الجزء السابع من رواية عادت لكي تنتقم

عمران : الووو يا بيه عجبك النوم

سيف : والله ي فندم انا مصدقتش لما شفت الرساله من حضرتك انك عطيني انهارده اجازه

عمران : عد الجمايل

سيف :علي راسي

عمران : باكد عليك ان بكرا الصبح بدري فيه اجتماع عشان هنبدء في العمليه

سيف: تمام ي فندم

ورجع سيف نام تاني

____________________

*في المستشفي

رغد :لو سمحتي انا رغد العطار وامي كانت عامله هنا تحاليل واشاعه واتصلو بيا اجي اخدهم متعرفيش اجيبهم منين

الممرضه ، اطلعي الدور التالت تاني اوضه علي شمالك من ناحيه السلم

رغد، شكرا

(جات تركب الاسانسير بس كان زحمه طلعت السلالم )

رغد : احييه هو فين يميني من شمالي استني كده احنا بناكل بالايد دي يبقي الناحيه التانيه

(وصلت قدام اوضه وسالت ممرضه فيها )

رغد :لو سمحتي انا كنت عايزه التحاليل والاشاعه بتاع ليلي علي عبد المعز

الممرضه :ماشي ثواني

(دورت شويه ملقتهمش سالت الممرضه التانيه )

الممرضه2: دكتور الاشاعه واخد الاشاعه بتاعتها عشان لسه هيعملها التقرير

رغد :طب هو هيخلص ايمتي

الممرضه2 :ماهو للاسف والله انا معرفش هيخلص ايمتي لان في كذا حاله طوارئ تحت وهو مشغول جدا

رغد وهي تهز براسها :يعني هطول معاكم هنا

الممرضه2 :معلش ي فندم

رغد ، ولا يهمك طب التحاليل فين

الممرضه : انا هطلع اجبهالك وانتي ارتاحي بس شويه

رغد :ماشي طب بصي انا هتمشي شويه وهجيلك تاني اشوفها جات ولا لسه

الممرضه :ماشي

(طلعت رغد وقعدت شويه تلعب في تليفونها وشافت وحده قاعده تبكي )

(قامت رغد وقعدت جنب الست دي )

رغد :انا اسفه لتدخل بس انتي بتعيطي ليه

الست: بعيط علي وجع قلبي علي ابني

رغد :مالو

الست : تعبان يقلبي تعبان اووي ورافض الاكل والشرب وبيموت مني بالبطئ (وانهارت في البكاء )

رغد : طب ليه كده

الست : عمل حادثه من 3ايام والحادثه كانت بسيطه الحمد لله كلها سطحيه بس هو رافض الاكل والشرب وده غلط عشان كده

حالته في النازل

الدكتور قال حالته النفسيه وحشه اوووي وعلاجه الاهم ان حالته النفسيه دي تتغير

رغد :طب مودتهوش لدكتور نفسي ليه

الست : ده بمجرد ما الدكتور قال كده اتعصب وقال مش هيروح لحد وهيفضل كده مهما نعمل

رغد : طب احكيلي بيتصرف معاكي ازاي

الست: علطول بيزعقلي ومتضايق وساكت ومش بيتكلم (وحكتلها البيحصل )

رغد :بصي انا ممكن ادخل احاول معاه بس باين علي ابنك انه عايز حد يشدلو ودانه هو ازاي يتكلم معاكي كده

طب هو كان بيتعامل معاكي كده علطول قبل الحادثه

الست : لاء خالص والله ده علطول شايلني في عينه وبيخاف علي زعلي بس الحصلو برضو مش سهل

رغد :بفضول حصلو اي قبل الحادثه (خربيت ام الفضول )

الست ، كان عندو صحبو بيحبه اووووي وطول الوقت مع بعض سابه وبعد عنه ووقعه في مشاكل في الشغل واترفد من الشغل بسبب صحبو وكان عندو حبيبته ودي سابته وحبت واحد غيرو

رغد بدهشه: لاءءء متقوليش حبيبته سابته وحبت صحبو

الست :لاء هي حبت واحد تاني

رغد :فهمت بصي انا هحاول اتكلم مع ابنك وكمان انا واخده كورسات كتيره في التنميه البشريه فهحلل الفلوس بتاع الكورس واشوف جه بفايده ولا لاء يعني ممكن اعرف اتصرف معاه

