الجزء الرابع والعشرون من رواية الزوجة التائهة بين الأحلام والواقع

هيا بنا لقراءة الجزء الرابع والعشرون من الإبداع والخيال الواسع الجميل من كتابة المؤلفة كيندا من ليبيا، لذلك جهز نفسك جيداً لقراءة كل جميل في السطور التالية .

الجزء الرابع والعشرون من رواية الزوجة التائهة بين الأحلام والواقع

وناض احمد صبح لبس حوايجه وطلع ووصل لشركه وخش للمكتب متعه كالمعتاد وبدى يخدم لحد ساعه 11 بزبط وهنا…….. شرين تلفونه

من رقم غريب وقال
احمد ….. الو من معاى
رقم غريب ……. اهلين ياوخى انت احمد عبد السلام
احمد ….. ايه وخى تفضل
رقم غريب …….. واللهى شن بنقولك ياوخى …. فى جثه عندنا فى تلاجه فى طبى ونبوك تجى وتتعرف عليها …..
احمد …… شن فى قولى شن صار ؟؟؟
الرقم الغريب …… انت تعالى وتوا تفهم كل شى
احمد …… ماشى ماشى شوى بس ونكون عندكم ……. بعدين فكر شوى وخدى تلفونه بيتصل بعصام وطلع للسياره …
احمد ….. الووووو عصام تعالى بسرعه نبيك
عصام …… غير قول خير … مساء الخير وانت طول دفش تقول سواق بوك انتى تقول تعال نجيك من قالك فاضى انى ؟؟؟
احمد ….. عصام مش وقت بردتك توا راهو فى كارته احتمال تكون فى طريق وربك يستر
عصام …. شن فى قووووول شن فى
احمد …. انى طالع توا اهو كيف بنولع سيارتى مهم توا فى حد كلمنى وقالى فى جته نبوك تتعرف عليها ومش عارفين لى منى ولا اصلا عرفت كيف وصلولى ومهم تعالى معاى بسرعه
عصام …. احمد قوووووول الا قالولك عليك ؟؟؟؟
احمد ….. تتتتتتتى يامريض خيرك قونالك ماقلولى شى وتعالى فى طبى نتلاقو غادى ونشوفو شن صاير وتوا بنصكر لانى نسوق سلام
طلع احمد زى مهبول يجرى ولحقه عصام حتى هوا زى مهبول وخلى محله فاضى من غير حد …… طلع عصام واتصل بى احمد وقاله …
عصام …. اه شنى وصلت انى قريب نوصل راهو
احمد …. زحمه ياعصام وطريق باين مصكره اسبقنى انت وانى جاى
مشى عصام يجرى بسرعة 200 ومايندريش على روحه لين لقى روحه جنب طبى درس سيارته بسرعه ونزل وقعد يسال فى الاستعلامات ويدور من غرفه لغرفه ومن دار لدار لحد ماوصل للمكان الا قالتله الريسبشن اسال فيه وهنا وقف لدكتور وقاله …
عصام …. اهلين دكتور فى جته وصلتكم مانعرفش امتى بس انتم ماعرفتوش من هيا واتصلتو بى واحد اسمه احمد عبد السلام وقلتوله تعالى
الدكتور …. ايه ياخوى انى الا كلمته
عصام …. باهى انى اخ احمد عبد السلام وهوا مازل موصلش نقدر نشوف بدله جته لوسمحت ونعرف شن الا صار بزبط
دكتور …. اوك تفضل معاى وهدا ياسيدى صبح بكرى جته جابتهالنا دورية شرطه لقو سياره مزطه من قدام وفيها 2 اشخاص وللاسف مالقينا شى يتبت هويتهم بس لقينا نقال هوا قريب من سياره ولما فتحنا سجل لقينا خوك اول اسم فى اسماء الا عنده فااتصلنا بيه ……. وغلى عموم نحن متوقعين انا هوا قبل الحادت كان يتكلم فى تلفون ولما صار الاصطدام تنطر من ايده نقال …
عصام ….. باهى ياوخى وسياره التانيه شن صار فيها ؟؟؟
دكتور …. كان فيها راجل وللاسف مات بس تعرفنا على اهله واتصلنا بيهم ..
عصام ….. دكتور باللهى عليك مازال انى خلاص راهو معاش قادر نستوعب شى
دكتور …. اهو وصلنا تفضل وخى …. سالم … ترا افتح درج التلاجه الا فيها جته الا وصلتنا مبكرى
