وسنبدأ حكايتنا سوياً بالجزء الأول من رواية حبيبتي لا تنسيني وسنتعرف علي التفاصيل الأولي من الطريق داخل مغامرات الرواية لذلك جهز نفسك جيداً وهيا بنا لنبدأ قراءة الأحداث سوياً في السطور التالية .
الجزء الأول من رواية حبيبتي لا تنسيني
طق طق …. طق طق .
ملاك …. هياااااااا .. دقيقه اهو جيت …
امها …. سنه باش تفتحى ؟؟؟ تى افتحى بسرعه
ملاك … اااااااااه ياماما اهو جيت ……. والله كنت راقده وماحسيتش بروحى .. ساعه كم توا ؟؟
امها …. ساعه 9 صبح يافالحه مش عندك اليوم محاضره هدا وين نايضه ؟؟ … عندك الحق راقده لتوا .. ماهو انى مش فى الحوش ..برى برى ديرلى فنجان قهوه لبين مادوشت وبنرجع للمستشفى ..
ملاك … مع ساعه 11 بنمشى .. امى امتحانى يبدا ساعه 11 وامس طول الليل ساهره نقرا …. وبعدين خليك منى وقوليلى التؤام كيف جو شكلهم .. حلوووين .. اختى شن اول ماشافتهم قعدت تبكى ؟؟ .. انى خاطرى نمشى للمستشفى ونشوفهم ..
امها … انتى عارفه انى مانقدرش نخلى خوتك الولاد وبوك بدون غدى وفطور .. لدلك اول مااختك تروح لحوشها نبدلو .. انتى باتى عندها وبرى صبح وانى نجى العشيه وقت ما يجو الناس …
ملاك … باهى ارقدى توا بعد ماتديرى دوش وبريلها العشيه انتى من امس فى الليل ومن اول ماسمعتى بيها بتجيب مارقدتيش …
امها …ناس تمشى وتجى عليها فى عياده .. مانقدرش نخلى اختك بروحها … خلاص برى حطى القهوه خلى نوض ندوش …
ملاك … باهى خلاص لبين مادوشتى تلقينى موتيه الفطور والقهوه .. افطرى معاى وبعدين برى ..
خشت ملاك للمطبخ … ووبدت توتى فى صفرة الفطور والشاهى والقهوه … وولعت الكوشه وسخنت فريدات القهوه … ومافاتتش ربع ساعه لين كانت صفره واتيه وهنا على خشت امها ..
امها … صبيلى قهوه نحس فى راسى بيتفجر ..
ملاك …. احكيلى ماما زحمه عندها فى مستشفى ؟؟
امها … اى والله زحمه ورغرايط تضرب هنا وغاديكا … وبدات عزوزتها مابطلتش بكى عاد .. مش منها الفرحه فرحتين اليوم …
ملاك … علاش شن هيا الفرحه تانيه ؟؟؟
امها … ولدها احمد الا كان يحضر برا روح …ليه شهر كمل نهائى وروح … والله قريب تشد الحيوط من الفرحه …
ملاك … هيا عندها ولد تانى غير محمد ؟؟ غريبه فرح ماقالتليش ؟؟
امها … وانتى شن ليك علاقه باش فرح تقولك وبعدين انتى ليك شهر دبس فى دارك وماشافك حد على خاطر امتحاناتك تقول بتولى دكتوره فى هاليومين
ملاك .. باهى ولدها هدا وين كان ؟؟؟
امها … كان مسافر يحضر من قبل مااختك تتزوج اصلا … وبعدين كانا اختك ماتعرفاش مازالت .. بتعرفيه انتى ..