الست : يااااريت ي بنتي والله العظيم هيكون جميل في رقبتي لاخر عمري

(دخلت رغد الغرفه وبصت عليه )

_نتعرف بيه علطول ***

(اكرم الحسيني 24 بشرته بيضه وعيونه رمادي غامق خريج تجاره وكان بيشتغل محاسب في بنك)

رغد بابتسامه :صباح الخير

بصلها اكرم بهدوء ومردش عليها وبص قدامو

رغد : علفكره من الادب ان لم حد يقول صباح الخير ترد عليه وتقول صباح النور

انت متعلمتش الحاجات دي في المدرسه

اكرم مدهاش اي اهتمام

رغد : عرفت انك مش بتاكل طب بزمتك مين المجنون اليقعد الفتره دي من غير اكل

اكرم :وانتي يشغلك في اي

رغد : مش حلو الاسلوب ده علي فكره في طريقه احسن من كده

اكرم : معرفهاش

رغد : مفيش مشكله اعرفهالك

اكرم : مش عايز اعرف حاجه

رغد :ماشي هو انت بتدرس ولا خلصت

مردش عليها

رغد :انا في رابعه حقوق بحب كليتي اووي وحياتي

اكرم : حاجه متخصنيش ومش عايز اعرفها

رغد : اكيد ماهو عشان انت كئيب مش هتحب تسمع حاجه حلوه

اكرم بضيق : هو انتي مين

رغد بكبرياء : مهتم انك تتعرف عليا

اكرم : ميهمنيش خالص انتي الجيتي اقتحمتي حياتي وشغاله اسئله

رغد بعصبيه : والله انت الاعامل في نفسك كده انت لو عايش حياتك بشكل طبيعي محدش هيتدخل

اكرم : والله دي حياتي وانا حر فيها

رغد :لو حياتك انت بس اعمل فيها الانت عايزو انشالله تولع فيها محدش هيقولك حاجه لكن امك الهتموت نفسها عليك دي ذنبها اي

ذنبها انها جابت واحد معندوش اي احساس بالمسؤليه

بصلها اكرم وقال : انت تعرفي الاحصلي عشان تقولي عندي احساس بالمسؤليه ولا لاء

رغد ، واي الاحصلك يعني

اكرم بعصبيه : وانتي مالك

رغد : انت بذمتك فرحان بالانت فيه ده

اكرم : والله انا مطلبتش رايك

رغد :وانا مش بديك رأيى انا بقولك الحقيقه

اكرم : ياستي ملكيش دعوه بيا انا عايز اموت واخلص

رغد بأنفعال : طب متنتحر واخلص علطول

اكرم بحزن: ياريت كنت اقدر كنت عملتها من زمان

رغد : وانت مفكر الانت فيه ده مش انتحار سايب نفسك للموت

فكرت في والدتك فكرت في حرقت قلبها علي ابنها وهي شيفاه بيموت نفسه بالبطئ

طب هسالك سؤال انت بتحب والدتك

بصلها اكرم : ومين مبيحبش امه

رغد :انا اقصد بتحبها لدرجه انك متقدرش تبعد عنها مش حب الفطره

اكرم : طبعا بحبها دي اغلي حاجه في حياتي

رغد : تخيل امك دي بعد الشر عنها تعبت وبتموت وانت واقف تتفرج عليها

اكرم بأنفعال :بعد الشر عنها متقوليش كده

رغد :اتضايقت كده ليه دانا بقولك اتخيل بس

اكرم : انتي جايبه احلي حاجه في حياتي وتقوليلي تخيل انها بتموت انتي عبيطه

رغد :لاء مش عبيطه بس التخيل الانت مقدرتش تتخيلو امك عايشاه شايفه ابنها بيموت قدامها ومش عارفه تعملو حاجه وياريته مثلا مريض ولا حاجه لاء ده هو البيعمل في نفسه كده بسبب انه متضايق من الدنيا عشان صاحبه تخلي عنه ولا حبيبته سابته وحبت غيرو ولا الشغل بتاعه مظبتش كلها حاجات تافهه

اكرم : انتي شايفه كل دي حاجات تافهه

رغد: ايوا تافهه مقارنة بصحتك البتدمر دي ولا دموع والدتك ووجع قلبها عليك كل الاسباب دي تافهه

