وفي الجزء التاسع من رواية قلبي ملكي ولكن أنت من للكاتبة المبدعة كيندا هل يا تري برأيك ماذا سيحدث من جديد في هذا الجزء ؟ وهل سيكون هناك مفاجآت غير متوقعة ستحدث ؟ كل هذا وأكثر سوف نعرفه داخل أحداث الجزء في السطور التالية بإذن الله .
الجزء التاسع من رواية قلبي ملكي ولكن أنت من
يعني ماردش من تلفوني بيرد من تلفونك ياماما ….
ولكن خدت تلفون مرة عمها وبالفعل اتصلت بيه … وضبح المره الاوله … والمره التانيه …. وتالته نفتح الخط وقال …
ليت …. أيوا ؟
وهنا ريحانارانصدمت ومعاش عرفت ترد او تسكت ووصلتها رساله من وراء تصرفه هدا وبعدين سكرت الخط وقالت …
ريحانا … ماما ماردش .. خلاص خليه براحته مرات فاطر برا ..
مريم … علي قولتك مرات صاحبه في اخر لحظه شد فيه وهوا لما يكون مع صاحبه الا في ليبيا مايحبش يرد ..
ريحانا … (( بوجه يحاول يتظاهر بالابتسامه )) مغرب ياادن ماما بري حلي فطرك واني رح نلحقكم … بنركب بشقتي ناخد حبوبي ونلحقك …
مريم … سمعت دوري فيهم لقيتيهم ؟
ريحانا (( سرحت شوي وعيونها دمعو وقالتلها … لقيتهم (( وبصوت ولطي )) بس متأخر …
ومشت مريم والتمت مع عيله علي الفطور.. بينما ريحانا … طلعت لجنان وقعمزة علي حاشية الرخمه متع احواض الغرس وقعدة شارحه وايدها علي الورد الاحمر … لحد مانخصتها شوكه من شوكاتهم … وهنا حطت وشدة صبعها الا خش فيه شوكه وقعدة تبكي … ونخصت شوكه هيا الا خلت كل المشاعر سلبيه الا في داخلها .. لانها ولاول مره كانت محتاجه تحكي لحد وتفضفض لحد … وكانت محتاره هوا علاش يتصرف معاها هكي … وبين مشاعرها الا كان يعاتب في قلبها … سمعت صوت الباب نفتح … فا قعدة تشبح للباب لحد ماخش منه ليت … واول ماشافها قاللها …
ليت … اسف نسيت دواك في جيبي ..
ريحانا (( تحاول تبين انهم مش مهتمه )) … عادي مش هامني الموضوع هلبا .. برده وتاخد وقتها سوا خديت دوا او لا … واكيد بعدها رح نوض اقوي …
ومشت وسيباته وركبت فوق …
وخشت لدارها … بدلت بيجامتها وخدت طاسة ميه وخدت دواها ورقدت … بينما هوا قعد لوطه مع ماليه يفطر معاهم … وفاتت ساعه ورا ساعه لحد ساعه 12 في الليل وريحانا تتملمز ومش جايها نوم وتتقلب في سرير … لحد ماسمعت ان ليت فتح باب دار نوم … فا دارت روحها في سابع نومه … وهنا قرب منها قاسلها وقعد يشبحلها شوي وبعدين حط ايده علي جبهتها باش يشوف حرارتها رجعت ارتفعت او لا … ووهوا بينوض من سرير شافها ترمش وعرفها نايضه بس تظاهر انها راقده … فا ناض عادي … وخش للحمام بدل توته وبعدين قعمز علي كرسي بعد مافتح بلكونة دار … وقام تلفونه واتصل ….
ليت … اهلين حبيبتي … استاحشتك هلبا ياروحي ..
