سنبدأ أول جزء من رحلتنا داخل الرواية الجميلة من المبدعة كيندا بعنوان حوش جدي نتمني لكم الإستمتاع بقراءتها بإذن الله ولا تنسونا بجميل تعليقاتكم حولها .
الجزء الأول من رواية حوش جدي
ملاحظه 1<< سميحه تكون مرة خال نهال ولكن نهال احتراما ليها تقوللها خالتى .. وسميحه تعامل فى نهال كانها بنت اختها 
>>
ملاحظه 2 << للى ماقراش المقدمه متع المسلسل هوا قبل … لازم مايقرا المقدمه توا باش يفهم الحلقه الاوله …
المقدمه
نهوله حبيبتى كان ميمتك طلبت منك طلب ترديه عليها ؟؟
نهال … نعم ماما مايردك الا لسانك شن فى ؟؟
امها … انتى عارفه انا مرة خالك مريضه وركابها يوجعو فيها ودكتور طالب عليها راحه وهيا يانارى حتى بنيه تعاونها ماعندها وماعندها الا 3 دكورا يأكلو يشربو بس زى منشار داخل واكل وخارج واكل .. وهيا قداش بتقسم روحها فى حوشها فى دور تانى ولا حوش جدك دور الاول
نهال ….. ماما خشى فى موضوع شن مطلوب منى ؟؟
امها …. اهو بنخشلك فى موضوع … مافيهاش باس كانا قعدتى فى حوش جدك رمضان هوا وساعدتى مرة خالك فى ظمان والتطيب والنزله ورقيه … واكيد مش رح تردينى وانى نقول بنتى فالحه وبنتى نويشطه وبنتى تطيبها يقولو بيه هنا وغادى وبنتى وبنتى .. وانتى توا قد مسؤليه وخلاص على وش زواج مادمك سكرتى 20 سنه ونستنو امتى يطق ولاد الحلال …
نهال …. اولا ماما معاش تقوليلى جمله هيا وتانيا انى والله ماعندى مشكله مع حناى وجدى وخالى ومرت خالى بس انتى تعرفينى قداش مانحبش ولدها هدكا ومن انى صغيره وهوا يخوف فيا ولحد توا نابته فيا عقده فاتبينى نقعد وجهى بوجهه المكزم رمضان كامل وياريت حتى على ابتسامه وانتى تعرفى جوه يعنى احتمال يكون جو متكهرب غادى اهو قتلك …
امها …. قصدك وسااااام .. لا خليه عليا يقولك حرف بس ولا ينطق بكلمه نوريه شنى يعنى كانا كبر وطق 29 سنه معناها كبر وولا راجل تى والله مانشده الا من ودنه ولا نطلع عيونه وبعدين ماتخافيش انى مرات نفطرو معاكم انى وخالاتك ومرات بعد صلاة ترويح نكونو عندكم مهم انتى اعصرى ليمه عليك هالرمضان وتحملى ماشى ..
نهالى ….. ربك يستر وخلاص بس …
امها …. لا تبسبسى ولاتعادوى خلاص تفاهمنا ماشى وخلينى توا نكلم مرات خالك ونبشرها …
<< ومن هنا تبدا القصه فى حوش جدى بكل تفاصيلها بفطورها وسحورها وطويسة المياه قبل الفجر لجدها وحناها …. وان شالله ياربى بيوتنا ديما عامره بالحب واللمه الحلوه وكل سنه وانتم بخير وبصحه عليكم هالرمضاااان يارررب
الحلقة الاوله …..
نهال …. خالتى صباح الخير ..
خالتها …. صباح الورد نهووله .. ناضو جدك وحناك
نهال … ناضو من ساعه 10 وظربت لجدى ابرة سكر وظميت الحوش وركبت باش نعاونك فى عشاء اليوم ..
خالتها << سميحه >> …. اى عاااد اليوم اول يوم فى رمضان نشاط كله فينا هههههه بس تعالى بعد مايبدا العد تنازلى بعد 15 يوم … اااااااه ياربى وخلاص والله الفجى فينا وخلاص حتى هما 15 ساعه شن بيفوتهم .. مهم هونى برى للحوض تلقينى مطلعتلك المفروم ابدى حطيه على نار باش بعد مايطيب تبدى فى البيتزا ….
نهال …. اوك … نخليلك منه شوى ؟؟ ولاكله نديره ؟؟
خالتها …. اى اى خليلى منه شوى للمحشى وديرى باقى .. خلى انى نبدا نقرض الرشده وبعدين ندير محشى ..
نهال … علاش رشده خالتى ؟؟؟
خالتها …. جدك وحناك هالفترش الرقيق مايمشى معاهم وبدات حناك كانا ماتبداش حاجه غليظه ونشاطه ماتكلهاش … وولادى يتزعبنو ومايبوش الغليظ وانى قعدت فى نص …
وهنا نهال كانت مطبسه على كيمه وقالتلها ….
نهال … اه فهمت عليك << بعدين سكتت شوى وقالتلها >> .. خالتى .. علاش مافكرتيش تجيبى عيل تانى مدما انتى خاطرك فى بنيه ؟؟
خالتها … والله يانهولتى شن بنقولك … اول ماجانى بكرى وسام … كان خاطرى تجى بعده بنيه بس بعدها جى امجد .. وقولت خلى تالته نجرب نصيبى وجانى قصى فالما لقيت خلفت خالك كلها ولاد يأست وصحتى بدت فى نازل وبينى وبينك ياسرنى 3 صغار … وبعد ماكبر وسام الحق فكرة بس بعدين قولت ان شالله وليدى يكبر ويجيبلى بنية حلال توقف معاى وتساندنى ونحطها زى بنيتى واكتر فى عيونى ..
نهال …. ان شالله ياخالتى بس فى شك وسام بى هالوعريه هادى تقبل بيه بنت ..ههههههه
خالتها …. هههههههه والله ديما نقوله نقص من هالحروفيه ونحى هالتكويشه رهى المرأه تحب الراجل الفرهودى .. بس هاتى من يسمع .. حده يقولى اصلا انى من قالك بنتزوج … بس يحسابه هههههه سهل يقعد هكى …. يالله غير يطيح فى بنت امها بس والله الا ماينقلب قلبة شخشير وقولى ماقالتهاش خالتى
نهال ….. ههههههه ان شالله يارب
خالتها …. شنى توا كسودى بعد تخرج نهال ؟؟
نهال …. والله ياخالتى كان نلقى نخدم بس بابا مايبيش فا سلمت امرى لربى ..
خالتها …. والله وسام قالى فى الشركه الا انى نخدم فيها طالبين موظفه .. فاطول خطرتى فى بالى …
نهال … عيت وانى نقتع فى بابا ياخالتى بس دماغه مسكر بقفل …
وفجأه خالتها وفى عز تهدريز قالت ….
خالتها …. يااااامجد …. يااااامجد …. تعالى بسرعه نبيك بسرعه …
امجد ….هاااااااااااااااااااا شنىىىىى … شن فى ؟؟
امه …. قول خير حتى لبنت خالتك حتى بالكدب ..
امجد …. اهللللللن نهووووله .. امتى جيتى ؟؟
نهاااال … ههههه امس فى الليل جيت .. بابا حطنى ..
امجد … وشنى بتقعدى عندنا ولا زياره ؟؟؟
نهال … والله كان مالزتونيش بنقعد شهر رمضان ان شالله ..
امجد … والله كانا وسام مالزكش ههههههه فابنسبه ليااااااا ماعندكش مشكله …..
امه …. ااااص اص سكوتك بركا . اقعد انت توا ناشبه بعدين لما يضربك قول كيف باهى …
امجد … وراس امك قوليله فارس ظلام هوا …. وتشوفى كيف نفترشهولك .. ولاكانا خش صالة الحديد هالتلاته شهور صدق روحه ..
امه … باهى باهى انهى هالسيره .. وبرا جيبلى ملح كمل عليااا .. بسرررعه باش نتم العشاء
امجد …. شن تشوووفى فياااا عيل انى .. فيقى عمرى 25 سنه راهو والله مانى 5 سنين باش نمشى نكر للمحل على شكارة ملح .. برى قولى لعسولتك << قصى >> الا راقد فى دار يجيبلك .. على الاقل هداكا عيل قلبا وقالبها .. هيا تشاووو عليكم بندوش وينرقد ومانبيش حد ينوضنى الا مايدن اهو قتلك ايوااااا .. 15 ساعه راهم مش حاجه سهله ..
طلع امجد من المطبخ ونهال قعدت تضحك وقالتلها ….
نهال …. ههههههه شن بديرى توا ؟؟؟
خالتها .. << بنادى على قصى وخلاص بالك ربى يهديه ويقول باهى ….
قصييييييي … ياقصىىىىىىى .. تعال تعال سلم اوليدى ..
قصى … << خش للمطبخ وقال >> اهلين نهال شن اخبارك .. نعم يامااا ..
امه … اطلع جيبلى ملح من محل الا قدامنا سلم وليدى ..
قصى … اسمعى ياما من الاخير متعارك مع زنيلو ولد جيرانا ويستنى امتى نطلع باش يضربنى ومانيش طالع … تبنى نطلع هاتى مفتاح سياره ..
امه … توا معقوله عمرك 16 سنه ونعطيك مفتاح سياره … تى انت غير طق سن القانونيه قبل ..
قصى …. مالا استنى لين انطقها باااهى باش نجيبلك ملح … هيا تشاووووو
امه …. تعااااااااالى هنااااااا نكلم فيكككككك شيط الله رقيكم بااااهى خودو الدعى فى هالرمضان … ولاد العازه والقهره وطيحت السعد … والله والله الا مايروح بوك باهى تى والله الاما نقوله بوكس العفن هيا وتجطونى الا ماينقامو وكانا ماشيطلكمش ريقكم بعدين مانبدا انى سميحه ….. وتوا نلبس جلابيتى وننزل انى للمحل باهى وانتم توسدو المخاد …
وفجأأأأه تصكر الباب على مرواحة وسام من الخدمه وخش للمطبخ وهنا سميحه قالت …
امه …. اهووووو خوكم جى بااااهى … تى والله الا مايبنالكم ..
وهنا نهال قلبها فجأة طلع منها وللحظه فكرت تلبد تحت طاوله بس شدت روحها وتلفتت وعطت بالقفى على اساس تمصمص فى معدنوس وتنقى فيه … واول ماخش وسام قال …
وسام … السلام عليكم …
امه … وعليكم سلام …
امه … بنت خالتك نهال عندنا ..
وهنا شبحلها شوى بعدين قرب منها وقاللها …
وسام … اهلين << ومد ايده >>
بس نهال ارتبكت وجت بتسلم طاح منها موس ومعاش عرفت كيف تتصرف فادوب مامدت ايدها وتلفتت بالعكس … وهنا جى بيطلع من مطبخ فاقالتله امه ..
امه … ووووسام قبل ماتطلع شوووفلى دوبره مع خوتك يااما والله نطلع انى ونمشى للمحل بروحى .. من بكرى وانى نكلم فيهم بس هات من يفهم وشاط ريقى فى قولت جيبولى ملح جيبولى ملح ..
وسام … خلاص انى طالعلهم …
وسام …. انتتتتتتتتت .. اى اى انت تعال هنااااااا .. اوقف هناااااا …. توااااااااااا فى اللحظه هيااااا نبيك طلقه … تطلع تجيب ملح وتجى تفهههههم فيا … وقسماااا باللله نلاقك تمردغ برا الا مانطلعلك وتيرواااات بس .. فاماتحشمش روحك قدام صحابك وتعالى هنا طووول …
قصى …. حاضر …
وساااام … استنى خود هاك 5 دينار … وخود باقى …وين خوك تانى ..
قصى …. راقد فى صاله ..
وسام … خلاص برا …. و5 دقايق ونبيك هناااااا ..
خش وسام لصاله ولقى امجد راقد ولقى على طاولة تلفزيون شيشة ميه فاخدى الميه وصب منها على امجد فاناض امجد مخلوع وقال …
امجد …. ياحيوووووان ..
وسام …. اه .. شن حسك قووولت ؟؟
امجد … نحسابك قصى بس .. كيف جيت بنعجنه عجنة رباشة قبور ..
وسام …ترا حط ايدك عليه كانك راجل وبعدين تلقى من يكسرهالك ماااااشى … وووين وين ماشى .. استنى … بنقولك كلمتين وحطهم خرصه فى ودنك
… اقسم بالله امك تقولك برا لمكان ولا جيبلى شى وتقوللها لا .. اقسم بالله الا ماندمك فى حياتك والموطو الا جبتهولك شهر الا فات رح تنساه فاااااااهم ..
امجد …. فاااااهم خلاص وانت تدل فينا …
وسام … زى ماانت تدل فى امك الا واقفه على خاطركم سنه فى مطبخ … بس الا زيك مايعرفش يستوعب دوه هياااا …
قووووووولنااا استنى … وين ماشى ؟؟
امجد .. بنكمل نومى فى دار ..
وسام …. صليت ظهر ؟؟
امجد … لا لا مازال
وسام …. ساعه 4 ومازال مش مفكر تصلى ظهر ؟؟؟ خش تووووووا توضى وصلى قدااامى هيا …
مشى امجد وهوا يغلى على وسام وخش للحمام … ومافاتتش 5 دقايق الا وقصى جاب الملح لامه ورجع قعمز على البلاى ستيشن … اما وسام فابدل حوايجه ونزل لحوش جده لوطه يهدرز مع حناه وجده …
وفاتت ساعه وراء ساعه ونهال وخالتها منهمكين فى توتى العشى وتهدريز وماكملوش كل شى الا لما جت الساعه 8 وربع المغرب وهنا سميحه قالت لنهال …
خالتها << سميحه >> … نهااااال انى بننزل حسه مدفع الافطار ضرب …. خلى نمشى نصب لحناك وجداك الحليب وانتى وتى صفرة الحار على طاوله هنا للولاد والحقنى …
نهال …. ماهمش فاطرين لوطه ؟؟
سميحه …. لا لا يبو يفتحو التلفزيون والحاج حمد وبسباسى وحناك ماتحبش دوشه …
نهال … باهى باه شووى ونلحقك ..
نزلت خالتى سميحه لوطا هيا وخالى فرج وقعدت نهال فوق تحط فى الماكله للولاد على طاوله … واول مابدت تحط على طاوله فى الماكله خش وسام للمطبخ وقعمز على طاوله ونزل عيونه وبدى يفطر ….. وبينما نهال اول ماشافاته و من ربكه ووهيا تحط فى عشى بسرعه باش تطلع من مطبخ ناشت طاسة الحليب الا جنبه وكفتها على سرواله فا …….
يتبع ………
لقراءة الجزء التالي : الجزء الثاني من رواية حوش جدي
للإطلاع علي فهرس الرواية : جميع الاجزاء كاملة لرواية حوش جدي للكاتبة كيندا
جميع الحقوق محفوظة للكاتبة كيندا من ليبيا .