وقال اي عايز تموت ومبتاكلش ومستني الموت

الموت كده كده جاي مهما تستعجل الموت او عايز تاخرو مش بمزاجك الموت له معاد وهيجيلنا كلنا

بس انت عملت اي للموت جاهز تقف قدام ربنا وتتحاسب

عملت مثلا حاجات كتيره اووي حلوه عشان كده عايز تموت

حتي لو عايش حياتك كلها عباده وطاعه مش كفايه انك تكون علي ثقه انك تموت وتتحاسب وتضمن جنه

ولا انت من النوع العايز يموت عشان يرتاح مفكر الموت حياه سوبر استارز لو مفكر كده تبقي غبي ده الرسول صلى الله عليه وسلم بيقول اعمل لدنياك كأنك تعيش ابدا واعمل لاخرتك كأنك تموت غدا وانت ماشاء الله لا عامل لا لدنيا ولا لاخره ده يكفي الانت عامله في والدتك

مفيش حاجه مستاهله الانت عاملو في نفسك وفي امك

(كل ده واكرم بيسمعها بس المرادي عينه مكسوره المرادي بيفكر وباين علي وشه الندم )

(سكتت رغد وعرفت ان كلامها جاب نتيجه معاه وحبت تخليه يعرف اكتر عن دينه )

رغد: معاك تليفون

اكرم : اها

رغد : طب افتح الشير هبعتلك قصه طويله شويه كلها مواعظ لشيخ حازم شومان اقرءاها واكيد هتريحك من التوهان الانت فيه ده

وفلا بعتتهالو

رغد : انا دلوقتي هطلع اشوف الورق لو جهز همشي ومش هتشوف وشي تاني وطبعا انت بتتمني كده

(بصلها اكرم بحزن اكتر )

رغد، ولو لسه مخلصش هجيلك تاني بعد نص ساعه ولا ساعه كده تكون قراءت القصه دي

(وطلعت رغد وسابت اكرم غرقان في بحر افكاره وبدء في قراءه القصه )

____________________

الست اول مشافت رغد جرت عليها وقالت عملتي اي ي بنتي

رغد بهزار : بقي ده ابنك دانا من كلامك عليه فكرته عيل صغير عنيد مش بيسمع الكلام ولما ادخل اتفاجا بالشحط ده كلو ابنك

الست بابتسامه ، يابنتي ماهو مش كبير اووي كده ده عندو 24سنه

رغد ، لاء مش هو اللي كبير انتي اللي صغيره

ضحكه الست ،وقالت ربنا يخليكي ي بنتي بس يمكن عشان انا متجوزه صغيره دانا كمان عندي ابن اكبر منه بخمس سنين

رغد : كماان الله اكبر عليكي

الست : هاا يبنتي عملتي معاه اي

رغد : ادتلو كلمتين كان هياكلني بس الحمد لله هدي ودلوقتي سبيه مع نفسه شويه وان شاء الله شويه كده هتلاقيه بقي كويس وهيرجع زي الاول واحسن كمان بس ادعيلو

الست : يااارب يااارب

رغد : بعد اذنك بقي انا ماشيه وممكن ارجع تاني بس ان جيت او لاء متدخليش قبل نص ساعه لزم يقعد الفتره دي لوحدو

الست : ماشي ي بنتي بس انا هستناك

رغد : سبيها علي الله انا ماشيه

ندهت عليها الست وقالت انتي اسمك اي

رغد : انا اسمي رغد

الست : اسمك جميل اووي ي بنتي

رغد : وانتي اسمك اي بقي

الست : انا اسمي حنان وابني اسمه اكرم

رغد بابتسامه :اسم علي مسمي لكن ابنك ده المفروض تسميه عفريت عتريس اي حاجه في الرينج ده

ومشت رغد

__________

عند مرام

طلعت مرام وراحت عند المخزن الموجود فيه السلاح وكانو بيجهزو السلاح في العربيات عشان لما ياجي وقت العمليه يكون كل حاجه جاهزه