لارا … حتي اني بيبي وينك فتره الا فاتت معاش مهتم بيا او حتي ترد علي اتصالاتي …
ليت … والله مشغول شوي ونحاول نقنع في اهلي بموضعي …. انتي تعرفي موضوع مش سهل …
لارا … وشن صار معاك جديد ؟
ليت … شبه اقتنعو … ومش رح نعطل عليك حبيبتي … شهر بس وتولي عروستي الحلوه … ونختارو احلي شقه رح تكون قصرك ونحققو كل الاحلام الا حلمنا بيها مع بعض …
لارا … واخيرااااا … امتي بس … بس تعرف عندي ليك احلي خبر …
ليت … شني ؟ بابا وافق انك توقع عقد في مستشفي معاه غادي … وقالي رح نعطيه سنه لو لقيته بوفشينل في تخصصه رح يخليك مدير القسم …
ليت …. (( بملامح مصدومه )) بجد انتي احلي بنوته في دنيا ياعيون ليت انتي 
… انتي اليوم قولتيلي احلي خبر كنت نحلم بيه سنين … هدا حلم عمري الا مش رح نحققه الا واحنا مع بعض بس …
… انتي اليوم قولتيلي احلي خبر كنت نحلم بيه سنين … هدا حلم عمري الا مش رح نحققه الا واحنا مع بعض بس …لارا … اكييييد واحنا مع بعض … انت تتجراء اصلا انك تحقق حلمنا مع غيري …نقتلك … بس قولي خيرا منقص صوتك هكي حبيبي انت وين ؟
ليت … (( شبح لريحانا شوي وقال )). … في داري حبيبتي … غير خوي صغير كرش فيا فارقد معاي وتوا راقد …
لارا .. يارووووحي بوسهولي ….
ليت … تمام … مهم انتي شن اخبارك وشن مدايره مع صقع ؟
لارا … اهو عندي بارتي بعد شوي بمناسبة زواج صديقتي تقدو تقول حفلة توديع العزوبيه …
ليت … اه استمتعي بوقتك حبيبي بس زي نااتفقنا ماتكتريش شرب لين تبدي ترجعي بعدها و تاني يوم تقعدي صداع وبطنك مقلوبه ..
لارا … حبيبي خليني براحتي ومعاش تضغط عليا …
ليت … موضوع شرب اتناقشنا فيه وقولنا تبدي تخففيه وبعد زواج رح تلغيه بيبي … اعتقد خلاص …
لارا … ليت لبسي ودرنك متعي هادي حاجه شخصيه … واني لما حبيتك حبيتك بكل شي فيك وماطلبتش انك تتغير … واتفاهمنا انا الافكار شرقيه هيا نحيها من راسك خلاص طالما قررت نتزوجو وماتجيش تطلب مني بين يوم والليله اني نتغير …
ليت … لارا … اني تعبان شوي … خلاص نخليك توا …
لارا … زعلت بيبي ؟
ليت … خلاص سكريه موضوع … مش حابه نتناقش فيه …
لارا … خلاص بيبي اني اصلا شكله وصلو جاسكا وادم … فا بنطلع معاهم …
ليت … لارا انتي بجد تحكي ؟ … ادم شن جيبه هنا عندك …
لارا … انت نسيت انه ولد عم جاسيكا وحابب يوصلنا للحفله بحكم سيارتي في صيانه …
ليت … (( يتكلم بصوت معصب بس بشكل وواطي وحاد )) ادم كان في يوم حبيبك … انتي علاش مصره تخليني نعيط ونتغصب عليك ؟
لارا … بس حاليا مجرد صديق .. فاخليك منفتح حبيبي احنا في الالفين وعشرين قريب … علي عموم بنسكر توا وبكرا نتكلمو باي باي …
وسكر تلفون بعد ماهيا سكرت … ولوح تلفون علي طول ايده علي الارض … وقعد يتفرج علي شارع وسارح في افكاره … من ناحيه مستقبله وحياته الا حلم بيها طول عمره … ومن ناحبه تنازلات مطلوبه منه … هل هوا بالفعل قادر يتعايش معاها او لا …
وبيه هالافكار والافكار نعسه النوم ومافقش الا علي صوت حركه في الحمام … فاناض ولقي ريحانه كيف طلعت من الحمام … ولبست عباية الصلاه وبدت تصلي وكانه مش موجود …. وبعد ماتمت صلاه متعها …. فتحت المصحف وبدت تقرا في قرأن … لحد ماحست الراحه سكنت في قلبها … واول ماسكرت المصحف وناضت قاللها …
ليت … تقبل الله …
ريحانا … مني ومنك صالح الاعمال .
