الجزء التاسع من رواية عالمي

وفي الجزء التاسع من رواية عالمي دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة بنان عماد .

الجزء التاسع من رواية عالمي

في السنين يلي بنان بعدت عني فيها د قدرت انساها بصعوبه وكل م اشوفها مع بدر بموت يوم كنت شغال وبقدم ف الطلبات ختيت البيتزا وعصير مشكل وتفاح وقلت عاوزين حاجه تاني وعاينت لقيت بنان وبدر قلت ليهم انتوو وعاينت لي بنان جوا عيونا من اللحظه ديك بقيت اكرها شديد يعني هنت عليها؟ مش د بنان نفسها القالت لي حطلق منو طيب وين الحب؟ وين الكلام البينا؟ وين الوعود؟ وين البرامج البنعملها..
*وبفرقك النصيب لمن يغضب ربنا*
وين الضحك والونسه وين السهرات وين العشره ديل كلهم سراب؟ ديل كلهم كذب يعني عشمت ف الفاضي؟ انااا يامن وقفت حياتي عشان بت؟ انا يامن بحرد الاكل عشانها؟ عشان بت خانتني؟ عشان سابتني؟ عشان وعشان في يوم كانت ف الكوفير وماشين الصاله لعرس منيه لمن شفتها وشفت جمالها حقدت ان تكون لي بدر ف اللحظة د شفت بدر لبسها الطرحه وشاكلها ليه نازله منها بقت تهمس ليه قرب عليها وباسها ف جبينها مسافه هي م حست بي كانت فرحانه بس انا؟ انا من جوا كنت بغلي هي مبسوطه وانا بدمر كل م اشوفهم مع بعض المشكله بحبها اكتر مني والمشكلة بتفاهمو بسرعه وحلوين مع بعض وبفهمو بعض من عيونهم المشكلة لمن تمسك يدو بتحس بطمأنينه لانها اتوترت يوم امها عيت اول م مسك يدها هدت بس عمري م حسستها اني بحبها عديل م عارف حسيت اني مقصر في حقها عشان كده خلتني طيب مم زنبي شنو إذا حبيتها وم قدرت اعبر اخخخ بس عبد السلام قال لي يااامن وينك قلت ليه اها ي مان قال لي ياخ القهوه د اتدفقت انت راسك د وين قلت ليه بنان عيونو حمرت قال لي تاني ي يامن تاني بنان قلت ليه م قادر م قادر انساها قال لي عشان د علاقه محرمه عشان كده ربنا م سهلها لو كنت عاوزها بجد كنت عرستها وقتي بلا وقت خطوبة بلا كلام كتير انت براك غلطان قلت ليه حخليها تطلق منو انا م قادر استحمل قال لي يامن انت من متين يتتهز عشان بت وبعدين انت شايفهم حلوين كيف نع بعض كيف تخرب بيت اختك قلت ليه وانا بنضف ف المصطبه م اختي ي عبدو م اختي د روحي التانيه انا مصر م اخليها ليهو قال لي يامن لو قربت منهم اعرف ان نهايتك عندي كلامو ضربت بيهو الحيطة وطلعت منو مشيت غرفتي بقيت افكر اتقرب لي بنان كيف وكل ما اتقرب احس انها بتبعد وبتتحاشا تتكلم معاي حتى بيتنا بقت م تجي طوالي بتمشي بيتهم من ابوها جا من شندي والولاياات بتمشي هناك وم بتجينا الموضوع د بحرقني بقيت افكر لمن نمت…
——————————
الدكتورة قالت لي عندك مرض الكلاميديا وامكن راجلك برضو عندو قلت ليها م فهمت الكلاميديا يعني.. يعني يعني انا عقيمه؟ قالت لي يتحسي بي الم في أسفل ضهرك قلت ليها اي قالت لي ربنا يعينك ي بتي للحظه حسيت بصدمة قلت ليها انا عقيمه يعني م حجيب بنات ولا اولاد يعني م م م حألد وافرح راجلي؟ يعني حيعرس فيني؟يعني انا م حكون ام؟ قالت لي د قضاء ربنا
قلت ليها مف علاج.؟ قالت لي في لكن م في السودان ولو لقيتي بعقم ليك للأبد م بقول ليك حتلدي بس يعني مم هو يعني امكن اي لكن النسبه ضعيفه جدا ولو ولدتي بتحصل ليك مضاعفات طلعت من المستشفى وانا بطني طامه من كل شي استغفر الله اي د قضاء واي شي بس احساس تكون لاجي لي ربنا وتتخزل استغفر الله امنيه جات وقالت لي بنان استغفر الله العظيم م تعملي كده ختيت يدي ف راسي وقلت ليها امنيه وديني البيت حاسه حهبط قالت لي طيب يلا سرعه وصلتني ودخلت معاي قلعت العبايه كيف ومتين م عارفه هي كمان قلعت قعدت قالت لي تعالي رقدت وختيت راسي ف رجلها بقت تمسح شعري وانا دموعي بنزلو كل م اتذكر اني لا يمكن احمل يعني م حجرب الحمل ولا الوحم ولا تعب الولاده ولا حشيل طفل في يدي ولا حبوسو لمن يدوني ليهو ولا حشم ريحتو ريحه الأطفال م حمسحو واهتم بيهو م حأكون ام م حأربيهو م عندي شغله ف كلام الناس انا همي نفسي الاتكسرت احساس م حقدت اكون ام احساس بكسر والله  أمنية كانت مكسوره زي ومستغربه في الجبل النزل فيني وانا م سرخت ولا عملت شي غير البكاء بس هل البكاء هين؟ هل البكاء بحملني؟ هل البكاء بغيرني؟ هل البكاء برجع ضحكتي هل برجع لاا يمكن الدموع ترجع حاجه لا يمكن…..

صح ان بنان م اتكلمت ولا قالت لي انا موجوعه بس كان باين ف دموعها البتنزل بغزاره انا اكتر وحده عارفه حياه بنان ولا اقول انا الوحيده العارفه حياه بنان انا اليوم فت ضعفها الاختفا من حبت بدر طيب هل بدر حيتنازل عنها انا شايله همها وخايفه تخسر بدر وتخسر نفسها لمن كانت بتبكي كنت بحس بغرز في قلبي بحس بي سهم قسمو انا ك امنيه م بحب اشوف بنان بضعف د اتصلت لي منيه ورحمة يجيبو لي غيار م بقدر اخلي بنان كده مف زول عارف غيري وقلت ليهم تعبانه شويه قالو لي بتكون حامل

*_-_-_-_-_-_-_-_-_-_-_-_-_-*

*ليه يا روح تختي الذنب فيني وانا انتي والالم واحد..*
*☆اشوفكم☆*
*☆bnan☆*
————————————–
———————
*☆يتبــــــــــــــــــــــــــــــــــــــــــــع☆☆*

لقراءة الجزء التالي : الجزء العاشر من رواية عالمي

لقراءة الجزء السابق : الجزء الثامن من رواية عالمي

للإطلاع علي فهرس اجزاء الرواية : رواية عالمي ( جميع الاجزاء كاملة ) للكاتبة بنان عماد

جميع حقوق الرواية محفوظة للكاتبة بنان عماد .