكم
وهنا ليلى شبحتله و زمطت ريقها وابتسمت ودارت روحها عاديه جدا وقالت لى احمد ….
ليلى …… خلاص وكانا عجباتك اخت العروسه انى نتملك فيه يااحمد …
احمد …… مالا شنى يا ماما اكيد هههههه شرع محلل اربعه
ليلى هنا لما سمعت الكلمه ماقالتش ولا كلمه ودمعه بتنزل من عينها ودارت روحها عاديه جدا ومتاترش بشى بش احمد استمر فى ضحك وتسهويك ومكانش متوقع انا ليلى خدتها الكلمه على محمل جد وزعلت وقال ….
عصام ….. اسمع احمد انت متزوج عاد غباره مرتك تتاقل بدهب وانت عينك على وحده تانيه تى كانا انى عندى زى وخيتى ليلى قسما بالله نحطها فى عيونى ….
وهنا احمد شبح لى ليلى شبحه مليانه بالحب بس لقاها منزله راسها لوطه وفجأه دموع بدو يصبو وطلعت تجرى من المربوعه وعزوتها قعدت تقول ….
ام احمد …… ليلى …… لييييييييلى تعالى يابنيتى خيرك شن فى من الا قالك كلمه زعلاتك
عصام …. هادى اكيد زعلت من كلمتك وانتى بلطتها طول
احمد ……. وانت عاد لحنت على كمنجا وولعت نار برا اقلب وجهك من عليا … صدقت انت شورك بتاخد سعاد حسنى
مروه ……. ههههههههههههه هادى شكلها غارت من خطيبة عصام من توا هههههه معناها شدلك فى بونى من توا
احمد ….. ظمى فمك انتى …. وبعدين شن قتلك انى طووول دار وجهك مانبيشى
مروه ……. شن قولت انى نهار ابيض اسود اغبر ديما وانى فشاشت غيوض امتى تنزوج بس ونطلع من حوش هدا اشالله شيبانى …… زيدى انتى اضحكى يابلوعة مجارى غير تجى دار بس وتشوفى شن ندير فيك …
ام احمد ….. بالك بنت صدقت بتاخد عليها نهار ابيض …. صفاء نوضى نوضى كلميها وشوفيها خيرها بنت مرات تصيرلها حاجه ..
احمد …. لا لا خلوها تهدا شوى وتو نركب نتفاهم معاها انى …. مهم شن صار معاكم …. وقبل كل شى نوضى صفاء انتى ديرلى نفص بالدحى وطاسة شاى بسرعه
عصام ونبيل …. حتى انى وديرلى فرده كامله وكترى الهريسه وشاى وحليب
صفاء …… قعدت تقول فى خاطرها وتتمتم <<نوضو جمرى باهى شغالت بوكم انى>> ….
احمد …. شن قولتى صفاء …… برى خيرلك ديرى الا قوتلك عليه …… باه كملى يااااام بسرعه وراى بكرا خدمه
ام احمد ….. خلاص البنت عجبتنا وتفاهمنا مع امها وبيردو علينا فى اقرب وقت باش نديرو يوم فض ويوم تلبيسه على سريع وبعدها العرس
احمد …… اها خلاص معناها تميتو كل شى
ام احمد …. اىه ايه ياوليدى وخلينى توا نمشى نصلى العشا ونشوف بوك
مشت ام احمد بتصلى عشا بينما احمد قعد يهدرز مع نبيل وقاله
احمد …… نبيل بعد على شلة الانس الاتبع فيهم اصلا وصلتنى اخبارك اول بااول
نبيل ….. من قالك امالا مسكسك هوا
عصام ……احترم نفسك خيرلك انى مش نديدك
احمد ……. صكر فمك انت وياه وانى نبهتك يا نبيل الولاد الا تبع فيهم مش كويسين وريحتهم فايحه فى شارع وقد احدرا من اندرا …….
وبعدها حطت العشى صفاء وتعشو بينما نبيل ناض وسيبلهم الماكله وطلع وقاللهم
نبيل …… اسمع احمد انى بايت برا اليوم باهى مادورونيش
احمد …… كيف ماندوروكش ؟؟؟؟
نبيل ….. صاحبى بوه مسافر وقالى بات معاى بكرا ان شالله عصر نكون هنا وهيا سلام
احمد ….. لاحول ولاقوة الا بالله وخلاص شن الواحد بيضربه فى هالليل واللهى ماهو حتى عيل استغفر الله ياربى وخلاص
تعشىى احمد وركب …….. ولقى ليلى راقده وطافيا الضى فاطبس عليها وباس جبهتها وقاللها انى اسف حبيبتى ماكنتش نقصد وهيا سمعاته بس دارت روحها راقده ودموع قعدو يصبو منها لا ارديا وفاتت الليله وكل واحد عاطى لتانى بالقفا وناض احمد صبح لبس حوايجه وطلع ووصل لشركه وخش لمكتبه كالمعتاد وبدى يخدم لحد ساعه 11 بزبط وهنا…….. شرين تلفونه من رقم غريب وقال
احمد ….. الو من معاى
رقم غريب ……. اهلين ياوخى انت احمد عبد السلام
احمد ….. ايه وخى تفضل
رقم غريب …….. واللهى شن بنقولك ياوخى …. فى جثه عندنا فى تلاجه فى طبى ونبوك تجى وتتعرف عليها …..

يتبع…….

لقراءة الجزء التالي : الجزء الرابع والعشرون من رواية الزوجة التائهة بين الأحلام والواقع

لقراءة الجزء السابق : الجزء الثاني والعشرون من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .