وفي الجزء التاسع من رواية محظوظ ولكن دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء التاسع من رواية محظوظ ولكن
ندى : ها هالة شن الجوو
هالة : تمام
ندى : تعرفي … ادم من اول ماشتغلت اهنا كان يهتم بيا …. بس توا معادش
هالة : شنووو ؟؟؟ بش قلتي دمه رزين
ندى : ايه بس وقت نشوفه نفرح مش عارفة عﻻش
هالة : الصبر ياربي وعمر ؟؟
ندى : موعد بعدين بعد العصر بنشوفوا بعض
هالة : صار تخدمي ع الجبهتين
ندى : ﻻﻻ والله ماصارت … عمر شد فيا فوافقت
هالة : باهي باهي قوليلي شن يصير فيك انا توا قاعدة انفطر ف امك
ندى : باهي صحيتي ردي بالك عليها سﻻم
هالة : سﻻم ..
ادم .. ف سيارته يسوق و يشرب ف نسكافيه واذا فجاة بطريقة او بأخرى ينسكب النسكافية واطيح الطاسة ف حجره
ادم يبرطم : احييييه النهار المبارك مش وقته بكل شن يردني للفيﻻ نلبس تاني …الصبر ياربي الصبر .. يﻻ نولي وخﻻص نكسبوا شوفت ندى خانوم
رجع ادم للفيﻻ وخداها زنق لين وصل
خش … السﻻم عليكم
ندى و حسنة : وعليكم السﻻم
حسنة : روحت ادم مصرع ندى قتلي كيف طلعت
ندى : هئ حم
ادم : طاسة نسكافية تبزعت عليا
حسنة : ئه وعﻻش مامشيتش شريت بدلة من محل وبدلت وطلعت زي عوايدك
حس ادم باﻻحراج … صح هكي كان ايدير معناها هوا رجع ع خاطر ندى
ادم : ﻻ مش رافع معاي فلوس كفاية
حسنة : اااممممبه
شاف ادم لندى نظرة قاتلة وركب فوق …
حسنة : رهف رقدت ؟؟
ندى : ايه قالت فايقة من الفجر
حسنة : ماشاء الله بنت خوي ناشطة
ندى : ههههه اي
حسنة : ساعديني بالله بنخش نتكى تعبت من قعدة ع الكرسي
ندى : هي …
خدتها ندى لدارها
حسنة : اجبديلي اليرغان من غادي
ندى : اوكي …. تمام هكي
حسنة : تمام …
طلعت ندى من دار حسنة وقعمزت ف صالة …
طلع ادم من الدوش يغني … دلوع وعسول ندوش دلوع و عسول نظراته اطلع طول دلوع وعسول …
شن نلبس زعما امممم خلي نلبس بدلة …. ﻻﻻ شن بدلة ياادم تو بالك نبان دقة قديمة خلي نلبس سبورت .. سروال جينز ازرق وسورية بيضاء وجاكيت اﻻكحل اي اي حلووو … بس قلت بنحيها من راسي ومش حنكلمها … بس والله عيونها حلوات … نخلي اﻻمور طبيعية وخﻻص تو شوي شوي تفهم اني معجب …
لبس ادم وتأنق وبخ برفان ولبس كندرته اللي تلمع ونزل …
وتلتقي العيون مجددا بنظرات ساحرة
ادم : وين رهف وندى اماﻻ
ندى : ههههه
اادم : اسف قصدي حسنة
ندى : رهف رقدت وحسنة متكية
ادم : اممم … باه امممم اااا ماقتلكش رهف شن تبي نوع الشوكﻻتة امبكري ؟؟
ندى ابتسمت ابتسامة بسيطة وردت عليه : ﻻﻻ ماقالتش
ادم : اممم به اما احسن شوكﻻتة عندك
ندى : اممم مش عارفة بس الصغار ايحبو كل انواع الشوكﻻتة
تقدم خطوات ادم من كنبة اللي مقعمزة عليها ندى … هوا يتقدم وهيا ارتبكت معش عرفت خيره
ادم : ماتحركيش خليك مكانك
ندى : شنو فيه
ادم يتقدم بخطوات مثل اﻻسد وندى ناضت تجري هربت
ادم : ههههههه برغم قتلك ماتتحركيش عنكبوتة وراك خفتها تنقز ف شعرك
ندى :ماه انت خلعتني نحساب اشبح شنو فيه
ادم : هههه مليكة مانضفتش اليوم ؟؟
ندى : ماريتهاش يمكن ماجتش
ادم : اوكي قوليلي شنو نوع تشوكليت
ندى : اممم خودلها توبليرون
ادم : تم ياتوبليرون …. يﻻ نستادنك تو …
وغمزلها غمزة تقتل وطلع
تنهدت ندى من برفان Vip
اللي باخه ادم وارتمت على الكنبة سارحة ف ادووم
ساعة 3 مساء …
مشي عمر للحﻻق واسى لحيته وقص شوي من شعره …
ومع ساعة 3:35 روح للحوش دار دوش … وتغدى ولقي حوايجه محددات واتيات …
اتصل ب ندى …
عمر : اها ندى شن اﻻخبار…تمان … وين نﻻقيك ؟؟
ندى : بحدى مركز العاشوري لتسوق
عمر :تم
ساعة 4:15
ادم : رهف وين ابلتك ؟؟
رهف : روحت يابابا
ادم … اتاخرت كنت حنعطيها الشوكﻻتة مع رهف اخ يﻻ مش من نصيبها اليوم …
ساعة 4:32 مساء.. لحظة اللقاء ..
عمر درس سيارته عمر بحدى مركز الحايس وقعمز يستنى مايبيش يدرس قدام العاشوري يبي يشوفها هوا قبل ويمشيلها …
اتصل بيها … الووو
ندى : اها انت وين انا قدام العاشوري
عمر : جاي هي …
بخ عميرو برفان دجافنشي ونزل ههههه مش عارفة هل هادي ماركت برفان حق واﻻ ﻻ اشبح وين سامعتها … المهم مشي للعاشوري ووقف قبالت ندى ودار روحه ايدور هههه بلعوط
{محﻻها الشفشة ههههه غير شوفوا معاي بش تشبه هديكا الممتلة الهندية شاشوريا واﻻ مش عارف شن اسمها ؟؟}
ندى اتركز ف عمر هدا وين شايفاته معش ندكر وين راياته هدااا… تي هدا المنجوه اللي كسرلي تلفوني
خلي نتلفت عليه خير ما يعنكش فيا
طلع نقاله عمر واتصل بيها … الو ندى انتي وين
ندى : قدام العاشوري
على عمر صواه وقال : حتى انا قدام العاشوري انتي وين ؟؟
تلفتتله ندى وقتله : ماتقوليش انت عمر نفسه عمر اللي نكلم فيه
عمر : ﻻﻻ مش معقولة ماتقوليليش انتي متع تلفون
ندى : اياح ماتقوليش انها صدفة …
عمر : انا بروحي مصدوم الدنيا صغيرة سبحان الله
ندى : اهلين كيف حالك
عمر : الحمد لله
ندى : بجد انحس فرج ﻻعب ف الموضوع
عمر : انا مصدوم زيي زيك
ندى : باهي كويس .. المهم امورك طيبة
عمر : الحمد لله وانتي ؟؟
ندى : كويسة … ههههه
عمر : هههه
ندى : ههههههههههه رسمي الدنيا صغيرة
عمر : اي
ندى : عموما فرصة سعيدة مطرة انروح توا
عمر : بتاكيد ..تفضلي
روحت ندى وعمر كعب للحايس وركب سيارته وهوا يغني ويزغرط ان ماصداتاش
رهف : بابا نبي نكلم ابلة ندى
ادم : عﻻش
رهف : غير نبيها بنقولها حازة
ادم : ديما انتي وحازاتك مايتموش ياشفشة
ركبت ندى اﻻفيكو
وتفكر في صدفة عمر … نقالها ايرن طلعاته لقاته رقم غريب مابتش اترد … جاها مسج محتواه >> يسعد مسائك ويحليه احلى من حﻻوة شوكﻻتة تبليرون …
ابتسمت ندى وعرفت انه ادم …
اتصل تاني ردت
رهف : الووو ابلة ندى
ندى : اهلين حبوبة
رهف : شن الجووو
ندى : باهية شن جوك انتي سموحة
رهف توشوش : باهية …. ابلة ندى قولي ل بابا يسريلي تلفون
ندى : ههههه تلفون شن بديري بيه
رهف : بس انكلمك
ندى : هههه باه تو نقوله
رهف : باه هدا تلفون بابا … ردي عليا لما نتصل بيك
ندى : باه حاضر
رهف : باي …
هاك بابا تلفون ماعرفتش نسكره
هاتي اهني … قاعدة ع الخط ابلتك … الووو
ندى : اها اهلين
ادم اهلين بيك … ههه معليشي ع اﻻزعاج رهف صدعتلي راسي نبي نكلمها بنقولها حاجة
ندى : هههه اي قتلي
رهف : ماتقوووليس توا ياابلة ندى قوليله غدوة
ادم : رهف اسكتي خلي نسمع …
كملي ياابلة ندى
ندى : هههه خﻻص غدوة نقولك ان شاء الله
ادم : ان شاء الله … اوكي مامحبش نعطل عليك توا …
ندى : اوك سﻻم
سكرت ندى الخط … وهيا فرحانة
وادم يفكر محﻻ صوتها واسلوبها
وعمر يفكر مااروعها ومحﻻها
روحت ندى للحوش واتصلت ب هالة وحكتلها كل شي …
وعمر حكي لفرج اللي صار معاه … على تاني يوم مشت ندى للعمل ولقت ادم ف الحوش قعمزت هيا وياه وهدرزو وحكتله ع رهف تبي تلفون ووافق انه ياخدلها …
توطدت الموضوع بين ادم وندى … وعمر قاعد حاط امل قوي ف ندى
وهيا احتارت من تختار الزوز طروف واحد اشقر ذو عضﻻت والتاني حنطي ذو عضﻻت والزوز مهتمين بحضرة جنابها .. الفرق ان واحد ثري والثاني حالته المادية متوسطة
فات شهر على شغل ندى عند ادم وتﻻتة شهور على معرفة عمر وندى وتعلق بيها عمر ويبي يخطبها بس … تعالو نشوفوا رد ندى
محاولة 1 …
عمر : ندى فيه موضوع بنحكيلك فيه
ندى : تفضل
عمر : اممم انا هئ حم نبي نخطبك … ونتمنى انك توافقي
ندى : اها اممم مش عارفة اجلها شوي مازال
محاولة 2 …
عمر : ندى امتى بتحدديلي يوم نجيب العويلة كلمت امي عليك
ندى : ماما تعبانة شوي توا
محاولة 3 ..