ملاك … حبيبتى فرح عاد عريسه وهادى فرحتها الاوله … من قال السنه الا فاتت لابسه طرحه وسنه هادى توأم فى ايدها زوز … اهو من توا بنقووللها هادم صغارى بنربيهم انى …
امها … ااااااه ياميلت بختى انى .. كانا مش من تسكير دماغك الاحرف هوا … راجل اختك كان متقدملك انتى فى الاساس … لولا دماغك المقفل هوا … نبى نكمل قرايتى .. نبى نبنى احلامى .. وعلى السيره هادى اظفرى الشيب هنا … هونى اختك الا اصغر منك بسنتين تزوجت وتوا عندها زوز صغار … وانتى اقعدى شملى واعطى شيشه بس …
ملاك … اوووووووف ماتعييش من نفس الاسطوانه … ناس كانو جاينى انى صح …. لكن نصيبهم ان انى مابيتش نطلع واختى وافقت تطلعلهم … وزى ماجى النصيب لاختى .. صدقينى حتى انى لما يحين وقته مش رح نوخر …
امها … اى اقعدى انتى طمنى روحك … ربى يقول اسعى ياعبد وانى نسعى وراك … مش انت طفش العرسان وانى نزلك عرسان من سمى …
ملاك … امى خلاصة موضوع … انى كله كله سنه تانيه بشرى ومش مفكره فى زواج لين نتخرج ونحقق جميع احلامى … اختى كانت تقرا معهد وكملت متوسط وقالت خلاص معاش نبى نكمل … وكانت تحلم انا تبنى حوش وتتزوج وتستقر .. بينما انى كل احلامى انى نكون دكتور وناخد ماستر ونتخصص ونولى انسانه مستقله وبعدين نفكر فى زواج ..
امها … دوه معاك مضيعه للوقت بس نقولك شى .. تحسابى خوتك بيسكتولك ؟؟ لامتى بتقعدى طفشى العرسان .. مصيره ويجيك يوم اغبر على تصرفاتك هادى .. وبلاش حتى فطور مانبيش نفطر … هوا اصلا الا يشوف وجهوكم يشوف فطور ولا هنى << وناضت وسيبت صفره >>
ملاك … ماما قبل ماتمشى خليلى عشره جنى بناخد شوى شيتات من الجامعه ..
امها … امتحانك اليوم اخر امتحان ولا لا ؟؟؟
ملاك ….. اى اخر نصفى امتحان اليوم … باهى لما تروحى حطى الغدى على طول على نار مش تخلى خوتك وبوك جعانين ..
ملاك .. ماشى ماشى ..
شافت ملاك بسرعه لساعة مطبخ لقتها ساعه 10 الا ربع … ناضت بسرعه ضمت صفره … وغسلت معايين واول مانشفت ايديها سمعت امها قربعت الباب وطلعت … فا خشت لدارها بسرعه ولبست وطلعت اتصلت بصاحبتها …
ملاك … اه يابلوه وينك ؟؟ وقت ساعه 10 ونص ياغبيه .. الامتحان يبدا سااااااعه 11
سمر …. خلاص وصلت فم الباب انزلى ياعبيطه …
نزلت ملاك تجرى وركبت لسيارة صاحبتها وطلعو بسياره ..
سمر … شنى اختك واخيرراااا جابت ؟؟
ملاك … اى زوز توأم يهبللللللللللو ..
سمر … تمنيتى انتى الا كنتى بدلها ؟؟
ملاك .. لا لا الحق ..
سمر … علاش ؟؟
ملاك …. اول شى حاليا مانفكرش الا فى قرايتى بس .. وتانى شى راجلها زى خوى نحس فيه يعنى ماتخايلتش فى يوم انى نكون مكانها … وبعدين شن قصة امى فتحتلى نفس الاسطونه وانتى توا .. شن تشوفو فيا كبرت لهدرجه ؟؟ راهو كله كله عمرى 22 سنه بس
سمر … لا والله ماقصدى بس قصدى كنت نفكر امس يعنى شوفى نصيب … هما ناس هادم كنو جاينك انتى فى الاساس .. بس انتى مابيتيش تطلعى لانك مازال مش مفكره فى زواج واختك الا اصغر منك يسنتين هيا الا طلعت .. وصار نصيب وتزوجت وتوا بصغارها .. يعنى ماتحسيش انا كان مفروض انتى تكونى مكانها ؟؟
ملاك … لاحول ولاقوة الا بالله ؟؟؟ خيرك يافرخه انتى ؟؟ هبلتى ؟؟ نقولك قسما بالله مافكرت فى يوم زى ماانتم مشغلين دماغكم توا … تى نهار ابيض راجل زى خوى .. كيف بيخطر فى بالى انى نكون مرته ؟؟ وعلى عموم الحق مش فيك … الحق فى عجلة سيارتى الا نطبقت باش جيت مع عبيطه زيك … وتوا اعطى شوىة رست لفمك وخلينى نراجع الاسئله …
سمر .. باهى باهى وانتى الواحد ماياخدش معاك كلمه … هههههههه
وصلت ملاك للجامعه .. ومعاها سمر … واول ماوصلو لقو الساعه 11 مزبوطه .. فاشدوها تهرويل على قاعة الامتحانات وفى نفس الوقت عيونهم فى شيت … وفى اللحظه هيا انفك خيط السبيدرو متع ملاك …
سمر .. اربطيه بسرعه يابلوه وقت …
ملاك .. برى ماتستنينيش … رح نلحقك …
مشت سمر تجرى … بينما ملاك ربطت سبيدروها ولمت شيتاتها وناضت … بس وهيا كيف يتنوض بسرعه انقبت فى شخص …
ملاك … اوووووووف ماتشبحش انت ؟؟ ياربى وقت عليااااااااا
الولد … متأسف جداااااا انتى نضتى بسرعه وانى كنت نقلب فى نقالى ومانتبتهتلكش اسف جداااااا .. نلم معاك الورق ..