ونحت عبايتها وخشت تحت فراشها … وبعدها ناض هوا … وخش تحت فراشه وفتح الروايه الا بدو فيها … وبدي يقرا ويشرح فيها بصوت واطي … وهيا تسمعله … وبعد استسال في الشرح اكتفت ريحانا بالصمت لحد ماقاللها …
ليت … اني اسف …
ريحانا … (( بصوت ملى بالحزن )).. تصبح علي خير …
وعطاته بالعكس ورقدة ….
وهوا قعد يشبحلها …. وكان عارف هيا علاش تتصرف هكي … فااكتفي باانه يحط الكتاب ويطفي سهاره ويرقد …. وفاتت الليله وكل واحد منهم باافكاره وهمومه برغم انهم زوز في نفس القوقعه … ونفس السفينه …. ولكن كل واحد كانت خطته ومسارته في اتجاه …. وبين اختفاء القمر وظهور الشمس ماكانت الا ساعات بس … وفاق ليت … واول ماشاف لسعته لقي ساعه 12 ظهر … فاتلفت لسرير وناض ومالقاش ريحانا …. فاخش الحمام وخدي دوش ونزل لوطه مع العيله … واول مانزل لقي ام ريحانا تنتاقش مع امها وهيا تقوللها ….
امها …. نحي الوشاح من راسك يابنتي انتي عريسه ومافي حد براني هنا …
ريحانا …. ماما خليني براحتي … ولد عمي شني مش معبيلك عينك …
امها … توا هدا ولد سهيله مسميته راجل تي هوا عيل ماسكرش 16 سنه وزي وخيك …
ريحانا …. ماما خليني براحتي في دسن مافيش حاجه اسمها وعيل وزي خوك … وبعدين اني مرتاحه هكي …
امها … الا يريحك اصلا انتي درتي العار قسما بالله هلبا هكي …
ريحانا … ماما رمضان كريم ابتسمي وفكينا من المشاكل وهيا نبدو في تطيب مع حناي …
ومشت وسيبت امها في جنان بتلقط شوي معدنوس من احواض الغرس الكبار وليت يشوفلها بدون اي تعليق …. وبعدين خش داخل فالقي امه واقفه واول ماشافته قالتله …
مريم … صحه نوم علي وليدي … صحه صحه نوم … اليوم ريحانه بتديرلك العصبان الا تحبه … اضرب هي من زيك .
ليت …. اه اليوم عصبان ههههه بصراحه اني محظوظ ..
مريم …. (( مالا شني تحسابه امك اختيارها يطيح الارض )) غير انت شهلل روحك وفرح امك زي مافرحاتك بعروسه زي السعد …
ليت …. اطلبي وذللي ياميمتي عيوني ليك …
مريم …. مانبي منك شي الا تفرحني وتقولي جايك حفيد ياامي في طريق وبعد ماتجيبهولي سلامتكم بناخده ومعاش نبيك لاانت لا هيا هههههه
ليت (( بوجه مجهم )) ربك الرزاق … خلاص بري لمطبخك خلي نمشي نهدرز علي بوي شوي …
وخش لدار عربيه ووجهه الالوان طيف من الموضوع الا امع فتحتوله … بينما مريم خشت للمطبخ مع حميده وريحانا وقالتلها …
مريم … ريحانا … بنيتي ها قدام امك نستنو في خبر حلو منك راهو …
ريحانا … ههههه زي شني متلا ؟
مريم … هههههه زي نونو متلا … اني ماصدقت …
وهنا ريحانا رجعت تقرض في الخضرا وهيا مرتبكه لين جرحت روحها …. فاشدت صبعها .امها خدت كلينكس وجت بسرعه حطت الكلينكس بسرعه وهيا تضحك وقالتلها …
امها … هدا كله حشم … دكرتيني بروحي ايام زمان هههههههه
مريم …. هههههه شوقك ياحميده … هاك شدي رز هوا نقيه ….
حميده …. ااااااه والله الواحد بدي يخاف يضحك يولي عليه الضحك … امس وائل خاشلي بموضوع الباين حمت بصلته بعد عرس اخته وولد عمه وخاشلي في موضوع نبي وحده وعاجبتني … تعرفي حرقلي دمي … والله تعبت .. كل مايشوفو وجهي يشوفو الطلبات والهم …
ريحانا … (( بوجه متفاجي )) … من هيا ماما الا يبيها ؟
امها …. بنت جيرانا حليمه بنتها تهاني … قتله اني مصدقت طلعت من اختك وعرسها … تبيني نفتح هم جديد …
مريم … مش بوه بانيله حوش فوقه اعطيه …
وهنا علي خشت ملاك ….
ملاك … من هيا الا تعطيه ياماما … شني نويتي تزوجي بابا هههههه .
وكيف ريحانا بتغير موضوع ناضت امها ردت وقالت …
حميده … وائل … يبي يتزوج حتي هوا … ماهو توا تفكرتو كلكم بتتزوجو وبتسيبونا …
وهنا ملاك ابتسمت واحمر وجهها وقالت لمرة عمها …
ملاك …. هوا يبي بنت معينه مرة عمو ولا قالك انتي اخطبيلي ؟
مرة عمها … لا لا لا نخطبله لا يخطبلي … له عليا اليوم نخطبله وبكرا يطلعو مش متفاهمين ونلقط الدعي … لا لا يابنيتي وهوا اصلا واخدها من قاصرها وقالي انه يبي بنت جيرانا حليمه … والحق هيا البنيه والعيله ياسلام عليهم بنت اصول وفالحه وناشطه وزي غزاله … بس قولتله يااجلها شوي لاني كيف طالعه من عرس اخته وبعدها يصير خير ….
وهنا تلون ملاك وجهها وقالتلها ….
ملاك .ّ (( بوجه يتظاهر انه عادي بس زي من رشق فيه موس )) ربي يعنيه يارب … ماما اني راكبه فوق بنكمل باقي ضمان شقه غير وركينه كملت من عندنا وجيت بناخد من مطبخ شوي …
وفتحت دولاب المخزن متع المطبخ الا تحت اللوندينو خدت من البدون شويه في شيشه وركبت والدمعه في عيونها … وهيا طالعه تقبت في كتف وائل بس مابتش تشبحله وركبت فوق لشقتهم تجري وهوا قعد يشبحلها ومتفاجي انها حتي التسليم ماسلمتش عليه …. ومافاتتش عشره دقايق … قرضت فيهم كل الخضره ونقعت المصارين والكرشه في دقيق والخل وقالت لامها …
ريحانا … ماما اني نقعت المصارين في ليم والدقيق والخضرا قرضتها وخليتها تتصقطر … شوي نركب فوق لداري ونجي نكمل تمام .
امها …. بسرعه غير ماتطوليش خلي نحطوه ويطيب بسرعه للان الغاز نبوه بتحطو عليه الكسكي وشربه وبنقلو عليه وبنرمو عليه خبزه كسكاس … سبقي انتي قبل وتعالي كملي معانا وكلمي ملاك قولها الحلو تديرها فوق ماعندهاش اهنا وين تديره …
ريحان …. اه ياماما مافيك من وصايا ماشي تمام … وركبت تجري لملاك الا لقتها مطبسه تنظف في الحمام وتبكي … واول ماطقت عليها ونادتها ردت ملاك ..
ملاك … خشي ريحانا …
ريحانا … ماتضايقيش حبيبتي … وسيبي الا في ايدك وتعالي نحكو …
وهنا غسلت ملاك ايدها وبعدين جت جنبها علي صالون وهيا تبكي وقالتلها ..ملاك …ّ شفتي نصيب زيني ؟ حتي الشخص الا حسيت نفسي هوا الشخص الا تمنيته انصدمت انه يبي وحده تانيه …
ريحانا … حبيبتي معاش تبكي عسي ان تكرهو شي وهوا خيرا لكم … مرات انتي هكي احسنلك …
ملاك … (( مع رشفة خشم ودموع ))مش رح تحسي بنار الا فيا ياريحانا لانك مجربتيش الشخص الا تبدي تحبيه وتموتي فيه هوا مش في باله وقلبه وعقله مع بنت تانيه …
ريحانا …. والله حاسه بيك حبيبتي … بس والله لاخيره الا فيما ااختاره الله … وصدقيني لما تضايقي معاش تبكي … بس خشي توضي وصلي وادعي لربي بس ان لو فيه خير ليك يقربه منك .
ملاك …. تصوري اني حاسداتك … تمنيت ان وائل يطلع يبيني وتطلع امه فاهمه غلط … اكدبي عليا قوليلي مرات امي فاهمه غلط …
ريحانا … ملاك حبيبتي بالله عليك معاش تبكي … واني رح نقعمز مع امي وصدقيني رح نفهم كل شي تمام … خلاص امسحي دموعك وخليني نكمل لوطه العصبان ونقوللهم بنساعدك في حلو ونجيك طول تمااام … بننزل ونكمل نركبلك طول … لان ماما شكلها تنادي … خلاص امسحي دموعك …
ملاك .. تمام خلاص .. امك تنادي بريلها … ريحانا … تمام …
ونزلت ريحانا وكملت العصبان وحطاته طفاته علي نار … وقالت لمريم عزوزتها …
ريحانا … ماما اني بنركب نساعد ملاك في الحلو ؟
مريم … لا لا بنيتي ناديلي ملاك تساعدني في بوريك لانها الوحيده الا تعرف تخدمه ماشالله ويجيها زي القلاش ..
ريحانا … علاش عمي ماحصلش ؟
مريم …. لا لا مالقاش وهيا مره شافت طريقته في قروب اسمه ابيسات ومن لما خدت طريقه من بنيه اسمها نادره ربك يمسيها بالخير وبدي يجيها تقول بوريك جيده ماشالله فاقوليلها هيا تنزل تخدمه وتديره وانتي اركبي بنيتي خودي منها الحلو وقولها بسرعه لان وقت ومطبخ مقلوب يبي وحده توقف علي غسل معايين …
ريحانا … حاضر ماما ّ..
وركبت ريحانا … ونزلت ملاك لامها … واول مابدت ريحانا نحت وشاحها اول شي وبعدين بدت تكربج في مطبخ وتطلع في ست البيت ومكونات .. سمعت الباب نفتح فاقالت …
ريحانا …. ملاااك باهي جيتي … قردل دقيق وين مالقيتاش …
وهنا خش عليها ليت وهوا مبتسم وقاللها …
ليت …. اعتبريني ملاك … وشوفي رفوف اللوطيات .
.ريحانا (( بوجه مرتبك )) شكرا … وتلفتت للحوض وعطاته بالقفي … بينما هوا استمر يراقب فيها وبعدين قاللها ..
ليت …. شعرك هدا مطروح علي ظهرك كيف بطيبي بيه …
وهنا شبحت ريحانا لي ايديها الا ملبزين دقيق وحاولت تدف شعرها باايدها … فاقاللها …
ليت … خليك … وقرب منها ومسك شعرها باايديه وبدي يلوي فيه وبعدين لفه لف عبيطه وقاللها ….
ليت … هكي تمام … شن رايك ننفع زيانه صح (( بوجه غبي ))
وفي اللحظه هيا مالقتش ريحانه نفسها الا وهيا مفلوقه بضحك ….
ليت …. علاش تضحكي قولت شي يضحك …
ريحانه ..ّّ لا لا بس اسمها مزينه .ّّ
ليت … هادي الا ضحكاتك انتي كويس … استني في خصله طايحه علي عيونك … وقرب منها اكتر وقاملها خصلتها وقاللها وقعد يشبح لعيونها شوي وبعدين قاللها …
ليت … (( بملامح دايبه فيها )) اني حاير شن الا فيك مش احلي من التاني … انتي محتاجه سنه باش الواحد يقدر يوصف جمالك ..