عصام …. استنى شوى … استنى لحظه …. خلينى شوى بس …. اه ه ه ه ياررررررب …. خلاص افتح
دكتور …. << نحى شرشاف من على وجه الميت >>…. اه تعرفت عليه ياخوى
عصام …. ماقالش ولاكلمه قعد ساكت دموع ينزلو بس ….
دكتور …. شنى ياخوى تعرفت عليه خلاص ….
عصام غمض عيونه شوى وصكر باب تلاجه وبعدين قال…….
عصام …. اه ه ه ه ه ه ه ه ه ه خووووووووى هدا خوووووووى نبيل خووووووى الا فى تلاجه
دكتور ….. لاحول ولا قوة الا بالله ان لله وانا اليه راجعون صبر روحك ياخوى كنا ليها تعالى اطلع معاى اطلع
عصام …. خلينى نحى ايدك خلينى …. << وفتح تلاجه ونحى شرشاف على نبيل وشدله راسه وقاله ….
نبيل رد عليا وخى واللهى انى امس حرشت فيك احمد لانى خايف عليك بس نوض كلمنى تبى سياره خودها منبيهاش…. تبى تسهر اسهر براحتك بس باللهى نوض نووووووووض يانبيل نوض وراس وخى نوض انت تسمع فيا نوض
دكتور …. لاحول الله ياربى….. سالم ساعدنى نطلعوه
عصام …. نحى ايدك نحيهااااااااا مانبيش نطلع نبى نقعد جنب خوى
طلع عصام بعد ستين واسطه وتلاقو هما واحمد فى الممر فالما شافه عصام قعد يعيط زى عيل صغير ويقوله
عصام …… نبيل هدا يااحمد نبييل … الا امس كشخنا عليه نبيل ياعصام الا يرقد معاى فى نفس الدرا ويخنب منى فى دشرتاتى وسروايلى وسيارتى نبيل مات يااحمد انى مش مصدق خلاااااااص راسى بيتفجر يااحمد اكيد انى نحلم ولا لا قولى انت تحلم اعطينى كف احمد ….<< احمد طبت خوه وقعد و يعيطو ودموع هما زوز زى الشيشمه >> وقاله انى الغلط منى انى الا خليته امس يمشى انى الا قتلته علاش ياربى علاش انى تعبت من صدمات فى حيااااااتى علاش نبى نتهنى ياررررررربى علاش دنيا تضرب فينا كفوف ااااااه ياربى……….
وينه خوى نبى نشوفه ….
مشى عصام واحمد وشافوووه ومش مصدقين الا شافته عيونهم وقعدو ساعتين مش مستوعبين شى مقعمزين برا غرفة تلاجات وكل واحد متكى على حيط ويشبح للحيط ويبكى وكل ماحد يشوف لتانى ينهار بالبكى ويتدكرو المواقف الحلوه الا جمعتهم بى نبيل
وبعد ساعتين من البكى ناض احمد وقال لعصام
احمد ….. نوض شد حيلك وأوقف انى بنمشى نكمل اجراءت دفن وشهادة الوفاه وانت برا قول للحوش وجيبها لامى بشوى …
عصام ….. ياررررررربى انى تعبت ياربى ساعدنى بس …. اهو ماشى
مشى عصام وركب سياره ومشى للحوش واول ما ماوصل للحوش لقى امه فى جنان …. قالتله
ام احمد….. وليدى خيره وجهك اصفر زى ليمه وعيونك منفخات كانا الخطوبه هكى بتدير فيك ياودى بلاش منها مره وحده ههههههههه
عصام …… قعد ساكت وبعدين قاللها …. يمااااااا بنقولك شى ……على نبيل ….
ام احمد ……. خيره هالمزتت المنجوه شن دار تانى اكيد خنب منك سياره تانى ولا لا ؟؟؟ تى واللهى الاما نقتله غي ……. وهنا عصام قاللها يااااام نبيل عطاك عمره …. وقعد يبكى ومشى طبتها وهيا قعدت تشبح وساكته بس وفجأه دفاته بعيد وقالتله بعد عليا وين نبيل ويننننننننه وين نبيييييل برا جيبه توا قوله روح من امس امك تستنى فيك براااااااا
عصام …… ياااااام نبيل مشى خلااااااااص ومعش بيجى خلاااااااص مشى
ام احمد ……. ووووووووووووووه عليا ووووووووه صفاااااااااااء تعالى شوفيه شن يقول ياصفاء وليددددددى وين ياربببببببى هدا هبل ياصفاء تعالى بعديه عليا …