ملاك .. لا لا شكرااا … وكملت لمان ورقها بسرعه وناضت تجرى ..
واول ماوصلت لقاعة الامتحانات مدت بطاقتها وخشت تجرى وبدو فى الامتحان ….
فاتت ساعه ورا ساعه وملاك كملت امتحانها وطلعت واول ماطلعت لقت صاحبتها سمر تستنى فيها …
ملاك … شن جاوبتى ؟؟
سمر … زى زفت والحمد لله ..
ملاك … بالعكس الاسئله كانت تهببببببببل …
سمر … تعالى نشربو قهوه … نحس راسى بيتفحر …
ملاك … بشرط مانتعطلوش وناخدوها من عصافير … قهوة الوسطيه مانحبهااااااش واخر شى وتعزمينى على كريب ؟؟
سمر … شن رايك نروحو احسن هههههههه
ملاك …. نبصر عليك … بس بجد خودى انتى قهوه من عصافير خلى نمشى للمعتمد ناخد منه شيتات ونجى
سمر …. خوديلى معاك شيت الانبريو << علم الجنين >> متع احمد سليمان وتوا نخلصك فيه ..
ملاك … ماشى ماشى …
خدت ملاك شيتات ورجعت لسمر … ولقتها مازال تستنى فى طابور …
ملاك … مازلتى واقفه ؟؟
سمر…. ماك عارفه بالارقام حكايه … اسمعى بنقولك … غير شوفى الولد هدكا الا واقف مع شلة شبيه زيد …
ملاك …. وينهم ؟؟؟
سمر …. هوووووووونى واقفين تحت دروج جنب مكتبة الواضح …
ملاك …. وووووووه مرض هوا نفسه …
سمر … تعرفيه ؟؟
ملاك …تقبيت فيه مبكرى وعطلنى على الامتحان … مهم خيره ؟؟
سمر … يهبببببببل يجنننننن يقتتتتتتل … بس شكله صويع من بكرى هوا وشلته يفنصو على بنات الا يخطمو والا يجو .. ويضحكو ..
ملاك … مادما واقف مع شلة شبيه زيد اعرفى صااااااايع زيهم …
سمر … بس يهبل .. حى على شخصيه .. اناقه … لبسته … زفت خيره نصيبى مايجنيش هكى ؟؟
ملاك … وصل رقمك برى جيبيلنا القهوه وياسرك احلام .. وبعدين عادى يعنى …
سمر … بجد انتى قولتى عادى ؟؟
ملاك … هههههههه هوا صح حلو … بس شوفى نظراته من بعيد .. تى والله الا باين عليه متع بنات …
سمر … اص اص بالله سديتلى نيتى ..
ملاك …. بناخدو قهوتنا وعلى سياره طول ؟؟ وقت عليا مانقدرش نتأخر … بنروح نطيب الغدى لخوتى الولاد وبوى ..
سمر … خليك شوى … نبى نتفرج عليه شوى بس ملاك ارجووووووووك ..
ملاك … ارجوك ؟؟ ارجوك ؟؟؟ تى بتمشى ولا نلم عليك ناس …
خدت ملاك وسمر قهوتهم وطلعو …. وسمر طول الوقت وهيا تمدح ف جمال هدكا الولد … وملاك زى من يكسر فى دماغها … وماصدقت ملاك وصلت لحوشها لين قالتلها …
ملاك … رووووووووووى واخيرا وصلت .. سلام .. برى احلمى بيه بروحك باااااااااى << وقربعت باب وخشت تجرى وتضحك …
واول ماوصلت للحوش .. خشت لدارها وبدلت حوايجها بسرعه وحطت الفاصوليا على نار ونقعت رز … وبعدها شغلت مكينة الكنس وكنسة الحوش ونشفاته وبخراته وخشت للمطبخ كملت باقى غدى ووتت سلاطه … وهنا على خشت خوها وليد …
وليد …. اه شن الغدى واتى ؟؟
ملاك … اى نادى على بابا ومجدى وتعالو تغدو …
مجدى … جيت من غير ماتقولى يافرخه …
ملاك … احترم نفسك وتكلم بااسلوب ..