وهنا شبحتله ريحانا شوي ويعدين دفاته وقالتله …
ريحانا … (( بنظرة قوه )). ربي يخليك حبيبتك … اكيد رح تكون احلي من اختك …
ليت … تعرفي شي ياريحانا … تمنيت تعرفت عليك في ظروف غير …
وهنا غيرت الموضوع ريحانا وقالتله …
ريحانا … هيا زبده وين ؟
ليت … انتي شن بتديري (( مع ابتسامه ))
ريحانا … بندير تشيز كيك … وبعدين بندير لقمة القاضي وكنافه بشكلاته …
ليت …. ااااه تشيز كيك هادي من اختصاصي … انتي تعرفي اني ةاخد كورس برا في مطبخ …
ريحانا … لا والله منك نسمع …
ليت …. اني رح نهريك حلو معناها واحتمال ماتكملي عشره سنين معاي لين يركبك الحلو …
واول ماقال الكلمه ريحانا انصدمت وقعدة تشبحله … وهوا نفس الشي حس انه غلط والكلمه طلعت منه بدون مايحسبها …. فا دار روحه طبيعي وقاللها …
ليت …. تعرفي ان البطل في الاخير مش رح ياخد الا حبها …
ريحانا … اكيد كانت محظوظه للانها ماكانتش من نصيبه …
ليت …. هههههههه انتي تخوفي يابنت في داخلك وحش مايريحش ..
ريحانا …. (( وبعدين سكتت شوي وقالتله )) انت امتي بتسافر … يعني امتي بنطلقو …
ليت … هوا انتي قلقتي مني بي هالسرعه. راهو احنا لينا اسبوع بس متزوجين …
ريحانا … يعني مازال اربعه اسابيع تانيات …
ليت … سكريه ريحانا توا الموضوع مش وقته ..
ريحانا … علاش .. انت مفروض يفرحك ..
ليت … احيانا من صالحك انك تبعد علي انسان مارسمتش خريطك معاه … لكن ماتحسش براحه لو حسيت انك بعدت عليه …
ريحانا …
ليت …. تعرفي ان الشخص احيانا يلقي نفسه بدون مايحس كيف وامتي حس براحه مع شخص هوا عارف انه رح يجرحه بس غصبن عنه …
ريحانا … ليت نبي نطلب منك طلب … ممكن …
ليت … اكيد … شن في
ريحانا … نبيك تبعد عليا قدر الامكان … وماتسألنيش السبب … بس مش حابه تقرب من حياتي … احنا بينا تفاهم واني احترمت مشاعرك اتجاه البنت الا تحبها بس انك تقتحم حياتي وتدخلني في متاهتك فاياريت ياريت تبعدني عليها … لاني بجد اني مش حابه نعرف حتي انت من ؟
ليت … انتي خايفه من شي وداستيه ؟ او في في حياتك شخص تاني ؟
ريحانه … لا اعتقد ان هدا موضوع يخصك .
ليت … علاش مايخصنيش … انتي كلك علي بعضك ليا وتخصيني …
ريحانا … لا اني مانخصكش ومش ليك زي ماانت مش ليا ولا ملكي … ولو تبي تعرف باش ترتاح ويرتاح ضميرك … ايه في حياتي شخص نحبه فهممممت خلاص بعددددددد عليااااا
ليت …. تعرفي شي الا بعدني توا …لااعتقد انه رح يبعدني بعدين … ونبي نقولك شي واحد بس .. اللهم مااني صايم … بس تعرفي شي .
وهنا قطعت عليه وقالتله …
ريحانا … اني مانبي نعرف شي عليك ونبيك تبعد عليا بس …
ليت (( وهنا خضها وبدي يعيط )) بس اني ليا كل الحقوق اني نعرف كل شي عليك … انتي زوجتي فهمتي … مش معني انك تزوجتيني وقولتلك كل شي معناها انك تقرطسيني … اني مش غبي … ولا حمار … وحطي في بالك بس انتي اليوم رح تكوني زوجتي زي ما الدين يقول … وطلاق مافيش …
ريحانا …. انت مريض واناني بعددددد … ومش رح نكون لانسان مريض زيك … في الليل يلعب دور الحبيبرالمغرب وفي ظهر يقرر يعيش دور المتزوج الا بيمارس حقه … انت مريض واني نكرهك وقارفه منك ونستني امتي نطلق منك وتبعد عليا … ويكون في علمك اني عمري ماحلمت اني ناخشذذ شخص زيك … يشرب ويدخن ونساونجي وكل محرمات يرتكب فيها … ولولا النصيب ماكنتش رح تكون في حياتي …
ليت … غصبن عنك رح نكون في حياتك … ومش اني الا نتزوج مراه وفي داخلها شخص تاني …
ريحانا … اني قلبي ملكي بس ومافيش حد رح يقدر يملك قلبي … لاني ببساطه مش زيك …
ليت … بس الليله صدقيني رح نرد عليك بطريقتك صدقيني …
ولوح طاجين علي طول ايده وقربع الباب وطلع … بينما ريحانا قعمزة علي الارض ودة في قلبها وايديها يرعشو من الخوف … ومن الخوف … ناضت بسرعه بعد ما حاولت تتماسك قانت طاجين ونظفت الارض ودارت الا تقدر عليه وبعدين نزلت بسرررررعه .. قبل مايرجع ويركبلها من جديد … وبمجرد مانزلت لقت ملاك خلاص توتي في صفر والعيله كلهم مقعمزين يستنو في مغرب فاقالت لملاك
ريحانا … ملاك اليوم بنتاخرو هنا فاخلينا في حوش جدي لاني حابه نهدرز معاك بخصوص وائل فا لو تكلم ليت قوليله اني نبيها الليله تقعد لوطه في سهريه معنا
ملاك … تمام … بس انتي كلمتي امك …ريحانا … ماهو اني هدا علاش بنخش لدارك وبنتكلم معاها براحتي ..
ملاك … تمام …
وبدو يحطو في صفر ووبعد دقايق أدن مغرب … وهنا التمت العيله كلها … وقعمزو علي فطور … والكل لاحظ عبوس ليت وحواجبه منقورات … وبمجرد ماكمل فطوره … طلع بسرعه ولع دخانه وولع سيارته وطلع … وهنا بس ريحانه ارتاحت … ودعت اليوم انه يروح موخر هلبا او مايروحش … وبمجرد ماكملو غسل المعايين وضمو الحوش … حطو عالة الشاهي وبدو يهدزو … ريحانه تحكي وتهدرز بس قلبها قريب يوقف من الخوف …
وفجاه خش ليت ووقف فم الباب وقاللهم …
ليت … يما اني بنركب فوق تعبان ماتنوضنيش بعدين لااني ولا ريحانه …
ملاك … بس ريحانه نبيها ..
ريحانا … اي بنقعد لوطه اني اركب انت …
وفجاه ليت حمرو عيونه وعيط عيطه تفاجي بيها الكل وقاللها …
ليت …. قولتلك ارررررررركبي .
ومن صدمه وبعد مالكل قعد يشبحلها … ناضت وهوا فتحلها طريق ومشت وهوا مشي وراها …. وبينهم مسافه … واول ماوصلت لشقه فتحت الباب وقلبها يدق وايديها يرعشو وخشت لشقه وقعمزة علي صالون … بس هوا سكر الباب وخدها من ايدهل لدار نوم وايدها قريب فككها وخش لدار نوم وسكر الباب وقاللها ….
ليت ….
يتبع………
لقراءة الجزء التالي : الجزء العاشر من رواية قلبي ملكي ولكن أنت من
لقراءة الجزء السابق : الجزء الثامن من رواية قلبي ملكي ولكن أنت من
للإطلاع علي فهرس أجزاء الرواية : جميع اجزاء رواية قلبي ملكي ولكن أنت من للكاتبة كيندا
جميع الحقوق محفوظة للكاتبة كيندا .