عمر : ها شنو ندوو كيف حال الوالدة
ندى : تمام الحمد لله
عمر : باهي مليح قوليلها خلي نجيب العويلة
ندى : ايه قتلها قتلي ستنى مازال
وفي كل مرة تقدم لعمر عذر مش قادرة اتقوله تفضل حارت كيف بتقوله انا نشتغل ف حوش وسبب التاني واﻻكبر هو ادم
في يوم ما ساعة 10:30 صباحا فيﻻ تبع ادم …
ندى تتكلم ف تلفون وواقف ع الروشن ..
ندى : تعرفي نتمنى ادم مثﻻ ايشغلني عنده ف الشركة اقلها دوام اقل من 8 ل 2 ونروح لأمي بكري مسكينة قاعدة ف الحوش بروحها
هالة : اها به كلميه
ندى : ﻻﻻ نتحشم ..رصيد يأشر باي
سمع ادم المحادثة كلها…فقالها:هئ احم … مش بالقصد اني نتصنت عليك …لكن كلمات طاحو ف ودني … معش تبي تشتغلي اهنا ؟؟ مليتي من رهف
ندى : ﻻ مش هكي والله رهف عسولة تنحط عالجرح يبرى لكن امي تقعد بروحها ساعات طويلة
ادم : جيبيها معاك
ندى :مش حتوافق
تنهد ادم وقالها : خﻻص غدوة تعالي اهنا ومع ساعة 11 نبعتلك السواق
يجي ياخدك
ندى : بجد استاذ ادم
ادم : اي بجد
تاني يوم ساعة 10 صبح
عمر : ناعس يا فرج معش نبي نخدم خدمتين هلبا عليا ليل وصبح قريب نطيح ع وجهي
فرج : استقيل به
عمر : حسني بنستقيل رسمي ..
فرج : شن فيه من بكري ايخششوا في بوكيهات الورد من جاي وزير واﻻ سفير
عمر : مش عارف جايبين حتى نظافة تنشف ف الممرات اكيدة اجتماع
فرج : خلي نقصقص البنت متع ريسبشن
عمر : قصقاص ههههههه
رهف : يعني معش بتجينا
ندى : اكيد حنجيكم وكل يوم حنطل عليك
رهف : حقاني ؟؟
ندى : حقاني حبيبتي
فرج ل عمر : ماطلعت منها معلومة اﻻ بسيف
عمر : عﻻش
فرج : جاية بنت مهمة للمدير ويزينلها ف المكتب بالورد طبعا ماحد يندري راك اتقول
عمر : اها ههههههه تمام تمام عميمنا المدير ولى مراهق يعني
فرج : هههه شكله هكي
خالد وصل قدام فيلا تبع ادم وبيب
طلعت ندى وركبت قالت ااسﻻم عليكم
خالد : وعليكم السﻻم
نزل ادم بطوبته ويستنى ف الريسبشن بش يستقبل ندى بعد شوي وصلوا …
طلع ادم قدام الباب برا جنب السكيروتي
نزلت ندى من سيارة متانقة
وﻻبسة كعب ونظارات …
ومانتبهتش لسكيروتي وفجاة يتلفت عمر ويلقى ندى …
وتجي عين ندى ف عين عمر
عمر معش فهم شي
ندى تشنجت
فرج حار لهلموقف الغريب
ادم : الشركة نورت يا انسة ندى
استدركت نفسها ندى وركبت التلاتة درجات
عمر : ن ن ن
وخشت مع ادم لشركة
نزل خالد وجي جنب عمر وفرج وقال : ريتو السي ادم يعرف يختار محصلها طرف طيار
…عمر قاعد مصدوم يشوف ل فرج وفرج يشوف ل عمر …
شن بيصير في عمر … وشن ردة فعل ندى … وشن موقف فرج … وهل عمر حيتكلم ويقول ل ادم … هدا اللي حنعرفوه في الجزء القادم بإذن الله .
يتبع ……….
لقراءة الجزء التالي : الجزء العاشر من رواية محظوظ ولكن
لقراءة الجزء السابق : الجزء الثامن من رواية محظوظ ولكن
للإطلاع علي فهرس اجزاء الرواية : رواية محظوظ ولكن ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