مجدى … تى برى يافرخه … مش مابتيش تخلينى ناخد سياره هونى عجلتها مشت …
ملاك … اى حره عندك مانع ؟؟
مجدى … مش قتلك انتى عيل …
وليد …. توا بظمو فمكم انتم زوز ولا لا ؟؟مروح من خدمه راسى بيتفجر … مانبيش نسمع صوت …
ملاك انى خاشه لدارى ومسيبتهالكم مره وحده …. اصلا لانى صغيره فامش رح نلقى احترامى اكيد …
خشت ملاك لدارها ..وتكت على سرير … وبعدين قامت تلفون واتصلت باامها …
ملاك …. اه ماما انى كملت كل شى مازال يتغدو ونغسل معايين بس … شن رايك نجى العشيه طالما اختى روحت ؟؟
امها … اغسلى معايين وتعالى باش فى الليل نروح انى وياك … ونرجع صبح ..
ملاك …. مش مفروض تباتى الليله ؟؟
امها …. عزوزتها حلفتلى لانا شافتنى تعبانه ومارقدتش … فاقالتلى الليله والله لماتروحى ترتاحى وهيا وبناتها بى يباتو جنب فرح الليله ..
ملاك … ياوخيتى مطيبهم عزوزتها وحماوتها فرح بجد ياسعدودها بيهم … باهى امى كلمى وليد توا يغيرلى عجله سيارتى ؟؟
امها … خلاص توا نكلمه يغيرهالك توا وانتى اغسلى معايين وتعالى لانا الحوش يملى ويفرغ بالناس ..
ملاك … خلاص انى جايه ساعه بس ونطلع … نغسل معايين الغدى ونلبس … لبين ما وليد غيرلى عجله ….
ناضت ملاك وطلعت لبسه تلبسها من دولاب … وبعدين خدت شنطه وحطت فيها بيجامه وشبشب لانا حطت احتمال تبات غادى … وبعدين طلعت للمطبخ واستنتهم لين كملو غداهم وبدت تغسل فى معايين … وهنا وليد قاللها …
وليد …. ملاك وتيلى القهوه متعى لبين ماغيرتلك عجله وجيت وحدديلى سوريتى بيضه …
ملاك … ماشى ماشى ..
ضمت ملاك المطبخ ووتتله قهوته وحددتله سوريته … وبعدين مشت لدارها لبست لبسه حلوه وبسيطه وحطت مكياج خفبف ولبست وشاحها وحطت برفان خفيف ونزلت …
ملاك … اه وليد شن كملت ؟؟
وليد … اى كملت غير ردى بالك … باين انا فى حد شاركلك القومه شرك …
ملاك …. اكيد خوك لانا مابيتش نعطيهالى بس والله الا ماتروح امى وهيا تتفاهم معاه ..
وليد …. حددتيلى سوريتى ووتيتلى قهوتى ؟؟
ملاك …. اى تلقها على طاولة مطبخ وسوريه فوق سريرك …
ركبت ملاك لسيارتها وطلعت …. واول ماوصلت لشارع اختها ضيق فى الاساس … لقاته زحمة سيارات مدرسه على خاطر جياب اختها ومالقتش الا مكان واحد بس لتدريس وكان ضيق جداااااا … واول مابدت تقدم وتوخر وتحاول تدرسها … طق على مرش سياره وقاللها ….
الولد …. صدقينى تبى سنين تعليم ومش رح تقدرى درسى فى هرجه هيا …
وهنا ملاك فتحت مرش وشبحتله باش ترد عليه وتطلب منه مساعده واول ماقامت عينها وشافته جتها صدمه وقالتله ….
يتبع………..
لقراءة الجزء التالي : الجزء الثاني من رواية حبيبتي لا تنسيني
للإطلاع علي فهرس اجزاء الرواية : جميع أجزاء رواية حبيبتي لا تنسيني كاملة للكاتبة كيندا
جميع الحقوق محفوظة للكاتبة كيندا من ليبيا .
