الجزء التاسع من رواية حوش جدي

وفي الجزء التاسع جهز نفسك جيداً لقراءة أروع المواقف والأحداث بين ابطال الحكاية ، هل أنت جاهز ؟ أم سنري شيء لا يخطر علي البال ؟ كن جاهزاً لكل شيء فخيال الكاتبة في عالم جميل لا مثيل له فتوقع كل شيء .

الجزء التاسع من رواية حوش جدي

فاتت الليله على حوش جدى زى اى ليله .. العيله ملمومه والكل يضحك ويهدرز وينتاوش مع خوه …. وطبعا لاتخلى الجلسه من بعض اليبرا الا يضرب فيها امجد لوسام .. بس الباين انا العاده عند امجد انا مايستمتعش الا مايشوف وسام متنرفز ويغز ويسحن عليه ….. فاتت الليله واليوم الا بعده ونهال .. تخمم وتخمم كيف بيكون بعد بكرا .. هل رح تقدر تتقبل العريس … وترتاحله وتحبه ؟؟ ولا المشاعر الا ممكن حاسه بيها اتجاه شخص رح تكبر وتحرق فيها وفى كل الا قدمها..
جى اليوم الا نهال بيجو اهل خطيبها وخطيبها فيه .. باش تصير المقابله الشرعيه … وهنا امها اتصلت بيها وقالتلها …
امها … الو ايوا نهال ؟؟
نهال … صباح الخير ياماما ..
امها .. مش قتلك خالك قوليله يحطك صبح ؟؟ مش عارفه الناس بيجو اليوم ولا تتزعبنى انتى ؟؟
نهال … خالى طلع من صبح بكرى … ومالحقتش عليه ..
امها .. من قاعد فى الحوش ؟؟
نهال … وسام بس ..وقاعد راقد ..
امها … خلاص كلمى خالتك تنوضه وقوليله توا يحطك … اهو قتلك .. ساعه 10 صبح توا .. ساعه 11 مانلقكاش قدامى نقلب الدنيا فوق راسك فاهمه .. لانى من امس قتلك خلى بوك يجيك وانتى قولتلى لا لا خالى توا يحطنى صبح .. وخلاص برى توا خلى بنطلع مع بوك نجيب الحلويات والعشى والحاجات ناقصه ..
نهال … فى حاجه تبنى نروح نديرها ؟؟ مرات نجى نلاقاك مهناكش ؟؟
امها … ماعبيتش عليك … امس نكتت الحوش كله وطلعت كل شى ومسحته .. انتى روحى وابدى فى روحك بس وخليك ناشطه زى باقى البنات ..
نهال … ااووووف ماشى ماشى … مهم انى صاحباتى بيجو اليوم ..
امها … علاااااش ولاضرورى هما فى كل معمعه خاشين ؟؟
نهال… امى قلتلك معاش تتكلمى على صاحباتى هكى .. انى قولتلهم تعالو نبيهم يجو ..
امها … ماشى ماشى .. خلاص انهى موضوع لانا نقاش معاك مافيش فايده منه .. هيا سلام وخلى ولد خالك يحطك فى حوش توا ..
نهال … دقيقه بس علاش انتم ماتخطموش عليا؟؟
نهال … اوووووف عاد انى بنطلع بنجيب الحلو والعشى وبعدين بنخطم انى وبوك بنمد ايدى انى وياه فى العزى .. وبعدين انى مشوارى فى جيهه وحوش جدك انتى فى جيهه .. هيا برى توا بوك يكلكس .. سلام ..
مشت نهال وحاسه انا فى شى مقعمز على قلبها … حطت وشاح على راسها وركبت فوق لخالتها .. ولقت مفتاح مرشوق من برا فافتحت باب وخشت واول ماخشت لقت خالتها تكنس باللمكينه الكهربائيه .. واول ماشافتها طفت المكينه وقالتلها ..
خالتها … صباح الخير نهوله ..
نهال… صباح الخير خالتى ..
خالتها .. شنى اليوم بيجوك ناس ؟؟
نهال … اى وامى توا كلمتنى قالتلى قولى لوسام يحطك فى حوش ..
خالتها … اه باهى دقيقه بس توا نوضهولك ..
مشت خالت نهال لدار وسام ولقت وسام راقد فى سابع نومه فاقالتله …
امه … وسام .. وسام … وليدى ..
وسام … نعم ياماااا .. بنرقد .. خلنى مازال شوى ..
امه … وليدى … نوض وصل بنت عمتك تستنى فيك ..
وسام … من بنت عمتى ؟؟
امه .. تى شنى منى بنت عمتك ؟؟ فيق بيا عااااد والله مانجيب الا مالقى ميه ونصبه عليك ..
وسام … نوضت نوضت .. شن فى يما ؟؟
امه … نهال تبيك تحطها فى حوش بوها توااا ..
وسام .. لاحول الله ياربى << وامسح وجه باايده وشبح لساعته وقاللها >>…. ساعه 10 .. علاش من توا << رجع رقد وقاللها .. قوليلها بعد صلاة ظهر توا نوض ونحطها ..
امه … نووووض توا .. حطها … خلى بنت تلحق تدير على عمرها شى قبل مايجو ناس ..
وفجأه تلفت وشبحلها شبحة استغراب وقاللها …
وسام … من ناس ؟؟
امه .. خطيبها وامه … بيجو يشوفو نهال وخطيبها بيجى يشوفها الرؤيه الشرعيه … والبنت امها قالتلها تروح توا ..
وسام … مانيش رافعها … ومش رح تركب سياره وتمشى تدور حد يرفعها لخطيبها … ولا نقولك مش لازم مره وحده ..
امه … هيا ماتاخدش فى شورتك ياسبع البرمبخ نوووض توا حطها ..
ناض وسام ولوح اليرغان على طول ايده واف اف لين عى … وقاللها ..
وسام … خلاص اطلعى … ندير دوش ونوصلها ..
امه .. ماشى بسرعه …
قعمز وسام على سرير وحط ايديه على راسه وبعدين مرر ايديه من جبهته لرقبته من تالى وتأف أف …. وشبح شوى على جنب وضرب باايده ساعه الا على كميدنو وناض … طلع حوايجه وخش للحمام وخطم من جنب نهال من غير حتى مايقوللها صباح الخير .. وهنا اول ماشافاته نهال يتصرف هكى .. حست بالاحراج وقالت لخالتها ..
نهال … خالتى .. خيره وسام متعفلق ؟؟ كان متضايق من توصيلى .. مش ضرورى .. توا نكلم بابا يجنى ..
خالتها .. ماتعدليش عليه … هوا ديما هكى .. مايحبش من ينوضه على غفله بس … خلاص برى انتى وتى روحك والبسى عبايتك ..
نهال … ماشى ماشى خالتى ..
نزلت نهال … وكانت مضايقه جدااااا من لقطه وسام …
لبست عبايتها ووشاحها … وركبت لخالتها وقعدت تهدرز معاها لين طلع وسام للحمام وقاللها ..
وسام … صبا ح الخير ..
نهال .. صباح الخير ..
امه … صباح الخير … بااااهى الانطقتها هالجوهره … خاطرى نعرف علاش ماد وجهك شبرين بس .. وبعدين فى واحد يلبس فى هالنو سوريه سوداء … شنى مالا فى حد ماتلك اليوم
وهنا شبح وسام لنهال شوى وقعدة عينه فى عينها وبعدين قاللها ..
وسام … شى … هكى من غير سبب … هيا باش تبنى نحطك هياااا ..
طلعت نهال من مطبخ ونزل هوا قبلها …
ركب وسام لسياره وولعها وولع تكيف وقعمزوقعد مطبس يقلب فى نقاله … وقعمزة نهال من تالى .. وقعدة تراقب فى تصرفاته وتشوف لعيونه من المرايه القداميه …. وحست اليوم بدات فيه شى مميز وخاصة فى ملامحه فى شمس وكيف شمس عاكسه على لون رموشه وشعره … و حست انا فى نكهه خاصه فى طريقة شعره ونظرته وحتى توكيشته وحواجبه .. استمرت تشبحله فى مرايه … ومشى تفكيرها بعيييييد وقعدت سارحه فى عيونه وهوا يشبح لوطه وتخايلت للحظات انه خطيبها وانا هالشخص رح يكون ليها ورح يشوفها اليوم ورح تروح ويحكو مع بعضهم ورح تقوله … شن رأيك فيا كيف طلعت اليوم … وفجأه وهيا ساراحه فى عيونه فى مرايه … تدكرت موقف كيف طلعت من حمام وشاف شعرها وبعتلها رساله فى الليل وموقف التورته وكيف لبستها على وجهه فاقعدت زى عبيطه تضحك وهيا سارحه فيه فى المرايه …
وفجأه فاقت على صوته يقوللها …
وسام …. نهااااااال نهاااااال … خيرك شن هبلتى تضحكى مع روحك هههههه سلام من قول رب رحيم وقعد يضحك لما ولى منظرها زى عبيطه وتحشمت وحشت وجهها فى كرسى … وبعدين قاللها .. << راجعى روحك اكيد رح تلقى عندك خال اهبل صدقينى >> …
نهال …. باه فهمت … اكيد انت وانى طالعتلك … هيا شنى مازال بنقعدو مدرسين هلبه ؟؟ ومازال بتشوف لنقالك هلببببه ؟؟
وسام … شكلك مستعجله على شوفت خطيبك هلبه … حقا باش بكرا تحكيلى عليه ها … عريس غفله هوا .. ولا نقولك اليوم استنى اتصالى فى الليل .. باش تحكيلى ههههههههه .. ولانقولك غير بعد مايروح ديرلى رنه بس ..

نهال … وانت شن دخلك ؟؟ وبعدين خيرك فرحان هلبببه انت … شن مقعمزه على قلبك انى ؟؟
وسام … ههههههههه ماهو كان انتى تتزوجى … تتنحى التعرقينه الا فى العيله وبعدك نخطب انى هههههههه ..
نهال …. هوا انت تكرهنى ؟؟؟ مدايرتلك شى انى ؟؟؟
وسام …. بالعكس انتى ولا على بالى اصلا ..
نهال … ولا على بالك ؟؟ اه اوووك << وحست بغصه فى قلبها >> وخدت سماعات وحطتهم فى ودنها باش تنهى معه الحديت وقوة الاغانى وتلفتت جيهة روشن … …
وهنا سكت شوى وقاللها …
وسام … زعلتى منى ؟؟؟ بجد انى اسف والله كنت نبصر عليك … على فكره حتى لو مارديتيش عليا عادى بس اهم شى انك تسمعى فيا << ماكانش يندرى انها حطت سماعات >> … نهال … نقولك شى … ممكن اول مره نتجرء ونقوله … انتى بالنسبه ليا اكتر اخت …. ونتمنى الايام تقدر تتبتلك شى هوا … ماتزعليش منى خلاااااص …
ولما لقاها مابتش تتلفت وترد عليه قعد ساكت ويسوق لحد ماوصلو بينما نهال .. اول ماوصلت لحوشا .. فتحت باب سياره بسرعه ونزلت .. وهنا قاللها …
وسام … نستناك لين تخشى ؟؟
نهال .. لا لا شكرا .. عندى مفتاح الحوش .. سلام ..وشكرا على توصيله ..
وسام … اوك .. سلام ..
خشت نهال وسكرت الباب وراها بينما وسام مشى بسياره وكمل طريقه وقعد يلود من مكان لمكان ومن جيهه لجيهه بدون ماويوقف … وفجأه لقى روحه مدرس قدام حوشهم …. نزل للحوش وقال لامه ..
وسام … امى … امممممى ..
امه …. خير شن فى ان شالله خير ؟؟
وسام … انى بنرقد ومانبيش حد ينوضنى ماااااشى .. وحتى يدن مغرب … ماتونضينيش ولا حتى تخشو عليا لدار … فطورى خليهولى لما نطلع من دار نفطر ..
امه … شن فى ؟؟ خيرك مش على بعضك من صبح ؟؟
وسام …. شى ؟؟ هوا لازم يكون فى شى باش نتعفلق ؟؟
امه …. موضوع يخص نهال ؟؟
وسام … مايخص حد … خلونى فى حالى بس ..
خش وسا لدار ولبس بيجامته … وحاول يرقد ويتقلب بس بدوف فايدف ….قعمز على نت فتح كتاب نفس شى … شد فى راسه وثعد يخبط .. ومش فاهم شى الا صايرله ولا حتى سبب نار الا راكبه فى قلبه …
بينما نهال …. بعد ماوصلت للحوش … خشت دارت دوش وحطت زوز خيارات على عيونها ورقدت لحد العصر ومافاقتش الا بعد صلاة العصر على خشت صاحباتها … وهنا قالولها ..
سندس …. ماااااااصحك قاعده رااااقد ؟؟
نهال …. ههههههه حوش فاضى ونظيف .. فاقولت نريح بشرتى … خديت دوش حمام دافى ورقدت ..
اميره ….. صححححه على ناس … وكانك مش مخممه فى العشى ؟؟
نهال … هههههههه باش بتجيب عشى لينا وبتجيب لناس تحطه لسحور ..
سلمى … والله امك هادى مدللتك باهى … صحه عليك بجد   ياريت انى امى هكى ..
سندس … مهم شن بتلبسى ؟؟؟