عصام ….. امى نوضى امى صفاااااااااء جيبى معاك ريحه وتعااااااااااالى بسرعه بسرررعه
صفاء …… <|< جابت الكولونيا >> وقالتله عصااااااام خيرها امى شن فى ياعصااااااااام
ناضت ام عصام وبدت فى عالم تانى لاعرفت تبكى ولاعرفت تخبط ولاعرفت تدير شى اما صفاء فاقعدت تعيط على طول بطنها ووتقول ..
صفاء …. عصااااااام وخى يارررربى علاش حرمتنا منه ياربى علاش ياربى …. ياربى مازال صغير ياربى ماشفاش من دنيا شى ياربى خوووووى مازال صغير ياربى ووووووه عليا وووه ….
بينما ليلى لما من لما سمعت العياط من فوق ونزلت وسمعت الخبر وهيا تبكى وناضو عليها جروح كانت تبى تنساها بس للاسف دنيا غداره …. ومرة ساعه ورا ساعه والكل فى حاله مايعلم بيها الا ربى واحمد اول ماكمل الاجرأت روح ولقى امه وخوته وشوى ناس مقعمزين فى المربوعه وبعدين امه سمعت انا احمد وصل فاطلعتله تجرى وقالتله ….
ام احمد …. قولى يكدبو عليا ياوليدى عصام كداب ولا لا ااااااااااااااااااه ياوليدى حرقتولى قلبى وكسرتونى حرام عليكم علاش قولتولى علاش ماكدبتوش عليا وبينما احمد طبت امه تطبيته قويه وقعد يبكى …. وفاتت ساع وراساعه ونصبو قيطون وحطو القران وكان يووووم من اسود ايام حياتهم لانا صدمه ماكانتش متوقعه وتانى يوم كان يوم دفن نبيل …. وبعد ماغسلوه وكفنوه جابوه للحوش باش يدخلوه لداره لاخر مره وخوته وامه يشوفوه واول مخش عليهم تابوت امه طبست على تابوت وعراته والبنات قعدو يبكو ويبوسو فيه بينما ام احمد قعدت تقوله ….
نبييل وليدى نوض ياوليدى نوض انى ديما نقول اجعل يومى قبل يومكم نوض يوليدى نوض كلمنى قول ياما نبى نسمع صوتك فى الحوش ونسمع دوشتك مع خوتك وترميلى حوايجك كل يوم ونغسلهملك نوض ياوليدى نوض انى بندفن روحى معاك وقلبى معاك ياربى هدا قطعه منى دفنتها وانى حيه ياربى اااااااه ياربى ياوليدى ياوليدى انت مازال صغير ياوليدى متت عريس قبور ياوليدى بنموت ومش رح نشوفك عريس ياوليدى ومش رح نشوف صغارك ياوليدى نوض شقتك قاعده ليك نبى نشوفك عريس يانبيل نوض ااااااااااااااااااااااااااااااااااه ياربى اااااااه قلبى ياربى تعبت يربى ارفعنى معاه معاش نبيها الحياه من بعده يارب ….. وبعدها احمد وعصام خشو وقالولهم البسو غطاكم الرجاله بيخشو ياخدو تابوت خلاص وقت دفينه ولما سمعو بنات الكلمه هيا كل وحده قعدت تعيط وتخبط وتنادى فيه وفقوله نوض يانبيل نوض … نوض بياخدوك منا يانبيل نووووووض ….. وبعدين رجاله قامو تابوت للاسف وقعدو يقول وفى صوت جماعى ….. ان لله وانا اليه راجعوووون ان لله وانا اليه راجعون وقامو تابوت ووقفو عليه وصلو صلاة جناز وخش احمد خوه وعصام وباقى كلهم طلعو وطبس باسه من جبهته وقعد يبكى وشممه حفنة تراب وطلعو وعصام يبكى زى عيل ويشح فيه احمد ويبكو وصكرو مطبق عليه ومشى لعالم تااااااااانى ……. وقعد احمد وعصام وخواله وبوه الامقعمز فى كرسى وشبه فاقد داكره فى صف واحد ياخدو فى عزاء
فاتت ساع ورا ساعه ورا ساعه …… ويوم وار يوووووووم ……….وفات شهر ورا شهر والنكد والدموع مافارقوش حوش عمى عبد السلام والكل لبس الاسود وقعد الحوش كئيب يوم ورا يوم وشهر ورا شهر……… لحد ما ليلى وصلت لشهر السابع فى حملها وهنا جى الحدت الا بيرجع الفرحه لحوش عمى عبد السلام والا هوا …….

يتبع ……..

لقراءة الجزء التالي : الجزء الخامس والعشرون من رواية الزوجة التائهة بين الأحلام والواقع

لقراءة الجزء السابق : الجزء الثالث والعشرون من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .