وفي الجزء الأول من رواية سر سعادتي دعونا نبدأ في معرفة كيف ستبدأ الرواية وعن شخصيات الابطال ؟ دعونا نعرف إجابة هذا التساؤل في السطور التالية بإذن الله مع الكاتبة لوزة ، نتمني لكم قراءة سعيدة بإذن الله .
تعريف بشخصيات رواية سر سعادتي ..
يوسف الغاوي دكتور جراحة ناجح ف مجال عمله طيب جدا وهادي مواليد 76 عنده اخته شذى اصغر منه بعامين وامه عائشة
يوسف متزوج ومرته اسمها رويدة متعجرفة مواليد 85
مسرة متخرجة من كلية العلوم تخصص احياء فتاة مؤدبة ومرحة وبشوشة دائما مبتسمة مواليد 90 عندها اخين عمر 88 و حازم 86 امهم فتحية.
رواية من الواقع وصايرة قدام عيوني مع اضافت لمسات من الخيال..
الجزء الأول من رواية سر سعادتي
احمد((صاحب يوسف)) ل يوسف :تي نوض بالك نوض خليت ريحة المحل شاورما تو تعلق ف الحوايج
يوسف: تسكت جعان
احمد:شنو اماﻻ ماتغديتش ؟؟
يوسف:ﻻﻻ مروح تعبان من العمل نبي لقمة طيبة لقيتها مبكبكة شايطة
احمد:ههههههههههههههههههه
يوسف تنهد: تعبت يااحمد والله تعبت مراة مهملة ﻻ مهتمة بنفسها وﻻ مهتمة بيا وﻻ بالحوش شي ايكطكط
احمد:ﻻ حول وﻻ قوة اﻻ بالله.. طلقها يايوسف وافتك من شرها وتجوز مرة تانية
يوسف:ﻻ بالله فكني نتجوز تاني وتطلعلي احرف من اﻻولة
احمد:اتعرف تعرف ﻻش قطوس ف شكارة توا فيه فيس و فايبر وهلبا حاجات
يوسف:ﻻ فاير ﻻ واحدة تره
احمد:غير اسمع مني والله بجديات باهي بﻻش برامج اهو انا يخشولي هلبا زبونات شوف كان عجباتك واحدة تبادلل رقم معاها
يوسف:زعماااا ؟؟
احمد:ايييه غير جرب انت
يوسف:اوﻻ بنات ناس مش تجربة وتانيا هههه كلهم مصلحجيات يسمعو بيا دكتور يتلصقو بش يبوني نصرف عليهم نوضي تل انتي وياها
احمد:ماقلتش جرب كل مرة واحدة قصدي جرب حظك واصﻻ انت ﻻش اتقول انا دكتور
يوسف:مانقولش مرات بصدفة يعرفو او انا نغلط نقولهم شوية عندي عملية والى اخره
احمد:باهي انت تعرف وماتقولش دكتور …باهي وجس نبضها وبعدين ساهل
يوسف:اممممم مشكلتي مانعرفش انطيح
احمد:اياح عاد بش قلنا توا فرصتك اهو قاعد ف المحل تعال اوقف مكاني ف الكاسة
يوسف:باهي هي
احمد:تي نحي نص شاورما اللي تاكل فيه …
يوسف:خﻻص اهو كملت.
خدي احمد معطر الجو وعبا المحل بيه
يوسف:خنقتنا بيه يادعوة
احمد :ﻻ بالك تبيني نخليه هكي ايفحفح ثومة ههههههههه
فاتت ربع ساعة
يوسف ل احمد : وينهم زبونات مانشوف ف شي .. صدقو الناس اﻻولة قدام وجهك تيبس الخضراية
احمد:اصبر قاعدين ف بداية العشية
خشت زبونة بس يوسف ماعجبتاش تنين تﻻتة تسعة عشرة
يوسف ل احمد:عييت منه محلك مايخشوله غير الدربكة وام حنكة شينات ياراجل
احمد:الباهي ديما ايعطل اصبر بس
الزبونة :السﻻم عليكم
يوسف :وعليكم السﻻم
احمد طلع نقاله وفتح لعبة
فات شوي
يوسف:ادوري على حاجة معينة ياانسة
الزبونة:ايه نبي جاكيت قماش لينو طويل هكي عرفته ؟؟
يوسف اتلكمس ماعرف شي
بعدين قالها ايه عرفته
الزبونة:باهي وينه
احمد:ناقصات شوي ياابلة راه
يوسف شاف جيهة جاكيتات وقالها باهي شن رايك ف هدا
الزبونة عجبها يوسف وسرحت ف عيونه ولقاته انيق ووسيم وريحة برفانه حلوة فقتله:ﻻﻻ مش نوعيه هادي والله لدت محﻻت كلهم وشي مالقيتاش
يوسف: باهي مدة جاية حنجيب بضاعة اكيد حنجيب منهم كنهدا خلي رقمك ووقت نحصله حنبعثلك رسالة او نتصل بيك نقولك طلبك اتوفر
الزبونة تبتسم وقتله: اوكي خود هي
09277014**
وكملت دوتها انا نشتغل ف مختبر العافية لتحليلات اللي ف منطقة كدة تبي اي حاجة تفضل
يوسف:تمام ربي يحفظك
الزبونة :ويحفظك تسلم .
وطلعت
احمد:منين بنلقاها الجاكيت اللي عشمتها بيها واللي مش حنقدر نجيبها
يوسف:معش عرفت شن نقولها المهم ريت نقرة الزين تبارك الرحمن
احمد:قنينة ايه
يوسف:وتحسها بريئة وبشوشة
احمد:لكن ﻻحظتها تبتسملك ومعجبة الباين
يوسف يتمتم قنينة الحق مش زي الغولة رويدة
احمد:مانسمعش فيك راه
يوسف:ﻻﻻ شي …
ليل الليل وروح يوسف لحوشه..وقال:السﻻم عليكم
رويدة:باهي اللي جيت يافالح
يوسف:يامراة ردي السﻻم تعلمي تقولي كلمة طيبة
رويدة: اياح علينا عاد
يوسف:درتي عشي؟
رويدة:مادرت شي اونه مطبخ دير حاجة تاكلها تن واﻻ جبنة
يوسف:ﻻ حول وﻻ قوة اﻻ بالله عﻻش ماطيبتيش الثﻻجة هادي اللي معبيها شنو كله بيتلوح
رويدة:باهي به كول اونه زي ماقتلك
يوسف:خﻻص طيرتي النية اصﻻ ..
بدل يوسف و توضى وصلى العشاء وخش لداره اتكى جنب مرته
يوسف:رودي
رويدة:هاه
يوسف؛قولي نعم شن هاه هادي
رويدة:نعم
يوسف قرب منها شوي…
رويدة :بنرقد راه
يوسف:والله ماولت عيشة هادي !
رويدة خشت ف اليرغان وماعدلتش عليه
كمل يوسف كﻻمه وقالها :تو بش نكلم فيك !
طلعت راسها رويدة وقتله:هاه هاه شنو فيه نبي نرقد تعبانة من الصبح ع رجل واحدة
يوسف:تعبانة؟؟؟؟الحوش ونشوف فيه الغبرة ترقص رقص و الغدي الله الله نروح تعبان من عمل ونبي لقمة طيبة يا نلقاها مبكبكة شايطة ياشكشوكة معبيا زيت وكان نروح ف الليل عشي مافيش نجي نقربك تقولي بنرقد ! ومازال تلومي فيا
رويدة:انت تتسبل هي تصبح ع خير
شافلها يوسف باشمقزاز
وطلع من دار النوم وقعمز ف الصالون و واجعه خاطره ويتمتم بينه وبين نفسه الله يسامحك يمى الله يسامحك زوجتيهالي غصب رضيت بيها وهيا تعامل فيا معاملة زفتة … صدقت يااحمد ﻻزم انبربش ع واحدة . . حقاااا خيرني انا …. البنت متع امبكري قنينة ماشاء الله باهي كيف بنجبدها ليا امممم واﻻ زعما نمشيلها وحتى ولو مشيتلها شن السبلة..
وبينما يوسف سارح ومبتسم ف البنت
جاته رويدة هاك اختك تتصل بيك
يوسف اتعكرش وجه من شوفة رويدة وخدي النقال:ايوه السﻻم عليكم
شذى:عليكم السﻻم .. معليشي افيسا اكيد نوضتك من نومك
يوسف:ﻻﻻ فايق
شذى:افيسا نبي اندير تحليلات نجيك غدوة ف مستشفى
يوسف:وين انور اماﻻ ..((انور راجل شذى))
شذى :ف الصحراء
يوسف:باهي ان شاء الله بس عندك عينة ؟
شذى:ايه خديتها غير امبكري كنت بنحلل ف العيادة فصارت مشكلة بالسﻻح فطلعنا نتجارو
يوسف سرح وفكر انه يرفع اخته لمختبر التحليل متع البنت اللي جت ف محل….وقال لشذى اسمعي شدى ماتجينيش ف المستشفى تو انا نمر ناخدك غدوة ونرفعك لمختبر متع تحليﻻت كويس غير مستشفى متاعنا تحليله مش كويس
شذى:اوكي نستناك على ساعة 11
يوسف:تمام ..تصبحي ع خير…
غمض عيونه يوسف سارح ف ابتسامة البنت لين خداه النوم وصبح الصبح و…
يتبع……..
لقراءة الجزء التالي : الجزء الثاني من رواية سر سعادتي
للإطلاع علي فهرس اجزاء الرواية : رواية سر سعادتي ( جميع الأجزاء كاملة ) للكاتبة لوزة
جميع الحقوق محفوظة للكاتبة لوزة .