نهال …. عندى بلوزة .. ربع كم لونها مش ابيض لا اقرب لى اوف وايت .. ورقبتها ترتبط على هيئة فيوكه وركبت عليها قونه على لون بيج داكن وفيها سبته رقيقه دهبيه وطولها لحد ركبه .. هيا بالوصف ممكن مش حلوه تبات بس .لبستها تهببببل ..
اميره … وشعرك كيف بتديريه ؟؟
نهال … بنقيمه نص … بتوكه فيوكه مركبتها للبسه وخلاص وعندى صندل واطى سمبل وخلاص …
سلمى … باهى توا شنى ؟؟
نهال … ههههههه توا تعالون تكو على سرير ونهدرزو شوى لين يدن مغرب وبعد الفطور نبدا نلبس لانهم بيجو مع ساعه 10 فى الليل ….
تكو على سرير وفتحو مكيف … وقعدت كل وحده فيهم تجبد فى سيره فلان وعلان لحد مااميره قالت لنهال …
اميره …. نهال متأكده انتى تبى تفتحى موضوع خطوبه ؟؟
نهال … اكيد طالما مافى حد فى حياتى ..
سلمى … اكيييييد … انى مانحسش هكى ..
سندس وحتى انى مانحسش هكى ..
اميره … من الاخير احنا فاهمين كل شى ..
نهال … شن فاهمين .. شن تخترفووووو انتم ؟؟
امير وسلمى … انننننتى تحبى وساااااام …
سندس … وبطلى تكدبى على روحك وعلينا ..
سلمى … بجد حرام عليك تظلمى روحك …
نهال … اااااااااااااه .. ممكن يكون حب وانى مش حابه نعرف بيه ..
اميره … علاااااش يابنتى .. هوا حد يطول الايام دى هههههههه
نهال … لانه نحس انه حب من طرف واحد … وانى مش فى باله ..
اميره .. وانتى شن عرفك ؟؟
نهال …. اليوم قالهالى انتى ولا على بالى … وقبلها قالى انى مش مفكر نتزوج .. وقبلها قالى انتى زى اختى .. وخوه هدكا اليوم فضحه وقال يعبى فى كروت فى الليل .. يعنى فى نظركم شن يدير بيهم فى الليل ؟؟ واضحه ؟؟ ومن الاخير مانبيش نعيش فى وهم زى الا انتى عشتى فيه يااميره مع ولد خالك .. لين نلقاه خطب وبيتزوج .. وانى نضيع عمرى ونستناه
سندس ..ماتقارنيش حياتك بحياة حد تانى ….
اميره … صح … مش معنى انا ولد خالى ندل معناها انا كل الولاد زيه ..
نهال …. ااااااااى خيركم قلبتوها نكد الهم … معقوله فى يوم زى هدا تنكدو عليا … غيرووو موضوع ولا والله نتفل فيكم بالعصى وحده وحده على قولت حناى ههههههههه ..
فاتت ساعه ورا ساعه وادن مغرب وقعمزة نهال هيا وصحابتها ووتو صفره لروحهم من الحاجات الا جابتهم ام نهال وقعمزو مع بعضهم فى دار وبدو يفطرو … وكل شوى تسمعى تنكيت وضحك وتهدرزيز …
وبعد ماكملو فطورهم … بدى الا يستشور والا يمكيخ والا يقيس والا ينحى … ومع ساعه 10 بزبط كملت نهال مكياجها وشعرها ومش للحمام لبست حوايجها وخشت لدار وقالتلهم …
نهال …. شنى رأيكم .. بصدق كيف طالعه ؟؟
اميره وسندس وسلمى … اووووووووو اولا لا لااااااء بصراااااحه طالع كيوووووت وتهببببببلى … بصراحه ياسعد … ههههه شن اسمه هوااا ؟؟
نهال ….اسلام …