_____________________

ياسمين رنت علي رغد

رغد : اي

ياسمين : جتك اوه انتي في البيت

رغد: لاء في المستشفي

ياسمين :بتعملي اي

رغد : بجيب التحاليل لامي ماهو انا الشغاله بتاعتهم

ياسمين: واي المضايقك كده

رغد: عشان سايبه سيف نايم وانا الاتبهدل

ياسمين :متتبهدلي ولا تروحي في داهيه المهم سيف يكون مرتاح

رغد بضيق : بقي كده خليكي معاه اياك يتجوز عليكي

وقفلت التليفون في وشها

(وجه الدكتور وخلصو الورق وخدته رغد بصت في الساعه

الساعه 5 كده عدي ساعه اروح اشوفو عمل اي ولا امشي

-اناهمشي احسن انا مالي

– طب فيها اي لما اروح اشوفو عمل اي والله مافيها حاجه وراحت عند اكرم )

____________

(كانت حنان قاعده مكانها )

رغد : اي ي طنط دخلتي ولا لسه

حنان : انا مستنياكي لما انتي التقوليلي ادخلي

رغد : وانتي عارفه اني كنت هاجي انا قولتلك احتمال امشي

حنان :كنت حاسه انك هتاجي طب متدخلي انتي ي رغد شوفيه الاول

رغد ى لاء انتي لازم تدخلي في الوقت ده

واعملي نفسك مش مهتمه بيه هو واخد انك تتحايلي عليه عشان يتكلم وكده بس المرادي اعملي انك داخله تجيبي حاجه من جوه

حنان : ماشي

(دخلت حنان الاوضه)

اكرم كان بيفكر في كلامها وفجاء الباب اتفتح

(دخلت حنان وجابت شنطتها طلعت منها حاجه وكل ده واكرم بيبص عليها وهي مش مهتميه ندهه عليها اكرم )

اكرم : امي

حنان : قربت منه وقالت ايوا ي بني

اكرم : قربي هقولك

(واول مقربت منه اترمي في حضنها وفضل يبكي )

اكرم :انا اسف متزعليش مني انا والله مقصدش ازعلك كده واخليكي تعيطي

(حنان مش مصدقه نفسها من الفرحه حضنت ابنها جامد وعيطت )

حنان :اخيرا ي بني حسيت بيا

اكرم : متزعليش مني

حنان : مش زعلانه بس انت اسمع كلام الدكتور ومتتعبش قلبي معاك

اكرم : هعمل الانتي عايزاه عشانك انتي بس

حنان : ربنا يسعدك يبني ويهديك

______________

عند يونس

عمر: سيف بعتلي الاماكن الممكن تتم فيها العمليه في مصر

يونس :انا مش عايز كلمه ممكن دي انا عايز المكان بتاكيد

عمر: انت عارف طلاما لسه في وقت علي العمليه يبقي في احتمال انهم يغيرو المكان

يونس :تمام وانا متابعهم هناا اما نشوف اخرهم اي

_____

عند رغد

(طلعت حنان و حضنت رغد جامد)

حنان: انا مش عارفه اشكرك ازاي جميلك ده هيفضل دين في رقبتي وعمري مهنساه

رغد بزهول :اي ده هو بقي كويس احكيلي قالك اي

(حكت حنان لرغد الحصل )

رغد : طب كده تمام اووووي تصدقي فعلا ان فيه ناس مبتجيش الا بضرب علي دماغها

حنان : اي

رغد بضحك :ابنك مكنش محتاج دكتور نفسي ابنك كان عايز حد يديلو علي دماغه

انا بقي الهدخل المرادي هو مفكر اني مشيت

ولما يشوفني هيتعامل معايا طبيعي من غير ميكون مخطط لكده

رغد بحماس :انا عايزه اشوف ردت فعله هتبقي ازاي

(اكرم كان قاعد علي السرير بيبص لفوق وسرحان واتفتح الباب ودخلت رغد )

اكرم اول مشافها ابتسم

رغد : انا جييت

اكرم : نورتي

رغد :اي ده داحنا بنعرف نضحك اهو

اكرم ، الفضل ليكي

رغد :غريبه وكمان بقينا بنعرف نتكلم باحترام اهو

اكرم : قصدك اني مش محترم

رغد : اكرم الاولاني مكنش يعرف حاجه عن الاحترام لكن اكرم ده ماشاء الله

بص اكرم قدامه

رغد : اي دا انت عينك ملونه

اكرم: اول مره تاخدي بالك

رغد :ايوا والله انا فكرتها سوده بس اي اللون ده

اكرم : انتي شيفاه اي

رغد :مش عارفه تحس انها زيتوني غامق او رمادي غامق مش عارفه احدد المهم انت حاسس بأي دلوقتي

اكرم : انا حاسس اني عايز اقوم اصلي

رغد : برافوووو لاء انت وصلت لنتيجه انا مكنتش اتوقعها

اكرم : ليه قاعده مع ابو لهب

رغد :انت مش فاكر انت كنت بتتعامل معايا ازاي

اكرم: ده علي اساس انها فرقت معاكي منتي برضو فضلتي قاعده وهزقتيني

رغد:خلاص نبقي خالصين

استني اقول لحد ياجي يساعدك يدخلك الحمام

اكرم: لاء متندهيش انا هقدر اقوم

رغد :ماشي وانا هطلع اشوف والدتك بره

اكرم : متمشيش عايز اتكلم معاكي شويه

رغد :سبحااااااانه

اكرم :اي

رغد :يبني دانت كنت عايز ترميني من الشباك من شويه

اكرم: يخربيتك انتي مش هتنسي بقي

___________________________

عند سيف صحي علي رنه تليفونه

سيف: قلبي عامله اي

ياسمين :الحمدلله عرفت من رغد انك واخد اجازه

سيف: انتي كلمتيها

ياسمين :طبعا وبعدين انا قاعده طول اليوم ماسكه نفسي ومش راضيه ارن عليك عشان اسيبك ترتاح

سيف: اصيله ي ام العيال طب انا هقوم اصلي واكل وجيلك نسهر لصبح

ونزل عند ليلي

سيف :اي ي امي غريبه البيت هادي كده ليه

ليلي : رغد مش هنا

سيف: امال فين

ليلي: اتصلو وقالو ان التحاليل جاهز وعايزين حد ياخدها راحت تجيبها

سيف: طب كنتي صحتيني اجيبها انا ي امي

ليلي : انت يابني تعبان مصدقت انك تريح شويه وهي بتعمل اي علطول فاضيه

سيف: برضو ي امي مش عايزها تتعب سبيها علي راحتها المهم الاكل جهز

ليلي : ايوا هحطلك

سيف : لاء لما تاجي رغد رني عليها علي ما اصلي شوفي لو هتتأخر اروح اجيبها

(ليلي: ماشي

(رنت ليلي علي رغد )

______________________

(رغد قاعده مع حنان )

رغد :الووو ي ماما

ليلي: أي ي رغد اتاخرتي كده ليه

رغد : اعمل اي في سيادة الدكتور كان في العمليات ولا معرفش كان فين ومعاه الورق بتاعك اضطريت استناه اكتر من ساعه لحد لما جه ولسه مخلصه الورق من عشر دقايق

ليلي : طب انتي جايه في الطريق

رغد :لاء ماهو لما الدكتور اتأخر انا لفيت لفه في المستشفي واتصاحبت علي وحده مزه ابناها كان عندو مشكله وانا حليتها

ليلي: حليتي اي انتي تعرفي تحلي مشاكل انتي بس تولعي في بلد بحالها ومحدش يعرف يطفيها

رغد :ربنا يخليكي ي ماما وبصت لحنان وقالت ماما بتسلم عليكي ي طنط

ليلي : الله اكبر علي الادب

رغد : خلاص بقي اما اجي هحكيلك علي الحصل

ليلي: طب يلا عشان اخوكي سأل عليكي ومستنيكي عشان تاكلو

رغد :حاضر عشر دقايق وهاجي

______________

في اوضه روان

دخل عامر الاوضه وقفل الباب وراه

عامر: اي ي قلبي نايمه بدري ليه كده ده لسه المغرب ماذن

ورفع البطانيه من علي وشها واتفاجاء من الشافو

____________________

لقراءة الجزء التالي : الجزء الثامن من رواية عادت لكي تنتقم

لقراءة الجزء السابق : الجزء السادس من رواية عادت لكي تنتقم

للإطلاع علي فهرس اجزاء الرواية : جميع اجزاء رواية عادت لكي تنتقم كاملة للكاتبة أميرة رمضان

جميع الحقوق محفوظة للكاتبة أميرة رمضان .