اميره … ياسعد اسلان بيك بصرااااحه تهببببلى … انى الا صاحبتك غرت منك كيف طالعه …
سندس … خيرك مادرتى زمالطو ؟؟؟
نهال … حى نسييييته ..
سلمى … قعمزى قعمزى … عندك حاجه على اوف وايت او بيج هادى ؟؟؟ مانبوش حاجه فاقعه ..
نهال … اى اكيد … سلمى افتحى شنطه الا فى قجر الاول هوا تلقى باكو افتحيه هاتى منه لون اوف وايت هاااادى قريب شفاف ..
سلمى … اى صح حلو يعطى لمعه لضوافرك تهببببل .. شكلى بنمشطه …
نهال .. ههههههه مصحك هدا اكتر لون عاجبنى فى الا عندى ..
سلمى … اوووووك .. خلاص هكى تمااااااام …
وفجأه خشت امها وقالتلها …
امها … اه نهال شنى واتيه ؟؟
نهال … اى ماما تماااام …
خشت نهال لناس وقعمزة معاهم ومافاتتش ساعه الا وخش العريس وطلعت امه وامها وخلتهم مع بعض … وهنا قام عينه وقاللها …
اسلام … نهال .. صح .. شن اخبارك 
نهال .. قامت عينه وابتسمتله وقالتله ..
نهال … اى تمام الحمد لله ..
اسلام .. بصراحه .. امى قالتلى انك حلوه بس ماتوقعتكش بالحلاوه هيا ..
نهال … شكرا ..
اسلام …. ااااااه ممكن تنحى اى تكاليف بينا وترخى روحك .. مافيش داعى للارتباك صح .. هههه احنا خاشين بنتعرفو ونهدرزو على بعضنا بس .. يعنى مش رح نقتلك متلا ..
نهال … هههه اكيد طبعا .. بس انى مش متعوده بس ..
اسلام … باين جدا صراحتا .. ههههه على عموم .. انى اسلام .. عمرى .. 28 سنه .. متخرج من كلية الاقتصاد قسم محاسبه .. وعندى ماستر .. ونفكر انى بعد مانتزوج ناخد دكتوراء …. اه شن تانى ههههه نحب بنت دكيه طموحه .. الا تحب العلم … ماعنديش مشكله مع بنت الا تلبس يعنى ننظر للموضوع حريه شخصيه واهم شى قناعه ….<< وهنا لما قال موقف هوا تدكرة وسام لما شافها نازاله بالسروال وجاكيت القصيره وكيف هبل عليها وغصب عليها انا تمشى وتبدل لبسته .. واول مارجعت الاحدات حدت تلو الاخر ابتسمت وفاقت على نفسها وهوا يقوللها ..
اسلام … نهاااال وين سرحتى ..
نهال .. لا لا معاك ..
اسلام … اى خدمه ماعنديش مشكله .. سواقه كدلك نشجع مراه عليها .. بس اهم شى تقوم بواجبتها بيتيه .. انى حاليا قولت الا عندى هههههه يعنى سى فى كامل ومختصر وانتى ؟؟
نهال …. شبحتله شبحة فيها من حزن وقالتله ..
نهال … انى شنى ؟؟
اسلام … احكيلى على روحك وشن حابه وشروطك …
سكتت نهال وماعرفتش شن تقول ولاحتى شن تحكى وفجأه قامت عينها وقالتله ….

يتبع………..

لقراءة الجزء التالي : الجزء العاشر من رواية حوش جدي

لقراءة الجزء السابق : الجزء الثامن من رواية حوش جدي

للإطلاع علي فهرس الرواية : جميع الاجزاء كاملة لرواية حوش جدي للكاتبة كيندا

جميع الحقوق محفوظة للكاتبة كيندا من ليبيا .